Bafsa ba a Botšiša . . .

Go Itsenya-tsenya Bonogeng—Kotsi ke Efe?

NA BAFSA bao ba lego mahlalagading ba kgahlegela bonoge e le ka kgonthe? Sehlopha sa banyakišiši se lekile go hwetša se ka go boledišana le barutwana dikolong tša magareng le tše phagamego tše 115. Poledišano e bontšhitše dipalo-palo tše tše utollago: Ba ka godimo ga seripa-gare sa bao go boledišanwego le bona (54 lekgolong) ba boletše gore ba na le kgahlego bonogeng le matleng ao a phagametšego a tlhago, mola kotara ya bona (26 lekgolong) ba boletše gore ba bo “kgahlegela kudu.”

Banyakišiši bakeng sa Yunibesithi ya Alaska kua Anchorage ba ngwala gore: “Dikanegelo tša dikuranteng le dimakasineng ka ga seo go thwego ke go gola ga modiro wa sehlotswana sa borapedi bja Sathane . . . ke tšeo di atilego nywageng ya morago bjale.” Ditsebi di bolela gore go na le bohlatse bjo bonyenyane bjo bo tiilego bja go thekga boipolelo bja Bosathane bjo bo apareditšego gare ga bafsa. Lega go le bjalo, ga go na pelaelo gore bafsa ba bantši ba kgahlegela dibopego tša Bosathane gotee le bonoge, gaešita le ge kgahlego e bjalo e le feela yeo e sa tsenelelago.

Ka gona bafsa ba bangwe ba ka botšiša gore, ‘Kotsi ke efe ka go itsenya-tsenya bonogeng?’ Go araba potšišo ye, a re lebeleleng ditsela tše dingwe tšeo bafsa ba tsenago bonogeng le mathomong.

Molaba wa Bonoge

Sehlogo seo se lego ka go U.S.News & World Report se bolela gore “bana le bafsa bao ba lego mahlalagading lehono ke bao ba hwetšago le bao ba lebanywago le tekanyo e kgolo e gakantšhago—yeo gantši e hlobaetšago—ya diswantšho gotee le boitsebišo tšeo nywageng e 20 e fetilego go bego go ka se ke gwa akanywa ka tšona.” Go rata go tseba go dira bafsa ba bantši gore ba bale dipuku le dimakasine, ba bogele dibidio goba ba fata-fate mekerong ya Web ya Internet yeo e bontšhago ditaba tšeo di bolelago ka bonoge.

Go ya ka BBC News Online, mananeo a ratwago a TV ao a hlalosago dika tša boloi le thuto ya dinwamadi “go thwe a kgothaletša kgahlego boloing gare ga bana.” Mmino o mongwe wa morethetho o matla ka mo go swanago o bontšha dihlogo tše di bolelago ka bošoro goba botemona. Mongwadi wa dihlogo tša dikuranta Tom Harpur o ngwadile ka kuranteng ya Toronto ya The Sunday Star gore: “Ke swanetše go ntšha temošo e matla ka mo go kgonegago ka seo se diragalago [mminong]. . . . Ga se ka ka ka bona selo seo se gobogilego ka mokgwa wo. Dikopelo ke tšeo di laolwago ke bogafsi, taolo ya meoya e mebe, batemona, tšhollo ya madi, maroga, bošoro bja mohuta le ge e le ofe, go akaretša le go kata, go itshegakanya, polao le go ipolaya. Lehu le tshenyo, diporofeto tša tshenyego, go ganetšwa dilo  ka moka tše dibotse le go amogela dilo ka moka tše mpe le tše kgopo—ye ke melaetša ya gona.”

Na ruri go theetša melaetša e bjalo go tšweletša boitshwaro bjo bo senyago? Go bonagala gore go dirile bjalo bonyenyane tabeng e nngwe—ya mofsa wa nywaga e 14 kua United States yoo a ilego a bolaya mmagwe ka go mo hlaba ka thipa ke moka le yena a ipolaya. Maboto a phapoši ya gagwe a be a khupeditšwe ka diswantšho tša diopedi tša mmino wa rock wa morethetho o matla. Tatagwe ka morago o ile a kgopela ka gore: “Botšang batswadi gore ba hlokomele mohuta wa mmino woo bana ba bona ba o theetšago.” O ile a bolela gore bekeng ya pele ga ge morwa wa gagwe a ka bolaya mmagwe, o be a dula a opela koša ya rock e lego “mabapi le madi le go bolaya mmago.”

Go oketša moo go na le dipapadi tša go ekiša semelo sa motho, tšeo tše dingwe tša tšona batšea-karolo ba dumelelwago go ekiša semelo sa baloi le batho ba bangwe ba bonoge. Bontši bja dipapadi tše bo bontšha bošoro bja botemona. *

Lega go le bjalo, mokgatlo wa dinyakišišo wa Mediascope o bega gore: “Dinyakišišo di bontšha gore kgetho bakeng sa mmino wa morethetho o matla e ka ba sešupo sa bohlokwa bakeng sa go ikarola, go dirišwa gampe ga dilo, malwetši a tšharakano ya monagano, dikotsi tša go ipolaya . . . goba boitshwaro bja go ipea kotsing nywageng ya mahlalagading, eupša mmino ga se wona o bakago boitshwaro bjo. Go naganwa gore bafsa ba lego mahlalagading bao ba šetšego ba katana le mathata ao ba ka goketšwa ke mmino wa morethetho o matla, ka gobane mantšu a wona a hlalosa maikwelo a bona a tshwenyegilego.”

Banyakišiši ba ka ba ba sa dumelelane ka moka ka dikotsi tša go theetša mmino wa Sathane. Eupša na go iphepa ka mehla ka dibidio, mmino goba dipapadi tšeo di bontšhago bošoro goba go iphediša ke mo go se nago mpholo le ge e le ofe? Lega go le bjalo, bakeng sa Bakriste go itsenya-tsenya bonogeng go tšweletša kotsi e kgolo le go feta.

Pono ya Modimo ka Bonoge

Go 1 Ba-Korinthe 10:20, moapostola Paulo o ile a lemoša Bakriste gore: “Xa ke rate xe Le ka ba ba xo kôpana le [batemona, NW].” Ge e le gabotse batemona ke bomang, le gona ke ka baka la’ng go le kotsi gakaakaa go itswalanya le bona? Ge go bolelwa ka tsela e bonolo, batemona ke bao pele e bego e le barongwa, bao ba ilego ba kgetha go latela Sathane Diabolo. Leina Sathane le bolela “Moganetši” gomme Diabolo e bolela “Mothomeletši.” Go ya ka Beibele, morongwa yo e bego e le morwa wa Modimo o ile a itira moganetši le mothomeletši ka go kgetha go rabela malebana le Modimo. Ge nako e dutše e e-ya, o ile a goketša barongwa ba bangwe gore ba sepele le yena tseleng ye ya gagwe ya borabele. Ka go rialo badirišani ba ba gagwe ba ile ba fetoga batemona.—Genesi 3:1-15; 6:1-4; Juda 6.

Jesu o ile a bitša Sathane gore ke “mmuši wa lefase lé.” (Johane 12:31) Sathane le batemona ba gagwe ba “tuka boxale ka kudu” ge ba bona phedišo e tlago go ba tlela. (Kutollo 12:9-12) Ga se mo go makatšago gore bao ba ilego ba itswalanya le batemona ba ile ba ba hwetša e le ba šoro. Mosadi yo mongwe kua Suriname yo a goletšego lapeng leo le bego le dirišana le meoya o ile a iponela kamoo batemona “ba thabelago go tlaiša bahlaselwa ba bona bao ba sa ratego.” * Go itswalanya le dibopiwa tše tše šoro tša moya ka tsela le ge e le efe go kotsi ka go fetišiša!

Ka lebaka le, Modimo o laetše batho ba gagwe ba kgale, ba-Isiraele, gore ba efoge ditiro ka moka tša bonoge. Doiteronomio 18:10-12 e lemoša ka gore: “Ba ba diraxo tše byalo, Morêna ó bôna e le makxapa.” Bakriste ba ile ba lemošwa ka mo go swanago gore “baloi” ba be ba tla lebana le go fedišwa ke seatla sa Modimo. (Kutollo 21:8) Go itsenya-tsenya bonogeng le gona Modimo o a go sola. Beibele e laela gore: “Le se swarê thšila.”—2 Ba-Korinthe 6:17.

Go Ikarola Ditirong tša Bonoge

Na o ile wa dira phošo ya go itsenya-tsenya bonogeng? Gona nagana ka seo se ilego sa direga lekgolong la pele la nywaga motseng wa Efeso. Batho ba bantši moo ‘ba be ba dirile bonoge.’ Eupša ba bangwe moo ba ile ba kgongwa ke mediro e matla yeo moapostola Paulo a ilego a e dira ka thušo ya moya o mokgethwa. Na mafelelo e bile afe? “Ba bantši ba ba bexo ba dirile tša bonoxê kxalê, ba kxobokanya dipuku tša mohuta woo, ba di fiša pepeneneng. Xe ba bala thêkô ya tšôna, ba hwetša e le ya mašeleng a dikete tše masome a mahlano. Lentšu la Morena la ênêla ka mokxwa woo è le le matla lè fenya.”—Ditiro 19:11-20.

 Na se se re botša’ng? Se re botša gore ge e ba motho a nyaka go phonyokga mereo ya batemona, o swanetše go fediša dilo ka moka tšeo di tswalanago le borapedi bja Sathane! Se se akaretša dipuku ka moka, dimakasine, diswantšho, dipuku tša metlae, dibidio, dipheko (dilo tšeo di aparwago bakeng sa “tšhireletšo”) gotee le dilo tša botemona tšeo di tšerwego go Internet. (Doiteronomio 7:25, 26) Lahla dilo le ge e le dife tšeo di ka bago di šomišwa bonogeng, tše swanago le dikgwele tša crystal goba matlapa a Ouija. Gape lahla mmino goba dibidio tšeo di nago le melaetša ya bosathane.

Go nyakega sebete le boikemišetšo go gata megato e bjalo e nyakago sebete. Eupša mehola ya gona e ka ba e megolo. Mosadi yo mongwe wa Mokriste yo a bitšwago Jean * o ile a reka papadi ya computer yeo mathomong e bego e bonagala e le e se nago kotsi. Ge a dutše a theoga le megato e fapa-fapanego ya papadi, o ile a utolla dibopego tše dingwe tša papadi tšeo di bego di e-na le dikgokagano tša go dirišana le meoya. Go se go ye kae o ile a thoma go ba le digateledi tše šoro! Jean o re: “Ke ile ka tsoga gare ga mpa ya bošego gomme ka senya di-CD tša papadi.” Mafelelo e bile afe? “Ga se ka ka ka ba le bothata ga e sa le go tloga moo.”

Ge o bontšha boikemišetšo bja kgonthe bja go itokolla dilong tše, o tla atlega. Gopola boikemišetšo bjoo Jesu a ilego a bo bontšha ge Diabolo a be a leka go goketša Jesu gore a mo rapele. “Ké mo Jesu a fetotšexo a re: Ntloxêlê, Sathane, xobane xo ngwadilwe xwa thwe: O khunamêlê Morena Modimo wa xaxo, O dirêlê Yêna a nnoši! Ya ba xôna Diabolo a mo tloxêlaxo.”—Mateo 4:8-11.

O se ke wa lwa Ntwa o le Noši

Moapostola Paulo o re gopotša gore Bakriste ka moka ba “lwa le meôya ya bobe e lexo sebakeng sa xodimo.” (Ba-Efeso 6:12) Eupša o se ke wa leka go lwantšhana le Sathane le batemona ba gagwe o le noši. Hwetša thušo go batswadi ba gago bao ba boifago Modimo gotee le bagolo phuthegong ya geno ya Bokriste. E ka ba mo go lešago dihlong go bolela go akaretšwa ga gago dilong tše, eupša go ka feleletša ka go hwetša ga gago thekgo yeo e nyakegago kudu.—Jakobo 5:14, 15.

Gopola gape gore Beibele e re: “Le lwê le Diabolo, ’me ó tlo Le thšaba. Batamêlang Modimo, le Yêna a Le batamêlê.” (Jakobo 4:7, 8) Ee, o na le thekgo ya Jehofa Modimo! O tla go thuša go itokolla ditlemong tša molaba wa bonoge.

[Mengwalo ya ka tlase]

[Seswantšho go letlakala 20]

Lahla dilo ka moka tšeo di tswalanago le borapedi bja Sathane

[Seswantšho go letlakala 20]

Hlokomela mekero ya “Web” yeo e kgothaletšago go dirišana le meoya