Na o Swanetše go Lebelela Dipalong Bakeng sa Tlhahlo?

NA THUTO ya bodupe bja dipalo e bonagala e le e tiilego ge e hlahlobja go ya ka tša thutamahlale le go nea mabaka? Na dipalo ke mokgwa woo ka wona pheletšo ya rena e ka utollwago? Na o swanetše go aga bokamoso bja gago dikutollong tša bodupe bja dipalo le go boleleleng dilo pele?

Tlhohlo e nngwe yeo ditsebi tša dipalo di paletšwego ke go e fenya ke gore ditšhaba ka go fapana ga tšona di diriša dialmanaka tšeo di sa swanego. Ka mohlala, go thwe’ng ge e ba motho a dula moo almanaka ya se-China e dirišwago? Ela hloko letšatši-kgwedi leo go boletšwego ka lona sehlogong sa rena sa pele—September 11, 2001. Go ya ka almanaka ya se-China, leo e be e le letšatši la bo-24 la kgwedi ya bo-7 la ngwaga wa bo-18 la modikologo wa bo-78. Almanaka ya Julius e be e tla tšweletša letšatši-kgwedi leo e le August 29, 2001. Go ya ka almanaka ya Mamoseleme, e be e le ka di 22 Jumada II 1422, mola almanaka ya Sehebere e le tšweleditše e le 23 Elul 5761. Ke bjang go bego go ka ba le seo se bolelwago ke dipalo letšatši-kgweding leo le tšweletšwago ka mekgwa e mentši gakaakaa? Lebaka le lengwe ke le: Gantši maleme a na le tsela ya moswana-noši ya go peleta maina. Ka mohlala, ditlhaka tšeo di lego leineng la Seisemane la John di na le dinoko tše pedi, eupša ditlhaka tša mopeleto wa leina lona leo ka Sepaniši—e lego Juan—di na le senoko setee.

Go lemoga gore dibopego tše dintši tša legohle di ka hlaloswa ka mekgwa ya dipalo, ke taba e nngwe. Mekgwa ye e ka lekwa le go bontšhwa. Eupša e tloga e le selo se sengwe gape go bolela gore leina la gago le rulaganyeditšwe e sa le pele gore le welane le letšatši-kgwedi la gago la matswalo le gore le kgokagane le dipalo tše itšego gore o ka kgonthišetša pheletšo ya gago.

Phetho e molaleng: Ka ge go hlaloswa ga dipalo go theilwe mabakeng a mantši a bjalo ka almanaka le leleme, ke mo go sa kwagalego go dumela gore ditlhaloso tše e ka ba tšeo di nepagetšego.

“Nako le Ditiragalo tše di sa Letelwago”

Ba bangwe ba kgahlegela thuto ya bodupe bja dipalo ka gobane ba kganyoga gore bophelo bja bona bo bolelelwe pele. Lega go le bjalo, Beibele e hlalosa ka mo go kwagalago gore ditaba tša mabapi le bophelo bja motho di ka se ke tša utollwa e sa le pele. Re bala gore: “Ka bôna, xe fá tlase xa letšatši thšii è se mokitimi, mofenyi è se moxale, boxôbê  é se bya yo bohlale, lehumô è se la wa thlaloxanyô, xo ratwa è se xa wa tsebô. [Nako le ditiragalo tše di sa letelwago di ba wela bohle, NW.]” (Mmoledi 9:11) Ee, ditiragalo tše dintši di direga ka mo go sa letelwago. Ditiragalo tše bjalo tšeo di sa letelwago di dira gore go se kgonege go bolelela pele mafelelo ao a theilwego letšatši-kgweding la matswalo goba dinokong tša maina.

Ela hloko mohlala o mongwe: Beibele ge e kgothaletša go nea ka seatla se se bulegilego, e re: “Lahlela bogobe bja gago godimo ga meetse, gobane ka morago ga matšatši a mantši bo tlo boela go wena. O hlallele ba ba šupago le ga e le ba seswai, ka gobane ga o tsebe kotsi e ka bago gona nageng.” (Mmoledi 11:1, 2, PK, mongwalo o sekamego ke wa rena.) Ka ntle le tše sego kae, dikotsi ke dilo tšeo batho ge e le gabotse ba sa kgonego go ka di tseba e sa le pele. Ka gona, moprofesara wa thuto ya dipalo e lego Underwood Dudley o ngwala mabapi le ditsebi tša bodupe bja dipalo gore: “Di palelwa ke go dumela ka mo go lekanego gore dilo di ka direga ka mo go sa letelwago. Dilo tše di makatšago di ka itiragalela feela.”

Ke therešo gore ditsebi tša bodupe bja dipalo di ka bolelela pele dilo tše dingwe tšeo di ka phethagalago. Ke’ng seo se dirago gore se se kgonege? Mabakeng a mangwe, se se ka bakwa ke go welana ga ditiragalo. Go feta moo, ka dinako tše dingwe polelo ya ditsebi tša bodupe bja dipalo ke yeo e sa hlathegego moo e lego gore e ka šoma ditiragalong tše di sa swanego. Eupša go na le selo se sengwe se segolo seo se swanetšego go elwa hloko.

Na ke Sebopego sa Bonoge?

Beibele ga e bolele thuto ya bodupe bja dipalo ka leina. Eupša e bolela ka Hamani yo e lego mo-Amaleke yo a ilego a loga leano la go fediša  ba-Juda bao ba bego ba dula Peresia lekgolong la bohlano la nywaga B.C.E. Pego e re: “Ba thôma xo laola ka ditaola [“matengwa”] pele xa Hamani; ba fêla ba dira byalo ka mehla [gore ba hwetše letšatši le le swanetšego le kgwedi bakeng sa go phethagatša leano la gagwe, Today’s English Version], xwa fêla dikxwedi xwa tla ya lesome la metšô e mebedi ya Adara.”—Esitere 3:7.

Mehleng ya bogologolo, go diriša matengwa e be e le tsela ya molao ya go rarolla diphapang. * (Diema 18:18) Eupša Hamani o ile a diriša matengwa bakeng sa go noga—e lego selo seo Beibele e se solago. Doiteronomio 18:10-12 e bolela gore Modimo o hloile “e a diraxo tša bonoxê le tša maphalô, le e a upaxo ka meupô le boloi, . . . wa malôpô le e a botšišaxo badimo, le xe e le sedupê. . . . Ba ba diraxo tše byalo Morêna ó bôna e le makxapa.”

Beibele e tswalanya bonoge le matla ao a sa tlwaelegago le mokgwa wa go dirišana le meoya. Meoya e kgopo e ka kgopamiša ditiragalo gore di swanele morero wa yona. Go sa šetšwe gore se se bjalo mabakeng a itšego, therešo ke gore: Go dirišana le meoya go solwa ke Modimo gomme go ka dira gore motho a be ka tlase ga taolo ya meoya e kgopo.—1 Samuele 15:23; Ba-Efeso 6:12.

Thuto ya bodupe bja dipalo ga e na motheo wa tša thutamahlale gomme e fetoga lefeela ge e hlahlobja ka go naganišišwa gabotse. Sa bohlokwa le go feta ke gore, bjalo ka ge e le sebopego sa bonoge, thuto ya bodupe bja dipalo e thulana le dithuto tša Beibele. Ka baka leo, thuto ya bodupe bja dipalo ga se mokgwa o holago wa go hlahla bophelo bja gago goba go rulaganyetša bokamoso bja gago.

[Mongwalo wa ka tlase]

[Lepokisi go letlakala 22]

DIALMANAKA TŠE DI SA SWANEGO KE LEPHEKO LE LEGOLO THUTONG YA BODUPE BJA DIPALO

ALMANAKA YAGREGORY September 11, 2001

ALMANAKA YA SE-CHINA letšatši la bo-24 la kgwedi ya bo-7 la

ngwaga wa bo-18 la modikologo wa bo-78

ALMANAKA YA JULIUS August 29, 2001

ALMANAKA YA MAMOSELEME 22 Jumada II 1422

ALMANAKA YA SEHEBERE 23 Elul 5761

[Lepokisi/Diswantšho go letlakala 23]

Na Di-horoscope Di Ka Botwa?

“Ka dinako tše dingwe o ba yo a nago le bogwera, eupša dinakong tše dingwe o ba yo a homotšego. O hwetša e se ga bohlale go itlhalosa kudu bathong bao o sa ba tsebego. O motho yo a naganago ka go ikemela yo a nyakago bohlatse bja taba pele o ka e amogela gabonolo. O rata dilo tše di fapa-fapanego bophelong, gomme o ikwa o sa thaba ge o thibelwa ke melao. O na le bokgoni bjo bogolo bjo o sa hlwago o bo diriša ka botlalo. O sekamela go ntšheng mediro ya gago le bokgoni bja gago diphošo.”

Na go bjalo ka wena? Ge e ba go le bjalo, o ka ba o feteletša tabeng ye. Go ba gona, bontši bja dipolelo tšeo di lego ka mo godimo ke tša therešo go batho ba bantši. Lega go le bjalo, babadi ba tla sekamela go amogeleng dipolelo tšeo di bonagalago di nepagetše gomme ba hlokomologe tšeo di sa nepagalago. Go ya ka puku ya Why Do Buses Come in Threes—The Hidden Mathematics of Everyday Life, “banyakišiši ba hweditše gore ge e ba dika tša dinaledi go horoscope di tlošitšwe, batho ga ba kgone go hlaola temana ya seka sa bona ka noši, eupša ge e ba dika di akareditšwe ba tla dumela gore horoscope ya bona ka noši ke yona e nepagetšego ka go fetišiša.”

[Lepokisi go letlakala 24]

Dipalo Tša Seswantšhetšo Ka Beibeleng

Dipalo tše itšego tšeo di dirišitšwego ka Beibeleng di na le ditlhaloso tša seswantšhetšo, eupša di tšwelela feela tabeng e dikologilego ya Mangwalo ao di dirišwago go ona. Ka mohlala, palo nne e dirišwa bakeng sa go bontšha go felelela goba go akaretša dilo ka moka. Kgopolo ye e fetišetšwa dipolelwaneng tše bjalo ka “dithokong tše nnê tša lefase” le “diphefong tše nne tša legodimo.” (Jesaya 11:12; Daniele 8:8, PK) Ka dinako tše dingwe palo tshela e emela go se phethege. Ka mo go kgahlišago, palo yeo e neilwego mokgatlo wa Sathane wa dipolitiki wa lefaseng ke puku ya Kutollo ke “palô ya motho”—666. (Kutollo 13:18) Mo tshela e bušeleditšwe gararo bakeng sa go gatelela go se phethege ga mokgatlo woo o swanago le sebata. Ge palo šupa e dirišwa ka tsela ya seswantšhetšo, e emela phethego. (Lefitiko 4:6; Ba-Hebere 9:24-26) Dipalo tše gotee le tše dingwe tša seswantšhetšo tšeo di dirišitšwego ka Mangwalong di hwetša tlhaloso go tšwa tabeng ya tšona e dikologilego ya boporofeta.

Gaešita le ge Mangwalo a gatelela bohlokwa dipalong tše itšego, Beibele ga e re kgothaletše go tswalanya ditlhaka tša mantšu a itšego le dipalo bakeng sa go utolla ditherešo tšeo di sa hlathegego.

[Seswantšho go letlakala 24]

Hamani o ile a diriša bonoge bakeng sa go kgetha letšatši-kgwedi la go phethagatša leano la gagwe la polao ya molokwana-rite