Leihlo LA Ntšhu

KA MONGWADI WA PHAFOGA! KUA SEPANIA

MA-SEPANIA a hlalosa motho yo a nago le mahlo a bogale e le yo a bonago go swana le ntšhu (vista de águila). Ma-Jeremane, a na le polelwana e swanago (Adlerauge). Ga se feela ge ka nywaga-kgolo e mentši go ile gwa hlabja diema ka bokgoni bjo bogolo bja go bona bja ntšhu. Puku ya Jobo e ngwadilwego nywaga e fetago dikete tše tharo e fetilego, e bolela ka ntšhu gore: “Mahlô a [yona, NW] a bôna tša kxolê.”—Jobo 39:27, 29.

Ge e le gabotse, ntšhu e bona go fihla bokgoleng bjo bokaaka’ng? The Guinness Book of Animal Records e hlalosa gore: “Ka tlase ga maemo a mabotse, ntšhu ya mmala wa gauta (Aquila chrysaetos) e kgona go bona go itšhišinya ganyenyane ga mmutla e le bokgoleng bja ka godimo ga dimaele tše 1 1⁄4 [dikhilomithara tše pedi].” Ba bangwe ba ile ba akanyetša gore ntšhu e ka kgona go bona go fihla bokgoleng bja go feta bjoo!

Ke eng seo se dirago gore ntšhu e kgone go bona kudu gakaakaa? Sa pele, ntšhu ya mmala wa gauta e na le mahlo a mabedi a magolo ao a tšerego sebaka se segolo hlogong ya yona. Book of British Birds e bolela gore tabeng ya ntšhu ya mmala wa gauta, mahlo a yona “ge e le gabotse, ke a magolo go feta tekanyo ka ntle le gore e be ao a imelago kudu gore a ka e šitiša go fofa.”

Go feta moo, leihlo la ntšhu le na le mo e ka bago palo e ipoeleditšego ga hlano ya disele tša go amogela seetša go feta tšeo re nago le tšona—e lego dikwi tša go bona mmala tše ka bago 1 000 000 sekwere-milimithareng se sengwe le se sengwe ge go bapetšwa le tša rena tše 200 000. Mo e nyakilego go ba sele e nngwe le e nngwe ya go amogela seetša e kgokagane le megalatšhika. Ka baka leo, mogala-tšhika wa leihlo la ntšhu, woo o rwalago melaetša go tloga leihlong go ya bjokong, o na le palo e ipoeleditšego gabedi ya ditlhale tšeo di hwetšwago mogala-tšhikeng wa motho. Ga go makatše ge dibopiwa tše e le tšeo di bonago mebala kudu! Sa mafelelo, dintšhu go swana le dinonyana tše dingwe, di na le mahlo ao a nago le lentshe e matla kudu yeo e dirago gore di kgone go gaša mahlo a tšona go tloga dilong tšeo di lego bokgoleng bja disenthimithara tše sego kae go ya go tšeo di lego kgole kudu. Mahlo a tšona a phala a rena kgole le tabeng ye.

Ntšhu e bona kudu mosegareng wa sekgalela, eupša bošego maribiši a thopa sefoka. Dinonyana tše tša bošego di na le mahlo ao a nago le megala-tšhika e mentši yeo e amogelago seetša le dilentshe tše dikgolo. Ka baka leo, di kgona go bona go re phala ka makga a 100. Lega go le bjalo, mabakeng ao a bago gona ka sewelo a ge go apareditše lefsifsi le leso-leso, maribiši a swanelwa ke go ithekga ka mo go feletšego ka go kwa ga ona kudu bakeng sa go hwetša moo sebolawa se lego gona.

Ke mang yo a neilego dinonyana tše bokgoni bjo bo bjalo? Modimo o ile a botšiša Jobo gore: “Xe lenong lè akalala, a le romilwe ke wene?” Go molaleng gore ga go motho yo a ka ipolelago gore ke yena a dirilego dilo tše tše di makatšago tša tlholo. Jobo ka boyena o ile a amogela ka boikokobetšo gore: “Ke tseba xobane [wena Jehofa] O Mo-kxôna tšohle.” (Jobo 39:27; 42:1, 2) Leihlo la ntšhu e fo ba bohlatse bjo bongwe bjo bo bontšhago bohlale bja Mmopi wa rena.

[Seswantšho go letlakala 21]

Ntšhu ya mmala wa gauta

[Seswantšho go letlakala 21]

Leribiši la mmala wa lehlwa