Mogato Wa Pele Ngangišano Ya Molomo Ka Pele Ga Kgoro-kgolo Ya Tsheko

LETŠATŠI-KGWEDI LEO LE BEGO LE BEILWE bakeng sa ngangišano ya molomo ka pele ga Moahlodi-mogolo William Rehnquist le baahlodi-gotee le yena ba seswai ba Kgoro-kgolo ya Tsheko e be e le February 26, 2002. Dillo tša Dihlatse tša Jehofa di be di emetšwe ke sehlopha sa bo-ramolao ba bane.

Ramolao yo a bego a eteletše pele wa Dihlatse o ile a thoma ngangišano ya gagwe ka matseno ao a gogago tlhokomelo ka gore: “Ke mesong ya Mokibelo ka 11:00 Motseng wa Stratton. [Ke moka o ile a kokota gararo godimo ga sethala sa seboledi.] ‘Thobela. Ka baka la ditiragalo tša morago bjale, ke dirile boiteko bjo bo kgethegilego bja go go etela go tlo boledišana le wena ka seo Moporofeta Jesaya a se boletšego e le selo sa bohlokwa. Tšeo ke ditaba tše dibotse tšeo Kriste Jesu a ilego a di bolela, e lego ditaba tše dibotse tša Mmušo wa Modimo.’”

O ile a tšwela pele ka gore: “Go ya ka ntlo le ntlo Motseng wa Stratton bakeng sa go iša molaetša woo ke tiro ya bosenyi ka ntle le ge e ba motho a ile a hwetša tumelelo ya go dira bjalo go bahlankedi ba motse.”

‘Na ga le Kgopele Tšhelete?’

Moahlodi Stephen G. Breyer o ile a rotoša dipotšišo tše di swanetšego bakeng sa Dihlatse. O ile a botšiša gore: “Na ke therešo gore batho ba geno ga ba kgopele tšhelete, le ge e le sente, le [gore] ga ba rekiše Dibeibele, e bile ga ba rekiše selo, gomme ba bolela feela gore, ‘Ke nyaka go boledišana le wena ka bodumedi’?”

Ramolao wa Dihlatse o ile a araba ka gore: “Mohlomphegi, pego e tloga e le molaleng, Dihlatse tša Jehofa ga se tša ka tša kgopela tšhelete Motseng wa Stratton. Mafelong a mangwe pego ke yeo e lego molaleng ka mo go swanago ya gore ka dinako tše dingwe di tla bolela ka moneelo wa boithatelo. . . . Ga re nyake ditšhelete tša boithapeletšo. Re upša re nyaka feela go boledišana le batho ka Beibele.”

Na Tumelelo ya Mmušo e a Nyakega?

Moahlodi Antonin Scalia ka temogo o ile a botšiša gore: “Na pono ya gago ga se gore ga o gapeletšege go ya go ramotse ke moka wa kgopela tumelelo ya go bolela le moagišani mabapi le selo seo se kgahlišago?” Ramolao wa Dihlatse o ile a araba ka gore: “Ga re dumele gore Kgoro ye ya Tsheko e swanetše go amogela molao wa Mmušo wo o nyakago gore modudi yo mongwe a hwetše tumelelo ya go boledišana le modudi yo mongwe gape legaeng la modudi yoo.”

Go Fetoga ga Ngangišano, go Fetoga ga Boemo

Bjale e be e le nako ya gore Motse o tšweletše taba ya wona. Ramolao yo a etelelago pele o ile a hlalosa molao wa Stratton, a re: “Stratton e diriša matla a yona a mmušo ge e tsoma go šireletša go se tshwenywe ga badudi ba yona le ge e nyaka go thibela bosenyi. Molao wo o thibelago go bolela phatlalatša goba go kgopela mafelong a batho ge e le gabotse o nyaka feela gore motho a ngwadiše pele le gore a sepele le lengwalo la tumelelo  nakong ya modiro wa go ya ka ntlo le ntlo.”

Moahlodi Scalia o ile a tsena mokong wa taba gatee-tee ge a be a botšiša gore: “Na o tseba ka molato wa rena o mongwe ka ntle le wo [wa Kgoro-kgolo ya Tsheko] woo o ilego wa ba wa akaretša le molao o mogolo gakaakaa, woo o akaretšago boithapeletšo, go se kgopele tšhelete, go se rekiše dithoto, eupša a re re ka mohlala, ‘Ke nyaka go bolela ka Jesu Kriste,’ goba ‘Ke nyaka go bolela mabapi le go šireletša tikologo?’ Na re kile ra ba le molato wa go swana le woo?”

Moahlodi Scalia o ile a tšwela pele ka gore: “Ga ke gopole go kile gwa tlišwa melato e swanago le e bjalo lebakeng la nywaga-kgolo e mebedi e fetilego.” Moahlodi-mogolo Rehnquist o ile a arabela tabeng yeo ka bohlale ka gore: “Ga se wa phela nako e telele gakaalo.” Seo se ile sa tsoša sesego ka phapošing ya tsheko. Moahlodi Scalia o ile a phegelela ngangišano ya gagwe ka gore: “Bogolo bja taba ye ke thoma go bo bona.”

Na Seo ga se Kgopolo e Botse?

Moahlodi Anthony M. Kennedy o ile a botšiša potšišo e lebanyago e rego: “Na o nagana gore ke kgopolo e botse gore ke swanetše go kgopela tumelelo Mmušong pele nka theoga le setarata, lefelong leo go lona ke sa tsebego batho ka moka, [ke moka] ka re, ke nyaka go boledišana le wena ka gobane ke tshwenyegile mabapi le taba ya go kgoboketšwa ga ditlakala goba ka gobane ke tshwenyegile mabapi le Setho sa Lekgotla la rena, goba selo le ge e le sefe se se swanago le seo. Na ke swanetše go kgopela Mmušo pele nka dira seo?” O ile a oketša ka gore, “Kgopolo yeo ke e tlabago.”

Ka morago Moahlodi Sandra Day O’Connor o ile a tsena ngangišanong, gomme a botšiša gore: “Gabotse-botse, go thwe’ng ka bakgopedi? Na le bona ba swanetše go hwetša lengwalo la tumelelo?” Moahlodi O’Connor le Moahlodi Scalia bobedi bja bona ba ile ba phegelela tsela ye ya go fa mabaka. Moahlodi O’Connor o ile a tšweletša ngangišano e nngwe gape: “Go thwe’ng ka go kgopela swikiri ka komiki go moagišani wa gago? Na ke swanetše go hwetša lengwalo la tumelelo bakeng sa gore ke yo kgopela swikiri ka komiki go moagišani wa-ka?”

Na Dihlatse ke Baboledi ba Phatlalatša?

Moahlodi David H. Souter o ile a botšiša gore: “Ke ka baka la’ng molao wo o akaretša Dihlatse tša Jehofa? Na ke baboledi ba phatlalatša, bakgopedi, barekiši, bagwebi bao ba ralalago le mafelo bao ba rekišago dithoto goba ditirelo? Ga se ba bangwe ba batho bao, na ga go bjalo?” Moeletši wa Motse o ile a tsopola molao ka mo go nabilego gomme a oketša ka gore kgoro ya tsheko ya selete e hlalositše Dihlatse tša Jehofa e le baboledi ba phatlalatša. Tabeng ye, Moahlodi Souter o ile a araba ka gore: “Ka gona le kgona go hlalosa baboledi ba phatlalatša ka tsela e nabilego ge e ba seo se akaretša Dihlatse tša Jehofa.”

Ke moka Moahlodi Breyer o ile a tsopola tlhaloso ya pukuntšu ya polelwana mmoledi wa phatlalatša bakeng sa go bontšha gore e be e sa šome go Dihlatse. O ile a oketša ka gore: “Ga se ka ka ka hwetša selo ngangišanong ya gago se se hlalosago gore ke ka morero ofe batho ba [Dihlatse tša Jehofa] bao ba se nago kgahlego tšheleteng, ba se nago kgahlego ya go rekiša le bao e bile ba se nago kgahlego ya go kgetha, ba swanetšego go ya diofising tša motse gomme ba ngwadiše maina a bona. Morero wa motse ke ofe?”

“Tokelo” ya go Boledišana

Ka morago moeletši wa Motse o ile a bolela gore “morero wa motse ke go thibela go selekega ga beng ba magae.” O ile a hlalosa ka mo go oketšegilego ka go kwagala gore e be e le go šireletša badudi ditirong tša boradia le go disenyi. Moahlodi Scalia o ile a tsopola molao bakeng sa go bontšha gore ramotse a ka tsoma tsebišo e oketšegilego mabapi le motho yo a ingwadišitšego gotee le morero wa gagwe bakeng sa “go hlalosa ka mo go nepagetšego mohuta wa tokelo yeo e kganyogwago.” O ile a oketša ka go lebanya gore: “Tokelo ya go yo kgodiša badudi gotee le wena ka selo le ge e le sefe—ke tloga ke sa kwešiše selo ka taba yeo.”

Moahlodi Scalia gape o ile a phegelela ka gore: “Ka gona na go tla nyakega gore motho yo mongwe le yo  mongwe yo a kokotago mojakong a ingwadiše diofising tša motse pele ga ge [a] kokota mojakong? Na kotsi yeo e nyenyane ya gore go ka ba le bosenyi ke e lekanego go ka dira gore motho yo mongwe le yo mongwe yo a nyakago go kokota mojakong a ingwadiše diofising tša motse? Ruri ga go bjalo.”

Na Baagi ba Šireleditšwe?

Ka ge metsotso ya gagwe e 20 e be e fedile, moeletši wa Motse o ile a fetišetša ngangišano go mothuši wa ramolao-pharephare wa naga ya Ohio. O ile a bolela gore molao wa go thibela go bolela phatlalatša o be o šireletša badudi gore ba se ke ba etelwa ke batho bao ba sa ba tsebego, “ge e le gabotse motho yo a sa laletšwago, [yo] a tlilego mo ga-ka . . . gomme ke nagana gore badudi ba na le tshwanelo ya go bolela gore, ‘Re tshwenyegile ka modiro wa mohuta woo.’”

Ka morago Moahlodi Scalia o ile a bolela gore: “Batho ba motse ba bolela gore le batho bao ba amogelago Dihlatse tša Jehofa, gaešita le ge ba dutše fao ba lewa ke bodutu, ba tla rata go boledišana le motho yo mongwe ka selo le ge e le sefe, gomme batho ba [Dihlatse tša Jehofa] ba sa dutše ba swanetše go ingwadiša go ramotse bakeng sa go hwetša tokelo ya go ba kokotela mejakong ya bona.”

“Thibelo Yeo e Nago le Teka-tekano”

Nakong ya potšološišo Moahlodi Scalia o ile a bolela ntlha e matla ge a be a re: “Ka moka ga rena re ka dumelelana le taba ya gore ditšhaba tšeo di šireletšegilego kudu lefaseng ke dipuša-noši tša taolo e feletšego tša bonkgwete. Ga go na bosenyi bjo bontši. Ke therešo e tlwaelegilego, gomme e nngwe ya dilo tšeo di ka dirago gore tokologo e lahlege ka tekanyo e itšego ke go ba kotsing e kgolo ya ditiro tšeo di sego molaong, gomme taba-kgolo ke ge e ba seo molao wo o lebišitšwego go sona bakeng sa go thibela ka mo go lekanego ditiro tšeo di sego molaong e tla ba seo se swanetšego ke go lahlegelwa ke tokelo ya go kokota mojakong wa motho yo mongwe.” Ka morago mothuši wa ramolao-pharephare o ile a arabela ka gore “ke thibelo yeo e nago le teka-tekano kudu.” Moahlodi Scalia o ile a araba ka gore e be e le yeo e leka-lekanego kudu moo e lego gore “ga re hwetše molato le o tee wo o hlalosago ka mmušo o mongwe wa mmasepala woo o kilego wa hloma molao wa mohuta woo. Ga ke nagane gore go dira bjalo go na le teka-tekano.”

Mafelelong, ka morago ga go bewa ka tlase ga kgatelelo ke yo mongwe wa baahlodi, mothuši wa ramolao-pharephare o ile a swanelwa ke go dumela ka gore: “Ke be nka se rate go bolela gore o thibele ka go lebanya taba ya go ya ka ntlo le ntlo goba go kokota mejakong.” O ile a phetha ngangišano ya gagwe ka tlhaloso yeo.

Nakong ya ngangišano, ramolao wa Dihlatse o ile a bolela gore molao e be e se tsela ya go kgonthišetša dipolelo tša motho. “Nka ya diofising tša motse gomme ka bolela gore, ‘Ke nna [semang-mang],’ gomme ka hwetša lengwalo la tumelelo, ke moka ka ya ka ntlo le ntlo.” O ile a bontšha gape gore ramotse o na le matla a go gana go fa motho yo a bolelago gore ga se setho sa mokgatlo lengwalo la tumelelo. O ile a bolela gore: “Re dumela gore go molaleng gore se ke go dirišwa ga bohlale,” gomme a oketša ka gore: “Ke šišinya ka tlhompho gore modiro wa rena [Dihlatse tša Jehofa] e tloga e le moko wa Tokišo ya Pele.”

Gatee-tee ka morago ga se, Moahlodi-mogolo Rehnquist o ile a phetha ngangišano ya molomo ka go bolela gore: “Molato o išitšwe [Kgorong-kgolo ya Tsheko].” Tshepedišo ka moka e ile ya tšea lebaka la ka godingwana ga iri. Gore iri yeo e ile ya ba ya bohlokwa gakaakang go be go tla bontšhwa kahlolong ye e ngwadilwego yeo e ilego ya tsebišwa ka June.

[Diswantšho go letlakala 6]

Moahlodi-mogolo Rehnquist

Moahlodi Breyer

Moahlodi Scalia

[Methopo]

Rehnquist: Collection, The Supreme Court Historical Society/Dane Penland; Breyer: Collection, The Supreme Court Historical Society/Richard Strauss; Scalia: Collection, The Supreme Court Historical Society/Joseph Lavenburg

[Diswantšho go letlakala 7]

Moahlodi Souter

Moahlodi Kennedy

Moahlodi O’Connor

[Methopo]

Kennedy: Collection, The Supreme Court Historical Society/Robin Reid; O’Connor: Collection, The Supreme Court Historical Society/Richard Strauss; Souter: Collection, The Supreme Court Historical Society/Joseph Bailey

[Seswantšho go letlakala 8]

Bokagare bja phapoši ya tsheko

[Mothopo]

Photograph by Franz Jantzen, Collection of the Supreme Court of the United States