Bafsa ba a Botšiša . . .

Nka Phedišana Bjang le Motho yo ke Dulago le Yena ka Phapošing?

“Ke be ke nyaka khitšhi e dulago e hlwekile. Eupša batho bao ke dulago le bona ba be ba sa be le taba ge go be go e-na le dibjana tšeo di sa bewago gabotse goba ge ba be ba tlogetše didirišwa tše dingwe godimo ga setofo. Seo se be se sa bolele selo go bona.”—Lynn. *

BATHO bao ba dulago gotee ka phapošing. Mongwadi Kevin Scoleri o bolela gore: “E ka ba bagwera ba go ntšhana sa inong goba manaba a šoro.” O ka ba o se na maikwelo a tseneletšego ka se ka bowena, eupša ke mo go sa ganetšegego gore go dula le motho yo mongwe e ka ba tlhohlo ya kgonthe. * Dintwa tša batho bao ba dulago gotee ka phapošing ke tšeo di tlwaelegilego kudu gare ga barutwana ba yunibesithing mo e lego gore go ya ka U.S.News & World Report, dikolo tše dintši di dira “maiteko a tseneletšego” bakeng sa go thuša batho bao ba dulago gotee ka phapošing gore ba kgone go phedišana, go akaretša le “mananeo a go lamola dintwa” gotee le diseminari.

Go dula le motho ka foleteng go ka ba thata le bakeng sa bafsa ba Bakriste bao ba tlogilego gae bakeng sa go phegelela modiro wa boebangedi wa nako e tletšego. Ditaba tše dibotse ke gore ka go diriša melao ya motheo ya Beibele le ka go bontšha “bohlale bjo bo šomago,” dintwa gantši di ka lokišwa.—Diema 2:7, NW.

Tsebanang

Ka morago ga ge lethabo la go huduga le fedile, mohlomongwe o ka ikhwetša o hlolosela tsela yeo dilo di bego di le ka yona morago kua gae. (Numeri 11:4, 5) Lega go le bjalo, go dula o nagana ka dilo tše di fetilego go tla dira gore go be thata go tlwaelana le boemo. Mmoledi 7:10 e nea keletšo ye: “Se re: Mehla ya byalo e re’ng e phalwa ke ya kxalê? Yo bohlale xa’ latiše tšeo.” Ee, go kaone gore o leke go dira boemo bja gago gore e be bjo bo thabišago ka mo go kgonegago.

Thoma ka go dira maiteko a go tseba motho yo o dulago le yena ka phapošing. Ke therešo gore ga se ga bohlokwa gore batho bao ba dulago gotee ka phapošing e be bagwera ba kgaufsi-ufsi. Ge e le gabotse, e ka ba e se motho yoo o batamelanego le yena ka mo go kgethegilego. Lega go le bjalo, ge e ba o swanetše gore o dule le motho yoo, na ga se mo go kwagalago gore le bope tswalano ya segwera ka mo go kgonegago?

Ba-Filipi 2:4 e re botša gore re se ke ra ‘šetša tša go hola rena eupša re šetše tša go hola ba bangwe.’ Ka ntle le go thoma poledišano yeo e bonagalago eka ke go botšološiša motho, na o ka botšiša mabapi le setlogo sa lapa labo motho yo o dulago le yena, dikganyogo tša gagwe, dipakane le dikgetho tša motho ka noši? Mo tsebiše ka wena. Ge le dutše le ithuta ka mo go oketšegilego mabapi le yo mongwe le yo mongwe wa lena, ke moo le tla kgonago go kwešišana ka mo go oketšegilego.

Ka dinako tše dingwe, le dire dithulaganyo tša kgonthe bakeng sa go dira dilo le le gotee. Lee o re: “Ka dinako tše dingwe nna le batho bao ke dulago le bona re intšha go yo ja ka ntle goba mo gongwe ra etela musiamo wa tša bokgabo re le gotee.” Bakeng sa Bakriste  bao ba dulago gotee ka phapošing, go abelana mediro ya moya e bjalo ka go lokišetša bakeng sa diboka tša phuthego goba go šoma gotee modirong wa boebangedi, ke tsela yeo e šomago kudu bakeng sa go hlama ditlemo tša segwera.

David o re: “Ge motho yo ke dulago le yena ka phapošing a be a ile go nea polelo ya Beibele ya phatlalatša, ke be ke kopanela dibokeng tša phuthegong ya gabo bakeng sa go mo nea thekgo.” Le ge David le motho yo a dulago le yena ka phapošing ba e-na le dikgetho tše di fapanego ge go e-tla dilong tše di swanago le dipapadi goba mmino, lerato la bona bakeng sa dilo tša moya le bopile tlemagano. David o re: “Re ba le dipoledišano tše dintši ka dilo tša moya. Ge e le gabotse, re kgona go boledišana lebaka la diiri ka dilo tša moya.”

Lentšu la temošo: O se ke wa kgomarela motho yo o dulago le yena ka phapošing kudu moo o palelwago ke go dira ditswalano tše dingwe tša segwera tšeo di agago. Ge e ba motho yo o dulago le yena ka phapošing a nagana gore o swanetše go laletšwa nako le nako ge a sepela a e-ya le ge e le kae, a ka thoma go ikwa a se na tokologo. Keletšo ya Beibele e re “katološang” ditswalano tša lena.—2 Ba-Korinthe 6:13.

Go Phela ka Molao wa Gauta

Ke therešo gore ge le dutše le tšwela pele go tsebana, le tla ela hloko gape go fapana ga lena ka mekgwa, dilo tšeo le di ratago gotee le dipono tša motho ka noši. Bjalo ka ge Mark yo monyenyane a lemoša, “o swanetše go letela ditiro tša go se phethagale.” Go ba yo a sa koba-kobegego le maemo le go ba le boithati go tswala kgateletšo. Go bjalo le ka go lebelela gore motho yo o dulago le yena a dire diphetogo tše dikgolo bakeng sa go go thabiša.

Fernando o ithutile se mabapi le go dula le motho ka phapošing: “O swanetše gore o hloke boithati.” Tlhaloso ya gagwe e dumelelana le Molao wa Gauta, woo o bolelago gore: “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo.” (Mateo 7:12) Ka mohlala, Fernando kapejana o ile a utolla gore yena le motho yo a dulago le yena ka phapošing ba be ba lwešwa ke thempheretšha ya ka phapošing; yena o be a rata ge go le borutho, eupša motho yo a dulago le yena ka phapošing o be a rata go robala ka thempheretšha ya tlase. Tharollo e bile efe? Fernando o re: “Ke ile ka ikhweletša kobo e nngwe.” Ee, bjalo ka ge Mark a hlalosa, “e-ba yo a koba-kobegago le maemo. Ga se gore o swanetše go tlogela ditsela tša gago ka moka, eupša mo gongwe o ka swanela ke gore o tlogele ditsela tša gago tše di sego kae.”

Tikologo e nngwe yeo go yona o ka dirišago Molao wa Gauta ke ye: Ithute go kgotlelela dilo tšeo motho yo o dulago le yena ka phapošing a di ratago. Na mohlomongwe o bolela gore ga o rate mohuta wa gagwe wa mmino? Ke therešo gore mohlomongwe le yena o ikwa ka mo go swanago ka mohuta wa gago wa mmino. Ka gona ge e ba mohuta wa mmino woo motho yo o dulago le yena ka phapošing e se wo o senyago boitshwarong, gona o ka leka go bontšha kgotlelelo. Fernando o re: “Ke be nka rata ge e ba motho yo ke dulago le yena ka phapošing a be a ka ba a e-na le kgetho e fapanego ya mmino. Eupša ke šetše ke tlwaela mmino wa gagwe.” Ka lehlakoreng le lengwe, motho a ka thabela mmino wa gagwe a diriša di-headphone e le gore a se ke a šitiša motho yo a dulago le yena ka phapošing, yoo mohlomongwe a ka bago a ithuta.

Go diriša Molao wa Gauta le gona go ka thibela dingangišano tšeo di sa rego selo mabapi le dilo tše di bonagalago. Ka mohlala, ge e ba o tlwaetše go itšeela selo le ge e le sefe seo se lego ka setšidifatšing bakeng sa go se diriša ka ntle le tumelelo—eupša e e-ba ka sewelo moo o se bušetšago—sekgopi se ka gola. Ka nako e swanago, go galefa goba go lebelela motho ka mo go sa kgahlišego ge motho yo o dulago le yena ka phapošing a ithuša ka selo se o se rekilego le gona go ka se godiše ditswalano tše borutho. Beibele e re  kgothaletša gore re “ratê xo nea, [re] abêlê ba bangwê.” (1 Timotheo 6:18) Ge e ba o nagana gore ba bangwe ba ikhola ka wena, o se ke wa homola. Hlalosa dipelaelo tša gago ka moya wo o fodilego le ka botho.

Yo mongwe le yo mongwe wa lena a hlomphe dilo tša yo mongwe. Ke boikgogomošo go ikadima selo ka ntle le go kgopela tumelelo. (Diema 11:2) O swanetše gore gape o be yo a naganelago go nyaka ga motho yo o dulago le yena sebaka sa go ba noši. Bontšha mekgwa ya motheo ya setho e bjalo ka go kokota pele o ka tsena ka phapošing ya gagwe. Ge o bontšha tlhompho, motho yo o dulago le yena ka phapošing o tla dira bjalo ka mo go swanago. David o re: “Ga se bothata bakeng sa bobedi bja rena go ithuta ka gae. Bobedi bja rena re hlompha seo ka mo go feletšego gomme yo mongwe o a homola ge yo mongwe wa rena a bala. Eupša ka dinako tše dingwe ke ya bokgobapukung bakeng sa go yo balela gona ge mohlomongwe yo ke dulago le yena ka phapošing a nyaka go dira selo se sengwe.”

Go diriša Molao wa Gauta gape go tla akaretša go bontšha boikarabelo ge go e-tla tabeng ya dilo tšeo di swanago le go lefa karolo ya gago ya rente ka nako goba go dira karolo ya gago ya mošomo wa ka gae.

Go Rarolla Diphapano

Morago kua mehleng ya Beibele, banna ba babedi ba Bakriste bao ba bego ba hlompšha kudu bao ba bitšwago Paulo le Baranaba ba ile ba ba le “kxang.” (Ditiro 15:39) Go thwe’ng ge e ba selo se se swanago se direga magareng ga lena? Mohlomongwe go na le phapano ya semelo goba mokgwa wo motho a o tlwaetšego woo o go galefišago wo o lekago kgotlelelo ya gago ka mo go feletšego. Na ge e le gabotse go se dumelelane gatee goba go ba le poledišano yeo e tletšego kgalefo go bolela gore le swanetše go kgaotša go dula gotee? Ga go bjalo le gatee. Go bonagala gabotse gore Paulo le Baranaba ba ile ba kgona go rarolla diphapano tša bona. Mohlomongwe le lena le ka dira selo se se swanago pele le ka tšea mogato o bjalo o mogolo o swanago le go huduga. Melao e mengwe ya motheo ya Beibele yeo e ka thušago še.

● “Le se kê la dira selô ka kxang le ka xo nyaka xo rêtwa. Sa lena a e bê xo ipoetša le xo phalana xo xodišaneng.”—Ba-Filipi 2:3.

● “Tše e kexo ké sekxoro, le bonaba, le mašata, le maroxa, a di bê kxolê le lena, le bobe byohle. Sa lena a e bê xo dirana ka botho le ka bonôlô, le xo xauxêlana byalo ka xe Modimo le Yêna a Le xauxetše ka Kriste.”—Ba-Efeso 4:31, 32.

● “Ké xôna, xe O tliša neô ya xaxo aletareng, ’me Ò le xôna-fao wa êlêlwa, xore ngwan’eno ó na le taba le wêna, xôna tloxêla neô ya xaxo moo aletareng, O thômê xo y’o boelana le ngwan’eno, O tseb’o tliša neô ya xaxo.”—Mateo 5:23, 24; Ba-Efeso 4:26.

Mehola ya Gona

Bafsa ba bantši (le bao e sego ba bafsa kudu) ba Bakriste bao ba nago le batho bao ba dulago gotee le bona ka phapošing ba ithutile ka go iponela ka noši therešo ya mantšu a Kgoši Salomo yo bohlale a rego: “Boló ké mola è le ba babedi, e sexo o tee.” (Mmoledi 4:9) Ka kgonthe, ba bantši ba hweditše phihlelo ya go dula ka phapošing gotee le motho yo mongwe e le yeo e nago le mohola. Mark o re: “Ke ithutile kamoo nka dirišanago le batho gakaone le go dumelelana le maemo.” Renee o oketša ka gore: “O ithuta mo gontši ka wena ka noši. Ka nako e swanago, batho bao ba dulago gotee ka phapošing e ka ba bao ba nago le tutuetšo e botse ya dithaka.” Lynn o dumela ka gore: “Ke be ke e-na le boithati kudu ge ke be ke thoma go dula le batho bao ke dulago le bona ka phapošing. Eupša ke ithutile gore ke se be yo a sa koba-kobegego kudu. Ke a lemoga bjale gore ka gobane motho yo mongwe a dira dilo ka tsela e fapanego le ya-ka, ga go bolele gore o fošitše.”

Ke therešo gore go phedišana gabotse le motho yo o dulago le yena ka phapošing go nyaka maiteko le boikgafo. Eupša ge e ba o šoma ka thata go dirišeng melao ya motheo ya Beibele, o ka kgona go dira mo gontši go feta go fo dudišana ka khutšo; o ka ikhwetša o thabela go ba le motho yo o dulago le yena ka phapošing.

[Mengwalo ya ka tlase]

[Seswantšho go letlakala 17]

Go itšeela dilo tšeo e sego tša gago bakeng sa go di diriša go ka baka kgateletšo

[Seswantšho go letlakala 18]

Bontšhang go naganelana