Bafsa ba a Botšiša . . .

Nka Lebeletšana Bjang le Kgateletšo ya Dithaka?

“Kgateletšo ya dithaka e gohle.”—Jesse wa nywaga e 16.

“Kgateletšo ya dithaka go tšwa go bao ke bego ke tsena le bona sekolo e be e le e nngwe ya dilo tše thata tšeo ke bego ke swanetše go lebeletšana le tšona ge ke be ke sa gola.”—Johnathan wa nywaga e 21.

KGATELETŠO YA DITHAKA ka ntle le pelaelo ke bothata bjo bo swanetšego go elwa hloko. Lega go le bjalo, kgonthišega gore o ka kgona go e lwantšha. Le gona, o ka kgona go e laola gaešita le go e dira gore e be le mohola go wena. Eupša bjang?

Sehlogong se se fetilego lelokelelong le, re boletše ka mogato wa pele wa bohlokwa: Lemoga matla a kgateletšo ya dithaka le go ka hlaselwa ga gago gabonolo ke tutuetšo ya yona. * Ke megato efe e mengwe e holago yeo o kago go e gata? Tlhahlo e holago kudu yeo o e nyakago e ka Lentšung la Modimo. Diema 24:5 (NW) e re: “Monna yo a nago le tsebo o tiiša matla.” Ke tsebo efe yeo e ka tiišago matla a gago a go lwantšha kgateletšo ya dithaka? Pele re araba seo, anke re thomeng ka go ahla-ahla bothata bjo bo ka dirago gore kgateletšo ya dithaka e be e matla go wena.

Go Hloka Kholofelo ke Kotsi

Ka dinako tše dingwe, bafsa bao e lego Dihlatse tša Jehofa ba hwetša kgateletšo ya dithaka e le tlhohlo e kgethegilego ka gobane tsela ya bona ya bophelo e akaretša go botša ba bangwe ka tumelo ya bona. (Mateo 28:19, 20) Na ka dinako tše dingwe o go hwetša go le thata go bolela le bafsa ba bangwe bao o kopanago le bona ka tumelo ya gago? Ga o noši. Melanie wa nywaga e 18 o re: “Ge go be go tliwa tabeng ya go botša bafsa gore ke Hlatse, go be go le thata go feta kamoo ke bego ke nagana ka gona.” O oketša ka gore: “Gatee-tee ka morago ga ge ke rapile sebete ka mo go lekanego gore ke ipolele gore ke Hlatse, ke be ke tlelwa ke letšhogo gape.” Go bonala eka kgateletšo e fošagetšego ya dithaka e be e mo šitiša.

Beibele e re kgonthišetša gore gaešita le banna le basadi ba tumelo e lemogegago ba ile ba dika-dika go bolela le batho ka Modimo. Ka mohlala, Jeremia yo monyenyane o be a tseba gore o be a tla lebeletšana le go kwerwa le tlaišo ge a be a ka theetša taelo ya Modimo  ya go bolela ka sebete. Go oketša moo, Jeremia o be a sa kgodišege. Ka baka la’ng? O itše go Modimo: “Hleng xa ke tsebe xo bolêla ka xe kè sa le ngwana!” Na Modimo o ile a dumela gore go ba ga Jeremia mofsa go be go mo dira gore a se swanelegele go bolela? Aowa. Jehofa o ile a kgonthišetša moporofeta ka gore: “O se re: Ke sa le ngwana.” Jehofa o ile a tšwela pele a nea lesogana le le dika-dikago kabelo ya bohlokwa.—Jeremia 1:6, 7.

Ge re sa kgodišege gomme re ikwa re sa ikholofele, gona go ka ba thata kudu go emeletšana le kgateletšo ya dithaka. Ditlhahlobišišo tša nyakišišo di ile tša bontšha seo. Ka mohlala, morago kua ka 1937 rathutamahlale yo a bitšwago Muzafer Sherif o ile a dira teko e nngwe e tumilego. O ile a bea batho ka phapošing ya lefsifsi, a ba bontšha hlasenyana e tee ya seetša gomme ka morago a ba botšiša gore hlasenyana yeo e šuthile ka bokgole bjo bokaaka’ng.

Ge e le gabotse hlase e be e se ya šutha le gatee; se e be e fo ba go aketša mahlo. Ge ba be ba lekwa ka o tee ka o tee, batho ba ile ba nea ditekanyetšo tša bona tšeo di fapa-fapanego mabapi le se seo se bego se bonala eka ke go šutha ga seetša. Lega go le bjalo, ge ba be ba le ka dihlopha ba ile ba kgopelwa gore ba bolele ka go hlaboša ditekanyetšo tša bona tše ba di naganelago. Go diregile’ng? Ka go se holofele temogo ya bona ka noši, ba ile ba tutueletšana. Ka diteko tšeo di boeleditšwego, dikarabo tša bona di ile tša nyaka di swana go ba go fihla ge go hlongwa “pono ya sehlopha.” Gaešita le ge ba be ba lekwa ba le noši ka morago, motho ka o tee ka o tee go batho bao o be a sa tutueditšwe ke pono-kakaretšo ya sehlopha.

Teko yeo e bontšha ntlha ya bohlokwa. Go se kgonthišege goba go se kgodišege go dira gore batho e be bao ba tutueletšwago gabonolo ke kgateletšo ya dithaka. Seo ke se se dirago gore motho a naganišiše, na ga go bjalo? Go ba gona, kgateletšo ya dithaka e ka kgoma batho ge go tliwa ditabeng tša bohlokwa kudu tšeo di akaretšago pono ya bona ka dikopano tša botona le botshadi tša pele ga lenyalo, go dirišwa gampe ga dihlare-tagi, gaešita le dipakane tšeo ba tlago go di phegelela bophelong. Ge e ba re itumelela go amogela “pono ya sehlopha” ge go tliwa ditabeng tše bjalo, re ka kgoma bokamoso bja rena ka noši ka tsela e matla. (Ekisodo 23:2) Ke eng seo se kago go dirwa?

Go ba gona, o nagana gore o be o tla arabela bjang tekong ge nkabe o be o tseba e le ka kgonthe gore hlase ya seetša e be e sa šuthe? Mohlomongwe o be o ka se tutuetšwe ke sehlopha. Ee, re nyaka kgodišego. Eupša ke kgodišego ya mohuta ofe yeo e akaretšwago, gomme re ka e fihlelela bjang?

Holofela Jehofa

O ka no kwa gantši go bolelwa ka go ikholofela. Eupša ge go tliwa tabeng ya go go fihlelela—le gore go nyakega mo gokaaka’ng—go ba le dipono tše lwantšhanago. Beibele e na le keletšo e leka-lekanego e rego: “Ke botša lena bohle ke re: Xo se kê xwa ba le e a ithsemaxo a fetiša moo xo mo swanetšexo. Ithsemeng ka xo ya ka kêlêlô.” (Ba-Roma 12:3) Phetolelo e nngwe ya temana ye e balega ka gore: “Ke tla rata go botša yo mongwe le yo mongwe wa lena gore a se ke a itšeela godimo go feta bohlokwa bja gagwe bja kgonthe, eupša a itekanye ka mo go swanetšego.”—Charles B. Williams.

 ‘Go lekanya ka mo go swanetšego bohlokwa bja gago bja kgonthe’ go ka dira gore o se ke wa ikgogomoša, wa ba le makoko goba wa ikgantšha. Ka lehlakoreng le lengwe, pono e bjalo e leka-lekanego e tla akaretša tekanyo e itšego ya go holofela bokgoning bja gago bja go nagana, go nea mabaka le go dira diphetho tše di nago le tlhaologanyo. Mmopi wa gago o go neile “matla a go nagana” gomme yeo ke mpho e bohlokwa kudu. (Ba-Roma 12:1, NW) Go dula o nagana ka seo go ka go thuša go lwantšha tlhohleletšo ya go dumelela batho ba lego kgaufsi ba go direla diphetho. Lega go le bjalo, go na le mohuta wa kholofelo wo o ka bago o atlegilego kudu gore o go šireletše.

Kgoši Dafida o ile a budulelwa gore a ngwale gore: “Xobane ke Xo hloloxetšwe, Morêna Mong’a-ka; ke Xo botile xo tloxa byaneng.” (Psalme 71:5) Ee, Dafida o be a holofetše ka mo go feletšego Tatagwe wa legodimong, le gona o dirile bjalo ga e sa le go tloga ge e be e sa le yo monyenyane. E be e “sa le lesoxanyana”—mohlomongwe mofsa wa mahlalagading—ge mogale wa mo-Filisita Goliata a be a hlohla mohlabani le ge e le ofe wa mo-Isiraele go tlo lwa le yena ntweng ya go lwa ba le babedi. Bahlabani ba be ba tšhogile. (1 Samuele 17:11, 33) Mohlomongwe go be go tsogile kgateletšo ya dithaka e fošagetšego magareng ga bona. Ga go pelaelo gore ba ile ba bolela ka go itlhoboga ka bogolo le ka bonatla bja Goliata le go bolela gore monna le ge e le ofe yo a bego a tla amogela tlhohlo e bjalo o be a tla be a gafa. Dafida o ile a itlhatsela a se a kgongwa ke kgateletšo le ge e le efe ya mohuta woo. Ka baka la’ng?

Ela hloko mantšu a Dafida go Goliata: “Wêna Mo-Filisita, O tla fá ka thšoša le ka lerumô le ka kotsê. Xe e le nna ke tlile fá ka ’ina la Morêna wa Mašaba, Modimo wa dirá tša Isiraele tše O bexo O di roxa.” (1 Samuele 17:45) Dafida o be a sa itlhokomološe bogolo, bonatla goba dibetša tša Goliata. Eupša go be go na le selo se itšego seo a se tsebago, a se tseba ka mo go kgonthišegilego kudu go etša ge a be a tseba gore leratadima le be le le ka godimo ga gagwe. O be a tseba gore Goliata e be e se selo ge a be a bapetšwa le Jehofa Modimo. Ge e ba Jehofa a be a le ka lehlakoreng la Dafida, gona ke ka baka la’ng Dafida a be a ka boifa Goliata? Go holofela Modimo mo go bjalo go ile gwa dira gore Dafida a ikwe a šireletšegile. Go be go se na tekanyo le ge e le efe ya kgateletšo ya dithaka yeo e bego e ka mo fekeetša.

Na o holofela Jehofa ka mo go swanago? Ga se a fetoga ga e sa le go tloga mehleng ya Dafida. (Maleaki 3:6, PK; Jakobo 1:17) Ge o tšwela pele o ithuta ka yena, e tla ba mo o tlago go kgonthišega ka mo go oketšegilego ka sohle seo a se bolelago ka Lentšung la gagwe. (Johane 17:17) Moo ke mo o tlago go hwetša ditekanyetšo tše tsepamego le tše di botegago tša go go hlahla bophelong le go go thuša go fenya kgateletšo ya dithaka. Go oketša tabeng ya go holofela Jehofa, go na le se sengwe gape seo o kago go se dira.

Kgetha Baeletši ba Babotse

Lentšu la Modimo le gatelela bohlokwa bja go tsoma tlhahlo e botse. Diema 1:5 (PK) e re: “E a nago le tlhaologanyo a fiwe dikeletšo tše bohlale.” Batswadi ba gago bao ba tshwenyegago kudu ka dilo tše di botse tšeo o di ratago, e ka ba mothopo wa tlhahlo. Indira o tseba se gabotse kudu. O a laodiša: “Ke ka gobane batswadi ba-ka ba ile ba boledišana le nna ka mehla ka Mangwalo gomme ba dira gore Jehofa e be wa kgonthe bophelong bja-ka, moo ke sepelago tseleng ya therešo ga bjale.” Bafsa ba bantši ba ikwa ka tsela e swanago.

Ge e ba o le setho sa phuthego ya Bokriste, o na le mothopo o mobotse wa thekgo—balebeledi bao ba kgethilwego goba bagolo gotee le Bakriste ba bangwe bao ba godilego ka tsebo. Nadia yo monyenyane o gopola ka gore: “Ka kgonthe ke be ke lebelela bagolo ba ka phuthegong ya gešo ka go ba hlompha. Ke gopola polelo yeo e ilego ya newa ke molebeledi yo a okamelago yeo e bego e lokišeleditšwe bafsa ka mo go kgethegilego. Ka morago ga seboka, nna le mogwera wa-ka re be re thabile kudu ka gobane seo a se boletšego e be e le seo re bego re ikwa re lebeletšane le sona.”

Sebetša se sengwe se matla malebana le kgateletšo e fošagetšego ya dithaka ke ka kgateletšo e nepagetšego ya dithaka. Ge e ba o kgetha bagwera ba gago ka bohlale, ba ka go thuša go kgomarela dipakane tše dibotse le ditekanyetšo tše di nepagetšego. Re ka kgetha bagwera ba babotse bjang? Dula o nagana ka keletšo ye e rego: “E a sepelelanago le ba bohlale, o tlo hlalefa; eupša yo a lego mogwera wa ditlatla, o tlo tshereana.” (Diema 13:20, PK ) Nadia o ile a ba šedi gore a kgethe bagwera ba bohlale sekolong—e lego badumedi-gotee le yena bao ba bego ba kgomaretše ditekanyetšo tše swanago tša boitshwaro. O a elelwa: “Ge bašemane ba sekolo ba be ba e-tla go ‘bolela’ le rena, re be re thekgana.” Bagwera ba babotse ba ka re thuša go tšweletša dika tše dibotse kudu. Go nyakega maiteko go hwetša bagwera ba bjalo.

Ka gona, kgonthišega gore ge o aga kholofelo ya gago go Jehofa, o tsoma tlhahlo go tšwa go Bakriste bao ba godilego ka tsebo gomme o kgetha bagwera ba gago ka bohlale, o ka kgona go lebeletšana le tlhohlo ya kgateletšo ya dithaka. Ge e le gabotse, o ka ba karolo ya kgateletšo e nepagetšego ya dithaka go bagwera ba gago gomme wa ba thuša go tšwela pele ba le tseleng e yago bophelong gotee le wena.

[Mongwalo wa ka tlase]

[Ntlhakgolo go letlakala 16]

Tsoma bagwera ba babotse, bao ka go swana le wena ba ratago Modimo le ditekanyetšo tša gagwe

[Diswantšho go letlakala 16]

“Ditlwaelano tše mpe di senya mekgwa e mebotse.”—1 Ba-Korinthe 15:33, NW

“E a sepelelanago le ba bohlale, o tlo hlalefa.”—Diema 13:20, PK