Kamoo Kgang E Thomilego Ka Gona

STRATTON, OHIO, U.S.A., ke tikologo e nyenyane yeo e lego kgaufsi le Noka ya Ohio, yeo e aroganyago Ohio le Virginia Bodikela. E hlaloswa e le motsana gomme e na le ramotse. Gatee-tee tikologo ye e nyenyane ya badudi ba ka tlase ga ba 300 e ile ya fetoga lefelo leo go ngangišanwago ka lona ka 1999 ge balaodi ba moo ba be ba leka go gapeletša Dihlatse tša Jehofa, gare ga dilo tše dingwe, go hwetša tumelelo pele di ka ya go etela magaeng a batho ba lefelong ka molaetša wa tšona o theilwego Beibeleng.

Ke ka baka la’ng ye e le kgang ya bohlokwa? Ge pego ya rena e dutše e tšwela pele, o tla bona gore mohuta wo wa taelo ya mmušo gotee le taolo ya gona ge e le gabotse di be di tla fokotša ditshwanelo tša go bolela ka bolokologi e sego feela tša Dihlatse tša Jehofa eupša le tša batho bohle bao ba dulago United States.

Kamoo Ntwa e Thomilego ka Gona

Badudi ba Stratton ba be ba dutše ba etelwa ka nywaga e mentši ke bahlankedi ba Phuthego ya tikologong ya Wellsville ya Dihlatse tša Jehofa, bao ba ilego ba ba le mathata le balaodi ba sego kae ba lefelong mabapi le bodiredi bjoo bja ntlo le ntlo ga e sa le go tloga ka 1979. Mathomong a bo-1990, lephodisa la tikologong le ile la raka sehlopha sa Dihlatse toropong yeo, le bolela gore: “Ga ke na taba le ditshwanelo tša lena.”

Taba e ile ya fihla seremong ka 1998 ge ramotse wa Stratton a be a ikopanya le Dihlatse tše nne tša Jehofa ka boyena. Di be di e-tšwa motseng ka koloi ka morago ga ge di be di boetše moo go yo boledišana le badudi bao ba bego ba bontšhitše kgahlego ka go swara dipoledišano tšeo di theilwego Beibeleng. Go ya ka yo mongwe wa basadi bao go ilego gwa ikopanywa le bona, ramotse o ile a bolela gore ge e ba e be e le banna, o be a tla ba golega.

Selo seo se bakilego kgohlano ya morago-rago e be e le taelo ya motse e lego “Go Laola Thekišo Yeo e sa Nyakegego le go Kgopela Leboelela Mafelong a Batho,” yeo e bego e nyaka gore motho le ge e le ofe yo a nyakago go tšea karolo modirong wa go ya ka ntlo le ntlo a hwetše tumelelo ka ntle le tefo go ramotse. Dihlatse tša Jehofa di be di lebelela taelo ye e le go šwahlela tokologo ya polelo, go diriša bodumedi ka bolokologi le tokologo ya go phatlalatša ditaba. Ka baka leo, di ile tša iša molato kgorong ya mmušo ka morago ga ge motse o ganne go fetoša go diriša ga tšona taelo ye.

Ka July 27, 1999, theetšo ya lekgotla e ile ya swarwa ka  pele ga moahlodi wa kgoro ya selete ya United States bakeng sa Selete sa ka Borwa bja Ohio. Moahlodi o ile a thekga taelo ya go hwetša tumelelo ya motse e le ya molao. Ka morago ga moo, ka February 20, 2001, Kgoro ya Boipelaetšo ya United States ya Tikologo ya Botshelela le yona e ile ya tiišetša go ba molaong ga taelo.

Bakeng sa go rarolla kgang, Watchtower Bible and Tract Society ya New York gotee le Phuthego ya tikologong ya Wellsville ya Dihlatse tša Jehofa di ile tša kgopela gore Kgoro-kgolo ya Tsheko ya United States e bušeletše molato.

[Mmapa/Seswantšho go letlakala 3]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Los Angeles

New York

OHIO

Stratton