Ke Mang yo a Tlago go Tliša Khutšo ya ka mo go sa Felego?

KE KA baka la’ng Modimo a se a araba dithapelo tša go rapelela khutšo tšeo di rapetšwego ke baetapele ba madumedi a fapa-fapanego a lefase? Beibele e na le karabo e kgahlišago. Ga se gore Modimo ga a kgahlegele khutšo—o fišegela khutšo kudu go feta kamoo baruti bao ba e rapelelago ba dirago ka gona. Ge e le gabotse, Modimo o šetše a dirile dithulaganyo tša kgonthe bakeng sa go tliša khutšo ya lefase. O šetše a tšere megato ya makgaola-kgang bakeng sa go fihlelela pakane yeo. O hlaloseditše batho ka mo go kwagalago ka maikemišetšo a gagwe. Lega go le bjalo, ka mo go nyamišago madumedi a lefase a hlokomologa kudu seo Modimo a se boletšego.

Nakong e fetilego Modimo o ile a holofetša “peu,” e lego mmuši yoo Beibele e mo hlalosago ka mo go tšwelago pele le go re nea tsebišo e oketšegilego mabapi le go hlaolwa ga gagwe. (Genesi 3:15; 22:18; 49:10) Moporofeta Jesaya, yoo a tsebjago kudu ka diporofeto tša gagwe tše di sa tlwaelegago mabapi le Mesia, o ngwadile gore Moetapele yo yo go boletšwego ka yena e sa le pele e be e tla ba “Kxoši ya kaxišô” godimo ga lefase le gore ka tlase ga pušo ya gagwe ‘khutšo e ka se fele.’ (Jesaya 9:5, 6) E le Mmuši wa legodimong, o tla tsena ditaba gare bakeng sa go fediša bokgopo le go fetola lefase gore e be paradeise, moo go ka se sa bago le go hloka toka, bolwetši, bodiidi goba lehu. Khutšo le bophelo bjo bo sa felego di tla aparela. (Psalme 72:3, 7, 16; Jesaya 33:24; 35:5, 6; Daniele 2:44; Kutollo 21:4) Se se tla direga neng?

Khutšo ya Lefase e Kgaufsi Kudu

Jesu o boditše barutiwa ba gagwe gore bofelo bja tshepedišo ye e kgopo ya dilo le mathomo a moloko o mofsa wa batho di be di tla etelelwa pele ke lelokelelo la ditiragalo tše di makatšago tšeo di šišinyago lefase, tšeo di bego di tla direga sammaletee. (Mateo 24:3, 7-13) Bontši bja ditiragalo tše—dintwa, go hlaelela ga dijo, ditšhišinyego tša lefase, e le go bolela tše sego kae feela—di be di dutše di tsoga nako le nako mehleng e mengwe le e mengwe. Lega go le bjalo, le ka mohla ga se tša ka tša tlaiša batho ka nako e tee lefaseng ka bophara go swana le mehleng ya rena. Mafelelo a masetlapelo a bjalo ke ao a senyago kudu go feta kamoo a kilego a ba ka gona ka gobane lefase le na le baagi ba bantši kudu.

Tiragalo e nngwe yeo e boletšwego ke Beibele e sa le pele ke go senya ga batho tikologo mo go tšwelago pele. (Kutollo 11:18) Go feta moo, pele ga bofelo bjo bo boletšwego e sa le pele, go tla dirwa modiro wa lefase ka bophara wa go nea temošo, e lego go bolelwa ga ‘ditaba tše dibotse tša mmušo.’ Lehono Dihlatse tša Jehofa di dira modiro woo lefaseng ka bophara.—Mateo 24:14, NW.

 Go phethagala ga diporofeto tšeo go bolela ditaba tše dibotse bathong ba botegago. Lefase le lefsa leo le porofetilwego la khutšo e feletšego le kgaufsi kudu! Seo se tla kgonthišetša go hwelela ka mo go sa felego le ga makgaola-kgang ga lehloyo le botšhošetši. Beibele e hlalosa gore: “Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”—Jesaya 11:9.

Dithapelo Tšeo Modimo a di Theetšago

Go rapela Modimo ga se tiro ya lefeela goba tirelo e se nago mohola. Ka Beibeleng, Jehofa o bitšwa “Mokwi wa dithapêlô.” (Psalme 65:2) Ka gona nakong e nngwe le e nngwe, o theetša dithapelo tše dintši kudu tšeo di rapelwago ke batho ba botegago lefaseng. Lega go le bjalo, na go na le dinyakwa tšeo di swanetšego go fihlelelwa bakeng sa gore dithapelo di kwewe? Beibele e bolela gore batho ba dipelo tše botegago bao ba ithutago therešo ya Beibele ka Modimo ba swanetše go arabela go yona, gomme ba fetoge “barapedi ba makxonthe,” bao ba mo rapelago ka “Môya le ka therešô.” (Johane 4:23) Dithapelo tša bao ba sa hlomphego tšeo a di ratago ga di amogelwe: “Yo a thibelago tsebe ya gagwe go kwa molao [wa Modimo]; le thapelo ya gagwe ke makgapa.”—Diema 28:9, PK.

Ka mo go nyamišago, baetapele ba bantši ba bodumedi lehono ga ba rute goba go rapela ka morero wa Modimo wa go tliša khutšo. Go e na le moo, ba rapelela gore mebušo ya batho e rarolle mathata ao, mola Lentšu la Modimo le bolela ka mo go kwagalago gore “motho yo a sepelago ga a tsebe go tsebiša dikgato ša gagwe mo a yago ntshe.”—Jeremia 10:23, PK.

Go ile gwa porofetwa gore “bofelong bya mabaka,” mehleng ya rena, barati ba khutšo ba be ba tla kgeregela ‘thabeng ya ntlo ya Morena’ ya seswantšhetšo—e lego, borapedi bja therešo. Batho bao ba be ba tla dira diphetogo tše dikgolo maphelong a bona: “Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”—Jesaya 2:2-4.

Na go na le sehlopha le ge e le sefe sa bodumedi lehono seo se lekago go phela ka go dumelelana le mantšu ao? Goba na madumedi ka moka a fo bolela ka khutšo mola a le gare a kgothaletša ntwa? Nakong e tlago ge o gahlana le Dihlatse tša Jehofa, o laletšwa gore o boledišane le tšona ka taba ye ya khutšo gomme o ithute gore ke bodumedi bofe bjo bo rutago batho gore ba be le khutšo le batho bohle.