“Letšatši le Thabišago Kudu Maphelong a Rena”

LENYALO ke tiragalo e thabišago. Banyalani ba bantši ba itše: “E be e le letšatši le thabišago kudu maphelong a rena.” Eupša gape e ka ba letšatši leo le nyakago go gontši go wena. Kgateletšego le go lapa tšeo monyadiwa le monyadi le malapa a gabo bona ba lebeletšanago le tšona e ka ba tše tseneletšego ka baka la diphetho le ditokišetšo tšeo di nyakago go dirwa, gotee le batho ba bantši bao monyadiwa le monyadi ba tla kopanago le bona letšatšing leo.

Lenyalo le swaya mathomo a tsela e mpsha ya go phela bakeng sa banyalani. Eupša e ka se be bona ba nnoši ba kgongwago ke se. Ka ge lenyalo la morwedi, morwa, kgaetšedi goba ngwaneno gantši le bolela gore motho yo le mo ratago o thoma lapa la gagwe ka thoko, lapa gantši le tla lebeletšana le maikwelo a hlaka-hlakanego.

Meetlo ya lenyalo gantši e fapana go ya ka dinaga, gomme ga go kgonege go ka bolela ka yona ka moka mo. Dihlogo tše di tla lebiša tlhokomelo go seo se fetogilego moetlo dinageng tša ka Bodikela le dinageng tše swanago. Moo, go tsena lenyalong e ka ba mo go bitšago kudu. Ba bangwe ba diriša tšhelete e ntši kudu letšatšing la bona la lenyalo, go akaretša go hira holo goba lebenkele la go jela bakeng sa go swarela pokano ya bogwera le go fiwa dijo moo. Go akanyetšwa gore kua Italy palo-gare ya ditshenyagalelo tša lenyalo e ka ba ka godimo ga R90 000. Kua Japane, go swana le mafelong a mangwe ka moka, dipalo-palo di ka ba ka godingwana. Gantši monyadiwa le monyadi ga se bona ba lefelelago ditshenyagalelo. Batswadi ba bona ke bona ba di lefelelago.

Go dira manyalo ke kgwebo e kgolo. Difeme tše dintši ke tšeo di gatelelago kgopolo ya lenyalo le “phethagetšego,” moo go se nago seo se hlokegago. Ge e le gabotse, di bolela gore, “le ke letšatši le thabišago kudu la bophelo bja gago!” Ka gona di nea palo e kgolo ya ditšweletšwa le ditirelo tše “bohlokwa” bakeng sa go dira letšatši la gago le legolo gore e be le “phethagetšego.” Go ka ba le ditaletšo tša motho ka noši, lešira la gago la “ditorong,” diaparo tša bafelegetši ba ngwetši le disutu tša tuxedo goba disutu tše swanago le tšeo bakeng sa banna monyanyeng wa lenyalo. Gape go na le matšoba, dikoloi tša limousine, mohlomongwe le lebenkele la go jela moo monyanya o tla swarelwago gona, motšea-diswantšho, sehlopha sa mmino gotee le dilo tše dingwe. Lelokelelo la dilo ka moka tšeo monyadi le monyadiwa ba ka di kganyogago, gotee le lelokelelo leo le sepedišanago le lona la ditshenyagalelo, le ka hlobaetša bo-tate ba bantši.

Makokong a sa swanego, bohlokwa bjo bogolo bo bewa go lateleng meetlo ya setšo. Go na le tsela ye e beilwego yeo ka yona lelokelelo la ditsela tša go itshwara le ka dirwago ka gona, gomme go lebeletšwe gore monyadiwa le monyadi ba tla dumelelana le yona. Ee, go na le dilo tše dintši tšeo di swanetšego go gopolwa, eupša nako ke e nyenyane bakeng sa go ka di rulaganya ka moka.

Na ye ke tebelelo e thabišago goba e nyamišago? Go sa šetšwe karabo yeo o e neago, go naganišiša ka dilo ka moka tšeo lenyalo le ka di akaretšago go tsoša dipotšišo tše dintši. Na go tsena lenyalong go bolela’ng mehleng yeno? Na tše ka moka di tloga di nyakega e le gore o tle o kgone go tsena lenyalong “gabotse”? Mathata a fapa-fapanego ao a ka tšwelelago gotee le a maikwelo a ka fenywa bjang?

Go sa šetšwe kgateletšego ka moka, ba bantši ba ile ba rulaganya ditaba tša lenyalo ka botlalo gotee le go thabela tiragalo. Diphihlelo tša bona di ka thuša ba bangwe bao ba itokišeletšago go lebeletšana le tiragalo e swanago. Gape go na le melao ya metheo ya Beibele yeo e ka thušago ge dithulaganyo tša lenyalo di dirwa, e le gore letšatši leo le tle le feleletše e le le le bose, le thabišago le le agago bakeng sa bohle.