Bafsa ba a Botšiša . . .

Go Thwe’ng ge e ba ke Gahlana le Motho yo ke Tsenago le Yena Sekolo?

“Go ya sekolong gape ka Mošupologo e be e le tlaišo. Ge e ba yo mongwe wa bagwera ba-ka a be a mpone, ke be ke tla iphahlelela ka mabaka ao a naganišišitšwego gabotse. Ka mohlala, ke be ke tla botša bagwera ba-ka gore ke be ke ile go koleka tšhelete bakeng sa Mokgatlo wa Bašomi.”—James, Engelane.

“Sekolong ke be ke kwerwa ke batho bao ba mponego. Ke ile ka ikwa ke gateletšegile kudu.”—Débora, Brazil.

KE KA baka la’ng bafsa ba ba be ba tšhaba go bonwa ke bagwera ba bona? Na ba be ba swaregile mohuteng o itšego wa mediro yeo e sego ya molao? Ka mo go fapanego, ba be ba swaregile ka mošomo o hlomphegago kudu le wa bohlokwa ka go fetišiša woo o dirwago lefaseng lehono. Ba be ba dira modiro woo Jesu a laetšego gore o dirwe ge a be a re: “Ké xôna yang Le dirê dithšaba ka moka barutiwa, . . . ka xo ba ruta xo boloka tšohle tše ke Le laetšexo tšôna.”—Mateo 28:19, 20.

Go ya ka nyakišišo ya Gallup ya United States, bafsa ba ka godimo ga 90 lekgolong ba dumela go Modimo. Mo e ka bago seripa-gare sa bona ba ya kerekeng beke le beke. Le gona, gaešita le ge bafsa ba bantši ba kopanela medirong yeo e thekgwago ke kereke e bjalo ka go opela khwaereng, ke ba sego kae bao ba bolelago ka Modimo le barutwana-gotee le bona. Lega go le bjalo, Dihlatse tša Jehofa di tsebega lefaseng ka bophara ka modiro wa tšona wa go bolela ka ntlo le ntlo. Dikete-kete tša bafsa ba Dihlatse di tšea karolo modirong wo.

Ge e ba o le Hlatse yeo e sa lego mofsa, ga go na pelaelo gore le wena o šetše o tšea karolo modirong wo wa boboledi. Eupša se ga se nape se bolela gore o go hwetša go le bonolo go dira bjalo. Go swana le bafsa bao ba tsopotšwego mathomong, o ka hwetša go fo nagana ka kgonagalo ya go gahlana le yo o tsenago sekolo le yena boboleding e le mo go gateletšago. Mofsa yo mongwe wa Brithania yo a bitšwago Jennie, o dumela ka gore: “Se sengwe sa dilo tše mpe ka go fetišiša e be e le gore yo mongwe wa bao ke tsenago le bona sekolo a mpone ke apere gabotse, ke apere sekhethe, ke swere mokotla wa dipuku—ke lebelelega ke tšhephile kudu go feta ge ke le sekolong.”

Dipoifo tša go gahlana le morutwana-gotee e ka ba tše tseneletšego kudu mo e lego gore bafsa ba  bangwe ba Bakriste ba ile ba retologela boikgakanyong. Mofsa yo a bitšwago Leon o re: “Ke tseba mofsa yo mongwe wa Hlatse yo a aparago baki yeo e nago le kuane ge a dutše a le bodireding, e le gore a kgone go ikhurumetša ka yona ge a gahlana le bagwera ga gagwe ba sekolong.” Lega go le bjalo, bafsa ba bangwe ba phema ka go lebanya go dira boboledi ditikologong tše itšego. Mofsa yo a bitšwago Simon o gopola ka gore: “Ke gopola ke rapela gore re se ke ra šoma mmileng o itšego, ka gobane ke be ke tseba gore o tletše ka batho bao ke tsenago le bona sekolo.”

Ke ga tlhago go ikwa o tšhoga go se nene ge o gahlana le motho yo o mo tsebago boboleding. Lega go le bjalo, go dumelela poifo yeo e go laola go ka go gobatša. Mofsa wa Mojeremane yo a bitšwago Alicia o dumela ka gore: “Ke ile ka ba le pono e fošagetšego kudu ka boboledi, moo e ilego ya ba le mafelelo a sa thabišego boemong bja-ka bja moya.”

Lega go le bjalo, ke ka baka la’ng ge e le gabotse o swanetše go dira boboledi—kudu-kudu ge e ba go le thata go wena go dira bjalo? Go araba potšišo ye, anke re hlahlobeng lebaka leo ka lona Modimo a go rwešago boikarabelo bjo. Ke moka re tla go bontšha kamoo ka boiteko le boikemišetšo, e lego mo go kgonegago gore o fenye dipoifo tša gago.

Boikarabelo bja go Dira Boboledi

Sa pele, e ka ba mo go thušago go gopola therešo ya gore go abelana le ba bangwe tumelo ya gago ga se selo se se thomago ka wena goba seo se sa tlwaelegago. Go tloga mehleng ya kgale, banna le basadi ba boifago Modimo ba ile ba dira bjalo. Ka mohlala, Noage ke yo a tsebegago kudu e le moagi wa areka e kgolo kudu. (Genesi 6:14-16) Eupša go ya ka 2 Petro 2:5, e be e bile e le “sexoeledi sa tokô.” Noage o ile a ikwa a gapeletšega go lemoša ba bangwe ka phedišo yeo e bego e batamela.—Mateo 24:37-39.

Ka morago, le ge ba-Juda ba be ba se ba newa ditaelo tše lebanyago tša go dira boboledi go bao e sego ba-Juda, ba bantši ba ile ba abelana le ba bangwe tumelo ya bona. Ka go rialo, motho o šele yo a bitšwago Ruthe o ile a kgona go ithuta ka Jehofa. A leboga mmatswal’agwe wa mo-Juda e lego Naomi, Ruthe o ile a mmotša gore: “Sethšaba sa xeno ke tlo re ke sa xešo; Modimo wa xaxo e tlo ba Modimo wa-ka.” (Ruthe 1:16) Ka morago, Kgoši Salomo o ile a bontšha gore ba bantši bao e sego ba-Juda ba be ba tla kwa ka “’ina le lexolo” la Jehofa gomme ba rapela tempeleng ya Gagwe.—1 Dikxoši 8:41, 42.

Ka gona, ge e ba bahlanka ba ba Modimo ba bogologolo ba ile ba bolela le ba bangwe—go sa šetšwe gore ba be ba se ka tlase ga taelo e lebanyago ya gore ba dire bjalo—gona ke mo go swanetšego kudu gakaakang gore Bakriste lehono ba ikwe ba gapeletšega go dira boboledi! Go ba gona, re laetšwe gore re bolele “Ebangedi yé ya mmušô.” (Mateo 24:14) Re swana le moapostola Paulo ka kwešišo ya gore re tlamilwe ke taelo gore re tsebatše ditaba tše tše dibotse. (1 Ba-Korinthe 9:16, PK) Go phologa ga rena go kotsing. Ba-Roma 10:9, 10 e re: “Xobane xe O ipolêla [phatlalatša, NW] ka molomo wa re: Jesu ké Yêna Morêna! . . . O tlo phološwa. Xobane motho ó dumêla ka pelo a tseb’o lokafala; ó ipolela ka molomo a tseb’o phološwa.”

Ke kae moo o ka ‘ipolelago phatlalatša’? Le ge boboledi bjo bo sa rulaganyetšwago bo na le lefelo la bjona, bodiredi bja ntlo le ntlo e sa dutše e le e nngwe ya ditsela tše di atlegago kudu tša go fihlelela ba bangwe. (Ditiro 5:42; 20:20) Na o lokolotšwe gore o se tšee karolo modirong wo ka gobane o le yo monyenyane? Le gatee. Beibele e nea taelo ye go Psalme 148:12, 13: “Lena masoxana le lena basetsana ba baxolo le ba bafsa, bohle a ba rêtê ’ina la Morêna.”

Tlhohlo ya go Dira Boboledi go Dithaka

Ke therešo gore e ka ba mo go tshwenyago le mo go gakantšhago go ba bodireding gomme wa gahlana le motho yo o tsenago le yena sekolo. Go ba gona, ke ga tlhago go nyaka go amogelwa ke ba bangwe. Ga go motho yo a nyakago go kwerwa, go rogakwa goba go gobošwa ka mantšu. Le gona, go etša ge mofsa yo a bitšwago Tanya a bea taba, “bana sekolong e ka ba ba sehlogo!” Ka gona, o ka ipotšiša ka mo go swanetšego mabapi le kamoo bao o tsenago le bona sekolo ba tlago go arabela ka gona ge e ba ba go bona o tšhephile gomme o swere Beibele ka seatleng sa gago. Se se nyamišago ke gore go ka direga gore ba go kwere. Mofsa wa Brazil yo a bitšwago Felipe o gopola ka gore: “Go be go na le mošemane ka klaseng ya-ka yo a bego a dula moagong wo ke dulago go wona. O be a fela a re, ‘Ke ge o thomile gape ka Beibele! O swere eng ka mokotleng woo wa dipuku?’”

Go kwerwa ka tsela e bjalo ga go thabiše le gatee. Beibele e re botša gore Isaka, morwa wa  Aborahama, o ile a lebeletšana le seo ge e le gabotse e bego e le go kwerwa ga sehlogo ke Išimaele, yo e bego e le ngwanabo ka motswadi o tee. (Genesi 21:9) Moapostola Paulo ga se a ka a nyenyefatša tshwaro ye e mpe. Go Ba-Galatia 4:29 (NW), moapostola o ile a e bitša ka mo go swanetšego gore ke ‘tlaišo.’

Ka mo go swanago, Jesu o ile a lemoša gore batho ba bangwe ba be ba tla bontšha lehloyo go balatedi ba gagwe. O ile a re: “Xe lefase lè Le hlôya, Le tsebê xore le thomile xo hlôya Nna. Xe le ka be Le le ba lefase, lefase le ka ba le rata ba e lexo ba xalô; xomme le Le hloile ka xe Le se ba xalô, ka xe ke Le hlaotše lefaseng.”—Johane 15:18, 19.

Ka gona, bjalo ka Mokriste o swanetše go itokišetša go kgotlelela tekanyo e itšego ya tlaišo. (2 Timotheo 3:12) Gaešita le ge o se wa ka wa bolela selo ka Beibele go dithaka tša gago, ba bangwe ba sa dutše ba ka go tlaiša feela ka baka la gore o kgomarela ditekanyetšo tše phagamego tša boitshwaro le ka gobane o sa kopanele le bona boitshwarong bjo bobe. (1 Petro 4:4) Lega go le bjalo, Jesu o bolela mantšu a a kgothatšago: “Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka.” (Mateo 5:11) Ke bjang go kwerwa le go rogakwa go ka go dirago gore o thabe? Ke ka gobane o tseba gore o thabiša pelo ya Jehofa Modimo! (Diema 27:11) Le gona, ka go thabiša Modimo, o ipea boemong bja go tlo hwetša moputso wa bophelo bjo bo sa felego!—Luka 10:25-28.

Ka mahlatse, ga go bonale e le bohle bao o tsenago le bona sekolo—goba gaešita le ka bontši bja bona—bao ba bego ba tla bontšha lehloyo ge e ba o be o ka gahlana le bona bodireding. Mofsa wa Brithania yo a bitšwago Angela o re gopotša gore: “Ge o gahlana le motho yo o tsenago le yena sekolo bodireding, gantši e ba yena yo a tšhogilego kudu go go feta!” Ge e le gabotse, ba bangwe ba ka ba ba fišegela kudu go kwa seo o tlago go se bolela. Go sa šetšwe boemo, bafsa ba bantši ba Bakriste ba ba le katlego e kgolo tabeng ya go nea bohlatse go barutwana-gotee le bona. Sehlogo sa rena se se latelago lelokelelong le se tla hlalosa ditsela tše dingwe tšeo ka tšona le wena o ka dirago bjalo.

[Seswantšho go letlakala 20]

Bafsa ba bantši ba boifa go gahlana le morutwana-gotee le bona ge ba le bodireding

[Seswantšho go letlakala 22]

O se ke wa dumelela go kwerwa go go dira gore o hlabje ke dihlong ka tumelo ya gago