Pono ya Beibele

Fêng Shui—Na e Swanetše Bakriste?

KUA Asia, mafelo a mabitla a kgethwa go ithekgilwe ka yona. Meago e thalwa le go kgabišwa go ya ka yona. Thoto e rekwa le go rekišwa go ya ka yona. Kua China e tsebja e le fêng shui, sebopego sa go noga ka go thala-thala goba bonoge. Gaešita le ge fêng shui e ile ya tuma kua Asia ka nywaga-kgolo e mentši, nywageng ya morago bjale e ile ya phatlalalela dinageng tša ka Bodikela. Bathadi ba bangwe ba dipolane ba e diriša ge ba thala dipolane tša meago e metelele, diofisi le magae. Basadi ba bangwe ba e diriša bakeng sa go kgabiša magae a bona. Dipuku tše dintši le di-Web site tša Internet di a e godiša le go ruta ka yona.

Ke ka baka la’ng e e-ba e tumilego ka mo go oketšegago gakaakaa? Go ya ka mmoleledi yo mongwe, fêng shui e ka tliša “bophelo bjo bokaone, bophelo bjo bobotse bja mmele, manyalo a makaone goba segwera, lehumo le legolo le khutšo ya motho ka noši ya monagano.” Le ge seo sohle se kwagala e le se ipiletšago, ge e le gabotse mokgwa wo ke eng, le gona Bakriste ba swanetše go o lebelela bjang?

Fêng Shui ke Eng?

Mantšu a se-China fêng shui, ge e le gabotse a bolela “moya-meetse.” Modu wa fêng shui o thomile morago nywageng e dikete e fetilego go ya nakong ya ge difilosofi tše dintši tša ka Bohlabela di be di hlangwa. Magareng ga tše, go be go akaretšwa tumelo ya seo se bitšwago teka-tekano ya yin le yang (lefsifsi le seetša, go fiša le go tonya, therešo le maaka.) Kakanyo ya yin le yang e ile ya kopanywa le kgopolo ya chʼi yeo ge e le gabotse e bolelago “moya” goba “mohemo.” Yin, yang le chʼi, gotee le seo se bitšwago dikarolo tše hlano tša legong, lefase, meetse, mollo le tšhipi, di bopa dikarolo tše feletšego tša kgopolo ya fêng shui. Balatedi ba fêng shui ba dumela gore methaladi e matla ya matla e sepela go phatša boalo bja naga bjo bongwe le bjo bongwe. Pakane ke go šupa mafelo ao matla goba chʼi wa naga le leratadima a leka-lekanywago. Se se phethwa ka go fetola ponagalo ya naga ka boyona goba ka go dira diphetogo moagong lefelong le itšego la go aga. Go naganwa gore go tšweletša teka-tekanyo ye go tla tliša katlego e botse go bao ba šomago goba bao ba dulago moo.

Gantši ditsebi tša fêng shui di ikgokaganya le khamphase ya go noga ka go thala-thala. * Ye ke khamphase e nyenyane ya makenete yeo e hlomilwego bogareng bja seo ka tlwaelo e lego tšhate ya bolepi bja dinaledi. Khamphase e na le dintiko-tiko tšeo di nago le bogare botee tšeo di arogantšwego ka methaladi. Khamphase ya go noga ka go thala-thala e na le tsebišo e tletšego ka dilo tše bjalo ka sehlopha sa dinaledi, dihla le dinako tša medikologo ya letšatši. Ge go hlahlobja lefelo goba moago, dipalo-palo tše dintši tša khamphase di a tšewa. Setsebi sa fêng shui se lemoga moo nalete ya khamphase e kopanago le ntlha yeo e lego ka ntle ga methaladi le dintiko-tiko, gomme go tšwa go se, o hwetša seo se nyakegago bakeng sa go “alafa” lefelo.

Dibopego tša kgaufsi tša tlhago le tša maitirelo tša naga, dinokana, mekero ya go sepediša ditšhila gaešita le go tsenywa ga mafasetere le mabati moagong, ka moka di ka naganišišwa ge go dirwa phetho ya kamoo lefelo la moago le ka leka-lekanywago ka gona. Ka mohlala, kua Canada ralebenkele o fega seipone lebating la ka morago la lebenkele la gagwe bakeng sa go “phošolla” boemo bja mabati a lona. Ka mo go swanago, dinoge tša go noga ka go thala-thala di ka šišinya go tloša dimela goba fenitšhara, go tsenya diswantšho tše dingwe,  go oketša lešata la moya, goba go hloma bobolokelo bja diphedi e le bakeng sa go dira gore moago goba phapoši e be e leka-lekanego.

Pono ya Bokriste

Se se lemogegago ke gore, makgobapuku a mantši a bea dipuku tše di lego mabapi le fêng shui le dipuku tša bolepi bja dinaledi le bodupe. Ge e le gabotse, Webster’s Ninth New Collegiate Dictionary e hlalosa go noga ka go thala-thala e le “go noga ka go diriša dipalo goba methaladi goba dibopego tša tša thutafase.” (Mongwalo o sekamego ke wa rena.) Ka go rialo, go amogelwa ka gohle gore fêng shui le mehuta e mengwe ya go noga ka go thala-thala ke dibopego tša bodupe. E akaretša bonoge le mediro ya go dirišana le meoya, e lego tšeo e sego tše mpsha bathong.

Ge ba-Isiraele ba be ba tloga Egipita gomme mafelelong ba tsena nageng ya Kanana lekgolong la bo-15 la nywaga B.C.E., bonoge bja mehuta ka moka bo be bo thopa sefoka dinageng tšeo ka bobedi. Modimo o ile a bolela ka Moše bjalo ka ge go begilwe go Doiteronomio 18:14 gore: “Dithšaba tše O tl’o xo di raka di theetša tša maphalô le tša dinoxê; xe e le wêna Morêna Modimo wa xaxo xa a Xo dumelele xo dira tše byalo.” Dibopego tše dintši tša bonoge kua Egipita le Kanana di be di e-tšwa Babele ya bogologolo. Ge Jehofa a be a raranya polelo ya batho ba Babele, ba ile ba phatlalalela mafelong a mangwe, ba tloga le mekgwa yeo e bego e tswalana le bonoge le boloi tša Babele.—Genesi 11:1-9.

Jehofa Modimo o ile a lemoša ba-Isiraele ka thata le gona leboelela gore ba se ke ba tšea mekgwa ya bonoge ya ditšhaba tše dingwe ka gore: “Xo wêna xo se kê xwa hwetšwa e a . . . diraxo tša bonoxê le tša maphalô, le e a upaxo ka meupô le boloi. . . . Ka xobane ba ba diraxo tše byalo, Morêna ó bôna e le makxapa; xomme xe Morêna Modimo wa lena a ba raka xe Le fihla, ké ka ’baka la bohlôla byoo.” (Doiteronomio 18:9-12; Lefitiko 19:26, 31) Bao ba dirago bonoge ba be ba swanetše go bolawa ka ntle le tika-tiko.—Ekisodo 22:18; Lefitiko 20:27.

Ke ka baka la’ng bonoge bo ileditšwe ka mo go tiilego gakaakaa? Ditiro 16:16-19 e re botša ka mosadi yo a bego a na le “môya wa bonoxê.” (Mongwalo o sekamego ke wa rena.) Ee, bonoge bo tswalanywa ka go lebanya le botemona. Ka gona, go diriša sebopego le ge e le sefe sa bonoge, go ka kgokaganya motho le Sathane le matemona a gagwe! Se se ka feleletša ka tshenyego ya moya.—2 Ba-Korinthe 4:4.

Mekgwa e mengwe e tumilego ya go kgabiša le boalo bja naga bja ka Bohlabela goba ka Bodikela, mathomong e ka ba e ile ya huetšwa ke ditiro tša bodumedi bja maaka go swana le fêng shui. Lega go le bjalo, gantši mekgwa e bjalo e ile ya lahlegelwa ka mo go feletšego ke matla a yona a bodumedi. Lega go le bjalo, e tla ba go tshelwa mo go lego molaleng ga molao wa Modimo go diriša fêng shui bakeng sa go bolelela pele bokamoso ka go diriša bonoge goba go tliša mahlatse goba bophelo bjo bobotse. Go dira bjalo e tla ba go tshela molao wa Beibele o lebanyago wa mabapi le go phema go swara selo le ge e le sefe sa ‘ditšhila.’—2 Ba-Korinthe 6:14-18.

[Mongwalo wa ka tlase]

[Seswantšho go letlakala 15]

Khamphase ya go noga ka go thala-thala

[Mothopo]

Pages 2 and 15: Hong Kong Tourism Board