Pono ya Beibele

Mikaele Morongwa yo Mogolo ke Mang?

GO YA ka Beibele, go na le dibopiwa tše dimilione tšeo e lego barongwa tše di dulago lefelong la moya. (Daniele 7:9, 10; Kutollo 5:11) Go tloga mathomong go fihla bofelong, Mangwalo a bolela ka makga a makgolo-kgolo ka barongwa bao ba dulago ba botegela Modimo ka go se kwanantšhe. Lega go le bjalo, ke feela tše pedi tša dibopiwa tše tšeo di bolelwago ka maina. Se sengwe ke morongwa Gabariele, yoo ka boyena a ilego a tliša melaetša ye e tšwago go Modimo go batho ba bararo bao ba sa swanego lebakeng la nywaga e ka bago 600. (Daniele 9:20-22; Luka 1:8-19, 26-28) Morongwa yo mongwe yo a bolelwago ka leina ka Beibeleng ke Mikaele.

Mikaele ke morongwa yo a phagamego ka mo go lemogegago. Ka mohlala, ka pukung ya Daniele, Mikaele o hlaloswa e le yo a lwago le batemona ba kgopo bakeng sa batho ba Jehofa. (Daniele 10:13; 12:1) Ka lengwalong le buduletšwego la Juda, Mikaele o lwa le Sathane ge ba bakišana setopo sa Moše. (Juda 9) Puku ya Kutollo e bontšha gore Mikaele o lwa le Sathane le batemona ba gagwe gomme o ba raka legodimong. (Kutollo 12:7-9) Ga go morongwa yo mongwe yo a hlaloswago e le yo a nago le matla a bjalo a magolo le taolo godimo ga manaba a Modimo. Ka gona, ga go makatše ge Beibele e bitša Mikaele ka mo go swanetšego gore ke “morongwa yo mogolo,” lehlaodi “yo mogolo” le bolela gore “yo a phagamego.”

Ngangišano ka Semelo sa Mikaele

Madumedi a Bojakane gotee le Bojuda le Bomoseleme, a na le dikgopolo tše di ganetšanago tabeng ya barongwa. Ditlhaloso tše dingwe ke tšeo di sa kwagalego. Ka mohlala, The Anchor Bible Dictionary e bolela gore: “Go ka ba go e-na le morongwa o tee yo a phagamego gotee le/goba sehlopha se senyenyane sa barongwa ba bagolo (gantši ba bane goba ba šupa).” Go ya ka The Imperial Bible-Dictionary, Mikaele ke “leina la motho yo a nago le matla ao a phagametšego a tlhago, yoo ka kakaretšo go bilego le dikgopolo tše pedi tšeo di thulanago mabapi le yena, e ka ba gore ke yena Morena Jesu Kriste, Morwa wa Modimo, goba gore ke yena yo mongwe wa bao go thwego ke barongwa ba bagolo ba šupa.”

Moetlong wa ba-Juda barongwa ba ba bagolo ba šupa ke Gabariele, Jeremiele, Mikaele, Raguele, Raphaele, Sariele le Uriele. Ka lehlakoreng le lengwe Bomoseleme bo dumela go barongwa ba bane ba bagolo, e lego, Jibril, Mikal, Izrail le Israfil. Bokatholika  le bjona bo dumela go barongwa ba bane ba bagolo: Mikaele, Gabariele, Raphaele le Uriele. Beibele yona e re’ng? Na go na le barongwa ba bantšinyana ba bagolo?

Karabo ya Beibele

Ka ntle ga Mikaele, ga go na morongwa yo mongwe yo mogolo yo go bolelwago ka yena ka Beibeleng, e bile ga go na moo Mangwalo a šomišago leina ‘morongwa yo mogolo’ ka bontši. Beibele e hlalosa Mikaele e le morongwa yo mogolo, e le ge e bontšha gore ke yena a nnoši yo a nago le leina leo le mo hlaolago. Ka gona, ke mo go kwagalago go fetša ka gore Jehofa Modimo o neile se tee, e bile e le sona feela sa dibopiwa tša gagwe tša moya taolo e feletšego ya go buša godimo ga barongwa ba bangwe ka moka.

Ka ntle ga Mmopi ka boyena, ke motho o tee feela yo a botegago yoo go bolelwago ka yena e le yo a nago le matla a go laola barongwa—e lego, Jesu Kriste. (Mateo 13:41; 16:27; 24:31) Moapostola Paulo o boletše ka mo go kgethegilego ka “Morêna Jesu” le “barongwa ba gagwe ba matla.” (2 Ba-Thesalonika 1:7) Petro yena o ile a hlalosa ka Jesu yo a tsošitšwego bahung ka gore: “E a rotoxetšexo maxodimong, a dula ka letsoxong le letona la Modimo, a buša Barongwa, le mebušô, le ba matla.”—1 Petro 3:22.

Ka ge go se na polelo ka Beibeleng yeo e hlalosago Mikaele morongwa yo mogolo e le Jesu, fela go na le lengwalo leo le kgokaganyago Jesu le maemo a go ba morongwa yo mogolo. Lengwalong la gagwe leo le yago go ba-Thesalonika, moapostola Paulo o ile a porofeta ka gore: “Xobane Morêna Yêna mong ó tlo foloxa lexodimong ka mokxoši, ka kxowa ya Morongwa-moxolo, ka phalafala ya Modimo, ké mo bao ba hwetšexo xo Kriste ba tl’o xo tsoxa pele.” (1 Ba-Thesalonika 4:16) Lengwalong le Jesu o hlaloswa e le yo a tšerego matla a gagwe bjalo ka Kgoši ya Modimo yeo e lego Mesia. Lega go le bjalo, o bolela ka “kxowa ya Morongwa-moxolo.” Hlokomela gape gore o na le matla a go tsoša bahu.

Ge a be a le lefaseng e le motho, Jesu o ile a tsoša batho ba bantšinyana. Ka go dira bjalo, o ile a šomiša lentšu la gagwe go hlaba mekgoši e laelago. Ka mohlala, ge a be a tsoša morwa yo a hwilego wa mosadi wa mohlologadi kua motseng wa Naini, o ile a re: “Lesoxana, ke ra wene xe ke re: Tsoxa!” (Luka 7:14, 15) Ka morago, pejana ga ge a ka tsoša mogwera wa gagwe Latsaro, Jesu o ile “a hlaboša lentšu a re: Latsaro! Tšwaa O tlê mó!” (Johane 11:43) Eupša ditiragalong tše, lentšu la Jesu e be e le lentšu la motho yo a phethagetšego.

Ka morago ga tsogo ya gagwe ka noši, Jesu o ile a tsošetšwa “boemong bjo bo phagamego kudu” kua legodimong e le sebopiwa sa moya. (Ba-Filipi 2:9, NW) Bjale ka ge e se sa le motho, o na le lentšu la morongwa yo mogolo. Ka gona ge phalafala ya Modimo e lla bakeng sa “bao ba hwetšexo xo Kriste” gore ba tsošetšwe legodimong, Jesu o ile a hlaba “mokxoši,” ka nako ye “ka kxowa ya Morongwa-moxolo.” Ke mo go kwagalago go phetha ka gore ke feela morongwa yo mogolo a ka hlabago mokgoši “ka kxowa ya Morongwa-moxolo.”

Ee, go na le dibopiwa tše dingwe tša barongwa tše di lego maemong a godimo, tše bjalo ka barongwa-batuki [“baserafi,” PK] le bakerubi. (Genesi 3:24; Jesaya 6:2) Lega go le bjalo, Mangwalo a šupa go Jesu Kriste yo a tsošitšwego e le molaodi wa barongwa ka moka—Mikaele morongwa yo mogolo.