Dipalo le Wena

NA DIPALO di na le tlhaloso e utegilego? Ba bangwe ba ka bolela gore, “Go bjalo!” ba bile ba šupa mohlaleng o makatšago—wa ditlhaselo tša botšhošetši tša September 11, 2001.

Setsebi se sengwe sa dipalo se bolela gore: “Nakong ya ge ke be ke theeditše ditaba, ke ile ka lebiša tlhokomelo go letšatši-kgwedi la: 9-11-2001.” Ka kakaretšo, palo 11 e lebelelwa ke ditsebi tša dipalo e le e nngwe ya “dipalo tše di bolelago selo se segolo.” Ka gona, bao ba fišegelago thuto ya bodupe bja dipalo ba kgobokeditše lelokelelo la ditaba tše di fapa-fapanego tšeo di tswalanywago le tlhaselo ya botšhošetši yeo e šupago go “palo yeo e bolelago selo se segolo” ya 11. Ye e fo ba karolwana ya seo ba se hweditšego.

■ Masetlapelo a diregile ka letšatši-kgwedi la 9/11. . . . 9 + 1 + 1 = 11.

■ September 11 e be e le letšatši la bo-254 la ngwaga. . . . 2 + 5 + 4 = 11.

■ Sefofane seo se ilego sa thula tora ya ka leboa e be e le Flight 11.

■ Sefofane seo se be se nameditše batho ba 92. . . . 9 + 2 = 11.

■ Sefofane seo se ilego sa thula tora ya ka borwa se be se e-na le banamedi ba 65. . . . 6 + 5 = 11.

■ Ditora tše Pedi (Twin Towers) di be di eme go swantšhetša palo 11.

■ Ka Seisemane polelwana “New York City” e na le ditlhaka tše 11.

Thuto ya bodupe bja dipalo—yeo tlhokomelo e kgethegilego ya yona e tswalanywago le dipalo, go kopanywa ga tšona le dipalo-moka tša tšona—e be e dutše e le mokgwa o atilego Afrika, Asia le dinageng tša Amerika. Ke ka baka la’ng e le e goketšago gakaakaa? Go ya ka mokero o mongwe wa Web, go utolla tlhaloso e utegilego ya ditlhaka tšeo di dirišwago maineng—e lego sebopego se sengwe se se tumilego sa thuto ya bodupe bja dipalo—“go nea tsebišo e nepagetšego mabapi le semelo sa motho, tlhago ya gagwe, dika tša gagwe le mafokodi a gagwe.” Go ya ka mothopo wo, go nyakišiša mabapi le “letšatši-kgwedi la matswalo [la rena] go utolla tsela ya rena ya bophelo, le lethabo la yona gotee le diphihlelo tše bohloko.”

Na dipolelo tše ke tša therešo? Goba na go ka ba go e-na le dikotsi tše di iphihlilego nyakišišong e sa tlwaelegago ya dipalo?