O Swanetše go Robala ka mo go Lekanego!

Na go na le motho yo a ka ganetšanago le polelo ya gore go robala ka mo go lekanego ke lebaka la motheo bakeng sa go dula o phetše gabotse mmeleng? Mohlomongwe ga a gona. Lega go le bjalo, go ba bantši ke selo seo e sego sa bohlokwa kudu. Shawn Currie yo e lego setsebi sa tša monagano le mothuša-moprofesara Yunibesithing ya Calgary kua Canada o re: “O kwa mafelelo a seo letšatšing le le latelago.” Ge o sa robale ka mo go lekanego, go ka direga gore o be yo a selekegago kudu gaešita le go ba yo a gateletšegago ka dinako tše dingwe.

Kuranta ya Calgary Herald e re: “Bo-rathutamahlale ba akanya gore go robala go na le matla a go mpshafatša bjoko le gore go ithuta go tšwela pele nakong ya ge motho a robetše.” Moprofesara Currie o re: “Bošego motho o nagana kudu ka dilo tšeo di lego monaganong gomme dilo le ge e le dife tšeo a ithutilego tšona mosegare di beakanywa gabotse bošego. Ge e le gabotse, go se be le nako yeo ya go ikhutša go fokodiša tsela ya go ithuta.” Go oketša moo, o bolela gore “ge o robala ka mo go lekanego, mohlomongwe seo se thuša ka tsela e itšego go tsepamiša maikwelo a gago.”

Ka gona, go robala ka mo go lekanego ke go robala nako e kaaka’ng? Gaešita le ge ditsebi tše dintši di bolela gore bonyenyane e be diiri tše seswai, Currie o re: “Batho ga ba robale ka go lekana.” Ka baka leo, o šišinya gore motho a leke go robala boroko. Eupša se se ka fihlelelwa bjang, kudu-kudu go bao ba hlobaelago? Ditšhišinyo tše dingwe ke tše:

▪ Hlapa ka meetse a borutho pele ga ge o ka ya malaong.

▪ Itšhidulle ka tsela e leka-lekanego ka makga a mmalwa bekeng; eupša o se ke wa itšhidulla ka matla pele o e-ya malaong.

▪ Boloka phapoši ya gago e homotše, e le lefsifsi e bile e fodile.

▪ Leka go tsoga ka nako e swanago mesong e mengwe le e mengwe bakeng sa go dira gore o be le mokgwa wa ka mehla le o swanago wa go robala.

Ka baka la mehola yeo e lemogegago ya tša maphelo, e-ba yo bohlale gomme o lebelele go robala e le selo sa bohlokwa kudu.