Dikhunkhwane Tšeo di Nago le Bokgoni bja go Lahla Ditlakala

NYWAGA e ka godingwana ga e 150 e fetilego, batho ba ile ba thoma go hlama ditshepedišo tšeo di raraganego tša kelelatšhila le tša go lahla ditlakala. Lega go le bjalo, go be go šetše go e-na le setsebi sa go lahla ditlakala—tšhošane e nyenyane yeo e hwetšwago kua molatšatšing wa Amerika.

Sehlopha seo se tlwaelegilego sa ditšhošane tše ka bago tše milione tšeo di kgaolago matlakala se dula dihlageng tše dikgolo tša ka tlase ga mmu. Ditho tše di fapa-fapanego tša ditšhošane di na le dikabelo tše di sa swanego. Ditšhošane tše dingwe di kgoboketša ditsekana tša matlakala, ao sehlopha se sengwe sa tšona se dirago disohlo ka ona. Ditšhošane tšeo di abetšwego go ba bo-raserapa di diriša disohlo bakeng sa go lema mouta woo o lewago ka diphapošing tšeo di lego ka gare ga sehlaga. Gape di tloša selo se sengwe le se sengwe seo se ka phatlalatšago phetetšo ya ditwatši, tše bjalo ka mouta o senyago, ditšhošane tše di hwilego goba tšeo di hwago le dilo tšeo di bolago. Eupša ditšhošane di lahla ditlakala tša tšona ka tsela efe?

Kuranta ya The Independent e bega gore bo-rathutamahlale ba ma-Brithania kua Yunibesithing ya Sheffield ba hweditše karabo. Kgaufsi le diphapoši tša gona go na le diphapoši tše dikgolo moo ditšhila di bolokelwago gona. Ditšhošane tšeo di šomago ka ditlakala di diriša nako ya tšona ka moka moo, di ribega ditlakala bakeng sa go di thuša go bola, moo ka morago go bolayago dipaketheria tšeo di bakago malwetši. Ditšhošane tšeo e lego bo-raserapa le ka mohla ga di tsene ka gare ga diphapoši tša ditlakala. Di iša ditšhila ka gare ga thanele gomme tšeo di šomago ka ditlakala di a di rwala. Tshepedišo ye yeo e šomago ya go laola ditlakala e thibela kotsi le ge e le efe ya tšhilafatšo le go šireletša boemo bjo bobotse bja bophelo bja sehlopha sa ditšhošane.

Jehofa Modimo ga se a bopa ditšhošane feela di e-na le bohlale bjo bo logeletšwego eupša gape o ile a nea ba-Isiraele ditlhahlo tše di šomago tša maphelo nywageng e fetago e 3 500 e fetilego. Go dirišwa ga melao ye go be go tla thibela tšhilafatšo ya dijo le ya methopo ya meetse, go be go tla emiša go phatlalala ga malwetši ao a fetelago gotee le go kgonthišetša go lahlwa mo go šireletšegilego ga ditlakala. Ke tekanyo e kgolo gakaakang ya tlaišego le bolwetši yeo e bego e tla efogwa ka go latela melao e bjalo ya motheo!—Lefitiko 11:32-38; Numeri 19:11, 12; Doiteronomio 23:9-14.