Dijo tše di Šireletšegilego Bakeng sa Bohle

GO JA dijo tše di agago go a thabiša. Eupša bjalo ka ge re bone, ga se ka mehla go lego bonolo go hwetša dijo tše bjalo. Se sebe le go feta ke gore go na le batho ba dimilione bao ba se nago dijo tše dintši gore ba ka tshwenyega ka taba ya ge e ba dijo tša bona e le tšeo di šireletšegilego ka mo go lekanego goba tšeo di nago le bophelo. Ba swaregile ka go hwetša dijo tšeo di lekanego bakeng sa gore ba kgone go tšwela pele ba phela. Na e ka ba Modimo o be a rerile gore dilo di be ka tsela ye?

Nagana ka taba ye. Ge Modimo a be a bea monna le mosadi godimo ga lefase, na ba be ba e-na le lebaka la go tshwenyega ka dijo? Ga go bjalo le gatee! Pego e lego ka pukung ya Beibele ya Genesi e re: “Morêna Modimo a mediša dihlare tšohle tše di kxahlišaxo xe di bônwa, tše bose xe di lewa; a di mediša mo mmung.” (Genesi 2:9) Ka baka leo Adama le Efa ba be ba e-na le mehuta-huta e thabišago ya dijo gotee le kabo yeo e lego ka boati le e sa felego. Modimo yo a ba bopilego o be a tseba gabotse seo ba bego ba tla se nyaka bakeng sa phepo; gape o be a tseba seo se bego se tla ba tlišetša lethabo. Ke therešo gore ga re tšhemong ya Edene lehono. Eupša na Modimo o fetotše morero wa gagwe wa mathomong bakeng sa batho le lefase?

Re na le lebaka le le kwagalago la go dumela  gore kgaufsinyane batho ka moka godimo ga lefase ba tla thabela boati bja dijo tše di nago le phepo le tšeo di agago! Tumelo ye e ka ba thušo e kgolo kudu tabeng ya go boloka ga rena boemo bjo bo leka-lekanego bja kgopolo mabapi le tšhireletšego ya dijo lehono. Kholofelo e bjalo, ge e ba e le ya therešo le e botegago, e ka re thuša go phema go hlagolela dipono tša go fišegela thoko goba tše di feteletšego.

Ke ka baka la’ng re ka kgodišega gore bophelo kgaufsinyane e tla ba bjo bo fapanego? Barutwana ba fišegago ba Lentšu la Modimo ba tseba gore ga bjale re phela “mehleng ya bofêlô” ya tshepedišo ye ya dilo. Tshepedišo ya gona bjale e bušwa ke bohlale bja motho, bjoo mafelong a mantši a bophelo bo gakantšhago le gona bo ithekgilego ka go tsoma ditharollo le go lokiša diphošo. Ge go tliwa mekgweng ya go tšweletša dijo, go na le go belaetša mo gogolo ge go e-tla tabeng ya ge e ba e le tšeo di šireletšegilego goba e le tše kotsi. Go se kgonthišege mo go bjalo go baka letšhogo, go se kwane le go hloka botee.—2 Timotheo 3:1-5.

Mmopi wa batho o holofeditše gore tshepedišo ye ya dilo e tla tšeelwa sebaka ke tshepedišo e nngwe e mpsha ka mo go feletšego. Morero wa gagwe wa mathomong—bakeng sa gore lefase ka moka e be paradeise go swana le tšhemo ya Edene, leo le dulwago ke baagi ba thabilego le ba phetšego gabotse ba lapa la motho—o tla phethagala. Matla ao a kopanyago a bohlale bja Modimo bjo bo phethagetšego a tla tlala lefase ka nako yeo. (Jesaya 11:9) Bohlale bja motho bjoo bo gakantšhago bo ka se sa buša. Tshepedišo e mpsha yeo e dirilwego ke Modimo e tla fediša dipelaelo ka moka tšeo di lego gona mabapi le tšhireletšego ya dijo tša rena. Na ga se mo go nago le tlhaologanyo go fetša ka gore Modimo yo a bopilego batho gape o tla kwešiša dinyakwa tša rena tša phepo?

Dijo tše Phethagetšego go tšwa go Mmopi

Beibele e swere diporofeto tše di kwagalago mabapi le maemo a bophelo ka tlase ga tshepedišo e tlago ya dilo. Moporofeta Jesaya o ile a ngwala gore: “’Me [Modimo] ó tlo Le nea pula, ya na mašemong mo Le byetšexo dibyalô tša lena; ’me dijô di tšwaxo moo mašemong e tlo ba tše di hošaxo, e tlo ba makhura; mehleng yeo mehlape ya xaxo e tlo ba le phulô e ahlamilexo. ’Pholo le ’pôkôlô tša xo lema di tlo ja mabêlê a a nokilwexo, a a loditšwexo a fêfêrwa ka lesêlô.”

Boporofeta bja Jesaya bo bolela gape gore: “Morêna wa mašaba ó dirêla dithšaba ka moka monyanya thabeng yé, monyanya wa makhura, wa dinwewa tše monate, wa dinwewa tše di hlotlilwexo.” The New American Bible e fetolela karolo yeo ya mafelelo e le “monyanya wa dijo tše di humilego le dibeine tša mehuta-huta, dijo tše di rothišago mare le tše humilego gotee le dibeine tše di sekilego tša mehuta-huta.”—Jesaya 25:6; 30:23, 24.

Na seo se kwagala e le se se ipiletšago go wena? Boporofeta bja Jesaya bo re kgonthišetša gore motho yo mongwe le yo mongwe yo a phelago ka tlase ga tshepedišo e mpsha ya Modimo o tla ba le boati bja dijo tša nama. Na e tla ba tše šireletšegilego go ka jewa? Ruri ga go pelaelo ka seo. Boporofeta bjo bongwe bo re kgonthišetša gore batho ba Modimo ‘ba tlo dula meriting ya merara ya bona, le mo meriting ya mego ya bona, go se yo a ba tšhošago.’ (Mika 4:4) Tšhireletšego e bjalo e feletšego e tla kgonthišetšwa ke Mmušo wa Modimo wa Mesia, woo o tlago go thoma go buša lefase ka moka nakong e tlago yeo e lego kgaufsi.—Jesaya 9:5, 6.

Go ka se sa hlwa go e-ba le go se kgonthišege ka taba ya ge e ba dijo di šireletšegile goba go se bjalo. Ka mo go fapanego, re tla thabela go botšana gore: “Ipshine ka dijo.”

[Ntlhakgolo go letlakala 22]

Kgaufsinyane batho ka moka godimo ga lefase ba tla thabela boati bja dijo tše di nago le phepo le tšeo di agago

 [Seswantšho go letlakala 20]

Modimo o holofetša dijo tše di šireletšegilego le tše di agago bakeng sa batho ka moka