E Tlile le Moya

Monna yo mongwe o be a sepela setarateng sa Mumbai, India ge moya o tšubutlago o be o lahlela pampišana maotong a gagwe. E be e le Kingdom News No. 36, e nago le sehlogo se se rego, “Ngwaga-kete o Mofsa—Ke Eng Seo Bokamoso bo go Swaretšego Sona?” Sehlogo se ile sa goga kgahlego ya gagwe. Ka ntle le go senya nako, o ile a e topa gomme a e bala ka moka. E ile ya tsoša kgahlego ya gagwe gomme ka go nyaka go tseba mo go oketšegilego, o ile a kgopela Beibele le dikgatišo tše dingwe.

Pampišana e gatišitšwego ke Dihlatse tša Jehofa, e na le dikgopolo tšeo di matlafatšago tumelo. E hlalosa gabotse gore mathata ao re lebeletšanego le ona, ao a akaretšago bolwetši, bodiidi le ntwa, a bakwa ke “megabaru, go se botane le boithati—e lego mekgwa yeo e ka se kego ya fedišwa gabonolo ke nyakišišo ya tša thutamahlale, thekinolotši goba dipolitiki.” Pampišana e bontšha gape gore bokamosong bjo bo lego kgaufsi, Modimo o tla fediša bokgopo ka moka lefaseng le.

Na o tla rata go ithuta mo go oketšegilego ka dikholofetšo tša Beibele mabapi le bokamoso? Dihlatse tša Jehofa di ruta Beibele magaeng a batho ba dimilione, di diriša dikgatišo tšeo di theilwego Beibeleng tše akaretšago poroutšha ya Ke Eng Seo Modimo a se Nyakago go Rena? Poroutšha ye e araba dipotšišo tše bjalo ka: Modimo ke Mang? Morero wa Modimo ka Lefase ke Ofe? Mmušo wa Modimo ke Eng? Beibele e ka kaonefatša bjang bophelo bja lapa la gago?

Ge e ba o tla rata gore Dihlatse tša Jehofa di go etele legaeng la gago bakeng sa go go thuša go kwešiša seo Modimo a tlogo se dira bokamosong bjo bo lego kgaufsi, di tla thabela go dira seo gomme di tla go nea tsebišo e oketšegilego mabapi le Mmušo wa Modimo. Hle tlatša setlankana seo se lego ka mo tlase bakeng sa go dira gore di kgone go go thuša.

□ Hle ntlišetšeng kopi ya poroutšha ya Ke Eng Seo Modimo a se Nyakago go Rena?

Bontšha gore ka leleme lefe.

□ Hle ikopanyeng le nna mabapi le thuto e sa lefelelwego ya legae ya Beibele.