Bafsa ba a Botšiša . . .

Nka Hwetša Bjang Motho yo re Swanelanago yo Nka Dulago le Yena ka Phapošing?

“Go ka be go ile gwa ba thata go hlankela ke le moebangedi wa nako ye e tletšego le go lefela rente le ditirelo tša batho bohle ge nkabe ke be ke se na batho bao ke dulago le bona ka phapošing.”—Lynn. *

GE BATHO ba bafsa ba tloga gae, gantši ba a tlabega ge ba hwetša gore ke tšhelete e ntši kudu gakaakang yeo e nyakegago bakeng sa go phela ‘lefaseng la kgonthe.’ Bakeng sa ba bantši, tsela ya go lebeletšana ka katlego le ditshenyagalelo tša godimo tša boiphedišo ke go arolelana ditshenyagalelo le motho o tee goba ba oketšegilego bao ba dulago le bona ka phapošing.

Eupša bjalo ka ge sehlogo sa nakong e fetilego tšhiedišanong ye se bontšhitše, go dula le motho yo mongwe—kudu-kudu motho yo o sa mo tsebego ka mo go feletšego—e ka ba tlhohlo ya kgonthe. * Se ke sa therešo gaešita le gare ga bafsa ba Bakriste bao ba dulago gotee e le gore ba kgone go hlankela e le baebangedi ba nako e tletšego. Go sa šetšwe gore boemo bja gago ke bofe ka mo go kgethegilego, ge e ba o nagana ka go dula le motho yo mongwe, ke mo go kwagalago gore o šomiše “bohlale bjo bo šomago” ge o kgetha motho yoo. *—Diema 3:21, NW.

Kotsi ya Ditlwaelano tše Mpe

Bafsa ba bantši bao ba gotšego ba retologela dithulaganyong tša go sepediša melaetša, dipapatšo tšeo di beilwego ka magoro ka gare ga dikuranta le Internet bakeng sa go hwetša batho ba e ka bago bao ba ka dulago le bona ka phapošing. Eupša bakeng sa Bakriste ba bafsa, methopo e bjalo e na le dikotsi tše dikgolo. E ka dira gore o gahlane le batho bao ba sa swanego le wena ka tumelo, boitshwaro goba ditekanyetšo. Na ke go ba le kgopolo e sa bulegago goba go hloka bogwera go nyaka go dula gotee le motho yo mongwe yoo tumelo ya gagwe e swanago le ya gago feela? Aowa, ke tsela e bohlale. Beibele ka boyona e lemoša ka gore: “Ditlwaelano tše mpe di senya mekgwa e mebotse.”—1 Ba-Korinthe 15:33, NW.

Nagana ka mosadi yo mofsa yo a bitšwago Lee. O be a sa hlwa e e-ba Mokriste yo a kolobeditšwego ge a be a thoma go dula lefelong la bodulo la yunibesithing. O a gopola: “E be e le tikologo e kotsi kudu. Banenyana ba bangwe ba be ba re ge ba boela gae ba hwetša motho yo ba dulago le yena a kopanetše ditiro tša botona le botshadi le motho wa bong bjo bo sa swanego le bja gagwe.” Go dula moo go se go ye kae go ile gwa kgoma boemo bja Lee bja moya gampe. O a dumela: “Ke be ke foša diboka tše dintši tša Bokriste.” Ga go makatše gore boemo bja gagwe bja moya bo ile bja senyega ganyenyane-ganyenyane. “Ka letšatši le lengwe ke ile ka ikhwetša ke šomiša polelo ya maroga, gomme yo mongwe wa banenyana o ile a re: ‘Na Jehofa o dumelela seo?’” E ile ya ba mo go hlabišago dihlong gakaakang! Ka mahlatse Lee o ile a tloga tikologong yeo e sa lokago gomme a thoma go dira tšwelopele moyeng. Eupša phihlelo ya gagwe e bontšha kotsi ya go phela le batho bao ba sa hlomphego ditekanyetšo tša gago.

Go Hwetša Batho ba Swanelegago Bao o ka Dulago le Bona

Ka gona ke kae moo o ka nyakelago gona? Thoma ka phuthegong yeo e lego tikologong ya geno ya Dihlatse tša Jehofa. Ka mo go kgahlišago, bao e lego  baebangedi ba nako e tletšego gantši ba gahlana le bafsa bao ba sekametšego dilong tša moya dikolong tše di fapa-fapanego gotee le dibokeng tšeo ka mo go kgethegilego di swarelwago baboledi ba nako e tletšego. * Batswadi, bagolo ba phuthego ya tikologong, balebeledi bao ba sepelago gotee le ba bangwe e ka ba bao ba thušago; ba ka ba ba tseba bafsa ba bangwe bao e ka bago bao ba swanelegago gore motho a ka dula le bona ka phapošing.

Go botša ba bangwe ka ga go nyaka ga gago motho yo o ka dulago le yena e ka ba sedirišwa se matla. Ge o dutše o tsebiša batho ka seo o se nyakago, ke moo o tlago go hwetša thušo. (Mmoledi 11:6) Ka godimo ga tšohle, kgopela Jehofa gore a go thuše go hwetša motho yo o ka dulago le yena, gomme o ithekge ka yena gore a šegofatše maiteko a gago.—1 Johane 5:14, 15.

Go Nyakišiša Tsebišo Yeo e Nyakegago

Ge o šetše o hweditše motho yo e ka bago yo o dulago le yena, o ka fagahlela go dula gotee le yena kapejana. Eupša ke ga bohlale go dira dinyakišišo pele. Na motho yoo ‘o hlatselwa gabotse ke bana babo rena’ phuthegong ya gabo? (Ditiro 16:1, 2) Mohlomongwe wena le batswadi ba gago le ka boledišana ka go lebanya le batho bao ba swanelegago moyeng bao ba mo tsebago. Mo gongwe o ka botšiša gore: ‘Ke botumo bofe bjo motho yo a nago le bjona? Na motho yo ke yo a tsepamego maikwelong le moyeng? Na o tšea karolo modirong wa go bolela le ba bangwe le go nea dikarabo dibokeng? Na motho yo o tsebega ka boitshwaro bjo bobotse?’

Gopola gore motho yo a ‘šikago le bahlale o a hlalefa.’ (Diema 13:20) David o re: “Motho yo ke dulago le yena ka phapošing ke yoo a sekametšego kudu dilong tša moya. Seo se nthuša gore ke tšwele pele ke boloka boemo bja-ka bja moya.” Renee, yoo a ilego a dula le batho ba bantšinyana, ka mo go swanago o re: “Ba bangwe ba batho bao ke bego ke dula le bona ba be ba fela ba šišinya gore re bale kgaolo ya Beibele re le gotee bošego bjo bongwe le bjo bongwe. Ka ge batswadi ba-ka e be e se Dihlatse, ga se ra ka ra ithuta Beibele re le lapa. Ka gona taba ya go kgona ga-ka go swara ‘thuto ya lapa’ le batho bao ke dulago le bona e be e le e nkgahlago kudu!” Ee, go ba le motho yo o dulago le yena ka phapošing yo a nago le lerato le le swanago le la gago bakeng sa dilo tša moya e ka ba tšhegofatšo ya kgonthe.

Go Ahla-ahla Ditaba ka Bolokologi

Se se latelago, kopanang gomme le ahla-ahle ditaba. Dipoledišano tše bjalo di ka go thuša go hwetša ge e ba  dimelo tša lena di dumelelana. Ka mo go kgahlišago, nyakišišo e nngwe yeo e begilwego ka kuranteng ya Communication Research Reports e utollotše gore batho bao ba dulago gotee ka phapošing bao ba swanago ka mekgwa ya bona ya go bolela “ba begile kgotsofalo le lerato tša godimo tšeo ba nago le tšona ka go dula le motho ka phapošing.” Ka gona ge e ba o le motho yo a bolelago ka bolokologi, yo a nago le bogwera, yo a itlhalosago, gona o ka gahlana le mathata a go dula le motho yo mongwe yoo a nago le go šia, yo a sa bolelego goba yo a sekametšego go beng tšhika-noši.

Ka ge o sa nyake go fetola poledišano ya gago gore e be selo se se swanago le potšološišo ya maphodisa, e ka ba ga mohola go boledišana ka dilo tšeo motho a ikemišeditšego go di dira kgaufsinyane gotee le merero ya motho yoo o tlago go dula le yena ka phapošing. Na o phegelela tšwelopele ya moya goba na mohlomongwe o kgahlegela feela go tšhabela boemo bjoo bo gateletšago bja ka gae? Lynn o bolela ka bothata bjo bongwe bjoo bo ka tšwelelago, o re: “Ke be ke dula ka phapošing le motho yoo a bego a beana mabaka gomme lesogana la gagwe le be le dula le eta ka dinako tšohle, le dula go fihla bošego-gare.” Lynn o ile a hwetša dipontšho tša lerato e le tšeo di sa swanelago gotee le go ba tšeo di befedišago. Lega go le bjalo, mathata a bjalo ka dinako tše dingwe a ka efogwa ge e ba melao ya motheo e ka hlongwa e sa le pele. Ka mohlala, Renee o re: “Re be re e-na le molao wa gore bašemane ba ka se ke ba dula go feta nako e itšego.” E be e tla ba mo gobotse gore batho ba babedi bao ba dulago gotee ka phapošing ba dumelelane ka taba ya gore ba se be noši ka phapošing goba ka ngwakong le motho wa bong bjo bo sa swanego.

Gape ke ga mohola go boledišana mohlomongwe ka dilo tšeo di swanago le ditloša-bodutu, dilo tšeo motho a di thabelago gotee le dikgetho tša mmino. Mark o re: “Nka rata go dula le motho yo mongwe yoo a ratago mohuta wo o swanago wa dilo tšeo ke di dirago, yoo a swanago le nna ka semelo le yoo a ratago go dira dilo tšeo di swanago le tšeo ke di dirago.” Ke therešo gore go ba le dikgetho tše di sa swanego ga go beele ka thoko ka mo go kgethegilego go dula gotee ka phapošing. Taba ya kgonthe ke gore, Na bobedi bja lena le bao ba koba-kobegago gakaaka’ng le maemo? Na le ikemišeditše go kgotlelela diphapano le go dira diphetogo bakeng sa go amogelana?

Lee o šišinya gore: “O swanetše go botšiša gape gore motho yo mongwe o lebeletše eng thulaganyong ya go dula gotee. Batho ba bangwe ba letela gore o be mogwera yo kaone le modirišani yo kaone. Eupša seo ga se seo ke se kgahlegelago.” David ka mo go swanago o re: “Ke rata motho yo ke dulago le yena ka phapošing yoo nka dirago dilo le yena eupša yoo a sa ikwego gore ka dinako tšohle o swanetše go sepela le nna ge ke nyaka go dira dilo le batho ba bangwe.” Ka mo go swanago, hwetša ge e ba motho yo a kgahlegela go ba modirišani wa gago mošomong wa boebangedi goba ge e ba o na le seo a se nagannego, se bjalo ka go hlankela phuthegong yeo ba bolelago polelo e šele.

Mafelelong, kgonthišetša gore ga o hlokomologe ditaba tšeo di swanago le go apea (na bobedi bja lena le tseba go apea?), go arolelana mešomo ya ka gae, go šomiša ditlabakelo tša motho ka noši, sebaka sa ka phapošaneng ya diaparo, thoto, sebaka sa bobolokelo gotee le diruiwa. Go ahla-ahla dilo tše di swanago le tšeo go ka thibela go se kwešišane le go kwešana bohloko maikwelong. Diema 20:18 e re: “Maanô a thêkxwa ka keletšô.”

“Ka Bothakga le ka Thulaganyo”

Molao o mongwe wa motheo wo o thušago ke woo o hwetšwago go Luka 14:28, NW, moo e rego: “Bala ditshenyagalelo.” Ee, leka go hwetša gore na ditshenyagalelo tša gago tša bophelo e tla ba dife. Na go tla šomišwa bokae bakeng sa rente? Dijo? Ditlabakelo? Na le tla abelana mogala? Ge e ba go le bjalo, le tla arolelana bjang ditshenyagalelo? Lynn o re: “Ke be ke kgonthišetša gore ngwanenyana yoo a ka kgona go lefela karolo ya gagwe ya ditshenyagalelo pele nka mo tšea gore ke dule le yena ka phapošing.” Makasine woo o tsentšwego tshepedišong wa The Next Step ka mo go swanetšego o re: “Batho bao o dulago le bona bao ba sa thušego go lefela rente goba dijo . . . goba ba ipakelago dikoloto tše di phagamego tša ditirelo tša ditlabakelo, ba go bakela kgateletšego yeo e sa nyakegego.”

Renee o re: “Ka dinako tše dingwe bothata ga se tšhelete yeo motho a swanetšego go e lefela, eupša taba ke gore o tla e lefa neng!” O hlalosa ka gore: “Rente ya rena e swanetše go lefelwa letšatšing la boraro la kgwedi. Eupša ka dinako tše dingwe motho yo ke dulago le yena o a sepela bakeng sa go ya mafelo-bekeng pele a lefela karolo ya gagwe gomme ke swanelwa ke go kgopela tshwarelo go mong wa lefelo la rena la madulo.” Go molaleng gore ke ga bohlale go dira dilo ka moka “ka bothakga le ka thulaganyo” gomme re se ke ra tlogela dilo tša bohlokwa di direga ka ntle le thulaganyo. (1 Ba-Korinthe 14:40, NW) Gantši, ke ga bohlokwa go ngwala fase dilo tšeo le dumelelanago ka tšona.

Go ba šedi le go phakgama go oketša kgonagalo ya gore o hwetše motho yo o tlago go dula le yena yoo e tlago go ba tšhegofatšo go wena gomme a se go bakele manyami. Lega go le bjalo, go thwe’ng ge e ba go tšwelela mathata le dikgohlano tša semelo? Sehlogo sa nakong e tlago se tla ahla-ahla maemo a.

[Mengwalo ya ka tlase]

[Seswantšho go letlakala 16]

Go na le dikotsi tša go dula le batho bao ba sa kgomarelego ditekanyetšo tša boitshwaro tša Beibele

[Seswantšho go letlakala 16]

Pele ga ge o ka dumela go dula le motho yo mongwe, kopanang gomme le ahla-ahle ditaba tša bohlokwa