Bafsa ba a Botšiša . . .

Ke ka Baka La’ng go le Thata Gakaakaa go Phedišana le Motho yo ke Dulago le Yena ka Phapošing?

“Nna ke sethakga, le gona sethakga sa makgonthe. Eupša ge ke boela gae, ke hwetša motho yo ke dulago le yena ka phapošing a rapaletše lebatong a bogetše TV—dipampiri le di-“popcorn” di gašane gohle. Nako le nako ge ke e-tla gae, ke ba le seswantšho monaganong wa-ka ka seo ke tlago go se bona gomme ka ipotša gore, ‘Ga ke nyake go tsena ka mola.’”—David.

“Motho yo ke bego ke dula le yena ka phapošing e be e le ngwana wa go lengwa. Ke nagana gore o be a nagana gore o na le mošomedi wa mosadi le wa monna bao ba bego ba dula le rena. Ka dinako tšohle o be a nyaka gore dilo di dirwe ka tsela ya gagwe.”—Renee. *

SEHLOGO se se lego ka go U.S.News & World Report se itše: “Go ithuta go kgotlelela semelo seo se feto-fetogago sa motho yo o sa mo tsebego go ka go ruta . . . go koba-kobega le maemo gotee le go kgona go fihlelela kwano. Eupša mosepelo wa go ithuta gantši ke woo o gateletšago.” Bao ba kilego ba dula le motho ka phapošing ba ka dumela se.

Barutwana ba bantši bao ba tsenago yunibesithing ba dula le motho ka phapošing bakeng sa go thuša go fokotša ditshenyagalelo tša godimo tša go tsena sekolo. Bafsa ba bangwe ba dula ka phapošing le motho yo mongwe ka gobane ba nyaka tokologo ya go lokologa batswading ba bona. Gare ga bafsa ba Bakriste, ba bantši ba kgethile motho yo ba tlago go dula le yena e le gore ba kgone go phegelela dikgahlego tša moya. (Mateo 6:33) Ba hwetša gore go ba le motho yo ba ka abelanago le yena ditshenyagalelo tša bophelo go ba thuša gore ba hlankele e le baebangedi ba nako e tletšego. Go ba le motho yo o dulago le yena ka phapošing ka dinako tše dingwe ke karolo ya bophelo bja boromiwa le ya tirelo diofising tše di fapa-fapanego tša makala tša Dihlatse tša Jehofa. *

Phafoga! e boletše le banna ba bafsa ba sego kae le basadi bao ba ilego ba dula le batho ka phapošing. Ka moka ba ile ba dumela gore motho yo o dulago le yena ka phapošing a ka ba seo se fetago go ba motho yo a go thušago ka rente—motho yo o dulago le yena  ka phapošing a ka ba mothopo wa bogwera, motho yo o ka boledišanago le yena le yo o ka dirago dilo le yena. Lynn o gopola ka gore: “Re tla dula go fihla bošego gomme re bolela ka dilo tšeo basadi ba bafsa ba ratago go bolela ka tšona goba re lebelela difilimi.” Renee o re: “Motho yo o dulago le yena gape a ka go kgothatša. Ka dinako tše dingwe ge o šoma, o leka go lefelela ditshenyagalelo tša gago ka moka, o leka go dira boboledi, ke mo go thabišago go ba le motho yo o dulago le yena ka phapošing yoo a ka go kgothatšago.”

Lega go le bjalo, go dula le motho ka phapošing—kudu-kudu yo o sa mo tsebego go tloga mathomong—e ka ba tlhohlo e kgolo. U.S.News & World Report e hlalositše mabapi le boemo bja kholetšheng gore: “Go sa šetšwe maiteko ao a tseneletšego ao dikolo tše dintši di a dirago go hwetša batho bao ba swanelanago ba ba ka dulago gotee ka phapošing, go tlwaelegile go ba le mafelelo ao a sa kgotsofatšego.” Ka kgonthe, dikgohlano magareng ga batho bao ba dulago gotee ka phapošing kholetšheng ke tšeo di tsebegago ka go ba tšeo di golelago bošorong! Ka baka leo go tšweletše mekero ya Internet yeo e dumelelago barutwana go hlalosa phatlalatša dikgakanego tša bona tšeo di bonalago di sa fele mabapi le batho bao ba dulago le bona ka phapošing. Ke ka baka la’ng go dula le motho ka phapošing gantši go ipontšha go le thata?

Go Dula le Motho yo o sa mo Tsebego

Mark o re: “Go dula le motho yo o sa mo tsebego ke phihlelo e kgahlišago ka tsela e itšego. Ga o tsebe gore ge e le gabotse e tlile go ba motho wa mohuta mang.” Ka kgonthe, kgopolo ya go dula le motho yo o ka bago o na le dilo tše sego kae tšeo le swanago ka tšona goba yo le se nago selo seo le swanago ka sona e ka ba mo go ferekanyago. Ke therešo gore Bakriste ba swanetše go ba ba e-na le dilo tše dintši tšeo ba swanago ka tšona le dilo tše dintši tšeo ba ka bolelago ka tšona. Lega go le bjalo, David o dumela ka gore: “Ke be ke e-na le dipoifo mabapi le go ba le motho yo ke tlago go dula le yena ka phapošing.”

Lega go le bjalo, go ile gwa direga gore motho yo David a ilego a dula le yena ka phapošing le yena o be a e-na le setlogo seo se swanago le sa gagwe. Eupša ga se batho ka moka bao ba dulago gotee ka phapošing bao ba swanelanago kudu gakaakaa. Mark o re: “Motho wa pele yo ke ilego ka dula le yena ka phapošing o be a sa bolele kudu. Ge o dula le motho ka phapošing e tee, ka kgonthe o nyaka gore le boledišane. Eupša o be a sa ke a bolela. Ka kgonthe se se ile sa ntshwenya.”

Diphapano tša setlogo di ka baka dikgateletšo le dithulano tše dingwe. Lynn o re: “Ge o thoma go dula o nnoši, o nyaka go dira dilo ka tsela ya gago ka noši. Eupša go se go ye kae o lemoga gore go na le batho bao o swanetšego go ba naganela.” Ka kgonthe, ge o e-tšwa sebong se se šireletšegilego sa legae la geno, e ka ba mo go tšhošago kudu go bona kamoo batho ba bangwe ba lebelelago dilo ka tsela yeo e fapanego ka gona.

Ditlogo Tšeo di Fapanego, Ditsela Tšeo di Fapanego

Dilo tše dintši di ithekgile ka tlwaetšo—goba go hloka tlwaetšo—yeo motho a e hweditšego batswading ba gagwe. (Diema 22:6) Fernando yo monyenyane o re: “Nna ke sethakga gomme motho yo ke bego ke dula le yena e be e le lešaedi. Ka mohlala, nagana ka phapošana ya diaparo: O be a rata go lahlela dilo gohle. Nna ke be ke rata go di fega.” Ka dinako tše dingwe go fapana ka ditekanyetšo e ba mo go feteletšego kudu.

Renee o a gopola: “Ke be ke dula le motho yoo phapoši ya gagwe ya go robala e bego e swana tlwaa le lefelo la go lahlela ditšhila! Gape ke ile ka dula le batho bao ba sa hlwekišego tafola ka morago ga go ja goba bao ba tlogelago dibjana tša bona ka sinking lebaka la matšatši a mabedi goba a mararo.” Ee, ge go e-tla mošomong wa ka gae, batho ba bangwe bao ba dulago gotee ka phapošing ba bonala e le mothofatšo wa mantšu a Diema 26:14: “Sebodu le dilaô, ké lemati le-šika-le-dijakwana.”

Ka lehlakoreng le lengwe, go dula le motho yo mongwe ka phapošing yoo e lego sethakga ka go fetišiša le gona e ka no se be mo go thabišago. Mosadi yo mofsa yo a bitšwago Lee o bolela ka yo a dulago le yena ka phapošing ka gore: “Go ya ka moo a bego a bona dilo ka gona, go be go nyakega gore tiro ya go hlwekiša e dirwe iring e nngwe le e nngwe. Ka kgonthe ga ke lešaedi, eupša ka dinako tše dingwe ke tlogela dilo tšeo di swanago le dipuku godimo ga bolao. O ile a nagana gore o swanetše go dula a laola boemo.”

Batho bao ba dulago gotee ka phapošing ba ka ba le dikgopolo tša bona ka noši mabapi le bohlweki bja mmele. Mark o hlalosa gore: “Motho yo ke dulago le yena o tsoga ka motsotso wa mafelelo. O kitimela sinking, a itšhele meetse moriring gomme a sepele.”

Go fapana ga ditlogo gotee le dimelo go ka kgoma dikgetho tša boithabišo le boitapološo. Mark o  bolela mabapi le motho yo a dulago le yena ka gore: “Ga re rate mohuta o swanago wa mmino.” Lega go le bjalo, moo go nago le tlhomphano, go fapana mo go bjalo e ka ba mo go nago le mohola, mohlomongwe go thušeng batho ba babedi bao ba dulago gotee go katološa dikgetho tša bona tša motho ka noši. Eupša gantši kudu, diphapano tše di feleletša ka kgohlano. Fernando o re: “Ke rata mmino wa ma-Sepania eupša motho yo ke dulago le yena ke yoo a dulago a o swaya diphošo.”

Bothata bja Mogala

Go šomišwa ga mogala e ka ba se sengwe sa dibaki tše dikgolo tša kgohlano. Mark o re: “Ke rata go ithobalela. Eupša motho yo ke dulago le yena o rata go dula go fihla bošego kudu a bolela mogaleng. Se e ka ba selo seo se tenago ka morago ga nako.” Lynn ka mo go swanago o a gopola: “Ka dinako tše dingwe bagwera ba motho yo ke dulago le yena ba be ba mo leletša ka iri ya boraro goba ya bone mesong. Ge a be a se gona, ke be ke swanelwa ke go tsoga gomme ke arabe mogala.” Tharollo ya bona e bile efe? “Re ile ra kgonthišetša gore yo mongwe le yo mongwe o ba le mogala wa gagwe.”

Lega go le bjalo, ga se bafsa ka moka bao ba ka kgonago go fihlelela go ba le megala ya bona ka noši, gomme ba bantši ba gapeletšega go o kopanela. Se se ka lebiša boemong bja dikgohlano ka dinako tše dingwe. Renee o a gopola: “Yo mongwe wa batho bao ke dulago le bona o be a beana mabaka gomme gantši o be a dula mogaleng diiri tše dintši. Kgweding e nngwe o ile a dira ditshenyagalelo tšeo di fetago R1 000 tša mogala. O be a lebeletše gore yo mongwe le yo mongwe wa rena a lefelele karolo ya yona, ka ge re be re dumelelane gore re tla arolelana ditshenyagalelo ka go lekana.”

Go hwetša tumelelo ya go šomiša mogala e ka ba taba e nngwe. Lee o a gopola: “Ke be ke dula le motho yo a bego a mpheta ka nywaga. Re be re e-na le mogala o tee feela. Ke be ke šomiša mogala ka dinako tšohle ka gobane ke be ke e-na le bagwera ba bantši. Le ka mohla o be a sa ke a bolela selo. Ke be ke nagana gore ge a nyaka go šomiša mogala, o be a tla mpotša. Ke gona ke elago hloko gore ke be ke bontšha go se naganele motho yo mongwe.”

Go Hloka Nako ya go ba Noši

David o re: “Motho yo mongwe le yo mongwe o nyaka nako ya go ba noši. Ka dinako tše dingwe ke nyaka go khutša gomme ke se ke ka dira selo le gatee.” Lega go le bjalo, go hwetša dinako tša go ba noši e ka ba tlhohlo ge o abelana bodulo le motho yo mongwe. Mark o dumela ka gore: “Ke rata go ba le nako ke nnoši. Ka gona selo se se thata bakeng sa-ka ke go hloka nako ya go ba noši. Nna le motho yo ke dulago le yena re na le lenaneo leo le swanago. Ka gona go thata go hwetša nako ya go ba noši.”

Jesu Kriste le yena ka dinako tše dingwe o be a nyaka nako ya go ba noši. (Mateo 14:13) Ka gona, e ka ba mo go ferekanyago ge go ba gona ga motho yo o dulago le yena go dira gore go be thata go bala, go ithuta goba go naganišiša, ge e ba go sa dire gore go se ke gwa kgonega. Mark o re: “Go thata go ithuta ka gobane go dula go e-na le selo seo se diregago ka dinako tšohle. O laletša bagwera, o mogaleng goba o lebeletše TV goba o theeditše radio.”

Lega go le bjalo, le ge go kgotlelelana le motho yo o dulago le yena e le tlhohlo, bafsa ba dikete ba ile ba go dira gore e be mo go atlegago. Dihlogo tše di latelago lelokelelong le di tla ahla-ahla ditsela tšeo di šomago tša go dira gore go dula le motho yo mongwe e be mo go holago kudu.

[Mengwalo ya ka tlase]

[Seswantšho go letlakala 16, 17]

Go fapana ga dikgetho tša batho ka mmino go ka tšweletša tlhohlo

[Seswantšho go letlakala 18]

Go se naganele batho ba bangwe go ka hlola dikgohlano