Pono e Leka-lekanego ka Mošomo

MOHLANKEDI-MOGOLO yo a ineetšego wa tša bohlabani o ile a šoma ka nako ya gagwe ya matena ya go ikhutša e le gore a tle a kgone go phetha mošomo woo o bego o nyakwa ka go akgofa ke mohlankedi yo mogolo go yena. Ge bašomi-gotee le yena ba boa mateneng, ba mo hweditše a wetše godimo ga mošomo woo o bego o le tafoleng ya gagwe—a hwile.

Lebakeng la ka tlase ga diiri tše pedi ka morago, bahlankedi-gotee le yena ba ile ba makala ge yo mogolo wa bona a ba leleditše mogala gomme a re: “Ke mo go nyamišago ka ———, eupša ke nyaka yo a ka tšeago legato la gagwe mesong e latelago!” Se se ile sa dira gore babogedi ba ipotšiše gore, Na mošomo wo o bego o dirwa ke mohlankedi ke wona feela woo e bego e le wa bohlokwa go yo mogolo go yena?

Phihlelo ye ya therešo e bontšha boemo bja kgonthe—gore bophelo bja motho gantši bo lekanyetšwa ka mo go feletšego ka mohola wa gagwe go mothwadi wa gagwe. Se se ka dira gore motho a botšiše gore: Na ke phelela go šoma goba ke šomela go phela? Ke dibopego dife tša bophelo bja-ka tšeo ke di gafago bakeng sa mošomo wa-ka?

Go Dira Diphetho tše Bohlale

Tše pedi tša tšeo ba bantši ba di tšeago e le diphetho tše bohlokwa kudu bophelong gantši ke tšeo di itirelwago feela—kgetho ya molekane wa lenyalo gotee le go kgetha mošomo. Bobedi mošomo le lenyalo pele di be di lebelelwa e le dilo tša sa ruri. Ka gona go be go naganišišwa ge go be go dirwa e nngwe le e nngwe ya dikgetho tšeo. Gantši, go be go tsongwa keletšo e tšwago go bagwera ba bagolo goba batswadi.

Lega go le bjalo, matšatšing a ba bantši ba bonagala ba ikgethela balekane ba lenyalo ba nnoši motheong wa ponagalo ya mmele yeo e gogelago, ka kgopolo ya gore ge dilo di sa sepele gabotse, ba ka nyaka molekane yo mongwe. Ka mo go swanago, ba bantši ge e le gabotse ba kgetha mošomo ka baka la go bonagala ga wona e le o gogelago, ka ntle le go naganišiša ka mafelelo ao a sa kgahlišego ao a ka kgonegago. Goba bonyenyane dikgonagalo tšeo di sa thabišego ke tšeo di tlošwago ka pela ka  kgopolo ya gore, ‘Ke tla kgona go lebeletšana le tšona.’

Ka manyami, basadi dinageng tše di diilago ka tlwaelo ba arabela dipapatšong tše goketšago bakeng sa mešomo yeo e holofetšago bophelo bjo bo gogelago lefelong le lengwe. Lega go le bjalo, ge ba fihla nageng e nngwe, gantši ba romelwa mafelong a bagweba-ka-mmele moo go ba ga bona e le bagweba-ka-mmele go lego thata go feta bophelo bjoo ba bego ba bo phela pele. Go ya ka sehlogo se se lego ka go World Press Review, mohuta wo wa bokgoba bja sebjale-bjale wo o tšhošago ke “madi-mabe ao a ka se kego a fela.”

Na batho le bona ba ka gokeletšwa go amogeleng mošomo o tlwaelegilego gomme ba feleletša ba le boemong bja go ikwa e le makgoba? Selo se se ile sa direga! Ka mohlala, dikhamphani tše dingwe di nea matsaka a makatšago bakeng sa go hola bašomi ba tšona. Tše di ka akaretša mafelo a go jela bakeng sa go ka šomišwa ke ba lapa le bagwera, koloi yeo e sa lefelelwego gotee le go hlatswetšwa diaparo, dingaka tša meno tšeo di dulago meagong yeo, go šomišwa ga lefelo la boitšhidullo moo go sa lefelelwego gotee le go ba nea thekgo ya tša ditšhelete bakeng sa go ja mabenkeleng a go jela a bitšago kudu.

Raditaba Richard Reeves o bega gore: “Khamphani e nngwe e ile ya lefelela ditshenyagalelo tša go beana mabaka tša bašomi ba yona bao ba šomago ka thata.” Eupša hlokomela! O hlalosa gore: “Difeme tše di tšweletša dithulaganyo tše bakeng sa go dira gore bophelo bja gago bo be bonolo, boemong bjo tee feela—bja gore o ba dumelele ba laola bophelo bja gago; gore o šome matšatši a diiri tše 18 gotee le mafelo-bekeng, o je, o itšhidulle, o bapale gaešita le go robala ka ofising bakeng sa go ba hola.”

Go Kgetha Tsela e Kaone

Seema sa kgale se balega ka gore: “Mpya e phelaxo e phala tau e hwilexo.” (Mmoledi 9:4) Seema seo se tsoša potšišo e rego, Na ke swanetše go gafa bophelo bja-ka goba go phela ga-ka gabotse ka baka la mošomo wa-ka? Go araba potšišo ye, ba bantši ba ile ba hlahloba boemo bja bona lefsa gomme ba hweditše tsela e kaone ya go iphediša—gotee le bakeng sa lapa la bona ge e ba ba e-na le lona—gape le go phela bophelo bjo bo thabišago le bjo bo nago le morero.

Ke therešo gore go dira se gantši go nyaka boipoetšo gomme go ka nyaka gore o dire phetho ya gore dinyakwa tša gago ge e le gabotse ke dife, go e na le dilo tšeo o di ratago tšeo e sego tša bohlokwa. Bao ba  nyakago maemo a godimo le botumo ba ka lahla diphetho tše di leka-lekanego le go nagana gore bao ba di kgethago ke mašilo. Eupša sa bohlokwa ke sefe e le ka kgonthe bophelong? Na morago bjale o ile wa ema gore o nagane ka se?

Kgoši Salomo yo bohlale, yoo a ngwadilego seema se se tsopotšwego ka mo godimo, o ile a fihlelela mo gontši dilong tše di bonagalago mohlomongwe go feta motho le ge e le ofe. Eupša ge a bolela ka bokopana seo e lego sa bohlokwa e le ka kgonthe, o ile a ngwala a le ka tlase ga pudulelo ya Modimo gore: “A re kweng phethego ya ditaba ka moka: Boifa Modimo, gomme o boloke ditaelo tša gagwe; ke se e lego tshwanelo go batho bohle [“tlamo yohle ya motho,” NW].”—Mmoledi 12:13, PK.

Ka nako e swanago, Salomo o be a lebelela mošomo e le wa bohlokwa. O ile a ngwala gore: “Motho xa a na se se kaone; a a jê, a a nwê; pelo ya xaxwe e thabêlê botse mo ’tirong tša xaxwe.” (Mmoledi 2:24) Jesu Kriste, Salomo yo Mogolo, ka mo go swanago o lebelela mošomo e le wa bohlokwa, bjalo ka ge Tatagwe wa legodimong a dira bjalo. Jesu o ile a hlalosa ka gore: “Tate ó sa dira [šoma] le byalo; ’me le Nna ke a dira.”—Johane 5:17; Mateo 12:42.

Ka gona, ga bjale tekanyo ya bophelo bja motho e lekanyeditšwe. (Psalme 90:10) Eupša Kriste o tsebile gore bophelo bjo bo sa felego lefaseng bo tla thabelwa ka tlase ga pušo ya Mmušo, woo a rutilego barutiwa ba gagwe go o rapelela. Ke ka baka leo Thutong ya gagwe e tumilego ya Thabeng a ilego a kgothaletša gore: “Sa pele Le tsomê mmušô wa Modimo le tokô ya [gagwe]; ké mo Le tl’o xo ekeletšwa ka tšeo ka moka.”—Mateo 6:9, 10, 33.

Mabapi le bophelo ka tlase ga pušo ya Mmušo woo, Beibele e holofetša gore: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; . . . ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.”—Jesaya 65:21, 22.

A tebelelo e botse gakaakang—go thabela ka mo go sa felego bophelo bjo bo akaretšago mošomo o nago le morero le o putsago! Tlhahlobišišo e swanetšego ya boemo bja rena ka noši e ka bontšha gore go nyakega gore re naganišiše gape ka dibopego tša modiro wa rena lehono bakeng sa go efoga dikotsi tšeo di ka diregago tšeo di ka kgomago gampe kgonagalo ya go thabela ga rena “bophelô bya ruri”—bophelo bja nakong e tlago ka tlase ga Mmušo wa Modimo. (1 Timotheo 6:19) Ka gona a re bontšheng ka ditiro tša rena, goba ka se sengwe le se sengwe seo re se dirago, gore re na le tlhompho bakeng sa Yo a re neilego bophelo.—Ba-Kolose 3:23.

[Diswantšho go letlakala 28, 29]

Ka tlase ga Mmušo wa Modimo, batho ba tla thabela mošomo o šireletšegilego le o putsago