Kholofelo Bakeng sa Bao ba Tlaišwago ke Bolwetši bja Marapo

DR. Fatima Mili o re: “Bolwetši bja marapo ga se sebaki se segolo sa palo ya mahu go swana le bolwetši bja pelo goba kankere, eupša bo na le ditla-morago tše dikgolo boemong bja bophelo.” Bolwetši bja marapo bo ka kgoma dibopego ka moka tša bophelo bja motho. Ge e le gabotse, mathata a mangwe ao batlaišegi ba bolwetši bja marapo ba lebanago le ona ke afe? Na go a kgonega go lebeletšana le ona ka katlego?

Katia, * wa nywaga e 28 yo a tšwago Italy o re: “Ga e sa le go tloga ke hlahlobilwe gomme go hweditšwe gore ke na le bolwetši bja marapo ge ke e-na le nywaga e 20, bophelo bja-ka ka moka bo fetogile. Ke ile ka swanelwa ke go kgaotša mošomo wa-ka le modiro wa-ka wa bophelo ka moka wa tirelo ya nako e tletšego ka baka la bohloko.” Bohloko ke bothata bjo bo tlwaelegilego gare ga  batlaišegi ba bolwetši bja marapo. Alan wa nywaga e 63 go tšwa Engelane, o re: “O dula o e-kwa bohloko mo gongwe mmeleng wa gago gaešita le ge e ka ba bjoo bo okobetšego.” Go lapa kudu ke tlhohlo e nngwe. Sarah wa nywaga e 21 o re: “Gaešita le ge o ka kgotlelela bohloko le go thunyetšwa, go lapa ga go kgotlelelege.”

Bohloko bja Maikwelo

Go ya ka Setsuko wa nywaga e 61 wa Japane, go lwantšhana letšatši le lengwe le le lengwe le bohloko bjo bošoro gape “go ka go lapiša maikwelong le monaganong.” Ke ka baka leo, go fo leka go swara phentshele goba mogala e ka ba tlhohlo! Kazumi wa nywaga e 47 o lla ka gore: “Gaešita le dilo tše di sa rego selo tšeo le ngwana a ka di dirago, di fetogile tša go se kgonege go nna.” Janice wa nywaga e 60 yo a se sa hlwago a kgona go fetša nako e ntši a sepela goba a eme, o re: “Ke mo go nolago moko ka gobane ga ke kgone go dira dilo tšeo ke bego ke kgona go di dira.”

Mafokodi a bjalo a ka dira gore motho a ikwe a ferekane e bile a na le maikwelo a fošagetšego. Gaku wa nywaga e 27, ke yo mongwe wa Dihlatse tša Jehofa gomme o re: “Go se kgone go tšea karolo ka mo go tletšego modirong wa boebangedi goba go phetha dikabelo tša phuthego go dira gore ke ikwe gore ga ke na mohola le ge e le ofe.” Francesca yo a ilego a lwantšhana le bolwetši bja marapo go tloga ge a sa na le nywaga e mebedi, o bolela ka “go nwelela ka mo go tseneletšego ka bodibeng bja go itlhoboga.” Go itlhoboga mo go bjalo go ka ba le mafelelo a šoro moyeng. Joyce yo e lego Hlatse go tšwa Afrika Borwa, o dumela gore o ile a thoma go ikarola dibokeng tša Bokriste. O hlalosa gore: “Ke fo ba ke sa kgone go lebana le motho le ge e le ofe.”

Motlaišegi gape a ka ba le dipelaelo tše dintši ka bokamoso—poifo ya go se sa kgona go sepela le go ithekga ka batho ba bangwe, poifo ya go tlogelwa a se na mohlokomedi, poifo ya go wa le go robega marapo le poifo ya go se kgone ga motho go hlokomela lapa la gagwe. Yoko wa nywaga e 52 o dumela ka gore: “Ge ke be ke bona bogole bo direga malokololong a-ka, ke ile ka thoma go boifa gore bo tla oketšega.”

 Ditho tša lapa le tšona di ka tlaišwa ke bohloko bja maikwelo ge di lebane le go tlaišega ga moratiwa wa tšona letšatši le lengwe le le lengwe. Banyalani ba bangwe ba ka ba ba lebeletšana le kgateletšego e kgolo ya lenyalo. Mosadi wa kua Engelane yo a bitšwago Denise o re: “Ka morago ga nywaga e 15 ya lenyalo, monna wa-ka o ile a bolela gore, ‘ga ke sa kgona go kgotlelela bolwetši bja gago bja marapo go feta mo!’ O ile a ntlogela le morwedi wa rena wa nywaga e mehlano.”

Ka gona, bolwetši bja marapo bo tšweletša ditlhohlo tše dikgolo bobedi go batlaišegi le malapa a bona. Lega go le bjalo, ba bantši ba lebeletšana le bjona ka katlego! Anke re hlahlobeng kamoo ba bangwe ba dirago seo ka gona.

Šetša Mafokodi a Gago

Go khutša ka mo go lekanego go bohlokwa ge e ba o tlaišwa ke bolwetši bja marapo; go ka fokotša go lapa kudu. Lega go le bjalo, se ga se bolele gore o swanetše go fo phutha matsogo bophelong. Timothy o hlalosa gore: “O swanelwa ke go ba mafolofolo e le gore o se ke wa dumelela bolwetši bja marapo bo go laola monaganong, ka gobane ge bo ka dira bjalo, o tla fo dulela go kwa bohloko.” Ngaka ya Bolwetši bja Marapo William Ginsburg, wa Kliniki ya Mayo o bolela gore: “Go na le phapano e sa lemogegego magareng ga go dira mo gontši kudu le go dira mo go nyenyane kudu. Ka dinako tše dingwe batho ba swanelwa ke go gopotšwa gore ba iphe nako ya go hlokomela bolwetši bja bona.”

Se se ka nyaka go fetoša tsela yeo o lebelelago mafokodi a gago ka yona. Daphne yo a tšwago Afrika Borwa o re: “Ke swanelwa ke go lebeletšana le kgonthe ya taba gomme ke tsebe gore bokgoni bja-ka bja go dira dilo tše itšego ga se bja fela; ke fo ba ke swanelwa ke go di dira ka mokgwa wa go nanya kudu. Go e-na le go tshwenyega goba go ferekana, ke fo dira ganyenyane-ganyenyane.”

Gape ke kgopolo e botse go thoma go itlwaelanya le mekgwa ya thušo yeo e ka hwetšagalago, mohlomongwe wa ahla-ahla dilo tše le ngaka ya gago goba setsebi sa tša maphelo. Keiko o re: “Re ile ra tsenya senamelwa sa go namela manamelong. Dikonopi tša lebati di be di gobatša manakaila a-ka, ka gona re ile ra di fetola. Ga bjale, nka kgona go bula mabati ka moka ka go a kgorometša ka hlogo. Re ile ra tsentšha diswaro tša go koba-kobega dipomping ka moka tša meetse ka ntlong e le gore ke kgone go dira bonyenyane mediro e mengwe ya ka ntlong.” Yo mongwe yo a tlaišwago ke bolwetši bja marapo yo a bitšwago Gail o re: “Dinotlelo tša koloi ya-ka le tša ntlo, di kgokeleditšwe sekgokeletšong se setelele bakeng sa go dira gore go be bonolo go nna go di koba. Sekamo le poratšhe tša-ka di sehlomong se setelele gomme di ka ya ka mahlakoreng a sa swanego bakeng sa go kama le go poratšha.”

Thekgo ya Lapa—“Mothopo wa Matla”

Carla wa go tšwa Brazil o re: “Thekgo ya monna wa-ka e bile e bohlokwa kudu. Taba ya gore o ile a sepela le nna maetong a-ka a go etela ngaka, e nneile sebete. Bobedi re ile ra lemoga kamoo bolwetši bjo bo kgomago mmele wa-ka ka gona, seo o ka bonago ka sona ge bo go swere le gore go tla nyakega kalafo efe. Ke ile ka ikwa bokaone ka gobane o be a kgona go kwešiša boemo bjo ke lego ka tlase ga bjona.” Ee, banna goba basadi bao ba amogelago mafokodi a balekane ba bona le bao ba ikemišeditšego go rutwa ka boemo bja bona, e ka ba mothopo o mogolo wa matla le thekgo.

Ka mohlala, Bette o ile a šoma mešomo ya go hlwekiša ge bolwetši bja marapo bja monna wa gagwe bo be bo fokotša mošomo wa gagwe wa go aga. Monna wa Kazumi ga se a fo mo oka feela, eupša gape o ile a dira mošomo wa ka ntlong wo a bego a ka se kgone go o dira. Go oketša moo, o ile a tlwaetša bana ba bona go dira seo ba ka se kgonago bakeng sa go thuša. Kazumi o re: “Monna wa-ka e bile mothopo wa matla. Ge nkabe e se ka thušo ya gagwe, nkabe ke le boemong bjo bošoro kudu-kudu.”

Mosadi yo a bitšwago Carol go tšwa Australia, o nea temošo ye: “Hlokomela gore o se ke wa tlatša thulaganyo ka mediro e mentši kudu. Maikwelo a go hlaelelwa a nkaparela gabonolo ge e ba nka se kgone go sepedišana le lapa.” Thekgo ya lapa ge e newa ka kwešišo ya kgonthe le go naganela, e ka ba mothopo wa matla go batlaišegi.

Thušo ya Moya

Katia o re: “Ge motho a tlaišwa ke bolwetši bja go swana le bjo, o kgodišegile gore ga go yo a tsebago boemo bjo a lego ka tlase ga bjona. Se se dira gore go be bohlokwa go retologela go Jehofa Modimo, re tseba gore o kwešiša e le ka kgonthe  boemo bja rena bja mmele le bja maikwelo. (Psalme 31:7) Go ba le tswalano e botse le yena, go nneile khutšo ya monagano bakeng sa go phela mo e nyakilego go ba ka tsela e kaone ka bolwetši bja-ka.” Beibele ka mo go swanetšego e bitša Jehofa “Modimo wa khomotšô yohle, E a re homotšaxo mahlokong a rena ohle.”—2 Ba-Korinthe 1:3, 4.

Ka gona, thapelo e ka ba mothopo o matla wa khomotšo go motho yo a tlaišwago ke bohloko bjo bo phegelelago. Kazumi o re: “Mašegong a matelele ge ke sa kgone go robala ka baka la bohloko, ke tšhollela pelo ya-ka go Jehofa ka megokgo bakeng sa go mo kgopela matla a go kgotlelela bohloko le bohlale bja go lebeletšana le mathata a-ka ka moka. Ka kgonthe, Jehofa o ile a nkaraba.” Ka mo go swanago, Francesca o ile a latswa thekgo ya Modimo e lerato. O re: “Ke ile ka bona go phethagala ga mantšu a Ba-Filipi 4:13 ao a rego: ‘Ke kxôna tšohle ka Eo a mphaxo matla, Yêna Kriste.’”

Gantši Jehofa Modimo o nea thekgo ka phuthego ya Bokriste. Ka mohlala, Gail o bolela ka thušo yeo a ilego a e hwetša go tšwa go bana babo le dikgaetšedi ba moya ka phuthegong ya gabo ya Dihlatse tša Jehofa. Gail o re: “Lerato la bona le ile la nthuša gore ke se ke ka gateletšega.” Ka mo go swanago, ge Keiko a be a botšišwa gore, “Na go na le selo le ge e le sefe seo o ka se gopolago seo e bilego se se kgahlišago kudu bophelong bja gago?,” o ile a araba ka gore: “Ee, lerato ka moka le kwelobohloko tšeo ke di hwetšago go yo mongwe le yo mongwe ka phuthegong!”

Ka phuthegong ya Dihlatse tša Jehofa, balebeledi ba etelela pele bakeng sa go nea thekgo e bjalo. Setsuko o re: “Ga ke kgone go hlalosa gore go ba le mafelelo a mabotse gakaakang mothong yo a lwantšhanago le bolwetši ge bagolo ba theetša le go nea khomotšo.” Lega go le bjalo, bjalo ka ge motlaišegi yo mongwe wa bolwetši bja marapo yo a bitšwago Daniel a re gopotša, “bana babo rena le dikgaetšedi ba moya ba ka thuša feela ge e ba re ba dumelela go thuša.” Ka gona, ke ga bohlokwa gore, bao ba tlaišwago ke bolwetši bjo ba dule ba kgokagane le Bakriste-gotee le bona, ba iteka ka gohle ka mo go kgonegago gore ba be gona dibokeng tša phuthego. (Ba-Hebere 10:24, 25) Moo ba ka hwetša kgothatšo ya moya yeo e nyakegago bakeng sa go kgotlelela.

Tlaišego e tla Fela

Batlaišegi ba bolwetši bja marapo ba leboga kudu ditsebi tša tša maphelo bakeng sa tšwelopele yeo di e dirilego go fihla mo nakong ye. Lega go le bjalo, gaešita le dikalafo tše kaone di palelwa kudu ke go ba kalafo ya kgonthe. Mafelelong, batlaišegi ba ka hwetša khomotšo ya bona e kgolo kudu ka go swarelela dikholofetšong tša Modimo tša lefase le lefsa. * (Jesaya 33:24; Kutollo 21:3, 4) Lefaseng leo ‘digole di tlo taboga boka tshepe.’ (Jesaya 35:6) Bolwetši bja marapo le malwetši a mangwe ka moka ao a tlaišago batho a tla ba a fedišeditšwe sa ruri! Ka baka leo, Peter yo e lego mohlaselwa wa bolwetši bja marapo a mokokotlo o re: “Ke kgona go bona seetša mafelelong a lešoba le la lefsifsi leo ke sepelago ka gare ga lona.” Ka mo go swanago, mosadi wa Mokriste yo a bitšwago Giuliana o re: “Ke lebelela letšatši le lengwe le le lengwe le le fetago e le go fenya ntweng, letšatši letee le fokotšegile go ao ke swanetšego go a kgotlelela pele bofelo bo fihla!” Ee, nako ya go fedišwa e sego feela bolwetši bja marapo eupša gape le go fedišwa ga tlaišego ka moka, e batametše kudu!

[Mengwalo ya ka tlase]

[Diswantšho go letlakala 10]

Go na le mekgwa e mentši yeo e thušago batlaišegi go phela maphelo a putsago

[Seswantšho go letlakala 12]

Thekgo e lerato e ka hwetšwa dibokeng tša Bokriste