Mediro e Mentši ya Bo-mma

4:50 a.m. Ngwana, Alex, yoo a llago e bile a swerwe ke boroko, o namelela ka thoko ga mmagwe, Helen. Bana ba bangwe ba babedi—Penny (5) le Joanna (12)—le monna wa gagwe, Nick ba robetše. Helen o kuka Alex gomme o mo tsenya ka malaong le go mo nyantšha. Ga a sa kgona go swarwa ke boroko gape.

5:45 a.m. Helen o sepela ka go nanya go ya ka khitšhing, o dira kofi gomme o a bala.

6:15–7:20 a.m. Nick o a tsoga. Helen o tsoša Penny le Joanna, o dira difihlolo gomme o dira le mošomo o mongwe wa ka gae. Ka 7:15, Nick o ya mošomong gomme o tlogela Joanna sekolong. Mmago Helen o a fihla bakeng sa go tlo hlokomela Alex.

7:30 a.m. Helen o tlogela Penny sekolong sa bomapimpana. Leeto la go ya mošomong le nea Helen nako ya go nagana ka therešo ya go ba mma. O re: “Ke mošomo o thata kudu woo nkilego ka o dira.”

8:10 a.m. Helen o lebeletšane le tafola yeo e tletšego wa go falala ka mešomo. O tshwenyegile ka gore go ima gape go ka bolela go lahlegelwa ke mošomo wa gagwe. Lapa le nyaka mogolo o oketšegilego.

10:43 a.m. Ka morago ga gore Helen a bee mogala fase—mogala o lego mabapi le bana ba gagwe—mošomi-gotee le yena Nancy o mo homotša ka gore: “O ba swere ka tsela e botse kudu.” Megokgo e theoga dithameng tša Helen.

12:05 p.m. Helen o ja sangwetši ke moka a nagana ka nako ya pele ga ge morwedi wa gagwe wa pele a ka belegwa. Morago kua o be a e-na le mediro yeo a bego a rulaganyetša go e dira ka nako ya gagwe “ya go se dire selo.” O fetša ka gore: ‘A ditebelelo tšeo e sego tša kgonthe!’

3:10 p.m. Ka morago ga go araba megala e sego kae e tšwago gae ka ga makatika a Alex, Helen o bolela ka tlemo e kgethegilego yeo a nago le yona le bana ba gagwe ka gore: “Ga se ka ka ka ba le lerato le le swanago le le bakeng sa motho yo mongwe.” Go tsenelela mo ga maikwelo go ile gwa mo thuša go fenya mathata a mathomong le ao a bego a sa lebelelwa.

5:10 p.m. Ka morago ga go lata Joanna, Helen o phetha mabaka a mangwe. O leletša Nick mogala gomme o mo gopotša gore ke sebaka sa gagwe sa go ya go tšea Penny.

6:00–7:30 p.m. Ge a boetše gae, Helen o lokolla makgolo mošomong wa gagwe wa go ‘hlokomela Alex,’ o dira mošomo wa ka gae gotee le go apea dijo tša mantšiboa. Ge a botšišwa ka dinyakwa tše dikgolo tša ngwana, Helen o bolela ka go fegelwa gore: “Ngwana ga a nyake selo ge e se go nyaka mmagwe ka botlalo: matsogo a gagwe, mmele gotee le lebese gape le go mo hlora boroko.”

 8:30–10:00 p.m. Helen o thuša Joanna ka mošomo wa gagwe wagae wa sekolo gotee le go nyantšha Alex. Ge Nick a balela Penny ka seripa sa iri , Helen o dira mošomo o mongwe wa ka gae.

11:15 p.m. Ka morago ga gore Penny le Joanna ba robale, Alex o sa phafogile a kukilwe ke mmagwe, eupša ka morago ga moo o swarwa ke boroko mafelelong. Helen o botša Nick yo a otselago gore: “Ke nagana gore o šetše a loketše go ka ya malaong.”