Kgoro-kgolo Ya Tsheko E Phetha Ka Gore Go Be Le Tokologo Ya Polelo

LETŠATŠI LA GO DIRA PHETHO e bile ka June 17, 2002, ge Kgoro-kgolo ya Tsheko e be e phatlalatša dikahlolo tša yona tšeo di ngwadilwego. Kahlolo e be e le efe? Dihlogo tša ditaba tša dikuranteng di ile tša tsebiša mafelelo. The New York Times e ile ya tsebatša gore: “Kgoro ya Tsheko e Tloša Dithibelo tša go Thibela Diketelo tša Dihlatse tša Jehofa.” The Columbus Dispatch ya Ohio e ile ya bolela gore: “Kgoro-kgolo ya Tsheko e Fediša Taba ya go Nyakega ga Lengwalo la Tumelelo.” The Plain Dealer ya Cleveland, Ohio, e ile ya bolela ka go lebanya gore: “Ga go Nyakege Gore Baboledi ba Phatlalatša ba Hwetše Tumelelo Diofising tša Motse.” Letlakala leo le bapilego le la morulaganyi la kuranta ya USA Today le tsebaditše gore: “Tokologo ya Polelo e Thopa Sefoka.”

Dikahlolo tša kgoro ya tsheko ya tlasana malebana le Dihlatse tša Jehofa di ile tša gomišwa ka kgetho ya ba 8 go o tee! Phetho ya molao ya Kgoro ya Tsheko ya matlakala a 18 e ile ya ngwalwa ke Moahlodi John Paul Stevens. Phetho ya makgaola-kgang e be e le kgonthišetšo-lefsa ya tšhireletšo ya Tokišo ya Pele yeo e dumelelago bodiredi bja phatlalatša bja Dihlatse tša Jehofa. Phethong ya yona yeo e ngwadilwego, Kgoro ya Tsheko e ile ya hlalosa gore Dihlatse di be di sa kgopele tumelelo ka gobane di be di bolela gore “di hwetša taelo ya tšona ya go bolela go tšwa Mangwalong.” Ke moka Kgoro ya Tsheko e ile ya tsopola go tšwa ngangišanong ya tšona e ngwadilwego bohlatse bjo bo rego: “Re nagana gore taba ya go kgopela tumelelo go mmasepala bakeng sa go dira boboledi e be e tla ba go rogaka Modimo.”

Phetho ya Kgoro ya Tsheko e ile ya bolela gore: “Lebakeng la ka godimo ga nywaga e 50, Kgoro ya Tsheko e ile ya tloša dithibelo tabeng ya go ya ka ntlo le ntlo le go aba dipampišana. Ga se gwa itiragalela feela historing gore bontši bja melato ye e be e tswalana le ditlhohlo tšeo di bego di akaretša Tokišo ya Pele tšeo di ilego tša tlišwa ke Dihlatse tša Jehofa, ka baka la gore bodumedi bja tšona bo be bo di nyaka gore di ye ka ntlo le ntlo. Ka ge re bone molatong wa Murdock v. Pennsylvania, . . . (1943), Dihlatse tša Jehofa ‘di ipolela gore di latela mohlala wa Paulo, wa go ruta “phatlalatša, gotee le go ya ka ntlo le ntlo.” Ditiro 20:20. Di tšea taelo ya Mangwalo ka tsela ya kgonthe e rego,  “Yang lefaseng ka moka, Le kwatšê Ebangedi xo babopya ka moka.” Mareka 16:15. Ka go dira bjalo di dumela gore di kwa molao wa Modimo.’”

Ke moka Phetho e ile ya tsopolwa gape go tšwa molatong wa 1943: “Sebopego se sa modiro wa bodumedi se boemong bjo bo phagamego ka mo go swanago ka tlase ga Tokišo ya Pele go swana le borapedi bja dikerekeng le go bolela diphuluphiting. Se bolelela tšhireletšo e swanago le dikereke tše dintši le mediro e kopanego ya bodumedi.” Ge e tsopola molato wa 1939, Phetho e ile ya bolela gore: “Bakeng sa go dira modiro wa go seka-seka go dirišwa lengwalo la tumelo leo le dirago gore go gaša dipampišana ka tokologo le ka ntle le dithibelo go se ke gwa kgonega, go bea metheo ya ditiišetšo tša molao-theo kotsing.”—Mongwalo o sekamego ke wa bona.

Ka morago Kgoro ya Tsheko e ile ya bolela taba e bohlokwa e rego: “Melato e bontšha gore maiteko a Dihlatse tša Jehofa bakeng sa go ganetšana le molao wa polelo ga se ya ba a go lwela ditshwanelo tša tšona di nnoši.” Phetho e ile ya hlalosa gore Dihlatse “ga se tšona feela ‘batho ba tlwaelegilego’ bao ba lebeletšanego le go ba kotsing ya go ka homotšwa ke melao e swanago le ya Motse.”

Phetho e ile ya tšwela pele go bolela gore molao “o nyatša—e sego feela ditekanyetšo tšeo di šireleditšwego ke Tokišo ya Pele, eupša o nyatša le kgopolo ya setšhaba seo se lokologilego—gore poledišanong ya phatlalatša ya letšatšing le lengwe le le lengwe modudi o swanetše gore pele a tsebiše mmušo ka kganyogo ya gagwe ya go nyaka go boledišana le baagišani ba gagwe ke moka a hwetše lengwalo la tumelelo la go dira bjalo. . . . Molao wo o nyakago lengwalo la tumelelo bakeng sa go tsenela poledišano e bjalo o arogile ka mo go feteletšego go leabela la setšhaba le setšo sa melao-theo.” Phetho e ile ya bolela gape ka “mafelelo a gobatšago a go nyaka lengwalo le le bjalo la tumelelo.”

Tšhošetšo ya Bosenyi

Go thwe’ng ka pono ya gore lengwalo la tumelelo ke tšhireletšo malebana le mahodu le disenyi tše dingwe? Kgoro ya Tsheko e ile ya bea mabaka ka gore: “Go sa šetšwe go lemogwa ga dilo tše tše go tshwenyegilwego ka tšona e le tšeo di kwagalago, phetho yeo e ilego ya tšewa melatong ya nakong e fetilego e bontšha ka mo go kwagalago gore go swanetše go ba le teka-tekano magareng ga dilo tše tšeo go tshwenyegilwego ka tšona le tsela yeo melao e tlago go kgoma ditshwanelo tša Tokišo ya Pele ka gona.”

Phetho ya Kgoro ya Tsheko e ile ya tšwela pele ka gore: “Ga go bonagale gore go ba gona ga lengwalo la tumelelo go be go tla thibela disenyi gore di se ke tša kokota mejakong le go tsenela dipoledišanong tšeo molao o sa di akaretšego. Ka mohlala, di ka kgopela go šupetšwa tsela goba go kgopela tumelelo ya go diriša mogala, . . . goba mo gongwe di ka ingwadiša ka leina la bofora ka ntle le gore di otlwe.”

Ge e šupa diphethong tša bo-1940, Kgoro ya Tsheko e ile ya ngwala gore: “Mohuta wa leleme leo le dirišitšwego diphethong tša nakong ya Ntwa ya II ya Lefase tšeo di ilego tša phološa leboelela bakgopedi  [Mokgatlo wa Watch Tower] ba bodumedi bjo bo swanago ditatofatšong tše nyenyane o ile wa bonagatša tsheka-tsheko ya Kgoro ya Tsheko ya tokologo ya Tokišo ya Pele yeo e dirišwago molatong wo.”

Phetho ya mafelelo ya Kgoro ya Tsheko e bile efe? “Kahlolo ya Kgoro ya Boipiletšo e bušeditšwe morago, gomme molato o bušeditšwe go yona bakeng sa go tšeelwa megato e tšwelago pele yeo e dumelelanago le phetho ye. E laelwa gore e dire bjalo.”

Ka gona, go etša ge go boletšwe ka go Chicago Sun-Times, mafelelo a ditaba e bile gore, “Kgoro ya Tsheko e Thekga Dihlatse tša Jehofa,” gomme e dira seo ka tekanyo ya bontši bja ba 8 go o tee.

Go Thwe’ng ka Bokamoso?

Dihlatse tša Jehofa tšeo di lego Phuthegong ya kgaufsi ya Wellsville di ile tša lebelela bjang phenyo ye ya go fenya Kgorong-kgolo ya Tsheko? Ka ntle le pelaelo ga go na lebaka la go ikgantšha ka yona bakeng sa go leša badudi ba Stratton dihlong. Dihlatse ga di a boloka sekgopi malebana le batho ba ba lokilego ba motse. Gregory Kuhar, e lego Hlatse ya tikologong o itše: “Molato wo wa kgoro ya tsheko ga se selo seo re bego re ikemišeditše sona. Molao ka bowona o be o tloga o fošagetše. Seo re se dirilego e be e se bakeng sa rena feela, eupša bakeng sa batho bohle.”

Ditherešo di bontšha gore Dihlatse di dirile boiteko bjo bo kgethegilego e le gore di se ke tša rumola batho ba tikologong. Hlatse e nngwe e lego Gene Koontz, e hlalositše gore: “La mafelelo ge re be re dira boboledi mo Stratton e be e le ka March 7, 1998—e lego lebaka la ka godimo ga nywaga e mene e fetilego.” O okeditše ka gore: “Ke ile ka botšwa ka go lebanya gore ke tlo golegwa. Re bile le dipego tše dintši nywageng e fetilego tša maphodisa ao a bego a re tšhošetša ka gore a tla re golega. Ke moka ge re be re kgopela gore ba re bontšhe molao wo o ngwadilwego, ga se ra ka ra hwetša karabo.”

Koontz o okeditše ka gore: “Re kgetha go ba le ditswalano tše dibotse le baagišani ba rena. Ge e ba ba bangwe ba sa nyake gore re ba etele, re hlompha phetho yeo. Eupša go na le ba bangwe bao ba nago le bogwera bao ba thabelago go boledišana ka Beibele.”

Gregory Kuhar o hlalositše gore: “Ga se ra šala molato wo morago bakeng sa go ganetšana le batho ba Stratton. Re be re fo nyaka go hloma tokologo ya rena ya polelo ka molao ka tlase ga Molao-theo.”

O tšwetše pele ka gore: “Mafelelong, re holofela gore re tla boela Stratton. Ke tla thabela go ba wa pele go kokota mojakong ge re boela moo. Ka go dumelelana le taelo ya Kriste, re swanetše go boela.”

Mafelelo a “Watchtower v. Village of Stratton” e ile ya ba ao a fihlago kgole. Ka morago ga go kwa ka phetho ya Kgoro-kgolo ya Tsheko, bahlankedi ba bantši ba bo-mmasepala ba United States ba ile ba lemoga gore melao ya lefelong leo e be e ka se sa hlwa e dirišwa bakeng sa go thibela modiro wa boebangedi wa Dihlatse tša Jehofa. Go fihla ga bjale, mathata a modiro wa go bolela ka ntlo le ntlo a rarolotšwe ditšhabeng tše ka bago 90 kua United States.

[Lepokisi go letlakala 9]

“DIHLATSE TŠA JEHOFA DI FENTŠE GAPE”

Charles C. Haynes, e lego seithuti se segolo le molaodi wa mananeo a tša thuto Lefelong la Tokišo ya Pele, o ngwadile mantšu ao a lego ka mo godimo mokerong wa Web wa MSNBC (Microsoft National Broadcasting Corporation), ka tlase ga sehlogo se se rego, “Tokologo ya Bodumedi.” Haynes o tšwetše pele ka gore: “Bekeng e fetilego [Dihlatse] di fihleletše phenyo ya tšona ya bo-48 ya Kgorong-kgolo ya Tsheko—e lego lelokelelo leo le sa tlwaelegago la melato yeo e okeditšego tšhireletšo ya Tokišo ya Pele ka tekanyo e kgolo bakeng sa ma-Amerika ka moka.” O ile a lemoša ka gore: “Gopolang se: Ge e ba mmušo o ka kgona go thibela tokologo ya mohuta o itšego wa bodumedi, gona o na le matla a go thibela tokologo ya bodumedi le ge e le bofe—goba ya madumedi ka moka. . . . Ke therešo gore batho ba na le tshwanelo ya go se theetše—gotee le go tswalela mejako. Eupša mmušo ga se wa swanela go ba le matla a go dira phetho ge e le mabapi le yo a swanetšego go dumelelwa go kokota mojako. Ka gona Kgoro-kgolo ya Tsheko e lebogwa go menagane.”

Haynes o phetha ka gore: “Ka moka ga rena re swanetše go leboga Dihlatse tša Jehofa. Go sa šetšwe makga a mantši ao di ilego tša rogakwa, tša rakwa motseng goba gaešita le go hlaselwa mmeleng, di tšwela pele di lwela tokologo ya tšona (ka go rialo le ya rena) ya bodumedi. Le gona ge di fenya, ka moka ga rena re a fenya.”

[Lepokisi/Seswantšho go letlakala 10]

Kahlolo Ya Kgoro-kgolo Ya Tsheko—Seo Se Boletšwego Ke Mekero Ya Ditaba

▪ “Kgoro ya Tsheko e Thekga Dihlatse tša Jehofa; ga go Nyakege Gore go Hwetšwe Tumelelo Bakeng sa Bodiredi bja Ntlo le Ntlo

Modirong wa go ya ka ntlo le ntlo e le Dihlatse tša Jehofa, [Dihlatse] ka mehla di be di dutše di dumela gore di thekgwa ke Modimo. Ga bjale di thekgwa gape ke Kgoro-Kgolo ya Tsheko ya United States.”—Chicago Sun-Times, June 18, 2002.

▪ “Tokologo ya Polelo e a Fenya

Nakong e tlago ge Dihlatse tša Jehofa di go tsena gare o le gare o e-ja, mohlomongwe o ka nagana ka go di leboga. Ka go ineela ga sona ka sebete melaong ya motheo ya bodumedi bja sona, sehlopha se sa bodumedi seo se se nago tutuetšo e kgolo sa ditho tša ka tlasana ga milione [United States], mohlomongwe se dirile mo gogolo go feta mokgatlo le ge e le ofe go šireletša tokologo ya polelo bakeng sa batho ba ikemetšego ba Amerika. . . . 

“Go Dihlatse, go ya kgorong-kgolo ya tsheko ke mokgwa o tlwaelegilego. Melatong e fetago [e 24] lebakeng la nywaga ya ka godimo ga 65, di ile tša lwa ka katlego malebana le pušo e gatelelago ya ba bantši.”—USA TODAY, June 18, 2002.

▪ “Modiro wa go ya ka Ntlo le Ntlo o Ahlotšwe ka Gore ke Tshwanelo ya Molao-theo. Kahlolo e Bile Phenyo go Dihlatse tša Jehofa

Ka Mošupologo Kgoro-kgolo ya Tsheko ya United States e ahlotše ka gore bo-radipolitiki, dihlopha tša bodumedi, Mašupatsela a Banenyana le ba bangwe ba na le tshwanelo ya molao-theo ya go ya ka ntlo le ntlo bakeng sa go bolelela dikgahlego tša bona ka ntle le gore pele ba hwetše tumelelo go bahlankedi ba lefelong.”—San Francisco Chronicle, June 18, 2002.

▪ “Kgoro-kgolo ya Tsheko: Ga go yo a ka Thibelago Dihlatse tša Jehofa le Mašupatsela a Banenyana go ya ka Ntlo le Ntlo

WASHINGTON—Kgoro-kgolo ya Tsheko lehono e phethile ka gore Molao-theo o šireletša ditshwanelo tša baromiwa, bo-radipolitiki le ba bangwe bao ba yago ka ntlo le ntlo ka ntle le gore pele ba hwetše tumelelo ya babuši ba lefelong leo. . . . 

“Ka kgetho ya batho ba 8 go o tee, kgoro e ile ya bolela gore tshwanelo ya Tokišo ya Pele ya tokologo ya polelo e akaretša tshwanelo ya go iša molaetša ka go lebanya mojakong wa motho yo mongwe.”—Star Tribune ya Minneapolis, June 18, 2002.

[Seswantšho go letlakala 9]

Moahlodi Stevens

[Mothopo]

Stevens: Collection, The Supreme Court Historical Society/Joseph Bailey