Nakong Yeo Bokgoba bo Tlago go Fela!

TOKOLOGO! Ke mantšu a sego kae ao a ipiletšago pelong ya motho. Batho ba lwele le go tlaišega, ba phetše le go hwa, ka baka la go phegelela tokologo. Lega go le bjalo, ka manyami ba bantši ba dirile bjalo ka ntle le go bona tšwelopele e kgolo ya kgonthe pakaneng ya bona. Na go na le kholofelo bakeng sa go ka lokologa bokgobeng—kholofelo yeo e ka se kego ya feleletša ka kgakanego le manyami? E gona.

Moapostola Paulo o ile a budulelwa gore a ngwale ka kholofetšo ya Modimo gore: “Le tšôna dibopya di tlo hunollwa bohlankeng bya thsenyêxô, di be le tokoloxô ya xe bana ba Modimo bà e-ya letaxong.” (Ba-Roma 8:21) Eupša re ka kgonthišega bjang gore Modimo ka kgonthe o tla tliša ‘tokologo ya letago’? Tsela e nngwe ke ka go hlahlobišiša ditsela tšeo ka tšona Modimo a bego a dirišana le batho historing ka moka.

Beibele e re: “Mo xo lexo Môya wa Morêna, ké mo xo lexo khunoloxô [tokologo].” (2 Ba-Korinthe 3:17) Ee, moya wa Modimo goba matla a šomago, ke o matla ka mo go tseneletšego. O be a dutše a o diriša bakeng sa go nea tokologo ka ditsela tše dintši ka nako e telele. O dirile seo bjang? Ee, re swanetše go dula re gopola gore go na le mehuta e mentši ya bokgoba. Re šetše re ahla-ahlile o mongwe wa mehuta e šoro kudu, woo go wona bao ba nago le matla ba dirago bao ba fokolago makgoba ka kgapeletšo le bošoro. Eupša nagana ka dibopego tše dingwe tša bokgoba.

Batho ba ka itira makgoba ka go lemalela dilo tše di fapanego tšeo di ka ipontšhago e le tše thata ka mo go feteletšego go ka di efoga. Batho ba ka dirwa makgoba ke maaka le bofora, ba ka radiiwa gore ba phele bophelo bja go ipea ka tlase ga dithuto tša maaka. Mohuta wo o nago le bohwirihwiri le go feta, ke mohuta wa bokgoba woo o tlaišago yo mongwe le yo mongwe wa rena—re tseba seo goba re sa se tsebe—gomme mafelelo a wona ke ao a bolayago. Lega go le bjalo, go swanetšwe gore go gatelelwe  gore le ge re bea dibopego tše itšego tša bokgoba ka magoro poledišanong ye, ga re lekanye dibopego tše le gatee. Di fapana kudu. Lega go le bjalo, go na le sebopego setee sa bohlokwa seo se tlwaelegilego. Mafelelong, Modimo wa tokologo o tla kgonthišetša gore batho ba imollwa morwalo wa dibopego tše ka moka tša bokgoba.

Ge Dilo Tšeo di Lemalelwago di Dira Batho Makgoba

Ela hloko kamoo puku ya When Luck Runs Out e hlalosago go petšha mo go lemalelwago ka gona: “Tlhaka-tlhakano yeo ka go yona motho a gapeletšwago ke tutuetšo e matla le e sa laolegego gore a petšhe. Tutuetšo ye ke yeo e phegelelago le yeo e golago ka matla kudu le ka go akgofa . . . go fihlela ge mafelelong e šwahlela, ganyenyane-ganyenyane e fokodiša le go gobatša gomme gantši e senya dilo ka moka tšeo e lego tša bohlokwa kudu bophelong bja gagwe.” Ga go na motho yo a tsebago gore ke batho ba bakae bao ba fetogilego makgoba a go petšha. Kakanyetšo bakeng sa naga e tee feela, e lego United States, ke mo e ka bago dimilione tše tshela.

Go lemalela bjala e ka ba mo go senyago ka mo go swanago, ge e ba e se mo go senyago le go feta, gomme mafelong a mantši ke mo go apareditšego. Nageng e nngwe e kgolo, seripa-gare sa palo ya banna bao ba gotšego se tlaišwa ke go lemalela bjala ka tekanyo e itšego. Ricardo, yoo a ilego a fetoga molemaledi wa bjala nywageng e 20 e fetilego, o hlalosa seo mohuta wo wa temalelo o se bolelago: “Go tloga nakong yeo o tsogago ka yona, mmele wa gago o nyaka bjala ka go akgofa—bakeng sa go fodiša megalatšhika, bakeng sa go lebala mathata a gago goba go go nea feela go ikholofela mo go lekanego bakeng sa go lebeletšana le bophelo. O thoma go tshwenyega ka go hwetša seno se se tagago, gomme o leka go ikgodiša le go kgodiša bao ba go dikologilego gore boitshwaro bja gago ke bjo bo tlwaelegilego.”

Bjala ga se selo se nnoši seo se ka lemalelwago seo se dirago batho makgoba. Lefaseng ka bophara, go na le dimilione tše dintši tša batho bao ba dirišago dihlare-tagi tšeo e sego tša molao gampe. Go feta moo, ba bangwe ba dimilione tše dikete tše 1,2 ba diriša motšoko—woo o nago le sehlare-tagi se sengwe seo se lemalelwago kudu go feta tše dingwe ka moka. Batho ba bantši ba rata go tlogela go kgoga, eupša ba ikwa ba dirilwe makgoba. Na Jehofa o ipontšhitše e le Mohunolodi yo a atlegago wa batho dibopegong tše bjalo tše matla tša bokgoba? *

Nagana ka mohlala wa Ricardo. Ricardo o hlalosa gore: “Mo e ka bago nywaga e lesome e fetilego, ke ile ka lemoga gore bjala bo be bo laola bophelo bja-ka. Bo be bo senya lenyalo la-ka, mošomo wa-ka le lapa la-ka gomme ke be ke tseba gore ke be nka se tsoge ke kgonne go rarolla mathata a-ka ge e ba ke  sa efoge gore bo ntaole. Thutong ya Beibele, ke ile ka ithuta gore bodiidi—bja kgonthe le bja moya—bo tlaiša motho yo a nwago kudu. (Diema 23:20, 21) Ke be ke nyaka go ba le tswalano e botse le Modimo gomme dithapelo tša-ka tšeo di tšwago pelong tša go kgopela thušo ya Modimo di ile tša nthuša gore ke ipotegele ka noši. Monna yo mongwe o ile a ithuta le nna Bibele gomme a ipontšha e le mogwera wa bohlokwa. Ge ke be ke boetše morago, o be a sa ke a itlhoboga ka nna, eupša ka go se fele pelo le ka matla o ile a mpontšha tsela yeo Modimo a e neago bakeng sa Bakriste ba therešo.”

Lehono Ricardo o ikwa a hunolotšwe bokgobeng bja gagwe bja pele—bonyenyane ge go bapišwa le pele. O dumela ka ntle le go dika-dika gore mathomong o be a fela a boela morago nako le nako. O re: “Go sa šetšwe dipoelo-morago tšeo, kganyogo ya-ka ya go hlankela Jehofa ka potego gotee le thekgo ya mosadi wa-ka le Bakriste-gotee le nna ba bangwe, e ile ya nthuša go laola boemo. Ke lebeletše pele nakong yeo Modimo a e holofeditšego moo ‘go ka se bego le yo a rego, “Ke a babja”’ gomme le go lemalela bjala e tla be e le selo sa nakong e fetilego. Ge ke sa e letile, ke tla tšwela pele ka ntwa ya-ka ya letšatši le letšatši bakeng sa go neela mmele wa-ka e le ‘sehlabelo se se phelago, se sekgethwa, se se amogelegago go Modimo.’”—Jesaya 33:24; Ba-Roma 12:1, PK.

Go dikologa lefase batho ba dikete tše dintši ba ile ba iponela ka bobona thušo ya Modimo ge ba be ba le gare ba katana le go itokolla ditemalelong tšeo di fapa-fapanego. Ke therešo gore ba kgathile tema e kgolo go itireng ga bona makgoba, mohlomongwe ka go ineela dikgateletšong le ditekong tše di fapa-fapanego. Lega go le bjalo, ba hweditše gore Jehofa ke Mohunolodi yo a sa felego pelo e le ruri. O ikemišeditše go thuša le go matlafatša bohle bao ba nyakago e le ka kgonthe go mo hlankela.

“Therešo ya tlo Le Lokolla”

Go thwe’ng ka go ba makgoba a maaka le boradia? Jesu Kriste o re kgonthišetša gore go lokologa dilong tše bjalo go a kgonagala. O itše: “Xe Le nama le Lentšu la-ka, Le barutiwa ba-ka ka xo rereša, La tlo tseba therešô, ’me therešô ya tlo Le lokolla.” (Johane 8:31, 32) Nakong yeo a boletšego ka yona, ba bantši ba batheetši ba gagwe e be e le makgoba a thulaganyo e sa koba-kobegego ya moetlo wa Bafarisei. Ge e le gabotse, Jesu o boletše ka baetapele ba bodumedi ba mehleng ya gagwe gore: “Ba tlêma merwalô e boima e rôbaxo, ’me ba e rweša batho maxetleng, mola bôná bà sa rate xo e kxwatha le ka monwana o tee.” (Mateo 23:4) Dithuto tša Jesu di ile tša lokolla batho bokgobeng bjo bo bjalo. O ile a pepentšha maaka a bodumedi mabapi le seo a lego sona, gaešita le go hlaola mothopo wa ona. (Johane 8:44) O ile a tšeela maaka sebaka ka therešo, gomme a utolla ka mo go kwagalago dilo tšeo Modimo a di nyakago tšeo di leka-lekanego bakeng sa batho.—Mateo 11:28-30.

Ka go swana le barutiwa ba Jesu, batho ba dikete-kete lehono ba hwetša gore ka thušo ya Modimo ba ka kgona go lokologa maakeng a bodumedi le meetlong ya maaka yeo e ba dirilego makgoba. Ka morago ga go ithuta ditherešo tšeo di lapološago tša Beibele, ba ikhwetša ba lokologile poifong yeo e gateletšago ya bahu, ba lokologile letšhogong la go tšhoga tlaišo ya ka mo go sa felego mollong wa dihele gaešita le go lokologa kgateletšong ya go lefela tšhelete yeo e hweditšwego ka thata bakeng sa ditirelo tša bodumedi tšeo di dirwago ke baruti bao ba ipolelago gore ke baemedi ba Kriste—yoo a itšego: “Le filwe fêla; le lena fang fêla.” (Mateo 10:8) Go feta moo, tokologo e kgolo ka go fetišiša e kgaufsi kudu le go tla.

Bokgoba bjo bo sa Lemogegego ka go Fetišiša

Ela hloko tsela yeo Jesu a hlalositšego sebopego seo se sa lemogegego sa bokgoba, seo se boletšwego mathomong, seo se kgomago monna yo mongwe le yo mongwe, mosadi le ngwana mo lefaseng ge a re: “Ruri, ruri, ke a Le botša, mang le mang e a diraxo sebe, ké mohlanka  wa sôna sebe.” (Johane 8:34) Ke mang yo a ka ipolelago gore ga a dire sebe? Gaešita le moapostola Paulo o ile a dumela ka gore: “Xa ke dire botse byo ke bo rataxo; ke dira bobe byo ke sa bo ratexo.” (Ba-Roma 7:19) Le ge go se na motho yo a ka itokollago ditlamong tša sebe, boemo bja rena ga se bjo bo hlokago kholofelo.

Jesu o ile a kgonthišetša barutiwa ba gagwe gore: “Xe Morwa a Le lokolla, ké mo Le tlo xo ba Le lokolotšwe ruri.” (Johane 8:36) Phethagatšo ya kholofetšo ye ka kgonthe e tla bolela tokologo ya kgonthe dibopegong ka moka tšeo di senyago ka go fetišiša tša bokgoba. Bakeng sa go kwešiša tsela yeo ka yona re ka tšwago go bjona, sa pele re swanetše go bona tsela yeo ka yona re ilego ra dirwa makgoba le mathomong.

Beibele e utolla gore Modimo o bopile motho e le sebopiwa se se nago le tokologo ya go ikgethela, a se na tshekamelo ya sebe. Eupša morwa yo a nago le boithati le yo a sa bonagalego wa Modimo o ile a nyaka gore a diriše matla godimo ga batho, go sa šetšwe gore seo se be se tla bolela tlaišego bathong. E le gore a fihlelele pakane yeo, morongwa yo wa lerabele yoo ka morago a ilego a bitšwa Sathane Diabolo, o ile a dira gore batswadi ba rena ba pele ba batho e lego Adama le Efa, ba furalele Modimo. Ka morago ga gore Adama ka boomo a se ke a theetša ditaelo tše lebanyago tša Modimo, ga se fela gore yena ka boyena o ile a ba modiradibe eupša o ile a fetišetša go se phethagale le lehu ditlogolwaneng tša gagwe ka moka. (Ba-Roma 5:12) Mafelelong, Sathane o ile a ba ‘mmuši wa lefase,’ gomme ‘sebe se ile sa buša godimo ga batho bjalo ka kgoši gotee le lehu.’—Johane 12:31; Ba-Roma 5:21; Kutollo 12:9.

Ke bjang re ka lokollwago? Ka go ba barutiwa ba Jesu, re ka kgona go hwetša mohola lehung la Kriste la sehlabelo, leo le nago le matla a go “[fenya] Diabolo e a bexo a na le matla a lehu” le go “xolola [lokolla] bao e bexo e le batlêngwa ka xo boifa lehu mehla yohle xe ba sa phela.” (Ba-Hebere 2:14, 15) Nagana ka seo—tokologo ya go lokologa bokgobeng bja sebe le lehu! Na kgopolo ya tokologo e bjalo ga se yeo e ipiletšago?

Lega go le bjalo, go thwe’ng ka mohuta wa bokgoba woo re o ahla-ahlilego mathomong? Na go dirwa ga batho makgoba ka kgapeletšo ba sa rate go tla ka gwa fela?

Motheo wa Kgonthe Bakeng sa Kholofelo

Ka kgonthe, re ka kgodišega gore sebopego se bjalo seo se sa nyakegego sa bokgoba se tla fedišwa. Ke ka baka la’ng go le bjalo? Ee, nagana ka se: Jehofa Modimo o be a ikarabela ka go lebanya mogwantong o mogolo wa go ya tokologong historing ka moka ya batho. Mohlomongwe o ka ba o tlwaelane le pego ya histori.

Setšhaba sa Isiraele se be se dirilwe makgoba ke Egipita, se be se gapeletšwa go dira mošomo o thata wa matsogo le go swarwa gampe. Se ile sa llela go Modimo bakeng sa thušo, gomme yena ka kgaugelo ya gagwe e kgolo, o ile a se kwa gomme a gata mogato. Ka go diriša Moše le Arone e le baboleledi ba gagwe, Jehofa o ile a nea taelo ya gore Farao wa mo-Egipita a lokolle ba-Isiraele ba sepele. Kgoši yeo e ikgogomošago e ile ya gana leboelela, le ka morago ga ge Jehofa a tlišitše lelokelelo la dikotlo tšeo di šwalalanyago godimo ga naga. Mafelelong, Modimo o ile a dira gore Farao a theetše gomme a lokolle ba-Isiraele. Ba-Isiraele ba ile ba feleletša ba lokologile!—Ekisodo 12:29-32.

Ke pego e thabišago, na ga go bjalo? Lega go le bjalo, o ka ipotšiša lebaka leo ka lona Modimo a sa dirago selo seo se swanago mehleng yeno. Ke ka baka la’ng a se a tsena ditaba tša batho gare le go fediša bokgoba? Gopola gore Jehofa ga se ‘mmuši wa lefase’—mmuši ke  Sathane. Ka baka la ditlhohlo tšeo di ilego tša rotošwa morago kua Edene, Jehofa o dumeletše Lenaba le le kgopo gore le buše ka nako yeo e lekanyeditšwego. Bokgoba, kgatelelo le bošoro ke dibopego tšeo di kgethollago mmušo wa Sathane. Ka tlase ga tutuetšo e bjalo, mmušo wa batho o bontšhitše e le wo o paletšwego o šoro. Beibele e akaretša pego yeo ka boripana ge e re: “Motho [o] buša motho xore a mo senyê.”—Mmoledi 8:9.

Eupša ka lebaka le lekaaka’ng? Beibele e hlalosa gore re phela “mehleng ya bofelo,” nakong yeo go yona boithati le megabaru di bego di tla ata. (2 Timotheo 3:1, 2) Se se bolela gore kgaufsinyane Mmušo wa Modimo woo Jesu a re rutilego go o rapelela, o tla hloma lekoko la go loka leo go lona bokgoba bo tlago go iletšwa. (Mateo 6:9, 10) Jesu Kriste, e lego Kgoši e kgethilwego ya Modimo, o tla gata mogato wa go fediša mehlala ka moka ya bokgoba go ba go fihla ge lenaba la mafelelo, e lego lehu, le fedišitšwe.—1 Ba-Korinthe 15:25, 26.

Ge letšatši leo mafelelong le fihla, batho bao ba botegago ba tla bona gore go lokollwa ga batho ba Modimo bokgobeng bja Egipita e be e le mahlasedi feela a khunologo ye e kgolo ka go fetišiša. Ee, ge nako e dutše e e-ya, “le tšôna dibopya di tlo hunollwa bohlankeng bya thsenyêxô.” Mafelelong, bohle ba tla kgona go thabela ka botlalo “tokoloxô ya xe bana ba Modimo bà e-ya letaxong.”—Ba-Roma 8:21.

[Mongwalo wa ka tlase]

[Seswantšho go letlakala 23]

Batho bao ba akanyetšwago go dimilione tše tshela ke makgoba a go petšha kua United States e nnoši

[Diswantšho go letlakala 23]

Batho ba dimilione tše makgolo ke makgoba a dihlare-tagi, bjala le motšoko

[Diswantšho go letlakala 24, 25]

Ka go swana le Ricardo, batho ba dikete ba ile ba hwetša thušo ya Modimo bakeng sa go ba thuša go lokologa dilong tšeo di lemalelwago

[Diswantšho go letlakala 26]

Bjalo ka ge ba-Isiraele ba kgale ba ile ba lokollwa bokgobeng, kgaufsinyane barapedi ba therešo ba Modimo ba tla thabela tokologo e kgolo ka go fetišiša