Na Go Tšea Leeto Ka Sefofane Go Sa Dutše Go Šireletšegile?

DIFOFANE tše nne tše dikgolo tša go rwala banamedi di utswiwa ka go arošwa tseleng ya tšona. Tše nne di a pšhatlagana. Go senywa ga meago e tumilego. Seswantšho sa sefofane se segolo sa 767 seo se ilego sa šwalalanya e nngwe ya Ditora tše Pedi (Twin Towers) se bontšhwa leboelela thelebišeneng.

Ditlhaselo tša September 11, 2001 di re tlišitše mehleng e mefsa e boifišago kudu ya ditlhaselo tša botšhošetši. Ditirelo tša difofane di thomile go ba didirišwa tša go phetha morero wa go bolaya gomme difofane di fetogile dithuthupiši tše kotsi.

Ka baka leo, se se tšweleditše mohuta o mofsa wa banamedi ba difofane bao ba tletšego letšhogo: Bao pele ba bego ba ikwa ba šireletšegile eupša ga bjale ba tšhošwa ke kgonagalo ya ditlhaselo tša botšhošetši. Ka godimo ga moo, lelokelelo la dikotsi tše di bolayago tša ditirelo tša difofane tšeo di sa tswalanego le botšhošetši ka morago ga September 11, le gakaditše poifo ya ba bantši ya go boifa go tšea leeto ka sefofane.

Ke therešo gore go tšea leeto ka sefofane ke letsaka leo le sa fihlelelwego ke ba dimilione lefaseng ka bophara. Lega go le bjalo, go ba bangwe go tšea leeto ka sefofane ge e se mokgwa ke molao. Bakeng sa bao ba šomago mešomo yeo e ba sepedišago kudu ya tša kgwebo, go sepela ka sefofane ke mo go sa phemegego. Baromiwa le badiredi ba Bakriste gantši ba swanelwa ke go tšea maeto a matelele a go ya le go boa dikabelong tša bona ka difofane. Gaešita le bathong bao ba diilago, ka dinako tše dingwe sefofane ke mokgwa o nnoši o swanetšego wa tša go sepela nakong ya maemo a tšhoganyetšo a tša kalafo. Le gona bafofiši ba dikete gotee le dihlopha tša bafofiši ba iphediša ka go sepela ka difofane.

Bontši bja batho ba bao ba tšeago maeto ka difofane, mohlomongwe bao bona ka noši ba tšhogilego, ba swanelwa ke go homotša balekane bao ba tshwenyegilego le bana bao ba tšhogilego pele ga ge ba ka tloga gae. Le gona, ge go laelana maema-fofaneng mo e bego e le selo se se tlwaelegilego go fetoga diphihlelo tše bohloko, basepedi ba ipotšiša ge e ba sefofane e sa dutše e le tsela e kganyogegago ya go tšea leeto.

Bakeng sa go ahla-ahla ditaba tše, Phafoga! e ikopantše le ditsebi tša tša tšhireletšego, bašomi ba boema-fofane, balaodi ba ditirelo tša difofane le bašomi bao ba lokišago difofane. Ka moka ga bona go bonala ba dumelelana ka se: Gaešita le ge go tšea leeto ka sefofane e sa dutše e le mokgwa o šireletšegilego kudu wa go sepela, ditšhošetšo tše difsa di nyaka mekgwa e mefsa ya go oketša tšhireletšego ya batho bao ba tšeago maeto ka difofane.

Dihlogo tše di latelago di tla ahla-ahla ditlhohlo tšeo di akaretšwago le seo wena ka noši o ka se dirago go oketša tšhireletšego ya gago gotee le boiketlo ge o le leetong ka sefofane.