Kamoo o ka Tsebago Modimo ka Leina

MONGWADI wa kuranta o ile a hwetša lengwalo le le latelago go tšwa go mmadi le le rego: “Ke katane bophelo bja-ka ka moka le potšišo ye, gomme ke holofela gore o tla e araba. Leina la Modimo ke mang? Ba-Juda ba bolela gore leina la kgonthe le ile la lahlega kgale. Bakriste ba Mmitša Jesu. Mamoseleme a Mmitša Allah. . . . Bjale-ge, leina la Modimo  ke mang?” Kuranta e ile ya gatiša potšišo gotee le karabo ye e rego: “Go ya ka dithuto tša bogologolo tša Sehebere, Modimo ke yo matla-ohle, ka gona A ka se bitšwe ka leina le ge e le lefe le tee. Lega go le bjalo, ke go kgonthišetša gore O tla arabela leineng le ge e le lefe leo ka tlhompho o ka mmitšago ka lona.”

Lehono go tšea leina la Modimo ka tsela e bohwefo gakaalo ke selo se se tlwaelegilego. Gaešita le ge batho ba bantši ba sekametše bodumeding, bontši bja bao ba dumelago Beibele ga ba nagane kudu ka taba ya leina la Modimo. Eupša Modimo o ikwa bjang ka yona? Na ke taba e nyenyane gakaalo go yena?

Ga se Taba e Nyenyane

Ela hloko ntlha ya gore Beibele e bolela leina la Modimo leo le mo hlaolago, e lego Jehofa, ka makga a dikete. Ka go New World Translation of the Holy Scriptures, leina la Modimo le tšwelela ka makga a 7 210! * Ke Modimo ka noši yo a ilego a budulela bangwadi ba Beibele gore ba diriše leina la gagwe ka tsela e kgethegilego gakaalo. Yo mongwe wa bangwadi ba e lego mopsalme Asafa, o ile a ngwala gore: “Ba tsebe gobane ke wena o nnoši, o bitšwago Jehofa, Yo godimo-dimo, godimo ga lefase ka moka.” (Psalme 83:18 [83:19, PK]) Dafida le yena o ile a ngwala ka go psalme a re: “Ge e le rena re itumiša ka leina la Jehofa, Modimo wa rena.”—Psalme 20:7 [20:8, PK].

Beibele e bontšha gore Jehofa Modimo o hlahloba dipelo tša rena go bona gore re ikwa bjang ka leina la gagwe. Mopsalme o itše: “Mola re kabe  re lebetše ’ina la Modim’a rena, . . . xôna Wene Modimo, O kabe O sa šitwe ke tše byalo; ešita le dithopa tša dipelo O a di tseba.” (Psalme 44:20, 21) Moporofeta Jesaya o ngwadile gore: “Lebogang Jehofa; bitšang leina la gagwe, begang ditiro tša gagwe gare ga ditšhaba! Bolelang, le re: Leina la gagwe ke le le phagamilego!”—Jesaya 12:4, PK.

Modimo ka boyena o itše: “Gore ba tsebe leina la ka ga ke le Jehofa.” (Jeremia 16:21, PK) Lebakeng le lengwe o ile a tsebatša gore: “Ke tlo kgetha leina la ka le legolo le le gobošitšwego ditšhabeng, . . . baditšhaba ba tsebe gobane ke Nna Jehofa.” (Hesekiele 36:23, PK) A mangwe a mantšu a a boletšwego a šupa nakong yeo Jehofa a tlago go galefela bao ba nyatšago leina la gagwe. Taba ya leina la Modimo le le mo hlaolago ga se taba e nyenyane go yena.

Jehofa Modimo ga a Kgole le Wena

Ke bjang o ka tsebago Modimo ka leina la gagwe? Go bolela’ng go tseba Modimo ka leina? Beibele e araba ka gore: “Ba ba tsebaxo leina la xaxo ba Xo holofetše.” (Psalme 9:10) Go molaleng gore go tseba Modimo ka leina go akaretša go feta go fo tseba gore leina la gagwe ke mang. O swanetše go mmota. Seo se bolela go tseba gore ke Modimo wa mohuta mang le go ithuta ka dika tša gagwe le ka dikgopolo tša gagwe. Se se tla go tutueletša go mmota.

Ke feela ka go bala le ka go ithuta Beibele ka šedi o ka lemogago gore Jehofa ke Modimo wa mohuta mang. O holofetša go šireletša bao ba ratago yena gotee le leina la gagwe. Mabapi le yoo a dirago bjalo, Modimo o re: “Ke tlo mo phološa ka xobane a nkxomaretše. Ke tlo mo khutiša xobane ó tseba ’ina la-ka. O tlo mpitša ’me Nna ke tlo mo kwa, ka ba le yêna tlalelong; ke tlo mo namola ’me ka mo xodiša. Ke tlo mo horiša boati bya matšatši, a tlo thaba xe ke mmonthša xo phološa xa-ka.”—Psalme 91:14-16.

A tswalano e botse gakaakang yeo Jehofa Modimo a nago le yona le bao ba mo tsebago ka leina! Le wena ka mo go swanago o ka thabela tswalano e bjalo. Ge o rapela go tšwa pelong, le ka mohla o se ke wa dika-dika go mmitša ka leina. O tla go araba, ka gobane go etša ge Beibele e bolela, “xa a kxolê, ó kxaufsi le e mongwê le e mongwê wa ba re lexo fá.”—Ditiro 17:27.

[Mongwalo wa ka tlase]

[Lepokisi/Seswantšho go letlakala 11]

Modimo o go Tseba ka Leina

Modimo o ile a botša Moše gore: “Ke Xo tseba ka leina.” (Ekisodo 33:12) Pego e tsebjago gabotse ya sethokgwa se se tukago e hlatsela se. Beibele e bolela gore Modimo “a mmitša, yêna Modimo a le sethokxweng seo sa meetlwa, a re: Mošê! Mošê!” (Ekisodo 3:4) Wo e fo ba mohlala o mongwe wa ditiragalo tše dintši tša ge Modimo a be a bitša batho ka maina a bona. Go molaleng gore Mmopi wa legohle o na le kgahlego ka rena re le motho ka o tee ka o tee.

Beibele e bolela gore Modimo o tseba naledi e nngwe le e nngwe ya dinaledi tše dimilione tše dikete ka leina. (Jesaya 40:26) Ruri o swanetše go ba a hlokomela kudu gakaakang batho bao ba mo rapelago! Moapostola Paulo o ngwadile gore “Jehofa o tseba ba gagwe.” (2 Timotheo 2:19, NW) Se se šupa tabeng e fetago go swara maina ka hlogo. Modimo o tseba barapedi ba gagwe ka mo go tseneletšego. Le rena re swanetše go tseba Modimo ka leina gomme re be le tsebo e tseneletšego ka dika tša gagwe.

Puku ya mafelelo ya Beibele e hlalosa puku ya seswantšhetšo yeo ka go yona Modimo a ngwalago maina a bohle bao ba mo rapetšego historing ka moka. Puku ye e bitšwa ‘puku ya bophelo’ ka gobane Jehofa Modimo o tla nea bao maina a bona a ngwadilwego ka go yona bophelo bjo bo sa felego. (Kutollo 17:8) Ye ke tebelelo e botse go bao ba tsebago Modimo ka leina.

[Lepokisi/Seswantšho go letlakala 12]

Ba Tsebaditše Leina la Modimo

● Sefela sa Moše sa pele ga ge ba-Isiraele ba ka tsena Nageng ya Kholofetšo: “Ke tlo bitša leina la Jehofa.”—Doiteronomio 32:3, PK.

● Mantšu a Dafida go Goliata wa senatla: “Ke tla go wena ka Jehofa Tsebaothe.”—1 Samuele 17:45, PK.

● Mantšu a Jobo ka morago ga go lahlegelwa ke dithoto tša gagwe tšohle le lehu leo le sa letelwago la bana ba gagwe: “Leina la Jehofa le lebogwe!”—Jobo 1:21, PK.

● Ge Moapostola Petro a be a tsopola Mangwalo a Sehebere polelong: “Yo mongwe le yo mongwe yo a bitšago leina la Jehofa o tlo phološwa.”—Ditiro 2:21, NW.

● Moporofeta Jesaya: “Lebogang Jehofa; bitšang leina la gagwe, begang ditiro tša gagwe gare ga ditšhaba! Bolelang, le re: Leina la gagwe ke le le phagamilego!”—Jesaya 12:4, PK.

● Jesu Kriste a ruta barutiwa ba gagwe go rapela: “Lena, xe Le rapêla, Le re: Tata-wešo wa maxodimong! Leina la xaxo a le kxêthwê.”—Mateo 6:9, 10.

● Ge Jesu Kriste a be a rapela Modimo: “Ke tsebaditše ’ina l’axo.”—Johane 17:6.

● Ge Modimo a be a bolela le batho ba gagwe: “Ke Nna Jehofa, ke lona leina la ka, nka se ke ka neela yo mongwe kgodišo ya ka.”—Jesaya 42:8, PK.