Bafsa ba a Botšiša . . .

Ke ka Baka La’ng Motswadi Wa-ka a sa Nthate?

“Pele ga ge tate a ka hlala mma, re be re tlwaetše go ya lebopong la lewatle, re e-ja mabenkeleng a go jela gotee le go fo itshepelela ka koloi ya gagwe. Ke moka seo ka moka se ile sa kgaotša ka mo go feletšego. Tate o ile a fetoga. Ke nagana gore le nna o ntlhadile.”—Karen. *

BAFSA ba bantši kudu ba tlaišwa ke maikwelo a swanago. Ka go swana le Karen, ba ikwa eka motswadi ga a sa ba rata—goba ga se a ka a ba rata. Mo ga re bolele ka maikwelo a fošagetšego a lebakanyana ao a ka rotogago ka baka la kgohlano ya lebakanyana magareng ga bafsa le batswadi ba bona; e bile ga re bolele ka sekgopi seo ka dinako tše dingwe se rotošwago ke tayo ya batswadi. Go e na le moo, mabakeng a mangwe batswadi ba na le molato wa go hlokomologa bana ba bona e le ka kgonthe, ba palelwa ke go ba nea tlhokomelo le tayo tšeo di nyakegago. Mabakeng a mangwe go na le mokgwa wa tshwaro e šoro le e sehlogo, yeo mohlomongwe e akaretšago mantšu a šoro goba go bethwa mmeleng.

Ga go na selo se bohloko kudu go feta go lahlwa ke motswadi. Karen o re: “Seo se be se ntira gore ke ikwe ke sa nyakwe e bile ke hlokomologilwe.” Ge e ba o kile wa ba boemong bjoo bjo thata, ela hloko ditšhišinyo tše dingwe tšeo di lego mabapi le kamoo o ka swaraganago le maikwelo a gago ka gona. Kgonthišega gore gaešita le ge o sa hwetše thekgo ya batswadi ba gago, o ka atlega bophelong!

Go Kwešiša Motswadi wa Gago

Sa mathomo, ke mo go swanetšego go lebelela gore batswadi ba gago ba go rate. Lerato la motswadi ngwaneng e swanetše go ba la tlhago le leo le ka botwago go etša go hlaba ga letšatši. Modimo o lebeletše gore batswadi ba bontšhe lerato. (Ba-Kolose 3:21; Tito 2:4) Ka gona ke ka baka la’ng ka dinako tše dingwe batswadi ba hlokomologa, ba lahla goba ba swara bana ba bona gampe?

Lebaka le lengwe leo le tlaleletšago e ka ba diphihlelo tšeo ba bilego le tšona bophelong. Ipotšiše gore, ‘Batswadi ba-ka ba ithutile kae ka taba ya go godiša bana?’ Mabakeng a mantši batswadi ba ka ithuta go tšwa diphihlelong tša bona tšeo ba bilego le tšona bjaneng le batswadi ba bona. Lefaseng la rena la mehleng yeno le šoro, leo le nago le dipalo tšeo di sa kago tša ba gona pele tša batho bao “ba se nago maikwelo a borutho a tlhago,” tlwaetšo e bjalo gantši ke yona e solwago kudu. (2 Timotheo 3:1-5, NW) Ka dinako tše dingwe, seo se feleletša ka tatelano ya ditiragalo, moo batswadi ba swarago bana ba bona gampe go fo etša ge le bona ba kile ba swarwa gampe.

Go oketša moo, batswadi ba ka ba ba e-na le mabaka a fapa-fapanego ao a ba dirago gore e be bao ba sa thabago ka mo go tseneletšego. Ba bangwe ba ka leka go tšhabela masetlapelo le kgakanego ka go nwelela mošomong, dino-taging goba dihlare-taging. Ka mohlala, William le Joan ba godišitšwe ke tate yo a bego a lemaletše dino-tagi. Joan o re: “Go be go le thata gore tate a re rete. Lega go le bjalo, se sešoro le go feta e be e le kgalefo ya gagwe ge a be a thoma go  nwa. O be a tla omanya mma bošego ka moka. Ke be ke dula ke tšhogile.” Gaešita le ge batswadi ba sa bontšhe tshwaro ya bona e mpe phatlalatša, mokgwa wa bona o ka ba hlokiša matla a go nea bana ba bona lerato le tlhokomelo tšeo di nyakegago.

William o nagana gore o kwešiša seo se bego se bakela tatagwe gore a be le boitshwaro bjo bo sa laolegego. O hlalosa gore: “Tate o goletše Berlin, Jeremane, nakong ya Ntwa ya II ya Lefase. Ge e sa le mošemanyana, o ile a lebeletšana le dilo tše di tšhošago tšeo di sa balegego gomme a bona mahu a mantši. Letšatšing le lengwe le le lengwe o be a swanelwa ke go katana bophelong gore a hwetše seo a ka se jago. Ke nagana gore tate o ile a kgongwa o šoro ke seo se mo diragaletšego.” Ka kgonthe, Beibele e dumela gore batho bao ba lego ka tlase ga kgatelelo e šoro ba ka dira dilo ka tsela ya go hloka tlhaologanyo.—Mmoledi 7:7.

Na William le Joan ba nagana gore diphihlelo tša tatago bona di lokafatša tsela yeo a ilego a ba swara ka gona? William o re: “Aowa. Boemo bja gagwe ga bo lokafatše go nwa kudu le boitshwaro bjo bo sa swanelago. Lega go le bjalo, go bo lemoga go nthušitše gore ke be le temogo e oketšegilego ka boitshwaro bja tate.”

Go amogela ga gago therešo ya gore batswadi ba gago ga se ba phethagala le go ithuta se sengwe ka boemo bja bona go ka go thuša kudu tabeng ya go ba kwešiša. Diema 19:11 e re: “Molemoxi xa a na sebefedi.”

Go Swaragana le Maikwelo a Gago

Go na le maikwelo a mangwe a sa thabišego ao a ka go tshwenyago ka baka la boemo bjo bo lego gona ka lapeng. Ka mohlala, go se hwetše tlhokomelo e tšwago go batswadi ka bobedi go dirile Patricia gore a ikwe “a se na mohola e bile a sa ratege.” LaNeisha o ile a hwetša a thatafalelwa ke go bota banna ka kakaretšo ka morago ga gore tatagwe a ba tlogele ge a be a e-na le nywaga e seswai feela. Shayla yena o ile a ikhwetša a duma go hwetša tlhokomelo ya mo e ka bago motho yo mongwe le yo mongwe yo a bego a gahlana le yena, feela bakeng sa go thiba sekgoba seo se tlogetšwego ke mmagwe yoo bophelo bja gagwe “bo bego bo laolwa ke dihlare-tagi.”

Kgalefo le lehufa le tšona e ka ba bothata. Ge Karen a be a bona tatagwe yo a nyetšego gape a bontšha lapa la gagwe le lefsa lerato leo yena a bego a kganyoga go le bontšhwa, seo se ile sa mo dira gore a ikwe a “tletše lehufa kudu ka nako e nngwe.” Ka dinako tše dingwe, Leilani o be a bile a ikwa a hloile batswadi ba gagwe. O re: “Ke be ke phela ke ngangišana le bona.”

Ge go naganwa ka maemo, maikwelo a ka moka a a kwešišega. Lega go le bjalo, o ka swaragana bjang ka katlego le maikwelo a bjalo a fošagetšego? Ela hloko ditšhišinyo tše di latelago.

• Batamela Kgaufsi le Jehofa Modimo. (Jakobo 4:8) O ka dira seo ka go ithuta ga gago Beibele le go gwerana ka mehla le batho ba gagwe. Ge o dutše o bona tsela yeo Jehofa a dirišanago le ba bangwe ka gona, o tla thoma go tseba gore o a botega. O ka mmota. Jehofa o ile a botšiša ba-Isiraele gore: “A fa mosadi a ka lebala leseanyana l’axwe, a lesa xo šôkêlwa ngwana yo a mmelexexo?” O holofeditše gore: “Le xe yêna a ka lebala, Nna nka se Xo lebale.” (Jesaya 49:15) Ka gona rapela Modimo ka mehla. O se ke wa tshwenyega ka go diriša mantšu a lebanyago. O a go kwešiša. (Ba-Roma 8:26) Tseba gore Jehofa o a go rata gaešita le ge go bonagala eka ga go na yoo a go ratago.—Psalme 27:10.

• Tšhollela motho yo mogolo yo a ka botwago sa mafahleng. Gwerana le batho bao ba godilego moyeng. Ba botše maikwelo a gago le matshwenyego a gago ka bolokologi. Ka phuthegong ya Bokriste ya Dihlatse tša Jehofa, o ka hwetša bo-tate le bo-mma ba moya. (Mareka 10:29, 30) Lega go le bjalo, mo gongwe go ka nyakega gore o gate mogato wa pele wa go ba tšhollela sa mafahleng. Ba bangwe ba ka se ke ba tseba kamoo o ikwago ka gona ka ntle le gore o ba botše. Kimollo yeo e tlišwago ke go imolla pelo ya gago e ka ba khomotšo ya kgonthe go wena.—1 Samuele 1:12-18.

 • Dula o swaregile ka go direla ba bangwe dilo. Bakeng sa go phema kotsi ya go ikwela bohloko, leka gore o se ke wa nagana kudu ka dibopego tšeo di sa kgahlišego tša boemo bja gago. Go e na le moo, ithute go leboga seo o nago le sona. Diriša dibaka tše dintši tšeo di lego gona ka go ‘se šetše tša go hola wena o nnoši, eupša le ka go šetša tša go hola ba bangwe.’ (Ba-Filipi 2:4) Ipeele dipakane tša moya, ke moka o katanele go di phegelela ka boemo bjo bo nepagetšego bja kgopolo. Go hlankela dinyakwa tša ba bangwe bodireding bja Bokriste ke tsela e botse kudu ya go lebiša tlhokomelo ya gago go ba bangwe go e na le go e lebiša go wena ka noši.

• Tšwela pele o bontšha tlhompho go batswadi ba gago. Ka dinako tšohle dula o gopola go kgomarela melao ya motheo ya Beibele le ditekanyetšo tša yona. Seo se akaretša go godiša batswadi ba gago. (Ba-Efeso 6:1, 2) Kgodišo e bjalo e tla thibela go ba le kgopolo ya go ba yo a itefeletšago. Gopola gore ga go na tekanyo le ge e le efe ya seo se bonagalago e le phošo ka lehlakoreng la motswadi yeo e ka lokafatšago phošo ka lehlakoreng la gago. Ka gona tlogelela ditaba ka diatleng tša Jehofa. (Ba-Roma 12:17-21) “Ó rata tša tokô” gomme o na le maikwelo a tseneletšego a tšhireletšo baneng. (Psalme 37:28; Ekisodo 22:22-24) Ge o dutše o tšwela pele o bontšha batswadi ba gago tlhompho e swanetšego, leka go hlagolela dienywa tša moya wa Modimo—go feta tšohle, hlagolela sa lerato.— Ba-Galatia 5:22, 23.

O ka Atlega

Ga go pelaelo gore go hloka lerato la botswadi e ka ba mo go kwešago bohloko. Eupša go palelwa ga batswadi ga se gwa swanela go laola mohuta wa motho yo o tlago go ba yena. O ka ikgethela mafelelo a lethabo le ao a atlegilego ka go diriša melao ya motheo ya Beibele yeo e lego ka mo godimo bophelong bja gago.

William, yo a tsopotšwego pejana, ke moithapi wa nako e tletšego ofising ya lekala la Dihlatse tša Jehofa. O re: “Jehofa o re neile didirišwa tše dintši bakeng sa go re thuša go lebeletšana le maemo a a kwešago bohloko. Ke tokelo e kgolo gakaakang go ba le Tate yo bjalo yo lerato le yo a hlokomelago!” Kgaetšedi ya gagwe, Joan, ke modiredi wa mmulamadibogo wa nako e tletšego gomme o hlankela moo go nyakegago thušo e kgolo kudu ya baebangedi. O re: “Ge re dutše re gola, re ile ra bona phapano e lego molaleng ‘magareng ga yo a direlago Modimo le yo a sa mo direlego.’” (Maleaki 3:18) “Phihlelo ya rena e ile ya re dira gore re be le boikemišetšo bjo bogolo bja go lwela therešo le go e phelela.”

Go ka ba bjalo le boemong bja gago. Beibele e re: “Ba xo byala ka mexôkxô ba tlo buna ka mekxolokwane.” (Psalme 126:5) Temana yeo e šoma bjang? Ee, ge o katanela go diriša melao ya motheo yeo e nepagetšego ka tlase ga maemo a thata, mafelelong megokgo ya gago e tla tšeelwa sebaka ke lethabo la ge o hwetša tšhegofatšo ya Modimo.

Ka gona tšwela pele o katanela go batamela kgaufsi le Jehofa Modimo. (Ba-Hebere 6:10; 11:6) Gaešita le ge o bile le nywaga ya go tlaišwa ke pelaelo, kgakanego le maikwelo a molato, maikwelo a a ka kokobela ganyenyane-ganyenyane gomme a tšeelwa sebaka ke “khutšô ya Modimo, ye e fetaxo thlaoloxanyô yohle.”—Ba-Filipi 4:6, 7.

[Mongwalo wa ka tlase]

[Lepokisi go letlakala 14]

Na o Nagana . . .

• Gore o na le mohola o mo nyenyane goba o wa bohlokwa bjo bonyenyane?

• Gore ke mo go sa šireletšegago le mo e sego ga bohlale go bota batho ba bangwe?

• Gore o nyaka go kgonthišetšwa ka dinako tšohle?

• Gore pefelo ya gago goba lehufa la gago ke tšeo di sa laolegego?

Ge e ba dikarabo tša gago dipotšišong tše e le ee, boledišana ka tšona le motswadi, mogolo goba mogwera yo a gotšego moyeng bao o ka ba botago kapejana ka mo go kgonegago.

[Diswantšho go letlakala 15]

Gata megato e swanetšego bakeng sa go swaragana le maikwelo a gago