Tutuetšo e Matla ya go Myemyela

GAEŠITA le ge go tšea lebakanyana feela, o ka dula o go gopola bophelo bja gago ka moka. Bohlokwa bja go myemyela ke bjo bogolo kudu, eupša ga go na motho yo a diilago kudu mo e lego gore a ka palelwa ke go go bontšha goba yo a humilego kudu mo e lego gore ga a go nyake. Re bolela ka eng? Go myemyela.

Go myemyela go tšweletšwa ke ge dinama di ngangega moo mahlo a bontšhago phadimo gomme mahlakore a molomo a sekama ganyenyane bakeng sa go bontšha kgotsofalo. Dibekeng tše sego kae tša pele ka morago ga go belegwa, lesea le a myemyela gomme se se tloga se thabiša batswadi ba lona bao ba sa tšwago go le hwetša. Go myemyela mo ga pele go tsebja e le go myemyela mo go itiragalelago feela. Ditsebi di hlalosa gore mohuta wo wa go myemyela gantši o tšwelela nakong ya ge motho a lora gomme o bonala o tswalana le maikwelo a ka gare le tsela yeo tshepedišo ya motheo ya dikwi e šomago ka yona. Gaešita le ge re šetše re godile, go myemyela mo moo go itiragalelago feela go sa dutše go ka bonagala ka morago ga dijo goba ge re theeditše mmino.

Lega go le bjalo, nakong ya ge lesea le e-na le dibeke tše ka bago tše tshela, le a myemyela ge le lebane le sefahlego sa motho goba le e-kwa lentšu. Go ‘myemyela ka tsela ya bogwera’—go myemyela ka go rata—go a re thabiša, go sa šetšwe gore re bana goba batho ba bagolo. Go thwe go myemyela mo go bjalo go bile go na le tutuetšo e botse bophelong bja rena bjo bobotse bja mmele. Go ya ka ditsebi tša tša polelo, e lego Mirtha Manno le Rubén Delauro bao ba sepedišago kliniki yeo go yona batho ba rutwago go itlhokomela ye e bitšwago Smiling and Health (Go Myemyela le Bophelo bjo Bobotse bja Mmele), go fo myemyela go tšweletša sehlohleletši seo se kgomago thaka ya pituitary. Ka morago, thaka ye e tšweletša di-endorphin, e lego dikhemikhale tšeo di lego bjokong tše di dirago gore re ikwe re thabile.

Lebaka le lengwe la bohlokwa bakeng sa go myemyela ke tsela yeo go kgomago ba bangwe ka mo go kgahlišago ka gona. Go myemyela mo go tšwago pelong go hlalosa maikwelo a rena ka ntle le go diriša mantšu, go sa šetšwe gore ke go myemyela ka tsela ya go dumediša, ya go kwela bohloko goba ya go kgothatša. Ka dinako tše dingwe, go fo lebelela go myemyela mo go gogelago ga ngwana seswantšhong go ka dira gore le rena re myemyele.

Ge motho yo mongwe a re myemyelela ka tsela e borutho, seo se ka re thuša gore re ikwe re lokologile le go swaragana gakaone le go ferekana goba ditlhohlo. Beibele e kgothatša ka gore: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.” (Diema 3:27) Ee, ka go myemyela mo go bonolo, re ka ikhola gotee le go hola ba bangwe. Ke ka baka la’ng o sa dire boiteko bja go abelana le ba bangwe mpho ye e bohlokwa kudu—e lego go myemyela ka tsela e borutho?