Go Ba Yo A Kgomegago Ka Tšhireletšego

GO FOFELA bogodimo bja dikhilomithara tše 11 e ka ba phihlelo e boifišago go ba bangwe. Go ka bonagala e le go roba melao ya tlhago. Ge ditekanyetšo tša tša tšhireletšego le go ka botwa ga maeto a difofane go fihlile maemong a mafsa a phagamego, dikotsi tšeo di ka bago gona tša go phatša lefaufaung ga sefofane e ba tše nyenyane. Lega go le bjalo, ka dinako tše dingwe boemo bja kgonthe bjo šoro bo re gopotša gore dikotsi di ka direga.

Go Lebeletšana le Poifo ka Katlego

Go sa šetšwe boemo bjoo bja kgonthe, go tloga kgale motho o ile a bontšha kganyogo ya go tšea leeto ka sefofane. Nywaga-kgolo e lesome pele ga Kriste, Kgoši Dafida o ile a ngwala gore: “Nkabe ke bê le diphêxô byalo ka leeba, ke fofê ke y’o itulêla.” (Psalme 55:6) Bjalo ka ge go šetše go bontšhitšwe, thekinolotši ya mehleng yeno e dirile gore go sepela ka sefofane e be o mongwe wa mekgwa e šireletšegilego kudu ya go tšea leeto. Eupša ga se o phethagetšego. Ga go selo lefaseng le seo se šireletšegilego ka mo go phethagetšego goba seo se ka bonelwago pele ka mo go feletšego.

Ke gabohlokwa go gopola seo ge e ba re  hwetša go le thata go arabela ka bohlale ge motho yo mongwe e le yena a laolago. Batho ba bangwe ba ka sekamela go naganeng gore, ‘Ge ke kgona go laola boemo kutšwanyana, e ba moo boemo e bago bjo bo sa boifišego.’ Ge e ba go le bjalo, batho ba bjalo ba ba le mathata maemong ao go ona ba hwetšago sebaka se senyenyane goba ba sa se hwetšego bakeng sa go laola boemo. Go tšea leeto ka sefofane go tšweletša bjo bongwe bja maemo ao.

Go sa šetšwe maiteko a go kaonefatša tšhireletšego ya tša go tšea maeto ka difofane, ga go yo a swanetšego go hlaba kgobe ka mootlwa. Bohle bao ba akaretšwago leetong la sefofane ba ka dirišana tabeng ya go fokotša dikotsi tšeo di ka bago gona tšeo di beago tšhireletšego kotsing. Le gona, balaodi ba lemoša ka ditšhošetšo tše di tšwelago pele. Seema se bohlale sa Beibele se re: “Mohlale ó bôna dikotsi di s’e-tla, a khuta; ba mašilô ba a feta, ba y’o hlaka.” (Diema 22:3) Ke gabohlale go  lemoga gore sebaki sa kotsi se gona mo e nyakilego go ba modirong le ge e le ofe. Bakeng sa go lebelela dilo ka pono e botse, gopola gore go tšea leeto ka sefofane go nyaka kahlolo e swanago e botse yeo o tlago go e diriša go itšhireletša maemong a mangwe.

Bao ba dulago ba tšea leeto ka sefofane e ka ba bao ba hlamilwego gakaone bakeng sa go itlhokomela dinakong tše tše thata. Se se bjalo ka gobane bao ba dulago ba tšea leeto ka sefofane gantši ke bao ba tlwaelanego le maema-fofane le difofane go feta banamedi ba bangwe. O ka fihlelela go tlwaelana le maemo le go thekga ditho mo go swanago le ga bona ka go latela megato e bonolo yeo e hlaloswago mapokising ao a sepedišanago le dihlogo tše.

Go Itshepelela ka Bolokologi

Le ge mafelo a go phuruphutša a tša tšhireletšo a nea tirelo ya bohlokwa, basepedi ba bangwe—kudu-kudu bao ba itlhaganetšego—ba a lebelela e le ao a tenago. Ge o dutše o nagana ka tšhireletšego e okeditšwego maema-fofaneng a mantši, mo gongwe o ka nyaka go diriša ditšhišinyo tše di latelago bakeng sa go feta gabonolo mafelong a go phuruphutša:

▪ Fihla e sa le ka pela. Ka go rulaganyetša gore o be le nako e oketšegilego boema-fofaneng, o ka dira dilo ka go iketla, wa thekga ditho le go phema kgateletšego yeo e ka bakwago ke maemo ao a sa letelwago goba go šarakana ga dilo.

▪ Ge o kgetha tirelo ya difofane, tsoma yeo e dirišwago kudu ke bao ba sepelelago tša kgwebo. Ke bo-mahlwa-a-di-bona, ba sepela ka merwalo e menyenyane, gomme ba nyaka go akgofa.

▪ Pele ga ge o ka feta mojakong wo o phopholetšago dilo tša tšhipi, tloša dilo tšeo o naganago gore di ka dira gore alamo e lle. Tše di akaretša dinotlelo, tšhelete ya tšhipi, mabenyabje a tšhipi le megala ya go šikarwa. Di nee mohlokomedi ge o itokišetša go feta mojakong.

▪ Patlamiša mekotla le merwalo e mengwe ka mo o ka kgonago lepanteng leo le sepedišago merwalo; ge e ba motho yo mongwe yo a laolago sedirišwa sa go hlahloba merwalo sa X-ray a bona seswantšho sa morwalo o hlakahlakanego, mo gongwe a ka nyaka gore o pakolle mokotla wa gago goba go o fetiša gape.

▪ Tsebiša mohlokomedi ka dilo le ge e le dife tšeo di sa tlwaelegago tšeo o naganago gore di tla goga tlhokomelo ya motho yo a laolago sedirišwa, tše bjalo ka sedirišwa sa silifera sa bogologolo seo o se filwego ke makgolo wa gago. Ge a kgotsofaditšwe ke tlhaloso e kwagalago ya sebopego se se sa tlwaelegago seo se bonwago sedirišweng sa go hlahloba, mohlokomedi a ka se ke a phegelela go se hlahlobišiša. Ge e ba o tloga o le lebelong, ntšha sedirišwa pele ga nako gomme o kgopele gore se hlahlobje ka diatla.

▪ Ge e ba alamo e lla, e ba le tirišano gomme o nee tlhaloso kapejana. Ge e ba mohlokomedi a tseba gore alamo e leditšwe ke selo se itšego sa ka thoko gomme a e-na le modirišani yo a nago le sedirišwa sa go hlahloba dilo tša tšhipi seo se swarwago ka seatla, o tla go romela go yena.

▪ Tsela e nngwe yeo e kgonthišeditšwego ya gore o ka tlogelwa ke sefofane ke go dira metlae ka taba ya go arošwa tseleng ga sefofane goba ka taba ya pomo. Go tlaleletša tabeng ya gore balaodi ba tša tšhireletšo ba boema-fofaneng ba go phuruphutše ka mo go tseneletšego, o ka bewa molato wa bosenyi.

 E-ba le Leeto le le Šireletšegilego la Sefofane!

Na go a kgonega gore o kgethe sefofane se se šireletšegilego? Ee, go a kgonega. Go sa šetšwe sefofane seo o se kgethago, dikgonagalo tša gore o fihle o šireletšegile ke tša maemo a godimo. Ge e ba o na le pelaelo, nyakišiša ka pego ya tša tšhireletšego ya tirelo ya sefofane yeo o nyakago go e diriša. Gopola gore go sa šetšwe dikotsi tša difofane, go sepela ka sefofane go sa dutše go lebelelwa e le e nngwe ya ditsela tše di šireletšegilego kudu ya go tšea leeto.

Go sa dutše go le bjalo, ka moka ga rena re ka lebelela pele nakong ya ge go tla be go na le tšhireletšego, polokego le kholofelo ka tlase ga pušo ya Modimo godimo ga lefase. Ka gare ga lapa la batho leo le boifago Modimo le leo le nago le khutšo, go ka se be le sebaka bakeng sa batho le ge e le bafe bao ba beago bophelo bja batho kotsing. Batho ba ‘tla dula ka go iketla, ba ikagela ba sa šie kotsi.’—Diema 1:33, Holy Bible—Contemporary English Version. *

[Mongwalo wa ka tlase]

[Lepokisi/Seswantšho go letlakala 10, 11]

Dintlha Tše Dingwe Tša Tšhireletšego

Sepela ka difofane tše di lebago thwii mo di yago. Dikotsi tše dintši di direga nakong ya ge sefofane se tloga, se fofela godimo, se theogela tlase, goba se kotama. Go sepela thwii go tla fokotša go itebanya le megato ye ya go tšea leeto ka sefofane yeo gantši e bakago kotsi.

Kgetha sefofane se segolo. Ka kakaretšo difofane tšeo di nago le ditulo tša banamedi tše fetago 30 ke tšeo di hlamilwego le tšeo di hlatsetšwego di le boemong bjo bobotse ke melao e tiilego go feta difofane tše nyenyane. Le gona, tiragalong yeo e diregago ka sewelo ya kotsi e šoro, sefofane se segolo se nea sebaka se sekaone bakeng sa go phologa ga banamedi.

Ela hloko ditaelo tšeo di newago pele sefofane se tloga. Gaešita le ge tsebišo e ka bonagala e le yeo e boa-boeletšwago, mafelo a kgaufsi a go tšwa nakong ya maemo a tšhoganyetšo a ka no se swane go ithekgile ka mohuta wa sefofane le setulo seo o dutšego go sona.

Boloka lefelo la ka godimo ga dihlogo le se na merwalo e boima. Mafelo a ka godimo ga dihlogo a go bea merwalo a ka no se kgone go rwala dilo tše boima kudu nakong ya go šišinyega ka matla ga sefofane, ka gona ge e ba o swere selo seo o ka se kgonego go se kukela lefelong la go bea merwalo, se ngwadiše pele ga nako.

Dula o bofile lepanta la gago la setulo ge o dutše. Go dula o bofile lepanta ge o dutše go nea tšhireletšo e oketšegilego yeo mo gongwe o ka e nyakago ge e ba sefofane se fihla boemong bjoo se šišinyegago ka matla ka mo go sa letelwago.

Theetša bahlokomedi ba ka sefofaneng. Lebaka la motheo leo ka lona go nago le bahlokomedi ka sefofaneng ke bakeng sa tšhireletšego, ka gona ge e ba yo mongwe wa bona a go kgopela gore o dire selo se itšego, se dire pele gomme o botšiše dipotšišo ka morago.

O se ke wa namela le dilo tše kotsi. Go na le lelokelelo le letelele la dilo tše kotsi tšeo di sa dumelelwago, eupša tlhaologanyo e swanetše go go botša gore ga se wa swanela go namela ka sefofaneng le peterole, dikhemikhale tše kotsi, dikgase tšeo di nago le mpholo le dilo tše dingwe tše di swanago le tšeo ka ntle le ge di dumeletšwe ke tirelo ya tša difofane gomme di tsentšhitšwe ka diswarong tše di swanetšego.

O se ke wa nwa dino-tagi kudu. Seno-tagi se sengwe le se sengwe seo o se nwago se tla go kgoma kudu ge o le moyeng go feta ge o le tekanyong ya lewatle. Go lekanyetša ke tsela e bohlale boemong le ge e le bofe.

Dula o phafogile. Tiragalong yeo e diregago ka sewelo yeo go yona go rotogago boemo bja tšhoganyetšo, bjalo ka go lemošwa gore le tšwe ka baka la maemo a tšhoganyetšo, o swanetše go latela tlhahlo ya bahlokomedi ba ka sefofaneng le sehlopha sa bafofiši gomme o tšwe ka sefofaneng kapejana kamoo o ka kgonago ka gona.

[Mothopo]

Source: AirSafe.com

[Lepokisi/Seswantšho go letlakala 12]

Go Kgonthišetša Lapa La Gago

Ge e ba o tšea leeto, tsela yeo ka yona o ka thušago ba lapa la gago go lebeletšana le matshwenyego a bona še.

Boledišana le lapa la gago. Pele ga ge o ka tsena leetong la gago, fetša nako e itšego le baratiwa ba gago bakeng sa go ahla-ahla tšhireletšego ya gago gotee le tšhireletšego ya bona. Hlalosa megato e mefsa ya tšhireletšego yeo e gatilwego le seo e se bolelago bakeng sa tšhireletšego ya gago ge o le leetong.

Ba nee sebaka sa go bolela matshwenyego a bona. Dira gore ba lapa la gago ba bolele maikwelo a bona a go tshwenyega. Ba a go rata gomme ba tloga ba nyaka gore o šireletšege. Theetša ka kelohloko ka ntle le go swaya diphošo, gomme o amogele dipoifo le matshwenyego a bona ka tsela ya kgonthe.

Nea kgonthišetšo ya kgonthe. Bolela mabapi le kamoo mekgatlo e fapa-fapanego e lekago ka gona go thibela ditlhaselo tše dingwe tša botšhošetši. Maiteko a a akaretša megato e tiilego ya tšhireletšego maema-fofaneng gotee le ka difofaneng. Kgonagalo ya gore selo se sengwe se se tšhošago se direge ge o le ka sefofaneng ke e nyenyane kudu.

Dula o ikgokaganya le bona. Holofetša gore o tla ba leletša mogala ge o fihla mo o yago gona. Tšwela pele o leletša ba gae mogala ka mehla ge o sa dutše o le moo. Le gona, ke gabohlokwa gore lapa la gago le tsebe kamoo le ka ikgokaganyago ka gona le wena ge go tšwelela maemo a tšhoganyetšo.

[Mothopo]

E tšerwe go tšwa go United Behavioral Health Web site

[Diswantšho go letlakala 10]

E-ba yo a ikemišeditšego go ba le tirišano mafelong a go phuruphutša a tša tšhireletšo