Seno se se Lapološago go tšwa Semeleng Seo se sa Tlwaelegago

KA MONGWADI WA PHAFOGA! KUA NIGER

NA O thabela seno se se tonyago letšatšing leo le fišago? Malapa a mantši dinageng tša ka Afrika Bodikela a thabela seno se se lapološago seo se nago le mebala e tagilego, se sebose, sa phepo le seo se sa bitšego tšhelete e ntši—le gona ke se se dirilwego go tšwa semeleng. Seno se se bitšwa bissap, gomme semela seo se ntšhago matšoba seo se tšwago go sona ke roselle ya molatšatšing. Semela se se kgona go gola go fihla boteleleng bja dimithara tše pedi goba go feta moo. Se bjalwa ditikologong tše di sa swanego tša lefase, eupša ka mo go kgethegilego ditlelaemeteng tše di omilego kudu tšeo di hwetšwago dinageng tše di swanago le Niger, Mali le Senegal.

Tsela Yeo Bissap e Dirwago ka Gona

Lehwana le tee la matlakala ao a bitšwago di-calyx a semela le tsenywa ka gare ga mo e ka bago lithara ya meetse. Motswako o a bedišwa gomme wa inwa ka metsotso e 15 go ya go e 20. Matlakala a di-calyx a a sefša gomme teye e ka nwewa e fiša goba e tonya ka swikiri goba e se na swikiri. Lehono re nyaka go dira seno se se tonyago seo bana ba ka se thabelago, ka gona re tla se tšhela swikiri. Le gona, malapa a mangwe a tswaka seno se ka senoko sa minti goba sa vanilla. Bissap e tonyago le ya mmala wa bohwibidu bjo bo tagilego e tšhelwa ka gare ga mekotla e menyenyane yeo e bonatšago ya polasetiki, yeo e bofšago lehuto mo godimo. Bjale e loketše go ka abelwa bana bao ba e letilego ka tetelo-kgolo! Ka lethabo ba phunya lešobana mo khutlong ya mokotlana gomme ba thabela seno seo ba se ratago. Ke therešo gore ba bangwe ba kgetha go se nwa ka galase.

Ka ntle le go ba ga yona e bose, go thwe bissap e go loketše. E na le calcium, phosphorus, iron, bithamine A le C le tše dingwe! Ba bangwe ba bolela gore bissap gape ke sehlare sa go letefatša mala se bonolo, e oketša mosepelo wa mohlapologo e bile ke sematlafatši bakeng sa sebete. Go sa šetšwe mehola ya sona ya phepo, re thaba kudu gakaakang gore ka ntle le go ba se sebotse go se lebelela, semela se se re nea seno seo se nago le phepo le seo se lapološago!

[Mothopo wa Seswantšho go letlakala 31]

Photo by Kazuo Yamasaki