Ditšhišinyego tša Lefase, Boporofeta bja Beibele le Wena

PELE ga lehu la gagwe, Jesu o ile a bolela e sa le pele ka ditiragalo le maemo ao a bego a tla nea bohlatse bja gore lefase le le tsene ‘bofelong bja tshepedišo ya dilo.’ O ile a bolela gore nako yeo e be e tla swawa ke dilo tše bjalo ka malwetši, tlhaelelo ya dijo le dintwa tše di akaretšago tekanyo e kgolo ya lefase. O ile a bolela gape ka “dithšišinyêxô tše kxolo” tšeo di bego di tla direga “kua le kua.” (Mateo 24:3, 7, bapiša le NW; Luka 21:10, 11.) Na Jesu o be a bolela ka mehla ya rena?

Ba bantši ba gana taba ye. Ba bolela gore palo ya ditšhišinyego tša lefase ga se ya oketšega e le ka kgonthe nywaga-someng ya morago bjale. Ge e le gabotse, U.S. National Earthquake Information Center e bega gore ditšhišinyego tša lefase tša bogolo bja 7,0 le tše dikgolo go feta moo di ile tša dula e le tše sa “fetogego ka tekanyo e itšego” lekgolong ka moka la bo-20 la nywaga. *

Lega go le bjalo, ela hloko gore go phethagala ga boporofeta bja Jesu ga go nyake go oketšega ga palo goba matla a ditšhišinyego tša lefase. Seo Jesu a bego a se bolela e be e le gore, go be go tla ba le ditšhišinyego tše dikgolo tša lefase dinageng ka go fapa-fapana. Go feta moo, o boletše gore ditiragalo tše di be di tla swaya “mathômô a ditlalêlô.” (Mateo 24:8) Tlalelo ga e lekanywe ka palo ya ditšhišinyego tša lefase goba kamoo go balwago ka gona dipalo-palong tša sekala sa Richter, eupša e lekanywa ka mafelelo ao di bago le ona bathong.

Ka kgonthe, ditšhišinyego tša lefase di bakile ditlalelo tše dintši mehleng ya rena. Ge e le gabotse, lekgolong la bo-20 la nywaga, ba dimilione ba ile ba bolawa goba ba tlogelwa ba se na magae ke dikotsi tše. Ditsebi di bolela gore bontši bja mahu a a ka be a ile a thibelwa. BBC News e bega gore: “Dinageng tšeo di hlabologago, melao ya tša go aga gantši e lebelelwa e se bohlokwa go feta go nyakega ga nywako e agwago kapejana le e sa bitšego kudu bakeng sa go kgotsofatša go nyakega ga mafelo a golago ka lebelo a setoropo.” Ge a hlalosa ka ditiragalo tše pedi tša masetla-pelo tša morago bjale, Ben Wisner yo e lego setsebi sa dikotsi tša metse-setoropong, o re: “Ditšhišinyego tša lefase ga se tšona di bolailego batho ba. Ba bolailwe ke diphošo tša batho, go se šetše, kgobogo le megabaru di kopane.”

Ee, ka dinako tše dingwe dibaki tše šoro tša lehu tšhišinyegong ya lefase ke boithati bja batho le go se šetše. Se se thabišago ke gore dika tše bjalo di ntšhetšwa nyanyeng ke boporofeta bjo bongwe bja Beibele bja mabapi le ‘mehla ya bofelo’ bja tshepedišo ye. Beibele e bolela gore mehleng yeo batho e tla ba “baithati, barati ba tšhelete” le ba “retetšego.” (2 Timotheo 3:1-5, The Amplified Bible) Gotee le mantšu a Jesu mabapi le bofelo bja tshepedišo ya dilo, boporofeta bjo bo nea bohlatse bjo bo lego pepeneneng bja gore re batamela nako yeo ka yona Modimo a tlago go tliša kimologo bathong bao ba gateletšegilego ka baka la dilo ka moka tša gona bjale tše di bakago bohloko le tlaišego—go akaretša le ditšhišinyego tše dikgolo tša lefase.—Psalme 37:11.

Na o ka rata go ithuta mo go oketšegilego ka kholofelo ye yeo e theilwego Beibeleng? Ikopanye le Dihlatse tša Jehofa tša lefelong la geno, goba o ngwalele atereseng e swanetšego e lego go letlakala 5.

[Mongwalo wa ka tlase]