Go Lebeletšana le Tlhohlo ya go ba Mma

Ka ge bana ba emela moloko wa ka moso, gona basadi bao ba ba bopago, bo-mmago bona, ka kgonthe ba swanelwa ke tlhompho, kgodišo le thekgo. Le ge lefase la mehleng yeno le fetiša melaetša e sa swanego mabapi le go ba mma, Beibele e tiišetša gore bana ke tšhegofatšo e tšwago go Modimo gomme e ka ba mothopo wa lethabo bakeng sa batswadi. (Psalme 127:3-5) Lega go le bjalo, Mangwalo ga a hlokomologe ditherešo tša go ba mma. Beibele e bega ka tše dintši tša ditlhohlo tša gona.

Diphetho tše batswadi ba di dirago ka go ba motswadi le go ba mma di na le tutuetšo e tseneletšego le yeo e swarelelago bophelong le semelong tša bana ba bona. Diphetho tše di ka tliša diphetogo tše dikgolo mokgweng wa bophelo wa batswadi, ka gona go nyakega gore di dirwe ka šedi. Di akaretša dipotšišo tše di swanago le: Na mma o swanetše go šomela kgole le legae? Ge e ba go le bjalo, kgole gakaaka’ng? Ke mang a swanetšego go hlokomela bana ge mma a tšwile go ya mošomong? Mafelelong, batswadi ba swanetše go dira seo ba dumelago gore ke se sekaone bakeng sa bana ba bona e bile gape e le seo se lokilego pele ga Modimo.

 Lega go le bjalo, bo-mma ga se ba swanela go ikwa ba e-lwa ba nnoši ntweng ya go dira diphetho tše bohlale. Ba ka hwetša kgothatšo e kgolo go tšwa mantšung a Jesaya 40:11 (NW), yeo e bontšhago gore Modimo o na le kgahlego e kgethegilego dinyakweng tša bo-mma bao ba nago le bana ba banyenyane, bao a tlago go ba “nea tlhokomelo.” Modimo o bontšha kgahlego e bjalo e tseneletšego ka go nea ka Beibeleng dithuto tše mmalwa tšeo di ka dirago gore go ba mma e be mo go thabišago le mo go atlegago.

❖ E-ba le Teka-tekano: Bakriste ba swanetše go tsebja ka teka-tekano ya bona. (Ba-Filipi 4:5, NW) Janet Penley, yo e lego mongwadi le mma, o ile a ithuta bohlokwa bja molao wo wa motheo. O re: “Ke thomile go ba mma ke e-na le ditebelelo tše di phagamego kudu. Ke be ke ikemišeditše go ba mma yo kaone go feta le ge e le ofe yo a kilego a ba gona. Ke ile ka bala dipuku ka moka gomme ka theetša ditsebi ka moka. Eupša go e na le go ikwa ke le yo a atlegilego le yo a kgonago, ke ile ka feleletša ke ikwa ke sa swanelege gotee le go ba yo a gateletšegilego.” O hlalosa gore “go leka go phethagatša ditebelelo tša ba bangwe le go leka go itumelelanya le boemo bjo bongwe ‘bjo bo phethagetšego’ go ka fokodiša phišego gomme gwa baka go tshwenyega le maikwelo a molato.”

❖ Nolofatša dilo: Makasine wa Newsweek o ngwadile gore: “Seo malapa a ipeago kotsing ya go lahlegelwa ke sona bophelong bjo bja leema-ema ke phihlelo e kgethegilego ya bjaneng le lethabo la bophelo bja lapa.” Ke ka baka leo bo-mma ba bantši ba dumago bophelo bjo bonolo. O ka kgona go fihlelela se bjang? Sa pele, bea dilo tšeo di tlago pele, o lebiše tlhokomelo go ‘dilo tšeo di lego bohlokwa kudu,’ tše di akaretšago nako le tlhokomelo ya motho ka noši yeo bana ba gago ba e nyakago. (Ba-Filipi 1:10, 11, bapiša le NW.) Sa bobedi, hlahloba tsela ya gago ya go phela. Mo gongwe o ka swanelwa ke go beela ka thoko mediro le dithoto tšeo di sa nyakegego e le ka kgonthe.

Selo sa bohlokwa kudu bophelong  bja gago ke sefe? Na ke go ba le dilo ka moka ka nako e tee goba na dipakane tše dingwe di ka kgona go šuthišetšwa pele ge o le gare o leka go fihlelela tše dingwe? Carolyn, mma yo a nago le dilo tše di bonagalago tšeo di lekanyeditšwego, o bolela kamoo a kgonago go lebeletšana le boemo ka gona: “Ke boloka dilo di le bonolo gomme ke fokotša ditshenyagalelo.” Gloria, mma yo a nago le bana ba bararo, o a gopola: “Re be re se na tšhelete ya go reka diaparo tša maina a tumilego, eupša ke be ke rokela bana diaparo gomme ke ba botša gore tše e be e le tše kgethegilego ka gobane go be go se na motho yo a nago le tšona.”

Lentšu la Modimo le re “molôtola-thlaloxanyô ó tlo bôna tše di botse.” (Diema 19:8) Tlhaologanyo e nyakega bakeng sa go seka-seka mehuta yeo e sa felego ya mediro ya boiketlo, dilwana-lwana gotee le ditshekamelo tšeo di imelago bo-mma le bana. Judith, mma yo a tšwago Afrika Borwa, o re: “Re dula re kgobelelwa ka ditšweletšwa tše difsa, thekinolotši e kaone gotee le ditirelo tše di oketšegilego!” Angela, mmago bana ba bane yo a tšwago Jeremane, o lebeletšana le tlhohlo yeo ka mokgwa wo: “O swanetše go hwetša gore ke selo sefe sa bohlokwa le seo e lego sa mohola go wena gomme  o thuše bana ba gago go dira se se swanago.”

❖ Dira diphetogo tše di kgonegago: Beibele e lemoša ka gore: “Diriša tlhaologanyo le kahlolo e botse.” (Diema 3:21, Contemporary English Version) Ge e ba ga bjale o šoma kgole le gae, na lapa la gago le ka kgona go phela feela ka mogolo wa monna wa gago? Bakeng sa go go thuša go araba potšišo ye, hwetša gore o šalelwa ke bokae mogolong ka morago ga go ntšha metšhelo, tšhelete ya tlhokomelo ya bana, tšhelete ya maeto a go ya le go boa mošomong, diaparo, go jela mabenkeleng a go jela gotee le ditshenyagalelo tše dingwe. Gape, go ka ntšhwa motšhelo o mogolo mogolong wa monna wa gago ge e ba megolo ya lena ge e kopantšwe e dira gore le hwetše mogolo o phagamego kudu. O ka makatšwa ke go bona gore go šala e nyenyane gakaakang.

Ba bangwe ba šoma diiri tše di sego kae goba kgaufsi le gae, e lego seo se ka bolelago go hwetša tšhelete e nyenyane eupša o e-ba le nako e ntši le bana. Ge e ba o kgetha go tlogela go šoma le gona ge e ba mošomo wa gago e bile wa bohlokwa go wena bakeng sa go go nea boitlhompho bja gago le maikwelo a kgotsofalo ya gore o fihleletše se sengwe, o ka nagana ka tsela yeo o ka kgomarelago dikarolo tše tša bohlokwa o sa le gae.

❖ Hwetša thušo: Lentšu la Modimo le bontšha leboelela gore ‘go lla bakeng sa thušo’ go ka tliša mafelelo a mabotse. (Ekisodo 2:23, 24, bapiša le NW; Psalme 34:15, bapiša le NW.) Sello sa mma sa go nyaka thušo se swanetše go hlohleletša thušo ya monna wa gagwe. Ka tirišano ya gagwe le ka kgona go thoma mokgwa wa go abelana mešomo ya ka gae e le gore le kgone go ba le nako ya go phethagatša dipakane tšeo le di beilego gotee—tše bjalo ka go ipha nako bakeng sa bana ba lena. Ge e ba go kgonega, mma o swanetše gape a kgopele thekgo sehlopheng sa batho, go akaretša ba lapa le bagwera bao ba ka botwago, bao ba nago le dikgahlego le dipakane tšeo di swanago le tša gagwe.

Bo-mma ba bantši ba hwetša thekgo e bohlokwa go tšwa phuthegong ya Bokriste ya lefelong ya badumedi-gotee le bona. María, mmago bana ba bararo, o ile a lemoga gore “go batamela kgaufsi le phuthego” ke e nngwe ya ditsela tšeo “Modimo a re bontšhago lerato le kwelobohloko le go re bontšha gore o tshwenyega ka rena.”

❖ Iphe nako ya go ikhutša: Gaešita le Jesu, motho yo a phethagetšego yo a nago le matla a magolo, o ile a laletša barutiwa ba gagwe gore ba ye “mo xo sexo batho, [ba] khutšê ka xo nyane.” (Mareka 6:30-32) Go atlega bjalo ka mma go ithekgile ka bokgoni bja gago bja go dula o leka-lekane dinakong tšeo di go nyakago mo gontši. Ke therešo gore bana ba gago ba a go nyaka, eupša gape ba nyaka gore le wena o be yo a thabilego le yo a kgotsofetšego. O nyaka go ikhutša mo go leka-lekanego.

Angela, yo go boletšwego ka yena pejana, o na le thulaganyo ya go ikhutša: “Ke beela nako ye e homotšego ka thoko mesong. Ke tšea bonyenyane seripa sa iri ke nnoši. Nna le monna wa-ka re ba gotee mantšiboeng a tee goba a mabedi ka beke ge re lebeletše gore bana ba rena ba tla ya go gongwe ka ntlong gomme ba dire selo se sengwe ba sa dire lešata moo. Ka gona re ka kgona go fetša iri re le noši.”

❖ Etiša boemo bja moya pele: Go etšwe hloko gore ditlhohlo tša go ba mma di gakatšwa ke go lahlegelwa ke pono ya morero le go hloka dilo tšeo di tlago pele. Malapa a Bakriste a hwetša lethabo ge a swarišana go etiša thato ya Modimo pele maphelong a bona. Moapostola Paulo o ngwadile gore: “Se se holaxo xohle ké borapedi [“boineelo go Modimo,” NW] ka xe bo na le kholofedišô ya bophelô byono le ya byo bo tl’o xo tla.” (1 Timotheo 4:8) Lapa leo le phelago ka boineelo go Modimo le leo le latelago tlhahlo ya Modimo yeo e lego ka Beibeleng le tla hwetša lethabo. Le ge e le setho se tee sa lapa se se dirišago melao ya motheo ya Beibele, dilo di ba kaone go feta ge go se motho yo a dirago bjalo.

Adele, mma wa Mokriste yo a šomago ka nako e tletšego, o bone mehola ya go sekamela dilong tša moya. O re: “Re na le tlhahlo e kgolo le boitsebišo ka dipukung tše di theilwego Beibeleng tšeo di re rutago ka boemo bjoo bana ba rena ba lebeletšanego le bjona le kamoo re ka ba thušago ka gona. Go bona bana ba gago ba arabela go seo o ba fepago ka sona moyeng go dira gore se e be sa mohola. Ge o bona dilo tše dinyenyane le tšeo di kgothaletšago tšwelopele boitshwarong bja bona le tseleng ya bona ya go nagana, o lemoga gore ba amogela tlhahlo le gore maiteko a gago ke ao a atlegago.” *

Ee, go a kgonega go kitima lebelo leo le tletšego mapheko la go ba mma ka katlego. Modimo ka noši o nea kgonthišetšo yeo e homotšago ya gore maiteko a bo-mma ba mafolofolo le bao ba ikgafago ba ba mmotago e ka se be a lefeela. Bo-mma bao ba hlagolelago tswalano ya motho ka noši le yena ba ka hwetša khomotšo kholofetšong ya gagwe ya gore o ‘nea ba ba lapilego matla.’—Jesaya 40:29.

[Mongwalo wa ka tlase]

[Lepokisi go letlakala 10]

Tutuetšo ya Mma

Bjalo ka mma, ka dinako tše dingwe o ka makatšwa ke bogolo bja tutuetšo yeo o nago le yona bophelong bja ngwana wa gago. Ka dinako tše dingwe, tutuetšo ya dithaka, barutiši, boithabišo, dipapadi tša bidio gotee le mmino di ka bonagala di e-na le tutuetšo e kgolo kudu go feta ya gago.

Nagana ka mohlala wa Jogebeda, mmago Moše. O phetše dinakong tše thata kudu gomme o be a se na seo a ka se bolelago go seo se bego se tla diragalela morwa wa gagwe. Lega go le bjalo, o ile a šomiša dibaka tšeo a bego a e-na le tšona bakeng sa go tutuetša kgolo ya gagwe. Sa pele, o ile a bontšha tumelo ka sebete ka go gana go dumelela gore Moše a bolawe. Modimo o ile a putsa tumelo ya gagwe e sego feela ka go boloka bophelo bja ngwana eupša gape le ka go rulaganyetša maemo ao a ilego a dumelela Jogebeda go dira e le moledi wa gagwe—gotee le mmagwe.—Ekisodo 1:15, 16; 2:1-10.

Go molaleng gore Jogebeda o thušitše go bopa semelo sa morwa wa gagwe. Taba ya gore Moše yo a gotšego o ile a ikwa a rata ba-Hebere le Modimo wa bona ka mo go tiilego go sa šetšwe dikgokagano tša gagwe tša ka bogošing kua Egipita ke bohlatse bja tutuetšo ya batswadi ba gagwe nywageng ya gagwe ya bjaneng.—Ba-Hebere 11:24-26.

Bjalo ka mma, mohlomongwe o na le dibaka tše dintši go feta Jogebeda bakeng sa go ka tutuetša ngwana wa gago. Na o šomiša sebaka sa nywaga e sego kae e mekopana ya nakong ya bjana ya bana ba gago go ba nea thuto e swarelelago ya Modimo? Goba na o dumelela setšo seo se tlwaelegilego gore se be le tutuetšo e kgolo kgolong ya ngwana wa gago?

[Diswantšho go letlakala 10]

Akaretša ba bangwe mošomong wa ka gae, beela ka thoko nako ya go ba noši le go etiša boemo bja moya pele