MOHLOMONGWE tsela yeo o godišitšwego ka yona goba setšo di laela gore bodumedi bo se ke bja ahla-ahlwa ka ntle ga lapa goba kereke. Ka baka leo, o ka ferekana ge e ba motho yo mongwe a e-tla legaeng la gago a sa go tsebiša a swere Beibele. Bakeng sa ba bangwe, pono ye e bopilwe ke ditiro tše šoro historing ya bodumedi tšeo di ilego tša dirwa ka boikgakanyo bja go nyaka go tlišetša batho tlhakodišo.

Histori ya ditšhaba tše dintši e bolela ka ditshokologo tša mašaba a batho tšeo di bego di sa hlohleletšwe ke lerato la go rata Kriste, eupša tšeo di bego di hlohleletšwa ke bogale bja tšhoša. Batho ba bantši ba ile ba iphihla, ba tlogela magae le dinaga tša gabo bona goba gaešita le go loba maphelo a bona—ba bangwe ba ile ba fišwa koteng—go e na le go sokologela bodumeding bja batlaiši ba bona.

Mangwalo ao a buduletšwego a Beibele ga a thekge mediro e bjalo ya go sokologa ka kgapeletšo. Ka gona, na seo se fediša go abelana ga motho ditumelo tša gagwe tša bodumedi le ba bangwe? Beibele ka boyona e a araba.

Sa pele, ela hloko mohlala wo o beilwego ke Jesu Kriste. E be e le morutiši yo a nago le bokgoni yo a ilego a tutuetša maphelo a batheetši ba gagwe. (Johane 13:13, 15) Thutong ya Thabeng, thuto ya gagwe e be e le e bonolo eupša e le e matla. Mafelelo e bile gore batheetši ba gagwe ba ile ba “tlabya ke thutô ya xaxwe, Ka xobane à ba ruta bo-ka E a naxo le matla.” (Mateo 7:28, 29) Nywaga e 2 000 ka morago, maphelo a sa dutše a tutuetšwa ke ge dithuto tša gagwe di dutše di seka-sekwa. Ge a tiišetša pono ye, Moprofesara Hans Dieter Betz o boletše gore “ditutuetšo tšeo di tlišitšwego ke Thuto ya Thabeng, ka kakaretšo di fetetše kudu ka kua ga mellwane ya Bojuda le Bokriste gaešita le setšo sa ka Bodikela.”

Kapejana pele ga go rotogela ga gagwe legodimong, Jesu o ile a nea taelo yeo e ilego ya kgonthišetša gore ka morago ga lehu la gagwe modiro wa go ruta wo a o thomilego o be o tla tšwela pele gaešita le go atlega. (Johane 14:12) O ile a laela barutiwa ba gagwe gore ba ye bathong ba ditšhaba ka moka, “xo ba ruta xo boloka tšohle” tšeo a ba laetšego tšona. Morero o mogolo wa kabelo ye o ile wa bonala gabotse ge mantšung ona ao Jesu a bolela gore: “Ké xôna yang Le dirê dithšaba ka moka barutiwa.”—Mateo 28:19, 20, mongwalo o sekamego ke wa rena; Ditiro 1:8.

Le gona, ela hloko mohlala wa moapostola Paulo. Ka morago ga go sokologela ga gagwe Bokristeng, ga se a ka a ba le dihlong tša go abelana le ba bangwe tumelo ya gagwe yeo a sa tšwago go e hwetša. (Ditiro 9:17-19, 22) E be e le mokgwa wa Paulo go bolela ka disinagogeng le go ba hlathollela “ôna mangwalô, a ba bonthša xore Kriste ó be a swanetše xo tlaišwa le xo tsoxa bahung.” Ka bokgoni o ile “a botšana le bôná tša mangwalô” e le gore a kgone go “kxodiša Ba-Juda le Ba-Gerika (mongwalo o sekamego ke wa rena).” Go ya ka puku e nngwe ya ditšhupetšo, lentšu la Segerika leo le dirišitšwego bakeng sa “kgodiša” le  bolela “go tliša phetogo ya monagano ka tutuetšo ya go nea mabaka goba go ela hloko ka tsela ya boitshwaro.” Mafelelo a tsela ya Paulo ya go nea mabaka ka go kgodiša e bile gore “o kgodišitše lešaba le lentši la batho.”—Ditiro 15:3; 17:1-4, 17; 18:4; 19:26, PK.

Mehleng yeno, polelwana “bosokolli” (proselytism) e be e dutše e dirišwa bakeng sa go hlalosa go sokolla ka kgapeletšo ga mehuta e sa swanego. Beibele ga e thekge mokgwa o bjalo. Go e na le moo, e ruta gore batho ba be ba bopilwe ba e-na le tokologo ya boikgethelo, ba e-na le tokelo le boikarabelo bja go kgetha tsela yeo ba tlago go phela maphelo a bona ka yona. Se se akaretša kgetho ya kamoo go ka rapelwago Modimo ka gona.—Doiteronomio 30:19, 20; Jošua 24:15.

Jesu o ile a hlompha tshwanelo ye yeo e neilwego ke Modimo ka gore le ka mohla a se ke a diriša matla a gagwe ao a makatšago le matla a gagwe a taolo bakeng sa go gapeletša motho go amogela dipolelo tša gagwe. (Johane 6:66-69) O ile a tutuetša batheetši ba gagwe ka go diriša mabaka a kwagalago, dipapišo le dipotšišo tšeo di nyakago pono ya motho ka noši, a dira tše ka moka ka morero wa go fihlelela dipelo tša bona. (Mateo 13:34; 22:41-46; Luka 10:36) Jesu o ile a ruta barutiwa ba gagwe go bontšha tlhompho e swanago go ba bangwe.—Mateo 10:14.

Go molaleng gore Paulo o ile a diriša Jesu e le mohlala bakeng sa bodiredi bja gagwe. Ge a dutše a kgodiša batheetši ba gagwe ka go diriša mabaka a kwagalago a Mangwalo, Paulo o ile a hlompha maikwelo le dipono tša ba bangwe. (Ditiro 17:22, 23, 32) O ile a kwešiša gore e swanetše go ba lerato la go rata Modimo le Kriste leo le re tutueletšago go hlankela Mmopi wa rena ka mafolofolo. (Johane 3:16; 21:15-17) Ka gona, phetho ya rena ke ya motho ka noši.

Ge ba dira diphetho tše dikgolo tša bophelo tše bjalo ka mohuta wa ntlo yeo ba ka e rekago, moo ba tlago go šoma gona le kamoo ba ka godišago bana ka gona, batho bao ba leka-lekanego ga ba dire bjalo ka kgapeletšo. Ba ka nyakišiša dikgonagalo tše dingwe, ba naganišiša ka tšeo ba di hweditšego gomme mohlomongwe ba kgopela keletšo. Ke feela ka morago ga go ela hloko dilo tše moo ba tlago go dira phetho.

Phetho ya kamoo re swanetšego go rapela Modimo ka gona e nyaka nako ya rena e oketšegilego le maiteko go feta phetho le ge e le efe e nngwe bophelong. E tla kgoma tsela yeo re phelago bophelo bja rena gona bjale, gomme sa bohlokwa kudu, e tla kgoma kholofelo ya rena ya bophelo bjo bo sa felego nakong e tlago. Se se ile sa kwešišwa gabotse ke Bakriste ba lekgolong la pele la nywaga kua Berea. Gaešita le ge ditaba tše dibotse di be di hlalositšwe go bona ke moapostola Paulo ka noši, ba ile ba tšwela pele ba hlahloba Mangwalo ka mehla ka kelohloko go kgonthišetša gore seo ba bego ba se rutwa ke therešo. Ka baka la se, “ba bantši ba bôná ba dumêla.”—Ditiro 17:11, 12.

Lehono, Dihlatse tša Jehofa di tšwetša pele modiro wa go ruta le go dira barutiwa wo o rulagantšwego ke Jesu. (Mateo 24:14) Di hlompha tshwanelo ya ba bangwe ya go ba le bodumedi bja bona. Eupša ge e le mabapi le go abelana ditumelo tša tšona tša bodumedi le ba bangwe, di latela mohlala wo o ngwadilwego ka Beibeleng. Ee, di diriša tsela ya go nea mabaka ka potego go tšwa Mangwalong go seo di se lebelelago e le modiro wa go phološa bophelo.—Johane 17:3; 1 Timotheo 4:16.