Lerato Le Le Bontšhwago Ka Mediro Modiro O Tšerego Lebaka Le Letelele Le O Thata Wa Tlhakodišo

RICHARD VARA, yo e lego mongwadi yo a nago le phihlelo wa kuranta ya Houston Chronicle, le ge e se motho yo a fo go kgahlega gabonolo, fela ngwagola o ile a kgahlega. O ile a re: “Ga se ka ka ka bona selo sa mohuta woo le ka mohla! Ga ke kgolwe seo.” Maikwelo a gagwe a be a swana le a Lee P. Brown, yo e lego ramotse wa Houston, Texas, U.S.A. O itše: “Ke duma eka yo mongwe le yo mongwe mo Houston a ka bona seo le se dirilego. Ke tloga ke kgahlegile kudu.” Ba be ba hlalosa ka eng? Mongwadi le ramotse ba be ba hlalosa ka modiro wa tlhakodišo wo o bego o dirwa ke Dihlatse tša Jehofa kua Houston. Modiro wo o be o akaretša’ng? Ke ka baka la’ng o be o nyakega? Gomme ke’ng seo se dirilego gore e be o kgahlišago gakaakaa? Gore re hwetše seo, anke re thomeng mathomong.

Mafula ao a sa Kago a Bonwa le ka Mohla

Mathomong a June ya 2001, ledimo le lešoro la molatšatšing le le bitšwago Allison le ile la hlasela naga ya molala ya ka borwa-bohlabela bja Texas. Mafelelong, ka Labohlano, June 8, lebakeng la diiri tše 24, ledimo la Allison le ile la kgaphela dipula tša matlorotloro tša meetse a bophagamo bja mithara Houston—e lego motse o mogolo wa bone ka nageng. * Kapejana, meetse ao a hlatlogago a ile a šwahlela ka mabenkeleng, diofising le magaeng a dikete tše masome. Ditsela tša lephefo motseng ka moka di ile tša fetoga dinoka tše šoro, tšeo di khupetšago dikoloi le dilori tše ditelele tšeo di kgakgetšwego. Meetse ao a phagamego a ile a palediša le dilori tša bo-raditima-mollo le dikoloi tše dingwe tša tlhakodišo go sepela ditseleng tše dingwe tšeo di apareditšwego ke mafula. Go ile gwa bitšwa di-helicopter le dikoloi tše dikgolo tša mašole gore di tlo hlakodiša batho.

Mafelelong, ge leratadima le apoga ka Mošupologo, June 11, go ile gwa ba molaleng gore Allison e bakile mahu le go senyega ga dithoto. Batho ba 22 ba ile ba loba maphelo a bona, go akaretša le Dihlatse tše pedi tša Jehofa: e lego Jeffrey Green yo e lego mogolo wa Mokriste le mogadibo wa gagwe Frieda Willis. * Go tlaleletša moo, magae a nyakilego go ba 70 000 a be a senyegile, e lego seo se ilego sa dira gore mafula a e be e nngwe ya dikotsi tša tlhago tše šoro tšeo di kilego tša hlasela tikologo e kgolo ya toropong. Ge e le gabotse, ka go baka tshenyo ya dithoto e bitšago mo e nyakilego go ba ditolara tše dimilione tše dikete tše hlano, Allison e fetogile ledimo la molatšatšing le le bakilego tshenyagalelo e kgolo historing ya United States.

Lefula la Baithapi

Batho ba be ba tšhogile. Mošomi yo mongwe wa tša tlhakodišo o itše: “Mepete ya bona e be e thapile. Mebete ya bona e be e thapile. Diswantšho tša bana ba bona le tša bona tša bjaneng di be di gogotšwe.” Bontši bja Dihlatse tša Jehofa tše fetago 16 000 tikologong ya Houston di ile tša senyegelwa. Diholo tša Mmušo tše seswai gotee le dintlo tše makgolo tša Dihlatse di ile tša senyega. Tše dingwe tša dintlo tše di ile tša šwahlelwa ke meetse a bophagamo bja disenthimithara tše itšego; go tše dingwe meetse a be a fihla tlhakeng. Ka kakaretšo, go ile gwa kgomega diphuthego tše fetago 80 tša Dihlatse tša Jehofa. Lega go le bjalo, bahlaselwa ba ga se ba ka ba tlogelwa ba sa newe thušo. Lebakeng la matšatši a sego kae lefula—eupša mo nakong ye e le lefula la baithapi—le ile la ba hlakodiša. Seo se diregile bjang?

Gaešita le pele ga ge mafula a ka fokotšega, bagolo ba Bakriste ba diphuthego tša Dihlatse tša Jehofa kua Houston ba ile ba gata mogato ka go akgofa. Mogolo yo mongwe o laodišitše gore: “Re be re leletša bana babo rena le dikgaetšedi mogala le go ba etela. Ka morago re ile ra lekola tshenyo, gomme ka Mošupologo, June 11, ke ge re kgobokeditše pego e feletšego ya lelokelelo la bahlaselwa, palo ya dintlo tše di sentšwego le bogolo bja tshenyo. Pego ye e ile ya romelwa ntlong-kgolo ya Dihlatse tša Jehofa kua Brooklyn, New York.” Ka morago ga matšatši a  sego kae, ofisi ya lekala ya Dihlatse tša Jehofa ya United States e ile ya hloma komiti ya tlhakodišo ya bagolo ba seswai ba Bakriste ba Houston gomme ya nea ditšhelete tša thušo. Komiti e be e abetšwe go dira’ng? E be e le go thuša bahlaselwa go boela sekeng maikwelong gotee le go lokiša dintlo tše di sentšwego tša Dihlatse—dintlo tše fetago 700!

Ditho tša Komiti ya tša Tlhakodišo ya Dihlatse tša Jehofa ya Houston 2001 yeo e sa tšwago go hlongwa di ile tša ipotšiša gore: ‘Re ka thoma bjang go swaragana le modiro wo o mogolo kudu?’ Di ile tša fetša diiri tše ditelele tša nakong ya mantšiboa di dira dithulaganyo tša mathomong le go laletša diphuthego tše fetago 160 tša Dihlatse tikologong ya Houston gore di tlo thuša. Modula-setulo wa komiti o itše: “Go ile gwa ba le karabelo e kgolo kudu. Dihlatse tše fetago 11 000 di ile tša ithapela go šoma, tša gafa nako ya tšona, nako le bokgoni ka ntle le tefišo.”

Mouta o Ntšhana Kgang le Baithapi

Matšatši a sego kae ka morago ga mafula, baithapi ba ile ba ya go šoma magaeng a bahlaselwa, ba kgakgamola mebete yeo e thapilego, ba thuba mabato ao a senyegilego, maboto ao a senyegilego, ba ntšha diraka tšeo di thapilego, mabati ao a kokomogilego le dilo tše dingwe tšeo di bego di šilafaditšwe ke meetse a mafula ao a šilafaditšwego ke kelelatšhila. Moithapi yo mongwe o itše: “Re be re sa tshwenyega feela ka go lokiša dintlo tša bana babo rena, eupša re be re tshwenyegile le ka go šireletša boemo bja bona bjo bobotse bja tša maphelo.” Ka ge mouta o nago le mpholo o be o tla mela ka go akgofa ka morago ga maboto le ka gare ga diraka, go be go nyakega gore go thongwe ka go bolaya ditwatši ka mo go feletšego ka dintlong.

Bakeng sa go ithuta go dira mošomo ka mo go šireletšegilego, Dihlatse tše dintši di ile tša kgopela  tlwaetšo go Federal Emergency Management Agency (FEMA), e lego mokgatlo wa mmušo wo o nago le boitemogelo tabeng ya go swaragana le dikotsi tša tlhago. Ka morago ga moo, Hlatse e nngwe le e nngwe yeo e tlwaeditšwego ke FEMA e ile ya laletša baithapi ba lesome gore ba ye le yona ntlong e senyegilego, moo ba ilego ba rutwa mokgwa wa go bolaya ditwatši ka ntlong yeo ka mo go swanetšego. Letšatšing le le latelago yo mongwe le yo mongwe wa baithapi ba lesome bao ba sa tšwago go tlwaetšwa le yena o ile a sepela le baithapi ba bangwe ba lesome. Moithapi yo mongwe o hlalositše gore: “Lebakeng la matšatši a sego kae, palo ya bao ba bego ba tseba go dira mošomo wo e ile ya oketšega ka makgolo a sego kae.” Mouta o aparetšago o be o tloga o sa kgone go fenya palo e golago ya baithapi! Batho bao ba rotšego modiro le bafsa bao ba lego maikhutšong a sekolo ba be ba šoma mosegare. Bošego baithapi ba bangwe ba be ba tšea modiro gomme ba tšwela pele ka wona. Lebakeng la dibeke tše tshela dintlo ka moka tša Dihlatse di be di hlwekile e bile di šireletšegile.

Lefelo le Legolo la Taolo le a Manyenyane a Šupa

Go sa dutše go le bjalo, komiti ya tša tlhakodišo e ile ya reka di-plasterboard tše dintši le ditone tša ditlabakelo tše dingwe tša go aga. Eupša di be di tla bewa kae? Seboleledi sa komiti ya tša tlhakodišo se boletše gore: “Ge molaodi wa khamphani a be a tsebišwa ka dinyakwa tša rena, o ile a re dumelela go diriša lefelo la bobolokelo—la bogolo bja  disekwere-mithara tše 5 000—ka ntle le tefišo!” Ka ntle le go swara ditlabakelo tša go aga, lefelo la bobolokelo le be le e-na le moo go ka hlongwago diofisi gona. Go se go ye kae, le ile la fetoga lefelo la tša taolo bakeng sa modiro wa tša tlhakodišo, moo baithapi ba 200 go ya go 300 ba bego ba šoma dinakong tša mosegare, bošego le mafelo-bekeng.

Ka ge dintlo tšeo di bego di sentšwe di be di le mafelong a fapa-fapanego tikologong, mafelo a manyenyane a taolo goba mafelo a tikologong a tša tlhakodišo, a ile a hlongwa Diholong tša Mmušo tše šupago. Mafelo-bekeng lefelo le lengwe le le lengwe le be le nyeuma ka baithapi. (Bona lepokisi le le rego, “Lefelo la Modiro.”) Ba bantši ba bona ba be ba kile ba šoma gotee go ageng Diholo tša Mmušo tikologong. Ge e le gabotse, baithapi bao ba nago le bokgoni go tšwa Dikomiting tša tša Meago tša Tikologo tše di fapa-fapanego tše 11 kua Arkansas, Louisiana, Oklahoma le Texas, ba ile ba thuša. * Lefelong le lengwe le le lengwe babetli, bo-mapentane, bo-radipompi gotee le bašomi ba bangwe bao ba nago le bokgoni ba ile ba etelela pele le go tlwaetša ba bangwe.—Bona lepokisi le le rego, “Mananeo a Tlwaetšo.”

Thulaganyo le go Kgoboketšwa ga Tsebišo

Baithapi ba be ba latela thulaganyo ya megato e šupago ya go aga. Ditlabakelo tša go aga di be di išwa magaeng ka dingata tše nne gomme modiro wa go lokiša legaeng le lengwe le le lengwe o ile wa rulaganyetšwa go dirwa lebakeng la mafelo-beke a mararo. Ka tsela ye, modiro ka moka wa tlhakodišo o be o tla phethwa lebakeng la mo e ka bago dikgwedi tše tshela.

Bakeng sa go dira gore lenaneo le šome, komiti e ile ya hloma mafapha a 22 ao a akaretšago lefapha la tša taolo, la tša go reka, la tša marobalo le la dilori. Mafapha ka moka a be a thušwa ke tsebišo yeo e bego e rulagantšwe ka mo go nabilego ye e bego e hlamilwe ke baithapi. Pele ga ge modiro wa go lokiša o thoma, baithapi ba ile ba fetša matšatši a lesome ba ngwala tsebišo. Pego ya ditaba e boletše gore: “E be e le modiro o mogolo wa go ngwala tsebišo.” Lega go le bjalo, bofelong bja “modiro” woo, go be go e-na le tsebišo e kgobokeditšwego e holago. Ka go tobetša mouse wa computer, thulaganyo ya tsebišo e be e bontšha nako yeo ka yona baithapi ba 11 000 ba bego ba tla hwetšagala, gore ba na le bokgoni bofe le kamoo go ka ikopanywago le bona. Ka go tobetša gape, e be e bontšha boemo bja tša go lokiša, ditumelelo tša tša go aga tšeo di nyakegago le tsebišo e nngwe ka dintlo tšeo di senyegilego. Tsebišo e kgobokeditšwego e ile ya thoma go tsebja e le “karolo ya motheo ya modiro wa tša tlhakodišo.”

Ba be ba Maketše e Bile ba Leboga

Dintlo tšeo di bego di se sa na mouta e bile di omile di ile tša etelwa ke baithapi bao ba nago le bokgoni tabeng ya tša meago ya dintlo bakeng sa go bona gore go be go tla nyakega eng bakeng sa go lokiša tshenyo. Seboleledi se ile sa hlalosa gore: “Baithapi ba ba be ba kala ditlabakelo go fihla bokgoleng bja go bala palo ya dipikiri tšeo di bego di nyakega. Re be re sa nyake go senya tšhelete le ge e le efe goba ditlabakelo tšeo di neetšwego.” Ka nako e swanago, baithapi ba bangwe ba be ba hwetša ditumelelo tša go aga go balaodi ba motse.

Ka morago, malapa ao a kgomegilego a be a laleletšwa lefelong la bobolokelo go tlo kgetha mebete, diraka, vinyl ya go ala fase le dilo tše dingwe tšeo di lekanyeditšwego bakeng sa go thiba tšeo ba bego ba  di lobile. Bahlaselwa ba mafula ba ile ba makala gomme ba fela ba lla ge ba bona dilo tšeo ba bego ba di filwe. Bahlaselwa gape ba ile ba amogela keletšo go tšwa go baithapi bao ba nago le boitemogelo ditabeng tša tša inšuranse le melao ya mmušo. Ke moka, dintlo di ile tša rulaganyeletšwa go lokišwa, gomme letšatšing leo ka lona dihlopha tša go lokiša di bego di nyaka ditlabakelo tša go aga, baotledi ba dilori ba baithapi ba be ba ba išetša tšona. Motho yo e sego Hlatse yo ntlo ya gagwe yeo e senyegilego e bego e lokišwa o ile a botša mosadi wa gagwe yo e lego Hlatse gore: “Bana beno ke bao ba kgahlišago. Ge sehlopha se sengwe se tloga, se sengwe se tla ka go akgofa. Ba šoma bjalo ka mohlwa!”

Go lokiša dilo tša motheo go be go tšea mo e ka bago mafelo-beke a mararo bakeng sa ntlo e nngwe le e nngwe. Modula-setulo wa komiti o itše: “Lega go le bjalo, ka dinako tše dingwe go be go tšea dibeke tše hlano goba gaešita le tše seswai.” Ge maboto a kgale a be a thubja dintlong tša kgale, baithapi gantši ba be ba lemoga go senyega ga ona ga nakong e fetilego, gomme ba be ba sa nyake go tsenya maboto a mafsa ka ntle le gore ba thome ka go lokiša mathata a a kgale. Setsebi se sengwe sa mošomo sa moithapi se itše: “Ka dinako tše dingwe re be re bona maboto ao a apešitšwego ke mohlwa, ka gona re be re kgonthišetša gore mohlwa o a bolawa. Re ile ra dira modiro o mogolo wa go aga diforeimi tša meago lefsa bakeng sa go lokiša dilo. Re ile ra tlogela dintlo di le boemong bjo bobotse.” Mohlaselwa wa mafula o ile a hlalosa maikwelo a swanago le a beng ba bantši ba dintlo tšeo ge a be a botša moeti ka lethabo gore: “Ntlo ya-ka e boemong bjo bokaone kudu go feta nakong ya ge ke be ke e reka!”

 Dijo Tšeo di Apewago ka go Akgofa

Bakeng sa go lokišetša baithapi ba bantši dijo, sehlopha sa Dihlatse se ile sa fetola lefelo la bobolokelo leo le lego ka morago ga Holo ya Mmušo go ba lefelo le legolo la go apeela le go aba dijo. Dihlatse nageng ka bophara di ile tša neelana ka ditšidifatši, metšhene ya go hlatswa dibjana, ditofo le didirišwa tše dingwe tša ka khitšhing. Ka Mokibelo o mongwe le o mongwe le Sontaga se sengwe le se sengwe baapei ba 11 le baithapi ba bangwe ba ka bago 200 ba be ba apea disola tše dikete lefelong leo. Moithapi yo e bego e le mookamedi wa khitšhi, o itše: “Re be re dutše re lokiša dijo bakeng sa mošomo wa go agwa ga Diholo tša Mmušo ka nywaga e 19, eupša mošomo wo e bile o mogolo kudu go feta kamoo go bego go lebeletšwe.”

Dijo di be di tsenywa ka gare ga diswaro tše dikgolo tše 120. Gomme tše di be di laišwa ka dikoloing tše 60 tšeo di emego, tšeo di bego di iša dijo mafelong a manyenyane a mošomo le lefelo le legolo la tša taolo. Go sa dutše go le bjalo, sehlopha se sengwe le se sengwe seo se bego se šoma ntlong se be se roma moithapi o tee lefelong la sona leo le abetšwego bakeng sa go yo rwalela sehlopha ka moka dijo. Baithapi ba be ba e-ja dijo ka dintlong tšeo ba bego ba šoma go tšona ke moka ba boele mošomong kapejana.

Mošomo o Phethilwe!

Mafelelong ka April 2002, baithapi ba 11 700 ba ile ba phetha le lengwe la masolo a matelele la modiro wa tlhakodišo o kilego wa dirwa ke Dihlatse tša Jehofa. Baithapi ba ile ba diriša diiri tše 1 000 000 ba lokiša goba ba aga lefsa palo-moka ya Diholo tša Mmušo tše 8 le dintlo tše 723. Mohlaselwa yo mongwe wa mafula o ile a bolela legatong la ba bantši ge a be a bolela a sekišitše megokgo ka go leboga a re: “Ke leboga Jehofa le baithapi bakeng sa thušo ka moka yeo ba e neilego. Go ba karolo ya borwarre bjo lerato ke mo go homotšago kudu!”

[Mengwalo ya ka tlase]

[Lepokisi/Seswantšho go letlakala 15]

Lefelo La Modiro

Ke Mokibelo ka 7:00 a.m., Lefelong No. 4 ka leboa-bohlabela bja Houston. Baithapi bao ba bolelago, ba segago, ba nwago kofi e bile ba sohla mapaku a go apešwa swikiri ba thabela segwera Holong ya Mmušo. Ba bangwe ba sepetše leeto la dikhilomithara tše makgolo go tla mo. Eupša ka 7:30 a.m., dipoledišano tše mafolofolo di a kgaotša, gomme mookamedi wa lefelo o swara poledišano ya temana ya Beibele. O bile o tsebiša gore Thuto ya Morokami e tla swarwa ka Sontaga ka 7:30 a.m. pele baithapi ba ka ya mafelong a bona a mošomo, gomme o kgothaletša bohle gore ba tšee karolo thutong ka go nea ditlhaloso ka Seisemane goba ka Sepaniši. O fetiša molaetša o tšwago ntlong-kgolo ya lefase ya Dihlatse tša Jehofa, woo o amogelwago ka magofsi.

Mookamedi wa lefelo o nea tsebišo e lego nakong mabapi le mediro ya tša tlhakodišo gomme a leboga baithapi ka borutho bakeng sa moya wa bona wa boikgafo. O botšiša gore: “Na go na le motho mo, yo a sa tsebego seo a swanetšego go se dira goba moo a swanetšego go ya gona lehono?” Ga go na yo a emišago letsogo. “Re nyaka disola tše kae?” Bohle ba emišetša matsogo godimo gomme ba hwa ka disego. Mafelelong go ile gwa rapelwa gomme baithapi ba 250—banna, basadi, bafsa le batšofadi—ba ya mošomong wa bona, ba ikemišeditše go fetša letšatši le lengwe le letelele la mošomo o thata.

Go direga se se swanago mafelong a mangwe a tshelelago le lefelong la go bea dithoto. Ka nako e swanago, baithapi ba bangwe bao ba šomago khitšhing e kgolo ba šetše ba swaregile ka go hudua dipitša tše di kgaba-kgabago—therešo ke gore, lehono thapama baithapi ba 2 000 bao ba swerwego ke tlala Houston ka moka ba tla be ba loketše go ja dijo tše di fišago!

[Lepokisi/Seswantšho go letlakala 16]

Mananeo A Tlwaetšo

Nakong ya modiro wa tlhakodišo, baithapi bao ba nago le bokgoni ba ile ba swara diklase tša go tlwaetša baithapi ba se nago bokgoni mediro e itšego. Ba bangwe ba ile ba tlwaetšwa go bolaya ditwatši magaeng. Ba bangwe ba ile ba ithuta go aga maboto le go tsenya diraka. Ba bangwe gape ba ile ba ithuta go poleisetera le go penta. Diseminari tše tša Bašomi Bao ba Nago le Bokgoni di ile tša tšewa diswantšho tša bidio, gomme dibidio tše ka morago di be di dirišwa mafelong a modiro bakeng sa go tlwaetša baithapi ba oketšegilego. Setho sa komiti ya tša tlhakodišo se hlalositše gore: “Ka thušo ya diseminari tše, re ile ra dira modiro wa maemo a godimo wa go lokiša.”

[Seswantšho]

Ditsebi tša mošomo di swere diklase

[Lepokisi go letlakala 18]

“Tiro Ya Kgonthe Ya Modimo”

Setho se sengwe sa komiti ya tša tlhakodišo se hlalositše gore: “Dikhamphani tša inšuranse di bitša dikotsi tša tlhago gore ke ditiro tša Modimo.” O okeditše ka gore: “Lega go le bjalo, baithapi bao ba ilego ba šoma mo lebakeng la dikgwedi tšeo ka moka ke bona tiro ya kgonthe ya Modimo. Borwarre bja rena ke mohlolo!” Lebakeng le la modiro wa tša tlhakodišo, baithapi ba 2 500 goba ka godimo ga moo ba be ba e-tla mafelo-bekeng go tlo šoma. Modula-setulo wa komiti o itše: “Baithapi bao ba sa lefšego ba ile ba thiša go ya maikhutšong ao ba bego ba a rulagantše, ba rulaganya lefsa dithulaganyo tša malapa a bona gomme ba šuthišetša mabaka a mangwe a motho ka noši pele bakeng sa go thuša go o mongwe wa mediro e megolo kudu wa tlhakodišo woo Dihlatse tša Jehofa di kilego tša swaragana le wona.”

Lesolo le le tšerego nako e telele la tša tlhakodišo le be le nyaka boikgafo. Mošomi yo mongwe yo a ilego a thekga modiro go tloga mathomong go fihla mafelelong o be a šoma mošomo wa boiphedišo wo o nyakago diiri tše 50 ka beke. Lega go le bjalo, o be a fetša diiri tše 40 modirong wa tlhakodišo bekeng e nngwe le e nngwe. O itše: “Jehofa o ile a mmatlafatša. Batho bao ke tlwaelanego le bona ba be ba mpotšiša gore, ‘Na o a lefša bakeng sa modiro wo?’ Ke ile ka ba botša gore, ‘Le ge ke be nka fiwa tšhelete e ntši, ke be nka se dire modiro wo ge e ba ke be ke sa rate.’” Mafelo-bekeng a ka morago ga beke e tletšego ya mošomo wa boiphedišo, lapa le le tšwago nageng ya Louisiana le be le sepela leeto la go ya le go boa la dikhilomithara tše 800 bakeng sa go yo thuša mošomong wa tlhakodišo. Ba bantši ba be ba šoma go tloga ge letšatši le hlaba go fihla ge le sobela ke moka ba boela gae. Sehlopha se sengwe sa baithapi ba 30 bao ba nago le bokgoni se se bego se sepela leeto la diiri tše šupa go ya go tše lesome ge se e-ya le ge se boa, se itše: “E tloga e le mo go swanelwago ke boiteko.” Moithapi yo mongwe o be a kgaotša mošomong wa gagwe wa letšatši ka 3:30 p.m. gomme a ithapela go šoma lefelong la tša taolo go fihla ka 10:00 p.m. O be a bile a thuša gape le mafelo-bekeng. O itše: “Ke mo go kgotsofatšago.”

Ka kgonthe, baithapi ba le ba bangwe ka moka ba be ba ikemišeditše go thuša ka baka la go ba ga bona le lerato la borwarre—e lego leswao leo le hlaolago Bakriste ba kgonthe. (Johane 13:35) Ramotse wa Houston o ile a tutueletšega go botša sehlopha sa Dihlatse ka morago ga go etela lefelo la tša taolo la modiro wa tlhakodišo gore: “Le dumela go direng seo Modimo a re botšago gore re se dire. Le bontšha ditumelo tša lena ka mediro.”

[Seswantšho go letlakala 14, 15]

Mafula a ile a aparetša Houston, ka June 9, 2001

[Mothopo]

© Houston Chronicle

[Seswantšho go letlakala 15]

Ditsela tša lephefo di ile tša fetoga dinoka

[Seswantšho go letlakala 15]

Meetse a ile a šwahlela ka dintlong

[Diswantšho go letlakala 17]

Tše dingwe tša Dihlatse tše dikete tšeo di ilego tša hlankela e le baithapi

[Seswantšho go letlakala 18]

Sehlopha sa khitšhing se ile sa lokiša disola tša ka godimo ga kotara ya milione!

[Mothopo wa Seswantšho go letlakala 13]

NOAA