Go Atlega Gare ga Mathata

Go etša ge go boletšwe e sa le pele ka Beibeleng, re phela “[dinakong] tše hlobaetšago tšeo go lego thata go lebeletšana le tšona.” (2 Timotheo 3:1, NW) Khuduego ya lapa, mathata a tša maphelo le dikgateletšo tša tša ditšhelete e fo ba a mangwe a mapheko ao a ka go tlaišago. Ka dinako tše dingwe, o ka ikwa eka o ka se kgone go kgotlelela. Lega go le bjalo, o ka atlega gare ga mathata. Ela hloko mohlala o latelago.

Letšoba la violet ya Teide le mela bophagamong bja mo e ka bago dimithara tše 3 700 sehlakahlakeng sa Tenerife ka ntle ga lebopo la Afrika Leboa. Pico de Teide, e lego ntlhora ya thaba-mollo yeo letšoba le reeletšwego ka yona, e phagametše sehlakahlaka sa kgaufsi le molatšatši. Meboto ya sona ya ka godimo e bonagala e se na dimela. Eupša ka seruthwane, lehlwa la marega le le tologago le nea meetse a lekanego go dumelela matšoba a violet ao a nago le kgotlelelo go hloga le go kgabiša meboto ya ka godimo ya thaba-mollo ka mokgabišo wa matšoba a maphepholo. Ee, letšoba le le ka bonagala le fokola e bile le le boleta, eupša le kgona go phela le go atlega tikologong ye ya lekwala le ye e sa kgahlišego kudu.

Go swana le letšoba la violet ya Teide, le wena o ka kgotlelela gare ga maemo a thata. Beibele e thušitše Dihlatse tša Jehofa tše dintši go dira bjalo gaešita le dinakong tše thata kudu. Ka mohlala, tšeo di bego di golegilwe dikampeng tša tshwenyo kua Jeremane ya Bonazi di ile tša kgona go atlega. Raditaba wa mo-Sweden Björn Hallström o re: “Di be di swarwa gampe kudu go feta sehlopha le ge e le sefe se sengwe, eupša ka baka la go dumela ga tšona go Modimo di ile tša kgona go kgotlelela go feta ba bangwe le ge e le bafe.”

Boemong le ge e le bofe bjo o ikhwetšago o le go bjona, Beibele e ka go thuša gore o atlege gare ga mathata. Ikgokaganye le Dihlatse tša Jehofa tikologong ya geno goba o ngwalele atereseng e lego go letlakala 5 la makasine wo bakeng sa thuto e sa lefelelwego ya legae ya Beibele.