Pono ya Beibele

Na bakriste ba swanetše go diila?

JESU o kile a botša mmuši yo a humilego yo e sa lego mofsa gore o be a swanetše go yo rekiša dithoto tša gagwe ka moka gomme a nee badiidi. Pego e bolela gore monna yoo o ile a nyamišwa ke mantšu a Jesu gomme a tloga moo a nolegile moko, “ka xobane ó be a na le mahumô a mantši.” Ke moka Jesu o ile a botša barutiwa ba gagwe gore: “Ke mo go thata bjang go bao ba nago le mahumo go tsena mmušong wa Modimo.” Jesu o okeditše ka gore: “Go ka ba bolelo ge kamela e ka tsena ka lešobana la tšhwana, go fetiša ge mohumi a ka tsena mmušong wa Modimo.”—Mareka 10:21-23, PK; Mateo 19:24, PK.

Ke’ng seo Jesu a bego a se bolela? Na lehumo le borapedi bja therešo ke tšeo di sa sepelelanego? Na Bakriste ba swanetše go ikwa ba le molato ge ba e-na le tšhelete? Na Modimo o nyaka gore ba phele bophelo bja go itima dilo tše di bonagalago ka mo go feteletšego?

Modimo o Amogela “Mehuta ka Moka ya Batho”

Mehleng ya bogologolo Modimo ga se a ka a nyaka gore ba-Isiraele ba phele bophelo bja bodiidi. Ela hloko: Ka morago ga go tšea naga yeo ba bego ba e abetšwe, batho ba ile ba tsenela mediro ya tša temo le tša kgwebo gore ba iphepe le go fepa baratiwa ba bona. Dilo tšeo di swanago le boemo bja tša boiphedišo, boemo bja leratadima, tša maphelo goba tsebo ya tša kgwebo di be di tla kgoma katlego ya maiteko a bona. Molao wa Moše o be o laela ba-Isiraele gore e be ba kwelago bohloko ge e ba yo mongwe wa bona a be a tlaišega ka tša boiphedišo gomme a thoma go diila. (Lefitiko 25:35-40) Ka lehlakoreng le lengwe, ba bangwe ba ile ba huma. Boase, monna wa tumelo le wa go ba le potego yo a ilego  a ba rakgolokhukhu wa Jesu Kriste, o hlaloswa e le ‘monna yo a humilego kudu.’—Ruthe 2:1, bapiša le NW.

Boemo bo ile bja tšwela pele e le bjo bo swanago le mehleng ya Jesu. Ge a be a bolela le monna wa mohumi yo go boletšwego ka yena mathomong, e be e se boikemišetšo bja Jesu go kgothaletša go itima dilo ka mo go feteletšego. Go e na le moo, o be a ruta thuto e bohlokwa. Go ya ka pono ya motho, go ka bonagala go sa kgonege go batho bao ba humilego gore ba bontšhe boikokobetšo le go amogela tsela ya Modimo ya phološo. Lega go le bjalo, Jesu o itše: “Mo xo batho seo xa se kxônexe; xo Modimo ké mo xo kxônêxaxo tšohle.”—Mateo 19:26.

Phuthego ya Bokriste ya lekgolong la pele la nywaga e ile ya amogela “mehuta ka moka ya batho.” (1 Timotheo 2:4, NW) Ba ba be ba akaretša ba bangwe bao ba bego ba humile, ba bangwe bao ba bego ba phela bophelo bja go iketla le bao ba bego ba diila. Batho ba bangwe ba ka ba ba ile ba ikgobokeletša mahumo pele ga ge ba ka ba Bakriste. Maemong a mangwe maemo a mabotse le diphetho tše bohlale tša tša kgwebo di ka ba di ile tša tliša mahumo ka morago.

Ka mo go swanago, borwarre bja Bokriste lehono bo akaretša batho ba maemo a fapa-fapanego a tša boiphedišo. Ka moka ba katanela go latela tlhahlo ya Beibele ditabeng tša tša ditšhelete, ka ge go rata dilo tše di bonagalago go ka kgoma motho le ge e le ofe. Thuto yeo Jesu a e rutilego mabapi le mmuši yo a humilego yo e sa lego yo mofsa e phafoša Mokriste yo mongwe le yo mongwe malebana le taolo e matla yeo tšhelete le mahumo di ka bago le yona mothong.—Mareka 4:19.

Temošo go Bahumi

Gaešita le ge lehumo ka bolona le sa solwe ka Beibeleng, lerato la go rata tšhelete le a solwa. Mongwadi wa Beibele e lego Paulo o itše: “Xobane mexabaru [“lerato la go rata tšhelete,” NW] ké wôna modu wa bobe ka moka.” O ile a bontšha gore ka go lahla dikgahlego tša moya ka baka la kganyogo ya go rata go huma, “ba bangwe ka go kekela go yona ba arogile tumelo, gomme ba ipholeleditše ka mahloko a mantši.”—1 Timotheo 6:10, PK.

Ka mo go kgahlišago, Paulo o ile a nea ditaelo tše di kgethegilego go bahumi. O itše: “Bahumi ba mehleng ya byale ba laêlê O re ba se ikxodišê, ba se holofêlê lehumô la xo tla le xo tloxa; ba holofêlê Modimo e a phelaxo, e a re faxo tšohle xore di re natêfêlê.” (1 Timotheo 6:17) Go molaleng gore go na le kotsi ya gore batho bao ba humilego ba ka ikgogomoša le go ikwa ba phagametše ba bangwe. Gape, ba ka lekega gore ba nagane gore mahumo a ka nea tšhireletšego ya kgonthe—yeo e lego Modimo feela yo a ka e neago ka mo go feletšego.

Bakriste bao ba humilego ba ka itiša malebana le dikotsi tše ka go ba ‘ba humilego ka mediro e mebotse.’ Mediro ye e akaretša go ba ba ‘ratago go nea le go abela ba bangwe,’ ba nea thušo ka seatla se se bulegilego go bao ba e nyakago. (1 Timotheo 6:18 , PK) Bakriste—ba ba humilego le ba ba diilago—le bona ba ka diriša a mangwe a matlotlo a bona go phatlalatša ditaba tše dibotse tša Mmušo wa Modimo, e lego selo seo Bakriste ba therešo lehono ba tshwenyegilego kudu ka sona. Moya wo wa go nea ka pelo e ratago o utolla boemo bjo bo swanetšego bja kgopolo ka mahumo a dilo tše di bonagalago gomme o dira gore motho e be yo a rategago go Jehofa Modimo le go Jesu Kriste, bao ba ratago banei bao ba thabilego.—Mateo 24:14; Luka 16:9; 2 Ba-Korinthe 9:7.

Dilo tša Bohlokwa Kudu

Ka mo go kwagalago, ga se gore Bakriste ba swanetše go diila. Le gona ga se ba swanela go ba “ba ba rataxo xo huma.” (1 Timotheo 6:9) Ba fo ba ba šoma ka thata bakeng sa go hwetša mokgwa o leka-lekanego wa go iphediša. Go ithekgile ka mabaka a fapa-fapanego le boemo bja tša boiphedišo bjo ba phelago ka tlase ga bjona, maiteko a bona a tla ba le katlego ya maemo a sa swanego.—Mmoledi 11:6.

Go sa šetšwe gore maemo a bona a tša ditšhelete ke afe, Bakriste ba swanetše go leka go ‘kgonthišega ka dilo tša bohlokwa kudu.’ (Ba-Filipi 1:10, NW) Ka go etiša ditekanyetšo tša moya pele, ba “thêa mothêô wa mehla e tl’o xo tla xore ba fihlêlê byo e lexo bophelô bya ruri.”—1 Timotheo 6:19.