Motswadi yo a se Nago Molekane, Eupša ga a Noši

“Ge bana ba-ka ba boa gae gomme ba nkgokarela le go mpotša gore ba a nthata, seo ke karolo e thabišago kudu ya go ba mma.”—DORIS, MMA YO A SE NAGO MOLEKANE WA BANA BA BABEDI.

BATSWADI bao ba se nago balekane ba ka hwetša kgothatšo mantšung a Beibele ao a rego: “Bana ke tšhegofatšo le mpho e tšwago go MORENA.” (Psalme 127:3, Contemporary English Version) Ge bana ba godišetšwa lapeng la motswadi o tee, ga se gore ga ba bohlokwa mahlong a Modimo. Mmopi wa rena o kganyoga go bona malapa a motswadi o tee a atlega. Beibele e bolela ka yena gore: “Mmabaledi wa thšuana le mosadi wa mohlôlôxadi.” (Psalme 146:9) Batswadi bao ba se nago balekane ba ka kgonthišega gore Modimo o ikemišeditše go ba thekga.

Ngwana yo mongwe le yo mongwe o na le tshwanelo ya go godišetšwa tikologong e lerato, e šireletšegilego le e bolokegilego yeo e tlago go mo dumelela gore a gole mmeleng, maikwelong le moyeng. Ke boikarabelo le tokelo tša motswadi yo mongwe le yo mongwe gore a dirišwe ke Modimo go tlwaetša ngwana.

Batswadi ba bantši bao ba se nago balekane ba hweditše gore, gore ba atlege go nyakega gore ba rapele ka mafolofolo, ba diriše melao ya motheo ya Beibele ka dinako tšohle le go ithekga ka mo go feletšego ka Jehofa. Se se dumelelana le kgothatšo yeo e hwetšwago go Psalme 55:22: “Lahlêla Morêna morwalô wa xaxo; Yêna ó tlo Xo babalêla.”

Nako le nako bo-rakgolo le bo-makgolo, bagolo ba lefelong le batswadi bao ba nago le phihlelo ka phuthegong ya Bokriste ba ka hwetšagala bakeng sa go thuša lapa la motswadi o tee go swaragana le maemo a thata. Ke therešo gore ditho tša lapa le barapedi-gotee ba ka nea mo gontši bakeng sa go thekga maiteko a batswadi bao ba se nago balekane, eupša boikarabelo bja makgaola-kgang bjo bo neilwego ke Modimo bo godimo ga batswadi ba ngwana. *

 Ka mo go thabišago, batswadi ba bantši bao ba se nago balekane ba kgonne go swaragana le ditlhohlo tša moswana-noši tša boemo bja bona gomme ba godiša bana bao ba nago le boikarabelo, ba ba itshwerego gabotse le bao ba boifago Modimo. Phafoga! e ile ya boledišana le ba sego kae ba bona. Tše dingwe tša dilo tšeo batswadi ba ba swanago ka tšona ke tše:

• Taolo e botse ya lapa. Batswadi ba ba atlegago bao ba se nago balekane ba katanela go ba le thulaganyo e botse gomme ba šoma ka thata bakeng sa go dumelelanya dinako tša go dira dilo. Go nyakega go rulaganya dilo ka tsela e swanetšego. Beibele e re: “’Kêlêllô tša serôtô di iša mokhoreng.”—Diema 21:5.

• Boineelo. Batswadi ba ba atlegago bao ba se nago balekane ba dira gore bophelo bja lapa e be se sengwe sa dilo tšeo di tlago pele bophelong bja bona. Ba lebiša tlhokomelo tabeng ya go etiša dinyakwa tša bana ba bona pele go e na le tša bona.—1 Timotheo 5:8.

• Mokgwa wa go dira dilo o nago le teka-tekano. Batswadi ba ba atlegago bao ba se nago balekane ga ba nyenyefatše mathata a bona goba go a feteletša; ba tsoma ditharollo. Ba amogela mathata le go leka go lebeletšana le ona ka ntle le go ikwela bohloko goba ka go kwa bohloko.

• Poledišano e botse. Batswadi ba ba atlegago bao ba se nago balekane ba kgothaletša poledišano. Ba kgothaletša moya wa go bolela dikgopolo le maikwelo ka bolokologi ka lapeng. Tate yo a se nago molekane o bolela ka bana ba gagwe gore: “Ke boledišana le bona ka sebaka se sengwe le se sengwe. Re ba le ‘dinako tša boiketlo’ tšeo ka tšona re apeago dijo tša mantšiboa gotee. Ke ka yona nako yeo moo ba tlogago ba ntšhollela sa mafahleng.”

• Go itlhokomela. Go sa šetšwe go nyakwa ga nako ya bona e ntši, batswadi ba ba atlegago bao ba se nago balekane ba lemoga gore go hlokomela dinyakwa tša bona ka noši tša moya, tša maikwelo le tša mmele go bohlokwa. Ethel, mma yo a hladilwego wa bana ba babedi, o hlalositše gore: “Ke leka go ipeela nako ka thoko. Ka mohlala, ge mogwera a ruta bana mmino, seo se ntira gore ke be noši lebaka la iri. Ke a dula gomme ga ke bulele TV.”

• Boemo bjo bo nepagetšego bja kgopolo. Batswadi ba ba atlegago bao ba se nago balekane ba kgomarela boemo bjo bo nepagetšego bja kgopolo ka go ba ga bona batswadi le ka bophelo ka kakaretšo. Ba bona dibopego tše di nepagetšego maemong ao a gateletšago. Mma yo mongwe yo a se nago molekane o re: “Ke lemogile gore go ba motswadi yo a se nago molekane ga se gore ke selo seo se sa thabišego.”

 Bao ba Ilego ba Atlega

Na melao ye ya motheo e a šoma? Ee, bjalo ka ge go ka bonwa batswading ba bantši bao ba se nago balekane ba ba ilego ba atlega. Gloria yo e lego mma yo a hladilwego yo a se nago molekane le yo a šomago wa Engelane, yo go boletšwego ka yena sehlogong sa mathomo, o godišitše barwa ba babedi le morwedi. Boraro bja bona ba ile ba gola gomme ya ba badiredi ba Bakriste ba nako e tletšego, ba gafela maphelo a bona go tšwetšeng pele thuto ya Beibele. Ge a botšišwa gore o atlegile bjang, Gloria o hlalositše gore: “Tlhohlo ya pele e be e le go tšwela pele ke swara thuto ya ka mehla yeo e kgahlišago ya legae ya Beibele. Ke be ke nyaka gore bana e be bao ba thabilego, ba nago le khutšo ya monagano, bao ba kgotsofetšego le bao ba šireletšegilego mereong. Ke ile ka hwetša mošomo wa go šoma bošego. Boikemišetšo bja-ka e be e le go ba le bana ka dinako tšohle ge go be go kgonega. Pele ke e-ya mošomong, re be re rapela re le lapa ke moka ka ba iša malaong. Mmane o be a šala ka gae ge ke le mošomong.”

Gloria o ile a ruta bana ba gagwe bjang gore ba etiše dilo tšeo di swanetšego pele? O tšwela pele ka gore: “Boikemišetšo bja-ka bjo bogolo e be e le go etiša dilo tša moya pele. Re be re se na tšhelete, gomme ke be ke bolela ka bolokologi le bana ba-ka ka taba ye. Selo le ge e le sefe seo ke bego ke ba kgopela gore ba se dire, le nna ke be ke se dira, gomme ka moka ga bona ba be ba e-na le tirišano.” Ge a naganišiša mabapi le kamoo a ilego a boloka lapa leo le bopaganego, Gloria o re: “Sephiri e be e le go dira dilo re le gotee. Go be go se na yo a bego a itulela a nnoši ka phapošing ya gagwe. Re be re apea, re hlwekiša le go kgabiša re le gotee. Re be re leka-lekanya mešomo ya rena. Ka mehla ke be ke kgonthišetša gore go ba le boitapološo.”

Carolyn yo e lego mma yo a se nago molekane wa mošemanyana yo a bitšwago Joseph, o thabišwa ke tsela yeo a golago ka gona. Sephiri sa gagwe ke sefe? O re: “Re bala Beibele gotee ka nako ya go ya malaong, gomme ka morago ke mmotšiše dipotšišo mabapi le seo a ithutilego sona. Go oketša moo, re ahla-ahla dirapa tše di kgethilwego go tšwa dikgatišong tšeo di theilwego Beibeleng le go di diriša maphelong a rena. Se se thuša Joseph ge a lebeletšane le mathata a swanago le bomphenyašilo kua sekolong.” Carolyn o dumela gore bophelo bja gagwe bo tloga bo se bonolo, eupša ga a ikwe a le noši. O re: “Ke ntwa yeo e sa kgaotšego, eupša ke nagana gore Jehofa o nthušitše e le ka kgonthe. E bile ke hwetša dikgothatšo tše dintši go tšwa phuthegong ya Bokriste.”

Batswadi ba dikete ba ba ilego ba atlega bao ba se nago balekane ba ba swanago le Gloria le Carolyn, ba bontšha gore batswadi lehono ba ka kgona go ithekga ka melao ya motheo yeo e kgonthišeditšwego ya Beibele bakeng sa go godiša bana ba ba kgahlišago le bao ba tiilego moyeng. (Diema 22:6) Katlego e a kgonega! Go ba motswadi yo a se nago molekane go tšweletša ditlhohlo tše dintši tšeo di bulago dibaka tša go gola le go abelana le ba bangwe dilo. Go ithekga ka mo go feletšego ka Modimo le go kgodišega gore o tla nea thušo ke tsela e phalago tšohle ya go lebeletšana le dinyakwa tše dintši tša go ba motswadi yo a se nago molekane.—Psalme 121:1-3.

[Mongwalo wa ka tlase]

[Diswantšho go letlakala 11]

Thuto ya lapa e thušitše bana ba Gloria ba bararo gore e be badiredi ba Bakriste ba nako e tletšego. Mo ba lebeletše lengwalo le seswantšho tše di tšwago go morwa yo mogolo, yoo ga bjale a hlankelago e le moromiwa

[Diswantšho go letlakala 12]

Carolyn le morwa wa gagwe, Joseph