Tlhahlo e ka Botwago Bakeng sa Bokamoso

NA GO se botege ga thuto ya bodupe bja dipalo le dibopego tše dingwe tša bonoge go bolela gore ga re na tsela yeo ka yona re ka tsebago ka bokamoso bja rena? Le gatee!

Dipalo tša boikgopolelo di ka se kgone go botša batho seo bokamoso bo se huperego. Eupša “Modimo e a phelaxo” yo a bolelago “tša mafêlô mola di sa thôma,” o dirile seo. O dira se ka Lentšung la gagwe leo le ngwadilwego, Beibele. (1 Timotheo 4:10; Jesaya 46:10) Le gona lentšu la Modimo yo a phelago, e sego lentšu la ditsebi tša thuto ya bodupe bja dipalo, ke lona le kgonago go “fênyêka diakanyô le kxopolô tša pelo” gomme ka tsela yeo le ka go thuša go kwešiša seo se go tutuetšago le seo se tlago go go tlišetša katlego ya kgonthe.—Ba-Hebere 4:12.

Mmopi wa rena yo e lego Mongwadi wa Beibele, ke yena a nnoši yo a ka kgonago go bolelela bokamoso pele ka mo go nepagetšego. Se ke ka gobane Modimo ke yo matla-ohle, gomme o be a dutše a botegela lentšu la gagwe ka mehla. Jehofa Modimo o itše: “Ke boletše; ke tlo di tliša.” (Jesaya 46:11) Ka morago ga go etelela pele ba-Isiraele go tsena Nageng ya Kholofetšo, Jošua o ile a kgona go bolela ka kgodišego gore: “Xa xo a’ hlaêla le setee sa tše botse ka moka tše Morêna a di boditšexo ba sethšaba sa Isiraele; ka moka di be di tšweletše.”—Jošua 21:45; 23:14.

Beibele e hupere diporofeto tše dintši tšeo di sa tlago go phethagatšwa. Gare ga tšona go na le tšeo di bolelago ka nako yeo ka yona bokgopo bo tla bego bo tlošitšwe lefaseng gomme le fetošitšwe paradeise. (Psalme 37:10, 11; Diema 2:21, 22) Na bokamoso bjoo ke bjo bo kgahlišago go wena? Na o dumela gore Mmopi wa rena o na le bohlale le matla tša go lokiša maemo polaneteng ye? Ge e ba go le bjalo, o tla swanelwa ke go hlahloba seo Beibele e se bolelago mabapi le bokamoso bja lefase. *

Ka gona, diriša nako ya gago ka bohlale gona bjale—e sego ka go leka go tseba bokamoso bja gago ka go diriša dipalo, eupša ka go katanela go hwetša kwešišo e nepagetšego ya Beibele le diporofeto tša yona. Dihlatse tša Jehofa di ikemišeditše go go thuša go hwetša tsebo e oketšegilego mabapi le bokamoso bjalo ka ge bo utolotšwe ka Lentšung la Modimo, Beibele.

[Mongwalo wa ka tlase]