Dikarabo di ka Hwetšwa Kae?

Seo ke se ba bantši ba se botšišago lehono. Morutiši wa sekolo Novosibirsk, Russia, o boletše gore ga go bonolo go hwetša dikarabo tša dipotšišo tšeo barutwana ba gagwe ba di botšišago ka Modimo le ka bodumedi. Lengwalong la gagwe o ile a hlalosa gore:

“Ka letšatši le lengwe ge ke be ke fihla gae, ke ile ka hwetša pampišana e tlogetšwe moo e e-na le sehlogo se se rego, ‘Lebaka Leo ka Lona o ka Botago Beibele.’ Ke ruta histori sekolong, gomme gantši ke swanela go ahla-ahla le barutwana ditaba tše bjalo ka tša bodumedi bjo bo rulagantšwego, Beibele le Modimo. Ka dinako tše dingwe go thata go hwetša dikarabo tša dipotšišo tša bana.

“Nakong e fetilego, ke be ke nagana gore batho ba batamela Modimo ge feela ba na le mathata. Eupša bjale ke kgonthišegile gore se ga se therešo ka mo go feletšego. Motho a ka ba a botšiša: ‘Ke ka baka la’ng se se ntiragalela? Ke nna mang? Ke tšwa kae? Ke ya kae ge ke hwa?’ Go bohlokwa go hwetša dikarabo tša dipotšišo tše. Go bonagala Beibele e nea mabaka a kgodišago.”

Morutiši o ile a phetha ka gore: “Ke ngwadile lengwalo le ka gobane ke nyaka go tseba mo go oketšegilego ka Modimo le Beibele.”

Dihlatse tša Jehofa di lebiša batho Beibeleng bakeng sa dikarabo tša dipotšišo tša bona. Ela hloko puku ya Tsebo e Išago Bophelong bjo bo sa Felego. Dikgaolong tša yona tše 19 go akareditšwe tšeo di nago le dihlogo tše di rego: “Modimo wa Therešo ke Mang?,” “Ke ka Baka La’ng re Tšofala le go hwa?” le “Ke ka Baka La’ng Modimo a Dumelela Tlaišego?” O ka kgopela kopi ya thušo ye ya go ithuta Beibele ya matlakala a 192, ka go tlatša setlankana se se lego ka mo tlase le go se romela atereseng yeo e neilwego mo goba atereseng e swanetšego e lokeleditšwego go letlakala 5 la makasine wo.

□ Hle ntlišetšeng kopi ya puku ya Tsebo e Išago Bophelong bjo bo sa Felego.

Bontšha gore ka leleme lefe.

□ Hle ikopanyeng le nna mabapi le thuto e sa lefelelwego ya legae ya Beibele.