Poelano Ya Moswana-noši ka Morago ga Nywaga e 30

KA 1967 masogana a mabedi a ile a gahlana ka mo go sa letelwago. A ile a dudišwa gotee Yunibesithing ya Thekinikhale ya Michigan kua United States. Dennis Sheets, yo a tšwago Lima, Ohio, ka nako yeo e be e le morutwana wa nywaga e 18 yo a lego ngwageng wa pele yoo a bego a ithutela kago-dikgwa. Mark Ruge wa nywaga e 20 o be a e-tšwa Buffalo, New York. E be e le morutwana yo a lego ngwageng wa boraro yo a ithutelago boentšineare bja tša meago.

Ka nako yeo, segwera sa bona se ka be se ile sa bonagala e le sa nakwana, seo se fetago ka lebelo. Ga go le o tee wa bafsa ba yo a ilego a tšwela pele ka thuto ya yunibesithi; yo mongwe le yo mongwe o ile a itšeela tsela ya gagwe. Go ile gwa feta lebaka la ka godimo ga nywaga-some e meraro. Ke moka, ka letšatši le lengwe kua Dominican Republic, banna ba babedi ba ile ba gahlana gape. E ile ya ba poelano e makatšago e sa letelwago. Eupša go be go e-na le selo se sengwe seo le sona se bakilego seo. Selo seo e be e le sefe? Bakeng sa go hwetša karabo, anke re hlahlobišišeng ditsela tše aroganego tša bophelo bja bona.

Dennis o ya Ntweng

Dennis o ile a boela gae ka morago ga ngwaga wa gagwe wa pele kholetšheng. Ke moka, ka December 1967, o ile a bewa lelokelelong la Madira a United States, gomme ka June 1968, o ile a romelwa Vietnam. Moo o ile a bona dilo tše di tšhošago kudu tša ntwa. Ge kabelo ya gagwe ya tša bohlabani e fela ka 1969, o ile a boela United States, mafelelong a hwetša mošomo khamphaning e kgolo kua Ohio. Lega go le bjalo, o be a sa kgotsofala.

Dennis o hlalosa gore: “Ditoro tša-ka tša bjaneng e be e le go hudugela Alaska le go ba le polasa. Ka gona ka 1971 yena le mogwera wa gagwe wa sekolong se se phagamego ba ile ba thoma go phethagatša toro yeo. Lega go le bjalo, go e na le go hwetša polasa, o ile a šoma mešongwana e fapa-fapanego. O tšere nako e telele a dula ka tenteng gomme a šoma e le motho yo a hlokomelago mello ya tlhaga. O ile a godiša ditedu le moriri o motelele gomme a thoma go kgoga patše.

Ka 1972, Dennis o ile a tloga Anchorage bakeng sa go yo thabela moletlo wa Mardi Gras kua New Orleans, Louisiana. Ka morago ga moo, o ile a aga mokutwana o monyenyane dithokgweng tša Arkansas. Moo o ile a šoma go dira diforeimi tša kota tša dintlo le go šoma ka konkoreiti. Ka June 1973, Dennis o ile a kgopela dinamelwa go ralala le naga bakeng sa go bona ge e ba a be a ka hwetša morero bophelong.

Mark Mokgatlong wa go Lwantšha Ntwa

Mark o ile a dula diripa-ngwaga tše sego kae yunibesithing ka morago ga ge Dennis a sepetše eupša ka morago a dira phetho ya gore o be a sa nyake go ba karolo ya tshepedišo yeo e bego e thekga ntwa. Ka gona o ile a boela Buffalo, moo a ilego a šoma lebakanyana e le mookamedi feketoring ya tšhipi. A sa dutše a sa kgotsofalela boiteko bja ntwa, o ile a tlogela mošomo wa gagwe, a reka thuthuthu gomme a sepela go phatša naga a e-ya San Francisco, California. Gaešita le ge ba sa ka ba tseba ka nako yeo, Dennis le Mark ba bile San Francisco lebakanyana ka nako e swanago.

Mark, go swana le Dennis, o be a godišitše ditedu le moriri o motelele gomme a thomile go kgoga patše. Eupša Mark o be a swaregile ka mo go feteletšego  mokgatlong wa go lwantšha ntwa, a tšea karolo boipelaetšong le megwantong. O be a nyakwa ke FBI bakeng sa go tšhabela tirelo ya tša bohlabani, ka gona o ile a tšea nywaga e mmalwa a diriša maina a bofora bakeng sa go efoga go swarwa. O ile a phegelela mokgwa wa go phela wa mahiphi kua San Francisco. Moo, ka 1970, Dihlatse tše pedi tša Jehofa di ile tša etela ga gagwe.

Mark o hlalosa gore: “Di swanetše go ba di ile tša lemoga gore ke bontšhitše kgahlego e itšego, ka gona di ile tša boa. Ke be ke se gona gae, eupša di ile tša tlogela Beibele e tala le dipuku tše tharo.” Lega go le bjalo, Mark o be a swaregile kudu dikgarurung tša dipolitiki le boithabišong moo e lego gore ga se a ka a ipha nako ya go di bala. Le gona, o be a tsongwa kudu ke FBI. Ka gona o ile a hudugela Washington, D.C. ka leina le lengwe la bofora. Kgarebe ya gagwe, Kathi Yaniskivis, yeo a gahlanego le yona yunibesithing, e ile ya ya go yena moo.

Mafelelong, ka 1971, FBI e ile ya hwetša Mark. Bahlankedi ba babedi ba FBI ba ile ba sepela le yena ka sefofane go tloga Washington, D.C., go ya New York gomme ba kgonthišetša gore o tšwela pele ka leeto go ya Toronto, Canada. Go bonagala FBI e be e sa mo lebelele e le yo a beago thulaganyo ya molao kotsing; ba be ba nyaka feela go mo ntšha ka nageng. Yena le Kathi ba ile ba nyalana ngwageng o latelago, gomme ba hudugela Sehlakahlakeng sa Gabriola, British Columbia, Canada. Ba be ba nyaka go tloga setšhabeng, le gona ba be ba nagana gore bophelo bo swanetše go ba bo e-na le morero o oketšegilego.

Ba Fetoga Dihlatse

O tla gopola gore Dennis o be a kgopela dinamelwa go ralala le naga a tsoma morero bophelong. Mošomo wa gagwe o ile wa mo lebiša Montana, moo a ilego a hwetša mošomo ka ntle ga Chinook a thuša molemi nakong ya puno ya mabele. Mosadi le bana ba monna yoo e be e le Dihlatse tša Jehofa. Dennis o ile a newa makasine wa Phafoga! gore a o bale. Go se go ye kae, o ile a lemoga gore Dihlatse di diriša bodumedi bjo bo nepagetšego.

Dennis o ile a tloga polaseng yeo a swere Beibele gomme a hudugela Kalispell, Montana. Moo o ile a ya sebokeng sa gagwe sa pele sa Dihlatse tša Jehofa. O ile a kgopela thuto ya Beibele sebokeng seo. Ka moragonyana ga moo, o ile a kota moriri gomme a beola ditedu. Ka January 1974 o ile a ya modirong wa boboledi ka lekga la pele, gomme a kolobeletšwa ka legopo leo diruiwa di nwelago ka go lona kua Polson, Montana, ka March 3, 1974.

Ka nako e swanago Mark le Kathi bao ba dulago Sehlaka-hlakeng sa Gabriola, ba ile ba phetha ka gore ka ge ba be ba e-na le nako, ba be ba tla leka go hlahlobišiša Beibele. Ba ile ba thoma go bala King James Version eupša ba hwetša go le thata go kwešiša mongwalo wa kgale wa Seisemane. Ka gona Mark o ile a gopola gore o be a sa dutše a na le Beibele le dipuku tšeo Dihlatse di ilego tša mo nea tšona nywageng ya pele ga moo. Ba be ba bala Beibele gotee le dipuku tša Therešo ye Išago Bophelong bjo bo sa Felego le Is the Bible Really the Word of God? Mark le Kathi ba ile ba kgahlwa kudu ke seo ba bego ba ithuta sona.

Mark o hlalosa gore: “Ke ile ka kgahlwa kudu ke taba ya gore puku ya Therešo e bolela ka sehlopha sa Bakriste bao ba bego ba ka se ye ntweng ka tlase ga maemo le ge e le afe. Ke ile ka nagana gore bao ke bona ba dirišago Bokriste bja therešo.” Lebakanyana ka morago ga moo, Mark le Kathi ba ile ba boela Houghton, Michigan, go yo etela lapa labo Kathi—go sa šetšwe go ba ga bona kotsing ya go ka swarwa. Moo, ba sa dutše ba bonagala bjalo ka mahiphi, ba ile ba ba gona sebokeng sa Dihlatse. Ba ile ba amogela thuto ya Beibele gomme ba ithuta kgweding yeo ba bego ba le kua Michigan.

Ka morago ga go boela Sehlakahlakeng sa Gabriola, ba ile ba gahlana le Hlatse setarateng kua Nanaimo, British Columbia, gomme ba hlalosa gore ba be ba nyaka thuto ya Beibele. Letšatšing lona leo sehlopha seo se ka tlalago koloi sa Dihlatse se ile sa tla se nametše seketswana bakeng sa go tlo ikopanya le bona, gomme thuto ya Beibele e ile ya thongwa. Ka morago ga dikgwedi tše tharo, Mark le Kathi ba ile ba thoma go ya modirong wa boboledi. Dikgwedi tše tharo ka morago ga moo, ka March 10, 1974, bobedi bja bona ba ile ba kolobetšwa. E bile lebaka la beke ka morago ga gore Dennis a kolobetšwe!

Dennis Bodireding bja Nako e Tletšego

Dennis o ile a ba mmulamadibogo goba modiredi wa nako e tletšego ka September 1974. O hlalosa gore: “Ke be ke thabela go bula madibogo, eupša ke be ke nyaka go oketša bodiredi bja-ka; ka gona ka July 1975, ke ile ka dira kgopelo ya go yo hlankela ntlong-kgolo ya lefase ya Dihlatse tša Jehofa kua Brooklyn, New York. Ke ile ka laletšwa ka December yona yeo go ya moo.”

Kabelo ya mathomo yeo Dennis a ilego a e newa e be e le ya go thuša go fetoša seo e bego e le Towers Hotel go e dira lefelo la bodulo bakeng sa sehlopha  sa bašomi sa ntlo-kgolo. O ile a šoma nywaga e mmalwa moo, a okametše sehlopha sa go tsenya dithaele. Ke moka, ka ge a be a nyaka go nyala, o ile a hudugela California. Ka 1984, ge a be a hlankela e le mogolo phuthegong ya Cathedral City, o ile a nyala mmulamadibogo yo a bitšwago Kathy Enz.

Dennis le Kathy ba be ba ikemišeditše go phela bophelo bjo bonolo bakeng sa go phegelela dikgahlego tša Mmušo wa Modimo. Ka gona Dennis o be a fela a gana dibaka tša go dira tšhelete e ntši kgwebong e atlegago le e bušetšago kudu ya tša meago kua borwa bja California. Ka 1988 yena le Kathy ba ile ba dira kgopelo ya go thuša modirong wa go aga wa ditšhaba-tšhaba wa Dihlatse tša Jehofa. Ka December ya ngwageng woo, ba ile ba amogela kabelo ya go yo šoma modirong wa go aga lekala kua Buenos Aires, Argentina.

Ka 1989, Dennis le Kathy ba ile ba laleletšwa go hlankela modirong wa go aga wa Dihlatse tša Jehofa ka mo go tletšego. Sebopegong se se kgethegilego sa bodiredi bja nako e tletšego, ba hlanketše Suriname le Colombia ka makga a mabedi. Ba bile ba šomile modirong wa go aga lekala kua Ecuador le Mexico, gotee le go šoma modirong o swanago kua Dominican Republic.

Mark Bodireding bja Nako e Tletšego

Ka 1976, Mark gotee le masogana a mangwe a dikete a ma-Amerika ao a bego a tšhabetše Canada bakeng sa go efoga go bewa lelokelelong la madira, o ile a lokollwa ke mmušo wa United States. Yena le mosadi wa gagwe, Kathi, ba ile ba kganyoga go phela bophelo bjo bonolo bakeng sa go diriša nako e ntši bodireding bja bona. Mark o ile a šoma mošomo wa nakwana e le mohlahlobi wa meago, gomme yena le Kathi ganyenyane-ganyenyane ba ile ba feleletša go lefa dikoloto tšeo ba bego ba di kgobokeditše pele ba kolobetšwa.

Ka 1978, ge Dihlatse tša kua Canada di be di rulaganyetša go aga moago o mofsa wa lekala kgaufsi le Toronto, Ontario, Mark le Kathi ba ile ba kgona go nea ditirelo tša bona. Ka ge Mark a be a e-na le boitemogelo go tša meago, ba ile ba laletšwa gore ba tšee karolo moagong. Ba ile ba šoma moagong kua Georgetown go fihlela o fela ka June 1981. Ka morago, ba ile ba boela British Columbia gomme nywageng e mene e latetšego ba ile ba thuša go ageng Holo ya Kopano ya Dihlatse tša Jehofa moo. Ge e fela, ba ile ba laletšwa gape gore ba yo šoma go katološeng lekala la Canada.

Ka 1986, ka morago ga go fetša dikgwedi tše sego kae kua Georgetown, Mark le Kathi ba ile ba laletšwa gore ba dule e le ditho tša ka mehla tša sehlopha sa bašomi sa lekala la Canada. Ga e sa le go tloga ka nako yeo ba hlankela sehlopheng seo gomme e bile ba hweditše dibaka tše di oketšegilego tša go tšea karolo modirong wa go aga dinageng tše dingwe tše dintši. Ka baka la boitemogelo bja Mark go tša meago, o ile a thoma go dirišwa modirong wa go hlahloba bakeng sa meago ya makala le Diholo tša Kopano tša Dihlatse tša Jehofa kua Amerika Borwa le Amerika Bogare le dihlakahlakeng tša Caribbean.

Go theoša le nywaga, yena le Kathi ba hlanketše kua Venezuela, Nicaragua, Haiti, Guyana, Barbados, Bahamas, Dominica, United States (Florida) le Dominican Republic. Sebopego se se se kgethegilego sa bodiredi bja nako e tletšego se dirile gore bophelo bja Mark bo swane le bja Dennis gape.

Go Kopana Gape Kua Dominican Republic

Ka go se tsebe ga bona, Mark le Dennis ba be ba šoma modirong o swanago kua Dominican Republic. Ka letšatši le lengwe ba ile ba no welana meagong ya lekala ya Dihlatse tša Jehofa kua Santo Domingo. Ka ge o ka nagana, ba ile ba thabela go buša ba tlwaelana gape. Ee, bobedi bja bona ba be ba gotše ka nywaga e 33 gomme ba be ba e-na le dilo tše dintši tšeo ba bego ba swanetše go di anegelana. Ka go makala mo go oketšegago, ba ile ba anegelana  bontši bja ditaba tše o di badilego ka mo godimo. Eupša selo seo e ilego ya ba se se makatšago le go feta go bona—gotee le go bao ba ilego ba ba anegela diphihlelo tša bona—e bile diphihlelo tše dintši tše di swanago maphelong a bona.

Bobedi bja bona ba be ba phetše bophelo bja mahiphi gomme ba hudugetše mafelong a kgole bakeng sa go tšhabela mokgwa wa go phela wa mehleng yeno wa go phegelela dilo tše di bonagalago gotee le matshwenyego a bjona ka moka. Dennis o ile a nyala kgarebe ye e bitšwago Kathy; Mark o ile a nyala kgarebe ye e bitšwago Kathi. Banna ka bobedi ba ile ba amogela thuto ya Beibele ge ba be ba ile sebokeng sa bona sa mathomo sa Dihlatse tša Jehofa. Bobedi bja bona ba kolobeditšwe ka March 1974. Bobedi bja bona ba ile ba ba ditho tša malapa a makala a Dihlatse tša Jehofa—Dennis e bile United States gomme Mark ya ba Canada. Bobedi bja bona ba dirile boiteko bja go phela bophelo bjo bonolo bakeng sa go phegelela dipakane tša moya. (Mateo 6:22) Bobedi bja bona ba ile ba akaretšwa modirong wa ditšhaba-tšhaba wa go aga gomme ba amogetše dikabelo tša go šoma dinageng tše dintši. Go fihlela ge ba welana kua Dominican Republic, ga go le o tee wa bona yo a kilego a gahlana le bagwera ba gagwe ba pele bao ba ilego ba amogela ditherešo tša Beibele.

Na Mark le Dennis ba bolela gore ditiragalo tše tše di makatšago tša go welana di bakilwe ke tlholelo? Le gatee. Ba lemoga gore bjalo ka ge Beibele e bolela, “nako le ditiragalo tše di sa letelwago di [re] wela bohle”—ka dinako tše dingwe e ba ka ditsela tše di kgahlišago kudu. (Mmoledi 9:11, NW) Lega go le bjalo, e bile ba lemoga gore selo se sengwe gape se bile le karolo go kopaneng mo: go tsoma ga bona mo go swanago morero bophelong le lerato la bona la go rata Jehofa Modimo.

Histori ya Dennis le Mark gape e gatelela dilo tše dingwe tšeo di swanago go batho bohle ba dipelo tše di botegago bao ba ithutago therešo ya Beibele. Dennis o hlalosa gore: “Seo nna le Mark re se bonego se bontšha gore Jehofa o lemoga maemo a batho a bophelo, gomme ge dipelo tša bona di thoma go sekamela go lokeng, o ba gogela go yena.”—2 Koronika 16:9; Johane 6:44; Ditiro 13:48.

Mark o oketša ka gore: “Phihlelo ya rena gape e re rutile go kwešiša gore ge motho a itumelelanya le ditekanyetšo tša Jehofa, a neela bophelo bja gagwe go yena le go itira yo a hwetšagalago, Jehofa a ka diriša ditalente tša gagwe le bokgoni bja gagwe bakeng sa go tšwetša pele borapedi bja therešo e le go hola batho ba gagwe.”—Ba-Efeso 4:8.

Phihlelo ya bona gape e bontšha gore Jehofa Modimo o šegofatša tirelo ya moya ka moka ya batho ba gagwe. Dennis le Mark ba ikwa ba šegofaditšwe e le ka kgonthe. Dennis o re: “Ke tokelo go hlankela dikgahlego tša Mmušo tirelong e kgethegilego ya nako e tletšego. E re neile sebaka sa go thabela go kgothatšana le ba bangwe ge re dutše re šoma le bana babo rena le dikgaetšedi ba Bakriste go tšwa lefaseng ka moka.”

Mark o oketša ka gore: “Ka kgonthe Jehofa o šegofatša bao ba etišago Mmušo wa gagwe pele. Ke go tšea e le tokelo e kgethegilego go kgona go hlankela ke le setho sa lapa la lekala la Canada le go tšea karolo modirong wa go aga wa ditšhaba-tšhaba.”

Na yeo ga se poelano ya moswana-noši? Ke yona, ka gobane bjalo ka ge Mark a bolela: “Lebaka la kgonthe leo ka lona go kopana ga rena e bilego mo go thabišago gakaakaa ke gore bobedi bja rena re ile ra tseba, ra rata le go hlankela Modimo wa moswana-noši, Jehofa.”

[Seswantšho go letlakala 28]

Dennis ka 1966

[Seswantšho go letlakala 28]

Mark ka 1964

[Seswantšho go letlakala 30]

Dennis kua Dakota Borwa ka 1974

[Seswantšho go letlakala 30]

Mark kua Ontario ka 1971

[Seswantšho go letlakala 31]

Dennis le Mark gotee le basadi ba bona ka morago ga poelano ya bona ya go welana ka 2001