Go Tsena Lefaseng Leo le Tonyago!

LESEA le belegelwa lefaseng le šoro, le tonyago le le tletšego kgateletšego. Gaešita le ge lesea le ka se kgone go bolela maikwelo a lona e le ka kgonthe, bo-rathutamahlale ba bangwe ba dumela gore gaešita le pele ga pelego, lesea leo le sa lego ka popelong le lemoga seo se diregago.

Puku ya The Secret Life of the Unborn Child e re: “Ga bjale re a tseba gore lesea leo le sa hlwago le belegwa ke motho yo a lemogago, yo a arabelago yoo go tloga lebakeng la dikgwedi tše tshela ka morago ga go ingwa go ya pele (mohlomongwe le pele ga moo) a phelago bophelo bja go kgomega maikwelong.” Gaešita le ge ngwana a ka no se gopole, bo-rathutamahlale ba bangwe ba ipotšiša ge e ba phihlelo e gateletšago ya go belegwa e sa kgome bophelo bja ngwana ka morago.

Ka morago ga go belegwa, kgateletšego e tšwela pele. Ge le le ka ntle ga popelo ya mma, lesea ga le sa hlwa le fepša ka tsela ya go itiragalela go etša ge le be le le ka popelong. Kalana ya mokhubo yeo e bego e rwala oksitšene le dijo ga e sa le gona. Gore le tšwele pele le phela, lesea le swanetše go thoma go hema le go ja dijo ka bolona. Le nyaka motho yo a ka le lešago le go hlokomela tše dingwe tša dinyakwa tša lona tša nama.

Lesea leo le sa tšwago go belegwa le swanetše gore gape le gole monaganong, maikwelong le moyeng. Ka baka leo, motho yo a itšego o swanetše go hlokomela lesea. Ke mang yo a lego boemong bjo bokaone bja go dira seo? Ngwana o nyaka eng go batswadi ba gagwe? Dinyakwa tše di ka kgotsofatšwa bjang gakaone kudu? Dihlogo tše di latelago di tla thuša go araba dipotšišo tše.