O Laleletšwa Kopanong ya Selete ya “Bagoeledi ba Mmušo ba Mafolofolo”

AFRIKA BORWA e nnoši, go rulagantšwe dikopano tše 42. Ya pele yeo e tlago go swarwa mo e tla ba ka November 22-24, gomme ya mafelelo e tla ba mafelelong a December. E nngwe ya dipokano tše tša matšatši a mararo—tšeo ka mo go tlwaelegilego di swarwago go tloga ka Labohlano go fihla ka Sontaga—mohlomongwe e tla swarelwa toropong ya kgaufsi le moo o dulago gona.

Mafelong a mantši, mananeo a tla thoma ka lenaneo la mmino ka 9:00 a.m. Letšatšing la pele, polelo ya go amogela batheetši e tla latelwa ke karolo yeo e nago le dipoledišano le bagoeledi ba Mmušo. Ke moka, ka morago ga dipolelo tše di rego, “Hwetša Lethabo le Legolo go Jehofa ka Boyena” le ye e rego, “Ipontšhe o le yo a Lebogago,” lenaneo la mesong le tla phetha ka polelo ya thwadi e rego, “Bagoeledi ba Mmušo ba Tutuetšwa ke Phišego.”

Lenaneo la thapameng ya Labohlano le tla phetha ka tšhiedišano ya dikarolo tše tharo yeo e rego, “Boporofeta bja Mika bo re Matlafaletša go Sepela Leineng la Jehofa,” gotee le dipolelo tše di rego, “Dula o Hlwekile Boitshwarong ka go Diša Pelo ya Gago” le “Itišeng Malebana le Bofora.” Sa mafelelo, thušo e botse kudu e tla newa mabapi le bodiredi bja Bokriste polelong ya mafelelo ya letšatši yeo e rego, “Rapela Modimo a Nnoši wa Therešo.”

Lenaneo la Mokibelo mesong le tla akaretša tšhiedišano ya dikarolo tše tharo yeo e rego “Bagoeledi ba Mmušo Bao ba Tagafatšago Bodiredi bja Bona.” E tla latelwa ke dipolelo tšeo di kgothatšago tše di rego, “Lebaka la Gore re ‘Rapele re sa Kgaotše’” le “Poledišano ya Moya e a Aga.” Lenaneo la mesong le tla phetha ka polelo e ahla-ahlago boineelo le kolobetšo, yeo ka morago ga yona batho bao ba swanelegago ba tlago go ba le sebaka sa go kolobetšwa.

Lenaneo la Mokibelo thapama le tla ba le tšhiedišano ya mafelelo ya dikarolo tše tharo ya kopano yeo e rego, “Boemo bja Tumelo ya Rena bo Lekwa ka Diteko tše di Fapa-fapanego.” Dikarolo tše di tla nea Bakriste thušo ya go lebeletšana le ditlhohlo tša go boloka boema-gare bja bona. Lenaneo la Mokibelo le phetha ka tiragalo e kgahlišago ya kopano, e lego polelo yeo e ruthetšago pelo e rego, “Batamela Kgaufsi le Jehofa.”

Lenaneo la Sontaga mesong le tla lebiša tlhokomelo ka mo go kgethegilego go bafsa, gomme le tla bula ka dipolelo tše di rego, “Na Kholofelo ya Gago e go Jehofa?” le ye e rego “Bafsa—Agang Bokamoso le Mokgatlo wa Jehofa.” Karolo ya mafelelo e tla akaretša dipoledišano tša metsotso e 20. Ye e tla latelwa ke terama ya moaparo wo o feletšego ya Jeremia, yo nakong ya ge a be a kgethelwa go ba moporofeta a ilego a ipelaetša ka gore, “kè sa le ngwana!” (Jeremia 1:6) Ka morago ga yona go tla ba le polelo e gatelelago molaetša o fetišitšwego terameng. Lenaneo la thapama le tla ba le polelo ya phatlalatša e rego, “Sebopego sa Lefase Leno se a Fetoga.”

Ka kgonthe bophelo bja gago bo tla humišwa moyeng ke go ba gona ga gago matšatšing a mararo ka moka. Bakeng sa lefelo la kopano leo le lego kgaufsi le ga geno, ikopanye le Holo ya Mmušo ya Dihlatse tša Jehofa ya tikologong goba o ngwalele bagatiši ba makasine wo.