Pono ya Beibele

Na Bakriste ba Swanetše go Lebelela Tšhireletšo ya Modimo?

Beibele gantši e bolela ka bokgoni bja Modimo bja go šireletša barapedi ba gagwe kotsing. Kgoši Dafida o itše: “Morêna, nnamolêlê mo bathong ba babe, O nkefošê banna ba bašoro.” (Psalme 140:1) Lehono ba bantši ba barapedi ba Modimo bao ba ilego ba lebeletšana le bošoro, bosenyi goba dikotsi tša tlhago ba ile ba phonyokga lehu le dikgobalo ka lešobana la nalete. Ba bangwe ba ile ba ipotšiša ge e ba Modimo a ile a ba nea tšhireletšo ya mohlolo ditiragalong tšeo, kudu-kudu ka ge go e-na le ditiragalo tše dingwe moo batho ba boifago Modimo ba sego ba phonyokga eupša ba ile ba lebeletšana le masetla-pelo a magolo, gaešita le lehu le šoro.

NA Jehofa Modimo o šireletša batho ba bangwe dikotsing eupša a se šireletše ba bangwe? Na re swanetše go lebelela go hwetša phološo ya mohlolo bošorong le dikotsing lehono?

Tšhireletšo ya Mohlolo Dipegong tša Beibele

Beibele e na le dipego tše dintši tšeo go tšona Modimo ka mohlolo a ilego a tsena ditaba gare bakeng sa barapedi ba gagwe. (Jesaya 38:1-8; Ditiro 12:1-11; 16:25, 26) Mangwalo gape a bolela ka tsela yeo ditiragalong tše dingwe bahlanka ba Jehofa ba ilego ba se ke ba phološwa dikotsing. (1 Dikxoši 21:1-16; Ditiro 12:1, 2; Ba-Hebere 11:35-38) Ka gona, go molaleng gore Jehofa a ka kgetha go nea tšhireletšo ka baka la lebaka le itšego goba morero o itšego nako efe le efe yeo a kgethago go dira bjalo. Ka gona, ge Bakriste e le motho ka o tee ba sa phološwe ditekong, ga se ba swanela go phetha ka gore Modimo o ba lahlile. Re swanetše go amogela kgonthe ya gore dilo tše mpe di tla direga, gaešita le go diragalela bahlanka ba botegago ba Jehofa. Ke ka baka la’ng go le bjalo?

Lebaka Leo ka Lona Dilo tše Mpe di Diragalelago Bahlanka ba Botegago ba Modimo

Lebaka le lengwe ke gore ka moka ga rena re abetše sebe le go se phethagale go tšwa go Adama  le Efa. Ka gona, re lebeletšane le tebelelo ya bohloko, tlaišego le lehu. (Ba-Roma 5:12; 6:23) Lebaka le lengwe ke gore re phela mehleng ya bofelo. Beibele e hlalosa batho ba mehleng ya rena e le “ba-hlala-leratô, babata-sekxoro, . . . dihwirihwiri, le ba ba sa tsebexo xo ithswara, manaba a tše boló.” (2 Timotheo 3:1-5) Bohlatse bja se ke go aparela ga ditiro tša go kata, go thopša, polao gotee le ditiro tše dingwe tše šoro tša bosenyi.

Bahlanka ba bantši ba botegago ba Modimo ba phela le go šoma gare ga batho ba šoro gomme ka dinako tše dingwe ba fetoga bahlaselwa ba bona. Re ka ikhwetša re le boemong bjo bo beago bophelo kotsing feela ka gobane re le lefelong le le fošagetšego ka nako e fošagetšego. Go feta moo, re ka lebeletšana le therešo yeo e ilego ya bolelwa ke Salomo ge a be a re “nako le ditiragalo tše di sa letelwago di ba wela bohle.”—Mmoledi 9:11, NW.

Go oketša moo, moapostola Paulo o boletše gore Bakriste e be e tla ba bahlaselwa ba tlaišo ka gobane ba rapela Modimo. O itše: “Ké tše di tl’o xo dirêxêla bohle ba ba rataxo xo phela ka borapedi ka Kriste Jesu; le bôná ba tlo hlomarêlwa.” (2 Timotheo 3:12) Nywageng ya morago bjale se se ile sa ipontšha e le sa therešo dinageng tše dintši.

Ka gona, batho bao ba tšhabago Modimo ga se ba lokologa mafelelong a bošoro, bosenyi, dikotsi tša tlhago goba lehu la kotsi. Sathane o lekile go šomiša kgang ya gore Jehofa o ageleditše batho ba Gagwe ka legora gore ba phele bophelo bjoo bo se nago masetla-pelo. (Jobo 1:9, 10) Bjoo ga se bjona boemo. Lega go le bjalo, re ka kgodišega gore le ge Jehofa a sa re phološe ka mohlolo boemong bjo itšego, o nea batho ba gagwe tšhireletšo.

Kamoo Jehofa a Šireletšago Batho ba Gagwe ka Gona Lehono

Ka Lentšu la gagwe, Jehofa o nea tlhahlo ya gagwe yeo e šireletšago batho ba gagwe. Boemo bja moya gotee le tsebo ya Beibele di ka re nea kahlolo e botse le monagano o hlaphogetšwego, tšeo di ka re thušago go efoga diphošo tšeo di sa nyakegego le go dira diphetho tše bohlale. (Psalme 38:4; Diema 3:21; 22:3) Ka mohlala, go kwa keletšo ya Beibele mabapi le boitshwaro bjo bobotse bja botona le botshadi, megabaru, kgalefo gotee le bošoro go efošitše Bakriste masetla-pelong a mantši. Le gona, ka go se be le segwera sa kgaufsi le batho ba babe, re ka se be moo masetla-pelo a tlago go wela gona—lefelong le le fošagetšego ka nako e fošagetšego. (Psalme 26:4, 5; Diema 4:14) Bao ba phelago ka melao ya motheo ya Beibele ba thabela tsela e phagametšego tšohle ya bophelo, yeo gantši e feleletšago ka bophelo bjo bobotse bja monagano le bja mmele.

Seo se kgothatšago le go feta ke tsebo ya go tseba gore le ge Modimo a ka dumelela dilo tše mpe di direga, o tla nea barapedi ba gagwe matla ao a nyakegago a gore ba kgone go kgotlelela. Moapostola Paulo o re kgonthišetša ka gore: “Modimo ke Mmotexi; a ka se kê a lesa la lekwa ka tše di kaxo Le palêla; xotee le molekô ó tlo fêla a bea sebaka sa xo tlo efoxa, xore Le kxônê xo kxôtlêlêla.” (1 Ba-Korinthe 10:13) Beibele le yona e re holofetša “matla a fetišago a tlwaelegilego” go re thuša go kgotlelela masetla-pelo.—2 Ba-Korinthe 4:7, NW.

Modimo o Dira Dilo ka go Dumelelana le Thato ya Gagwe

Na Bakriste ba swanetše go lebelela gore Modimo a ba phološe ka mohlolo tiragalong e nngwe le e nngwe ya masetla-pelo ao a ba ukamego? Pego ya Beibele ga e thekge tebelelo e bjalo.

Ee, Jehofa Modimo o be a ka kgetha go tsena ditaba gare ka go lebanya bakeng sa bahlanka ba gagwe. Ge e ba motho le ge e le mang a dumela gore o phologile kotsi ka baka la go tsena ga Modimo ditaba gare, ga se a swanela go solwa. Eupša ge e ba Jehofa a kgetha go se tsene ditaba gare, se ga se sa swanela go tšewa e le sešupo sa go hloka kgahlego ga gagwe.

Eka re ka ba le kholofelo ya gore go sa šetšwe teko goba boemo le ge e le bofe bjoo re lebeletšanego le bjona, Jehofa o tla nea tšhireletšo ya gagwe bakeng sa bahlanka ba gagwe bao ba botegago, e ka ba ka go široša boemo, ka go re nea matla a go bo kgotlelela goba ge e ba re ka hwa, ka go re tsošetša bophelong bjo bo sa felego lefaseng la gagwe le lefsa.—Psalme 37:10, 11, 29; Johane 5:28, 29.