Bafsa ba a Botšiša . . .

Nka Bolela Bjang go Bao ke Tsenago le Bona Sekolo?

“Ke be ke tšwele ke le boboleding ge ka mo go sa letelwago ke kopana le motho yoo ke mo tsebago. Ke ile ka tšhoga! Motho yo ke bego ke šoma le yena o ile a swanelwa ke gore a tsene ditaba gare gomme a bolele legatong la-ka.”—Alberto.

 “Ke be ke tseba gore yo mongwe wa bao ke tsenago le yena klaseng o be a dula mmileng woo, ka gona ke ile ka dira gore ngwanešo a bolele dintlong ka moka. Ka morago ga nako o ile a gateletšega ka tsela e itšego gomme a nkgopela gore ke bolele ntlong e latelago. Ke ile ka kokota, gomme—aga—e be e le yena! Ke be ke tšhogile kudu!”—James.

BAFSA gantši ba nagana gore ga se “tlwaelo” go boledišana ka bodumedi. Lega go le bjalo, gare ga Bakriste ba therešo, bafsa ba thabela tokelo ya bona yeo ba e neilwego ke Modimo ya go abelana le ba bangwe tumelo ya bona. Ka go rialo bafsa ba dikete ba Dihlatse tša Jehofa ba tšea karolo modirong wa go bolela ka ntlo le ntlo. Eupša ba bangwe ba dira bjalo ba tšhogile gore ba tla gahlana le motho yo ba mo tsebelago sekolong. Jennifer o re: “Ke sa dutše ke tšhoga ge ke gahlana le batho bao ke tsenego le bona sekolo,” le ge e šetše e le nywaga a alogile sekolong se se phagamego.

Ge e ba o le Mokriste yo mofsa, o ka ikwa ka tsela e swanago ka dinako tše dingwe. Ke therešo gore ka moka ga rena re tšhaba go ganetšwa, ka gona ke ga tlhago go ikwa re tshwenyegile ge go e-tla tabeng ya go bolela ka bodumedi le bao re tsenago le bona sekolo. * Eupša ga go na lebaka la gore o dumelele gore letšhogo le go thothomediše. Na o gopola monna yoo Beibele e mmitšago “Josefa wa Arimathea”? O be a dumela dilo tšeo a bego a ithutile tšona go Jesu. Lega go le bjalo, Beibele e hlalosa Josefa e le “morutiwa wa Jesu, xomme à ikutile ka xo boifa Ba-Juda.” (Johane 19:38) Bjale na o be o tla ikwa bjang ka mogwera yoo a bego a nyaka go boloka segwera sa lena e le sephiri? (Luka 12:8, 9) Ka gona, ga se mo go makatšago gore Modimo o lebeletše gore Bakriste ka moka ba dire “boipolelo bja phatlalatša” bja tumelo ya bona. (Ba-Roma 10:10, NW) Se se be se tla akaretša go bolela le bafsa sekolong seo o tsenago go sona.

Josefa wa Arimathea o ile a fenya dipoifo tša gagwe, bonyenyane go fihla bokgoleng bja go tsoma tumelelo ya go boloka mmele wa Jesu. O ka fenya bjang dipoifo tša gago?

Go Hlagolela Phišego ya go Bolela

Ka kgonthe moapostola Paulo o be a se na dihlong tša go botša ba bangwe ka tumelo ya gagwe. Go Ba-Roma 1:15, o itlhalosa e le yo a fišegelago go bolela molaetša wa Beibele. Ke eng seo se bakilego phišego e bjalo? Bjalo ka ge go ngwadilwe go temana ya 16 Ba-Ro 1:16, o re: “Xobane xa ke na masêmê [“dihlong,” NW] ka Ebangedi ya Kriste, hleng è le matla a Modimo a xo phološa mang: le mang e a dumêlaxo.” Go thwe’ng ka wena? Na o ikgodišitše ka therešo e le ka kgonthe? (Ba-Roma 12:2) Na wena ka noši o kgodišegile gore molaetša wa Beibele ke “matla a Modimo a xo phološa”?

Go kopanela feela dibokeng tša Bokriste le batswadi ba gago ga se gwa lekana. Mofsa yo mongwe yo a bitšwago Deborah o re: “Go bonolo go fo ya dibokeng ka gobane batswadi ba gago ba go botša gore o dire bjalo. Eupša ge batho ba mpotšiša dipotšišo ka Beibele, ke be ke sa tsebe gore ke hlalose bjang.” Mofsa yo a bitšwago Mi Young le yena ka mo go swanago o dumela ka gore: “Re swanetše go ikgodiša rena ka noši gore ye ke therešo.”

Ke eng seo se ka go tutueletšago go abelana tsebo ya gago ya Beibele le ba bangwe? Ka go ithuta yona ka noši. Mofsa yo a bitšwago Sean o re: “Ge o thoma go dira thuto ya motho ka noši ya Beibele, o thoma go dira therešo gore e be ya gago. O ithuta bakeng sa go ikhola wena ka noši.” Ke therešo gore ga se batho ka moka bao ka tlhago ba ratago go ithuta. Shevon o dumela ka gore: “Ga ke rate go bala. Ka gona mathomong go be go le thata go nna go bala Morokami le Phafoga! goba go bala Beibele letšatši le lengwe le le lengwe. Eupša ge nako e dutše e e-ya, ke ile ka thoma go dira bjalo.”

Mafelelo a go ithuta ka mafolofolo mo go bjalo ke afe? Moapostola Paulo o re: “Tumêlô e tšwa xo kweng.” (Ba-Roma 10:17) Ge tumelo le kgodišego tša gago di dutše di gola, ka kgonthe boemo bja gago bja kgopolo bo tla fetoga. Mofsa wa mo-Brazil yo a bitšwago Elisângela o phethile ka gore: “Go ba Mokriste ke kgodišo, e sego selo seo se swanetšego go go leša dihlong.” Ka kgonthe, ge tumelo ya gago e dutše e gola, o ikhwetša o gapeletšega go bolela le ba bangwe—go akaretša le bao o tsenago le bona ka klaseng. Paulo o itše: “’Me . . . re a holofêla; ké ka ’baka leo re bolêlaxo.” (2 Ba-Korinthe 4:13)) Ka ntle le moo, o ka ‘hlatswega mading’ a bohle bjang ge e ba o tima batho ba bafsa bao o ba bonago letšatši le lengwe le le lengwe tsebo yeo e neago bophelo?—Ditiro 20:26, 27, PK.

Lega go le bjalo, bafsa ba bangwe ba Bakriste ba ikwa ba sa hlamelwa go ka bolela le ba bangwe ka Beibele. Mofsa yo mongwe yo a bitšwago Joshua o re: “Ge e ba o sa tsebe seo o ka se bolelago, go leka go dira boboledi ga se mo go thabišago.” Gape, go hwetša kwešišo e tseneletšego ka Beibele go tla go thuša go dira se ka bokgoni. (2 Timotheo 2:15) Diphuthegong tša Dihlatse tša Jehofa, bafsa ba ka batamela bagolo ba phuthego gomme ba kgopela thušo ya motho ka noši bakeng sa go kaonefatša bokgoni bja go ruta. Mofsa yo mongwe wa mo-Jeremane yo a bitšwago Matthias o re: “Ge ke be ke thoma go boledišana le batho e le ka kgonthe—e sego feela go ba nea puku ya Beibele—ke ile ka thoma go thabela go bolela.”

Sa mafelelo, o ka rapelela gore Modimo a go thuše go bolela ka sebete. (Ditiro 4:29) Moapostola Paulo o ile a hwetša thušo ya Modimo tabeng ye. Go 1 Ba-Thesalonika 2:2, o re: “Re be re na le mafolofolo ka Modimo wa rena, ra Le botša Ebangedi ya Modimo rè le bothateng byo boxolo.” Go ya ka puku e  nngwe ya ditšhupetšo, polelwana ye e ka fetolelwa e le, “Modimo o ntšhitše letšhogo dipelong tša rena.” Ka gona ke ka baka la’ng o sa rapele le go kgopela Modimo gore a ntšhe letšhogo pelong ya gago?

Go Itsebiša

Ka go dumelelana le thapelo yeo, o ka gata mogato o mogolo kudu. Mofsa wa mo-Brithania yo a bitšwago Chic o eletša ka gore: “Botša bao o tsenago le bona sekolo gore o Mokriste.” Ga go nyakege gore o be ‘morutiwa wa ka sephiring.’ Mofsa yo a bitšwago Rebecca o dumela ka gore pele o be a tšhošwa ke go gahlana le motho yo a mo tsebago mošomong wa boboledi. Eupša o bolela gore o utolotše gore “ge e ba o ba botša gore o Mokriste le gore o sepela ka ntlo le ntlo, ka dinako tše dingwe ba ka botšiša gore, ‘Ka gona, na o tla ka wa tla ga gešo?’”

Eupša ke ka baka la’ng o swanetše go emela sebaka sa gore o gahlane le yo mongwe? Tsoma dibaka tša go botša ba bangwe ka tumelo ya gago sekolong. Gopola potšišo yeo e ilego ya botšišwa ke moapostola Paulo: “Ba tlo dumêla bya’ng xe ba sešo ba Mo kwa? Ba tlo kwa bya’ng, xe xo se sexoeledi?” (Ba-Roma 10:14) O boemong bjo bokaone kudu bja go thuša bao o tsenago le bona ka klaseng gore ba kwe. Mofsa yo a bitšwago Iraida o re: “Sekolo ke lefelo le lebotse la go bolela leo le ka fihlelelwago ke rena barutwana feela.” Ka gona bafsa ba bantši ba diriša ka mo go holago boemo bja bona ka go nea bohlatse ka mo go sa rulaganyetšwago.

Lega go le bjalo, ka dinako tše dingwe go ba le mešomo ya ka klaseng yeo e go neago sebaka sa gore o abelane le ba bangwe ditherešo tša Beibele. Ngwanenyana wa mo-Brithania yo a bitšwago Jaimie o anega gore: “Re be re ahla-ahla taba ya tlhagelelo ka klaseng ya thuta-mahlale, gomme ke ile ka bolela ka ditumelo tša-ka. Yo mongwe wa bašemane o ile a nkwera gomme a bolela gore Dihlatse tša Jehofa ga di bohlale gomme ga di swanelwe ke go ba gona tshepedišong ya sekolo. Lega go le bjalo, di tloga fase feela bana ba bangwe ka klaseng ba ile ba thoma go nkemelela.” Go bonagala botumo bja gagwe bjalo ka Mokriste yo a beago mohlala bo ile bja ba le mafelelo a mabotse. Jaimie o oketša ka gore: “Ka baka la se, ke ile ka feleletša ke sepedišitše kopi ya puku ya Is There a Creator Who Cares About You? go yo ke tsenago le yena ka klaseng.” *

Ngwanenyana wa nywaga e 14 kua Romania yo a bitšwago Roxana o anega phihlelo e swanago: “Morutiši wa-ka o ile a tsebiša gore go be go tla ba le poledišano ya klase mabapi le bjala, motšoko le dihlare-tagi. Ka gona ke ile ka tla le tokollo ya Awake! ya March 22 , 2000 [tokollo ya April 8, 2000 ka Sepedi], ya sehlogo se se rego: ‘Kamoo o ka Tlogelago go Kgoga ka Gona.’ Yo mongwe wa bao ke tsenago le bona ka klaseng o ile a bona makasine, a o tšea, gomme a gana go o bušetša go nna. Ka morago ga go o bala, o ile a bolela gore o ikemišeditše go tlogela go kgoga.”

Ga se ka dinako tšohle o ka gahlanago le karabelo e bjalo e kgahlišago. Eupša Mmoledi 11:6 e re kgothaletša gore: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela.” Le ge go se na karabelo e kgahlišago, go abelana le ba bangwe ditumelo tša gago sekolong go tla thea motheo bakeng sa poledišano e kgahlišago ge e ba o ka gahlana le yoo o tsenago le yena sekolo bodireding bja ntlo le ntlo. Mofsa wa mo-Brithania yo a bitšwago Jessica o re: “Go nea bohlatse go bao o ba tsebelago sekolong ge e le gabotse go bonolo kudu ka gobane o šetše o tlwaelane le bona.” O ka makatšwa ke go bona kamoo ba bangwe ba bao o tsenago le bona sekolo ba ka ratago go tseba ka ditumelo tša gago.

Ke therešo gore ga se ka moka bao ba ka go amogelago ka mokgwa o botho. Eupša Jesu o neile keletšo ye e šomago: “Xe motho a sa Le amoxele, a xana xo kwa le dipolêlô tša lena, Le tloxê lapeng leo, . . . Le hlohlorê le lerole la ’naong tša lena.” (Mateo 10:14) Ka mantšu a mangwe, o se ke wa tšeela kganetšo hlogong. Itshepelele ka khutšo gomme o nyake motho yo mongwe yoo a ikemišeditšego go theetša. Ka nako e nngwe o tla hwetša ba dipelo tše ikokobeditšego bao ba swerwego ke tlala ya therešo le bao ba ikemišeditšego go theetša. Na e ka se be mo go putsago ge e ba yo mongwe wa bona e be e ka ba morutwana-gotee le wena? Ge e ba go le bjalo, o tla thabela gore o fentše letšhogo la go abelana tumelo ya gago le bao o tsenago le bona ka klaseng.

[Mengwalo ya ka tlase]

[Ntlhakgolo go letlakala 16]

“Ge o thoma go dira thuto ya motho ka noši ya Beibele, o thoma go dira therešo gore e be ya gago.”—Sean.

[Seswantšho go letlakala 14]

O se ke wa tšhoga go itsebiša o le Mokriste

[Seswantšho go letlakala 14]

Mešomo ya ka klaseng gantši e nea dibaka bakeng sa go abelana le ba bangwe ditherešo tša Beibele