Khomotšo Bakeng sa Bao ba Llago

DITLHASELO tša botšhošetši tšeo di diregilego ka September 11, 2001, kua New York City le kua Washington, D.C., di tšhošitše batho lefaseng ka bophara. Ka letšatši le tee, go hwile ba dikete, go akaretša le makgolo a bo-raditimamollo ba bagale, maphodisa le bašomi ba tša kalafo ya tšhoganetšo.

Ga e sa le tiragalo yeo e direga, Dihlatse tša Jehofa di dirile maiteko ao a kopanetšwego bakeng sa go homotša bao ba lahlegetšwego ke baratiwa masetla-pelong. Ba dirile se bakeng sa “xo alafa ba dipelo tše robexilexo” le “xore xo homotšwê bohle ba ba nyamilexo.”—Jesaya 61:1, 2.

Go theoša le nywaga, Dihlatse tša Jehofa di hweditše gore bao ba lahlegetšwego ke baratiwa lehung gantši ba naganišiša ka dipotšišo tšeo di lokeleditšwego ka mo tlase. Beibele e na le dikarabo. Ke ka baka la’ng o sa hlahlobe ditšhupetšo tša Mangwalo tšeo di lego ka mo tlase koping ya gago ka noši ya Beibele?

Na lehu la motho le rulaganyeditšwe e sa le pele?

Go Mmoledi 9:11, (NW), Beibele e bolela gore “nako le ditiragalo tše di sa letelwago” di wela batho bohle. Ge e ba lehu le rulaganyetšwa e sa le pele, ke ka baka la’ng Beibele e re kgothaletša go tšea megato ya temošo ya tšhireletšego?—Ka mohlala, bona Doiteronomio 22:8.

Ke ka baka la’ng re e-hwa?

Batho ba babedi ba pele, Adama le Efa, ba ile ba bewa paradeiseng ya lefaseng. Ge nkabe ba ile ba dula ba e-kwa, ba ka be ba se ba ka ba hwa. Lehu le be le tla ba gona ge feela batho ba be ba ka se kwe Modimo. (Genesi 1:28; 2:15-17) Ka manyami, Adama le Efa ba ile ba se kwe Mmopi wa bona. Ka baka leo, ba ile ba lefela kotlo—e lego lehu. Ka ge batho bohle ba e-tšwa go Adama le Efa, ka moka ga bona ba abetše sebe le lehu. Beibele e a hlalosa: “Ké xôna, byalo ka xe sebe sè tsene lefaseng ka motho o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.”—Ba-Roma 5:12.

Boemo bja bahu ke bofe?

Ka morago ga ge Adama a rabetše, Modimo o itše: “O tlo . . . boêla mmung; ka xobane O nthšitšwe mmung; O lerole; ’me sa xaxo ké xo boêla leroleng.” (Genesi 3:19) Ka gona lehu ke boemo bja go se kwe selo ka mo go feletšego—ka kgonthe, bja go se be gona. Beibele e re: “Xobane ba ba phelaxo ba tseba xore ba tlo hwa; ’me xo bahu xa xo se se tsebyaxo.” (Mmoledi 9:5, mongwalo wo o sekamego ke wa rena.) Beibele gape e bolela gore ge motho a e-hwa, “ó boêla mmung wa xaxwe; mohla woo ké mo xo fêlaxo maanô a motho.” (Mongwalo o sekamego ke wa rena.)—Psalme 146:3.

Na ga re na moya wo o phologago lehu?

Beibele e ruta ka mo go kwagalago gore moya wa gago ge e le gabotse ke wena, e sego selo seo se sego gona se se tla phologago lehu la gago. (Genesi 2:7; Diema 2:10; Jeremia 2:34) Ka ge go le bjalo, re ka bolela gore ge motho a e-hwa, go hwile moya. Beibele e bolela ka mo go kwagalago gore: “Moya o senyago wona o tlo hwa.”—Hesekiele 18:4, PK.

Go na le kholofelo efe ka bao ba hwilego?

Beibele e utolla gore ke morero wa Modimo go bušetša bahu bophelong ka go ba tsošetša lefaseng la paradeise, moo bolwetši le lehu di ka se sa bago gona. Jesu o itše: “Xo tla lebaka leo bohle ba lexo mabitleng ba tl’o xo kwa Lentšu la Morwa-Modimo ka lôna. Xomme ba tlo tšwa.”—Johane 5:28, 29; Kutollo 21:1-4.

Ge a bolela ka mogwera wa gagwe yo a bego a sa tšwa go hwa e lego Latsaro, Jesu o ile a bapiša lehu le boroko. (Johane 11:11-13) Go feta moo, ka morago ga ge Jesu a mo tsošitše, Latsaro ga se a ka a bolela selo ka go ba ga gagwe lefelong la tlhokofatšo goba lefelong la boiketlo nakong e kopana ya go hwa ga gagwe. (Johane 11:37-44) Se se a kwešišega, ka gobane bahu ga ba kwe selo. Ga ba tlaišege eupša ba letetše “lebaka” leo ka lona ba tlago go tsošwa. Sa bohlokwa kudu, therešo ya gore Jesu o ile a tsoša Latsaro e bontšha gore bahu ba kgona go phela gape. Ka kgonthe, Jesu ka mohlolo wo o bontšhitše ka tekanyo e nyenyane seo se tlago go direga lefaseng ka tlase ga pušo ya Mmušo wa Modimo. (Ditiro 24:15) A khomotšo e kgolo gakaakang go bao ba lahlegelwago ke baratiwa ba bona lehung nakong ye ya khuduego!