Pono ya Beibele

Na go na le Sebe Seo se sa Lebalelwego?

NA GO na le kotlo e šoro go feta lehu? Ee, ke go hwa ga motho a se na kholofelo ya tsogo ka gobane a dirile sebe seo se sa lebalelwego. Jesu o boletše gore go na le mohuta wa sebe seo ‘se ka se kego sa lebalelwa.’—Mateo 12:31.

Lega go le bjalo, Beibele e hlalosa Modimo e le yo a lebalelago. Gaešita le ge batho ba ka sekamela mokgweng wa go boloka sekgopi le go gana go lebalela, Modimo “ké wa tebalêlô e nntši.” (Jesaya 55:7-9) Ge e le gabotse, ka tahlegelo e kgolo go yena, Modimo o ile a roma Morwa wa gagwe yo a rategago lefaseng gore e be sehlabelo sa poelano le sa bohlokwa kudu moo e lego gore se ka kgona go phumola dibe tša rena.—Johane 3:16, 17; Ditiro 3:19; 1 Johane 2:1, 2.

Ka nako ya Gagwe e beilwego, Modimo o tla tsoša ba bantši bao ba ilego ba ba le molato wa dibe tše dikgolo eupša e le bao ba ka se sa hlwago ba ikarabela bakeng sa ditiro tša bona tša nakong e fetilego. (Ditiro 24:15; Ba-Roma 6:23) Ge e le gabotse, Jesu o boletše gore ka ntle le dibe tšeo di sa lebalelwego, “batho ba tlo lebalêlwa sebe mang le mang, le yôna thoxakô.” (Mateo 12:31) Ka gona, o ka ipotšiša gore, ‘Ke eng seo e ka bago se sešoro gakaakaa moo e lego gore Modimo ga a se lebalele?’

Ge Tebalelo e se sa Kgonega

Temošo ya Jesu e be e šupile tabeng ya “xo roxaka Môya” ka boomo le ka boithatelo. Ga go na tebalelo bakeng sa sebe sa mohuta wo. O okeditše ka gore: “Lebakeng leno le lebakeng le le tl’o xo tla.” (Mateo 12:31, 32) Bao ba nago le molato wa sebe se bjalo ba ka se ke ba tsošwa.

Go rogaka moya ke’ng? Go tšwa pelong gomme go utolla boemo bjo bobe bja kgopolo gotee le maikemišetšo a mabe. Boikemišetšo bja ka boomo bja go ganetša moya o mokgethwa wa Modimo bo dira gore sebe e be se sešoro kudu. Ka mohlala: Dikarolong tše dingwe tša lefase, molao o dira phapano magareng ga polao ka tekanyo ya pele le polao ka tekanyo ya bobedi motheong wa morero wa polao le tsela yeo e dirilwego ka gona, gomme o dira gore kotlo  ya lehu e šome feela polaong ya ka boomo le yeo e rerilwego e sa le pele.

Moapostola Paulo e kile ya ba morogaki, eupša o itše: “Ke xauxetšwe ka xobane dilô tšeo ke di dirile kè sa tsebe.” (1 Timotheo 1:13) Go dira sebe malebana le moya o mokgethwa ke go o ganetša ka boomo. Go akaretša boemo bja pelo bjo kgopo bjoo bo fihlago ntlheng ya go se sa kgona go boela morago.

Go molaleng gore Paulo o be a šupile dibeng tša mohuta wo ge a be a ngwala gore: “Xobane bao ba šetšexo ba kile ba bônêxêlwa ba kwa bose bya neô ya lexodimong, ba ba kilexo ba fiwa kabêlô ya Môya o mokxêthwa, ba kwa monate wa Lentšu le botse la Modimo, le matla a mehla e tl’o xo tla, xe bôná ba ka hlanoxa, xo ba mphsafatša xapê le xo ba iša thsokoloxong xo ka se kxônêxe, ka xobane ba boetše ba ipapolêla Morwa wa Modimo [koteng ya tlhokofatšo, NW], ba mo nyatšiša.” (Ba-Hebere 6:4-6) Le gona, moapostola o itše: “Xobane xe re senya ka boomo xe re šetše re filwe xo tseba therešô, xôna xa xo sa na sedimo sa xo hlatswa sebe seo.” (Mongwalo o sekamego ke wa rena.)—Ba-Hebere 10:26.

E be e le boitshwaro bja baetapele ba bangwe ba bodumedi ba mehleng ya gagwe bjoo bo ilego bja hlohleletša Jesu gore a lemoše malebana le sebe se se sa lebalelwego. Eupša ga se ba ka ba kwa temošo ya gagwe. Ge e le gabotse, ba ile ba mmolaya. Ka morago, ba ile ba kwa bohlatse bjo bo sa ganetšegego bja gore moya o mokgethwa o be o dirile selo se sengwe se se makatšago. Ba be ba boditšwe gore Jesu o be a tsošitšwe bahung! Go be go le molaleng gore Jesu e be e le Kriste! Lega go le bjalo, ba ile ba ganetša moya o mokgethwa ka tsela e kgopo ka go lefa madira a Roma gore a bolele maaka ka tsogo ya Jesu.—Mateo 28:11-15.

Temošo go Bakriste ba Therešo

Ke ka baka la’ng Bakriste ba therešo ba ela hloko kudu temošo ya mabapi le sebe seo se sa lebalelwego? Ka gobane, gaešita le ge re e-na le tsebo e nepagetšego ya Modimo le moya wa gagwe, re ka ba le pelo e kgopo. (Ba-Hebere 3:12) Re swanetše go hlokomela gore re se nagane gore se le ka mohla se ka se direge go rena. Ela hloko mohlala wa Judase Isikariote. Ka nako e nngwe o ile a ba molatedi yo a botegago wa Jesu. O be a kgethilwe e le yo mongwe wa baapostola ba 12, ka baka leo o swanetše go ba a be a e-na le dika tše dibotse. Eupša lebakeng le lengwe o ile a thoma go dumelela dikgopolo le dikganyogo tše mpe di gola gomme mafelelong tša mo laola. Nakong ya ge e be e le hlatse e bonego ka mahlo ya mehlolo e makatšago ya Jesu, o be a dutše a utswa tšhelete. Ka morago, o ile a eka Morwa wa Modimo ka boomo ka baka la tšhelete.

Batho ba bangwe bao e kilego ya ba Bakriste ba botegago, ba ile ba furalela Modimo ka boomo, mohlomongwe ka baka la sekgopi, boikgogomošo goba megabaru gomme mo nakong ye ke bahlanogi bao ba lwantšhanago le moya wa Modimo. Ba ganetša ka boomo seo go lego molaleng gore se phethwa ke moya. Na batho ba ba dirile sebe seo se sa lebalelwego? Jehofa ke Moahlodi wa mafelelo.—Ba-Roma 14:12.

Go e na le go ahlola ba bangwe, re dira gabotse ge rena ka noši re itiša malebana le go dira dibe tša ka sephiring tšeo ganyenyane-ganyenyane di ka retetšago dipelo tša rena. (Ba-Efeso 4:30) Le gona, re homotšwa ke go tseba gore Jehofa o tla re lebalela ka tekanyo e kgolo gaešita le dibe tše dikgolo tšeo re di dirilego ge e ba re itshola.—Jesaya 1:18, 19.

[Seswantšho go letlakala 18, 19]

Bafarisei ba bangwe ba ile ba dira sebe seo se sa lebalelwego