Hwetša Tsebišo e Nepagetšego

Go hwetša tsebišo e nepagetšego ditabeng tše di fapa-fapanego ga go bonolo. Mebušo le dikhamphani di bolela ditherešo tše di sa felelago. Mekero e mentši ya ditaba gantši e holofetša go nea dipego tše di swanetšego, eupša ga e phethagatše dikholofetšo tša yona. Ga se ka mehla dingaka di hlalosago ka mo go feletšego ditla-morago tše sa kgahlišego tša dihlare tšeo di re neago tšona. Na go na le tsela ya go hwetša tsebišo e ka botwago?

Go tšwelela ga Internet go ile gwa thabelwa ke ba bantši e le tsela ya go hwetša methopo e ka botwago ya tsebišo lefaseng ka moka. Go ba gona, seo se a kgonega ge feela o tseba moo o ka hwetšago tsebišo gona ka go fo kgotla mouse. Morulaganyi ka go The New York Times o itše: “Ge go lebelelwa lehlakore la yona le le kgahlišago, Internet e ka kgona go ruta batho ba bantši ka lebelo go feta sedirišwa le ge e le sefe sa mokero wa ditaba. Ge go lebelelwa lehlakore la yona le le sa kgahlišego, e ka fokodiša bohlale bja batho ka lebelo go feta sedirišwa le ge e le sefe sa mokero wa ditaba.”

Morulaganyi o tšwetše pele ka gore: “Ka ge Internet e kgahla batho ka baka la ‘thekinolotši’ ya yona, batho ba ba sa rutegago ba holofela tsebišo yeo e tšwago go yona le go feta. Ga ba lemoge gore ge go lebelelwa lehlakore la yona le le sa kgahlišego, Internet e fo swana le mokero o bulegilego wa kelelatšhila: mokero wa elektroniki bakeng sa tsebišo yeo e sa kgonthišetšwago le yeo e sa hlahlobjago.” Ka manyami, go etša ge mongwadi a bontšhitše, ga go na lenaneo la computer leo le ka phumolago tsebišo e se nago mohola.

Motho le ge e le ofe a ka tsenya selo le ge e le sefe ka go Internet, makasineng goba pukung. Ka gona, re swanetše go diriša temogo gomme re ithute e le gore re se ke ra fo dumela selo le ge e le sefe seo re se balago. Rena bao re nyakago tsebišo e nepagetšego re swanetše go kgonthišetša gore mothopo wo re o dirišago ke wo o ka botwago. Se se ka tšea nako. Eupša ka morago ga ge re dirile bjalo gomme re hweditše tsebišo e nepagetšego, re ka kgona go nagana gabotse, go ba le kahlolo e nepagetšego le go kgodišega ge re dira diphetho tša bohlokwa.