Pono ya Beibele

Na Modimo o tla Hlokomologa Mafokodi a Rena?

‘Ga ke yo kgopo! Ke lekile ka matla go lahla ditsela tša-ka tše mpe, eupša ke no ba ke fokola kudu!’

NA MAIKWELO a a bontšha tsela yeo wena goba yo mongwe yo o mo tsebago a ikwago ka yona? Ba bantši ba phetha ka gore e nyakile e le mo go sa kgonegego go fenya mafokodi ao a tsemilego medu a lego mabapi le boitshwaro. Batho ba bangwe ba lemaletše bjalwa, motšoko goba dihlare-tagi. Megabaru e laola maphelo a ba bangwe ba bantši. Gape go na le bao ba ineetšego boitshwarong bjo bobe bja kopano ya botona le botshadi, bao ba bolelago gore ba lemaletše wa go hloka kholofelo mekgweng ya kopano ya botona le botshadi.

Bjalo ka ge go bontšhitšwe go Mateo 26:41, Jesu ka botho o ile a bontšha go kwešiša ga gagwe mafokodi a motho. * Ge e le gabotse, pego ka moka ya Beibele e hlatsela ka mo go kwagalago gore bobedi Jehofa Modimo le Jesu ke bao ba nago le kgaugelo e le ka kgonthe go batho. (Psalme 103:8, 9) Eupša na re ka letela gore Modimo a hlokomologe diphošo ka moka tša rena?

Moše le Dafida

Ela hloko pego ya mabapi le Moše. O be a tsebja e le “monna yo bolêta ruri xo fetiša batho ka moka ba lefase.” (Numeri 12:3) Ge ba-Isiraele ba be ba sepela go phatša lešokeng, gantši ba ile ba itshwara ka go hloka teka-tekano gomme ba bontšha go nyatša Modimo le baemedi ba gagwe. Go tšeo ka moka, Moše ka boikokobetšo o ile a tsoma tlhahlo ya Modimo.—Numeri 16:12-14, 28-30.

Lega go le bjalo, ge leeto le letelele le leo le lapišago le be le le kgaufsi le go fela, Moše o ile a palelwa ke go laola kgalefo ya gagwe ka pele ga setšhaba ka moka gomme a hlokomologa ditaelo tša Modimo. Modimo o ile a mo lebalela, eupša na O ile a hlokomologa tiragalo yeo? Aowa. O ile a botša Moše gore: ‘Wena, phuthego ye o ka se ke wa e fihliša mo nageng ye ke tlogo e fa yona, ka baka la ge o sa ka wa mpota.’ Moše o be a ka se tsene Nageng ya Kholofetšo. Ka morago ga go katanela tokelo  ye e botse ka nywaga e 40, phošo e kgolo kudu ya motho e ile ya mo dira gore a lahlegelwe ke tokelo yeo.—Numeri 20:7-12.

Kgoši Dafida e be e le monna yo mongwe yo a boifago Modimo yo a bego a e-na le bofokodi. Lebakeng le lengwe, o ile a ineela kganyogong gomme a ba le kopano ya botona le botshadi le mosadi wa monna yo mongwe. Ka morago, o ile a leka go uta taba ka go dira gore monna wa mosadi yo a bolawe. (2 Samuele 11:2-27) Ka morago ga moo, o ile a itshola ka mo go tseneletšego ka bosenyi bja gagwe gomme Modimo o ile a mo lebalela. Eupša Dafida o be a thubile lapa, gomme Jehofa ga se a mo šireletša bošuleng bjo kotsi bjoo bo ilego bja latela. Ngwana wa Dafida wa mošemane o ile a babja kudu, gomme Jehofa ga se a ka a tsena ditaba gare go sa šetšwe dithapelo tša Dafida tša go rapelela ngwana wa gagwe. Mošemane o ile a hwa, gomme ka morago ga moo gwa latela lelokelelo la masetlapelo lapeng la Dafida. (2 Samuele 12:13-18; 18:33) Dafida o ile a lefa gabohloko gakaakang ka baka la go ineela ga gagwe bofokoding bja boitshwaro.

Mehlala ye e bontšha gore Modimo o dira gore batho ba ikarabele mabapi le boitshwaro bja bona. Bao ba nyakago go mo hlankela ba swanetše go matlafatša dikarolo tšeo di fokolago boemong bja bona bja moya gomme e be Bakriste ba kaone. Lekgolong la pele la nywaga, ba bantši ba dirile bjalo.

Go Katanela go Lahla Sebe

Moapostola Paulo o lebelelwa ka mo go swanetšego e le mohlala wa tsela ya go phela ya Bokriste. Eupša na o be o tseba gore o ile a swanelwa ke go lwa ka go se kgaotše le mafokodi a gagwe? Ba-Roma 7:18-25 e hlalosa ka mo go kwagalago ntwa ye, goba ‘tlhabano’ go ya ka Ba-Ro 7 temana 23 (PK). Paulo o ile a lwa ka ntle le go kgaotša ka ge a be a tseba gore tshekamelo ya sebe ke yeo e sa felego.—1 Ba-Korinthe 9:26, 27.

Ditho tše dingwe tša phuthego ya Bokriste ya Korinthe ya bogologolo pele e be e le ba lemaletšego go dira bobe. Beibele e bolela gore e be e le ‘diotswa, dihlotlolo, banna ba go dira ditšhila le banna ka bona, mahodu, ba megabaru le matagwa.’ Eupša gape e bolela gore ba ile ba ‘hlatswiwa, ba kgethagatšwa.’ (1 Ba-Korinthe 6:9-11) Bjang? Ba ile ba matlafatšwa ke tsebo e nepagetšego, bogwera bja Bokriste le moya wa Modimo gore ba kgaotše mekgwa ya bona e mebe. Mafelelong, ba ile ba bolelwa ke Modimo e le baloki, leineng la Kriste. Ee, Modimo o ile a ba lebalela, ka go rialo a ba nea letswalo le le hlwekilego.—Ditiro 2:38; 3:19.

Paulo le Bakriste ba Korinthe ga se ba ka ba nyenyefatša ditshekamelo tša bona tša sebe. Go e na le moo, ba ile ba di lwantšha gomme ka thušo ya Modimo ba ile ba fenya. Boitshwaro bja barapedi bao ba lekgolong la pele bo ile bja ba bjo bo retegago go sa šetšwe tikologo yeo ba bego ba dula go yona le ditshekamelo tša go se phethege. Go thwe’ng ka rena?

Modimo o Letetše Gore re Lwantšhe Mafokodi a Rena

Go lwantšha bofokodi go ka no se feleletše ka go bo tloša ka mo go feletšego. Le ge re sa swanela go ineela go se phethagaleng ga rena, fela re ka se ke ra fediša go se phethagale moo. Go se phethagale go baka mafokodi ao e ka bago a phegelelago kudu. Lega go le bjalo, ga se ra swanela go ineela mafokoding a rena. (Psalme 119:11) Ke ka baka la’ng se se le bohlokwa?

Ke ka gobane Modimo a sa dumelele go se phethagale gore e be lebaka la ka mehla la go iphahlelela bakeng sa boitshwaro bjo bobe. (Juda 4) Jehofa o nyaka gore batho ba itlhwekiše, gore ba phele maphelo a bona ka tsela e botse ya boitshwaro. Beibele e re: “Le bê ba ba hloilexo bobe.” (Ba-Roma 12:9) Ke ka baka la’ng Modimo a tšea boemo bjo tiilego gakaalo?

Lebaka le lengwe ke gore go ineela bofokoding go a gobatša. Go Ba-Galatia 6:7, Beibele e re: “Se motho a se byalaxo, ké sôna se a tl’o xo se buna.” Bao ba ineelago temalelong ya dilo, megabarung le boitshwarong bjo bo gobogilego gantši ba buna puno e šoro maphelong a bona. Eupša go na le lebaka la bohlokwa kudu.

Sebe se kgopiša Modimo. Se baka ‘karogano’ magareng ga rena le Jehofa. (Jesaya 59:2) Ka ge bao ba itlwaeditšego go dira sebe ba ka se amogelege go yena, o kgothatša ba bjalo ka gore: “Hlapang, Le tšwê dithšila; . . . bobe Le bo lahlê.”—Jesaya 1:16.

Mmopi wa rena ke yo lerato le yo a nago le kgaugelo. “Xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Go ineela ka mehla bofokoding go re thibela go hwetša kamogelo ya Modimo. Ka ge Modimo a sa hlokomologe mafokodi a rena, le rena ga se ra swanela go a hlokomologa.

[Mongwalo wa ka tlase]