Thekgo le Kwelobohloko go tšwa Mafelong a Mantši

BAITHAPI ba tlile ba e-tšwa mafelong a mangwe a United States gotee le dinageng tše dingwe. Yo mongwe wa baithapi ba bjalo e be e le Tom (yo a bontšhitšwego ka mo godimo) wa nywaga e 29, ra-ditima-mollo yo a tšwago Ottawa, Canada. O boditše Phafoga! gore: “Ke bone ditiragalo thelebišeneng gomme ka nyaka go nea thekgo go bo-raditima-mollo-gotee le nna ba New York. Ke ile ka wela tsela ka Labohlano ka ya Lefelong la Kotsi ka Mokibelo go ya go nea thušo. Ke ile ka bewa go seo se bitšwago sehlopha sa maleke, re olela marope ka maleke.

“Re ile ra hlokola marope gasele, re diriša digarafo, re tsoma dilo tšeo di ka re neago mehlala ya go hlaola bo-raditima-mollo bao ba kgakgetšwego. Ke ile ka hwetša kepi yeo e dirišetšwago go bula mabati ao a notletšwego gotee le seswaragantšhi sa lethopo. E be e le modiro o lapišago. Go tlatša lori e tee ya ditlakala go ile gwa tšea diiri tše pedi ka baithapi ba ka bago ba 50.

“Ka Mošupologo, September 17, re ile ra ntšha ditopo tša ba bangwe ba bo-raditima-mollo bao ba bego ba ile ba kitimela ka gare ga moago ka Labobedi le le fetilego. Le ka mohla, nka se lebale tiragalo yeo go yona—bašomi ka moka ba tša tlhakodišo ba ilego ba kgaotša go šoma, ba rola dikefa tša bona tše tiilego gomme ba ema—e le go hlompha bašomi-gotee le rena bao ba ilego ba hwa tiragalong yeo.

“Ge ke be ke eme ke lebeletše boemo bja Lefelong la Kotsi, ke ile ka makatšwa ke kamoo bophelo e sego selo ka gona lehono. Se se ile sa dira gore ke naganišiše ka bophelo bja-ka, modiro wa-ka le lapa la-ka. Go sa šetšwe dikotsi tšeo di ka tšwelelago, modiro wa-ka ke o putsago kudu—ka ge o kgona go thuša batho gaešita le go phološa maphelo.”

Dihlatse di Nea Thušo e Šomago

Matšatšing a mabedi a mathomo a masetlapelo, batho ba e ka bago ba 70 ba ile ba tšhabela ntlong-kgolo ya lefase ya Dihlatse tša Jehofa. Ba bangwe bao ba bego ba lobile diphapoši tša bona tša dihoteleng le dithoto, ba ile ba newa lefelo la go dula le diaparo tše dingwe. Ba newa dijo. Mohlomongwe sa bohlokwa kudu, ba ile ba newa thekgo ya maikwelo ke bagolo ba Bakriste bao ba nago le phihlelo.

Dihlatse tša Jehofa gape di ile tša romela ditlabakelo le dithoto tše nyakegago tša tšhoganyetšo go dihlopha tša go hlohlomiša le go hlakodiša tšeo di bego di šoma go seo se ilego sa tsebja e le Lefelo la Kotsi. Gape go ile gwa dirwa gore dinamelwa di hwetšagale gore di dirišwe ke kgoro ya tša ditima-mollo go iša bo-raditima-mollo mafelong a tlhakodišo. Ricardo (ka go le letona, ka godimo-dimo) yo e lego Hlatse ya nywaga e 39 e bile e le mošomi wa tša tlhwekišo, le yena o be a le gare ga lesolo la ba bangwe ba makgolo go tlošeng ditone-tone tša marope matšatši ka go latelana. O boditše Phafoga! gore: “Ponagalo ya lefelo e be e nola  mooko kudu, kudu-kudu go bo-raditima-mollo bao ba bego ba tsoma bašomi-gotee le bona bao ba timetšego. Ke ile ka ba bona ba goga raditima-mollo yo mongwe a phela. Raditima-mollo yo mongwe o bolailwe ke setopo seo se mo wetšego. Bo-raditima-mollo ba bantši ba be ba lla. Ke ile ka phula sello. Ka letšatši leo, go be go se motho yo a nago le sebete go swana le bona.”

“Nako le Ditiragalo tše di sa Letelwago”

Batho ba dikete ba ile ba hwa masetla-pelong ao. Gare ga bona, go na le bonyenyane Dihlatse tše 14 tšeo di bego di le lefelong la masetlapelo goba kgaufsi le lona. Joyce Cummings wa nywaga e 65 yo ka setlogo a tšwago Trinidad, o be a tlile go bona ngaka ya meno kgaufsi le World Trade Center. Ka bomadimabe, e be e le mo e ka bago ka nako ya masetlapelo. Go bonala a ile a kgangwa ke muši gomme a kitimišetšwa sepetleleng sa kgaufsi. Ba ile ba palelwa ke go mo phološa. O bile gare ga batho bao ba wetšwego ke ditla-morago tša “nako le ditiragalo tše di sa letelwago.” (Mmoledi 9:11, NW) O be a tsebja e le moebangedi yo a fišegago kudu.

Calvin Dawson (bona lepokisi) o be a šoma e le mmapatši lebatong la bo-84 la tora ya ka borwa. O be a le ka ofising ya gagwe gomme a kgona go bona tora ya ka leboa gabotse kapejana ka morago ga ge e se no thulwa ke sefofane. Mothwadi wa gagwe yo a bego a se gona ka ofising, o ile a letša mogala a nyaka go tseba seo se bego se diregile. O itše: “Calvin o be a leka go mpotša seo a se bonego. O itše: ‘Batho ba a fofa!’ Ke ile ka mmotša gore a tšwe ka moo gomme a botše ba bangwe gore ba tšwe ka ofising.” Calvin ga se a ka a kgona go tšwa. Mothwadi o tšwela pele ka gore: “Ruri ke a le botša Calvin e be e le monna yo a kgahlišago gomme re mo rata ka moka ga rena, gaešita le ge ba bangwe ba rena re se batho ba moya. Re be re rata go ba ga gagwe motho yo a boifago Modimo le botho bja gagwe.”

Mohlaselwa yo mongwe wa Hlatse e be e le James Amato (ka tlase go le letona, ka letlakaleng le lengwe), tate wa bana ba bane le moetapele kgorong ya bo-raditima-mollo ya New York. Bao ba bego ba mo tseba ba ile ba bolela gore, o be a e-na le sebete kudu mo e lego gore “o be a ka namelela ka  moagong wo o fsago gaešita le ge batho ba be ba tšhaba.” James o be a se gona ka nama ge a be a hlatlošetšwa boemong bja go ba ketapele ya sekgao sa lefapha la bo-raditima-mollo.

Ra-ditima-mollo yo mongwe wa Hlatse, yo a nago le boitemogelo bja nywaga e šupago e be e le George DiPasquale. O be a nyetše Melissa gomme ba e-na le morwedi wa nywaga e mebedi, e lego Georgia Rose. E be e le mogolo phuthegong ya Dihlatse tša Jehofa ya Sehlakahlakeng sa Staten, gomme o be a le lebatong la bolesome la tora ya ka borwa ge e be e e-wa. Le yena o ile a lahlegelwa ke bophelo bja gagwe ge a be a leka go phološa ba bangwe.

Ba ke ba babedi feela go makgolo-kgolo a bo-raditima-mollo, maphodisa le bašomi ba tšhoganyetšo bao ba ilego ba loba maphelo a bona ge ba be ba leka ka sebete go hlakodiša batho. Bahlakodiši ba ba be ba e-na le sebete o šoro. Ramotse wa New York City, e lego Rudolph Giuliani, ka morago o ile a botša sehlopha sa bo-raditima-mollo ba ba hlatlošitšwego gore: “Go ikemišetša go gata mogato ka sebete maemong a thata kudu ke tlhohleletšo go rena ka moka. . . . Gomme ga . . . go na mohlala o mobotse wa sebete go feta wa Kgoro ya tša Ditima-mollo ya New York City.”

Bodiredi bja Khomotšo

Matšatšing a ka morago ga masetlapelo, mo e ka bago Dihlatse tša Jehofa tše 900 000 kua United States di ile tša dira maiteko a tiilego setšhabeng ka moka a go nea khomotšo go bao ba bego ba le bohlokong. Lerato la go rata moagišani le ile la di tutueletša go homotša bao ba llago. (Mateo 22:39) Bodireding bja tšona, gape di be di katanela go bontšha kholofelo e nnoši bakeng sa batho bao ba gateletšegilego.—2 Petro 3:13.

Dihlatse di be di bontšha kwelobohloko ge di be di e-ya go batho. Boikemišetšo bja tšona e be e le go nea khomotšo e tšwago Mangwalong le go ekiša mohlala o lapološago wa Kriste yo a boletšego gore: “Tlang xo Nna bohle ba Le lapišitswexo, ba Le imêlwaxo; Nna ke tlo Le khutšiša. Le ithwešê yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya ya lena. Xobane yoko ya-ka xa e robe, morwalô wa-ka ké o bohwêfê.”—Mateo 11:28-30.

Dihlopha tša bagolo go tšwa diphuthegong tša Dihlatse tša Jehofa tša lefelong la Manhattan, di ile tša dumelelwa go tsena Lefelong la Kotsi gore di bolele le bašomi ba tša tlhakodišo moo le go ba homotša. Go bile le karabelo e botse kudu. Badiredi ba ba boletše gore: “Banna ba be ba sekišitše megokgo mahlong a bona ge re abelana mangwalo le bona.” Bašomi ba tša tlhakodišo ba be ba hlaphogelwa ba le sekepeng seo se bego se le boema-kepeng. “Banna ba be ba bonagala ba gakanegile kudu, ba inamišitše dihlogo, ba sa kgone go kgotlelela seo ba se bonego. Re ile ra dula fase le bona gomme ra abelana le bona ditemana tše di tšwago ka Beibeleng. Banna ba ba ile ba re leboga kudu ge re tlile, gomme ba re ba be ba tloga ba nyaka khomotšo ye.”

Gantši batho bao go ikopantšwego le bona ka morago ga masetlapelo, ba be ba nyaka seo ba ka se balago, gomme ba newa diporoutšha tše dikete ntle le tefo. Tše dingwe tša tše e be e le Ge Motho yo o mo Ratago a E-hwa, Will There Ever Be a World Without War? le Na Modimo Ruri o na le Taba le Rena? Gape ditokollo tše pedi tša Phafoga! di ile tša newa šedi e kgethegilego, ya mabapi le sebopego se sefsa sa botšhošetši (June 8, 2001), le ya mabapi le kgateletšego ya ka morago ga khuduego ya maikwelo. (September 8, 2001). Maemong a mantši, Dihlatse di be di hlalosa kholofelo ya Beibele ya tsogo. (Johane 5:28, 29; Ditiro 24:15) Mohlomongwe batho ba dimilione ba ile ba fihlelelwa ka molaetša wo o homotšago.

A Swanetše go re Dira Gore re Naganišiše

Masetlapelo a go swana le a a New York City, a swanetše go dira gore ka moka ga rena re naganišiše ka seo re se dirago ka maphelo a rena. Na re phelela feela go phegelela dikgahlego tša boithati, goba na re leka go tlaleletša lethabong la ba bangwe? Moporofeta Mika o boletše gore: “O boditšwe se e lexo se se botse’ le se Morêna a se nyakaxo xo wene: Ké xo dira tokò ké xo rata botho, ké xo sepela le Modimo w’axo O n’e boipoetšò.” (Mika 6:8) Boipoetšo bo swanetše go re hlohleletša go ya Lentšung la Modimo gore re hwetše kholofelo ya kgonthe ka bahu le go hwetša seo thato ya Modimo kgaufsinyane e tlago go se dira gore e tsošološe maemo a Paradeise lefaseng le. Ge e ba o rata go tseba ka mo go oketšegilego ka dikholofetšo tša Beibele, re go opeletša gore o ikopanye le Dihlatse tša Jehofa tša tikologong ya geno.—Jesaya 65:17, 21-25; Kutollo 21:1-4.

[Lepokisi/Diswantšho go letlakala 11]

THAPELO YA TATIANA

Mohlologadi wa Calvin Dawson, e lego Lena, o boditše Phafoga! mabapi le thapelo yeo morwedi wa gagwe wa nywaga e šupago a ilego a e rapela matšatši a sego kae ka morago ga gore a tsebe gore tatagwe a ka se ke a boa gae. Lena o be a rapetše, gomme Tatiana a botšiša gore, “Mma, na nka rapela?” Mmagwe o ile a dumela. Tatiana o ile a rapela ka gore: “Jehofa, Tatago rena wa legodimong, re rata go go leboga bakeng sa dijo tša letšatši le leo go lona re nago le bophelo. Re rata go kgopela gore moya wa gago o be le nna le mma e le gore re be matla. Le gona re rata go go kgopela gore moya wa gago o be le tate, e le gore a be matla ge a boa. Le gona, ge a boa, a tle a le gabotse, a le matla, a thabile e bile a phetše gabotse, gomme re tla mmona gape. Ka leina la Jesu . . . ke a lebala, le gona o se ke wa lebala go dira gore mma a be matla. Amene.”

Lena a sa kgonthišege ge e ba Tatiana a kwešišitše, o ile a re: “Tiana, o rapetše gabotse kudu. Eupša Moratiwa, na o a tseba gore tatago ga a sa boa?” Kapejana, sefahlego sa Tatiana se ile sa bonagala se aparelwa ke manyami. O ile a botšiša gore: “Ga a boe?” Mmagwe a re: “Aowa. Ke be ke nagana gore ke go boditše seo. Ke be ke nagana gore o kwešišitše gore tatago ga a sa boa.” Tatiana o ile a re: “Eupša ka mehla o mpotša gore o tla boa lefaseng le lefsa!” Mafelelong ge a lemoga seo morwedi wa gagwe a bego a se bolela, Lena o itše: “Ke kgopela tshwarelo Tatiana. Ke go kwetše thoko. Ke be ke nagana gore o be o bolela gore tatago o boa gosasa.” Lena o boletše gore: “Ke ile ka ikwa ke thabile go tseba gore lefase le lefsa ke selo sa kgonthe gakaalo go yena.”