“Go Tsoma ga Batho Modimo”

Kuranta ya Mexico City ya September 25, 2002, yeo e bitšwago Excelsior, e ile ya gatiša taba yeo e nago le sehlogo se se lego ka mo godimo. E be e ngwadilwe ke Carlo Coccioli, e lego seithuti seo se tsebegago kudu le mongwadi kua Mexico. Sehlogo sa gagwe se ile sa bula ka mantšu a latelago.

“Ke sa tšwa go fetša go bala—goba e re ke re go bala leboelela goba ke e bee gabotse ka mo go kwagalago, go bala ka makga a mantši—puku e khwibidu e nyenyane yeo e sa tlwaelegago—e sego yeo e bego e tumile nakong ya Mao Tse-tung. Puku ye [Go Tsoma ga Batho Modimo *] ga se feela puku yeo e sa tlwaelegago kudu eupša go fapana le ‘Puku e Khwibidu e Nyenyane’ ya Mao Tse-tung yeo e ilego ya felelwa ke nako ge nako e dutše e e-ya, go ka direga gore e ka se ke ya hwelela. Puku ye ge go bolelwa ka tsela e bonolo, ke mpho e tšwago go Dihlatse tša Jehofa e yago lefaseng. Ge e bapetšwa le dipuku tše dintši, ke e nyenyane eupša taba-kgolo ya yona ke ye e kgahlišago ka mo go sa lekanywego. E ka lekana ka potleng eupša ge e be e ka hwetšwa bokgobapukung bjo bo nago le dipuku tše 90 000 tše fapanego, mohlomongwe e be e tla ba yona e bohlokwa kudu go di feta ka moka.”

Mna. Coccioli o ile a tšwela pele go hlalosa ka nako ya ge e be e sa le yo mofsa ge a be a dira phetho mabapi le mošomo wo a bego a tla o phegelela. O hlalositše gore: “Mošomo wo ke o kgethilego woo ke ithutetšego wona dithutong tša-ka tša yunibesithi o be o sepedišana le seo se bego se gogela monagano wa-ka le go kgahliša moya wa-ka, e lego: madumedi, kudu-kudu a ka Bohlabela.” O boletše gore o be a kgahlišwa ke go ithuta ka madumedi le gore nakong ya Ntwa ya II ya Lefase, o ile a hwetša lengwalo la thuto la bongaka (doctorate) dithutong tšeo di sepedišanago le bodumedi.

O hlalosa gore: “Ka gona, ke ikwa ke swanelega gabotse go bolela gore puku e khwibidu e nyenyane yeo ke ilego ka e amogela ke modiro o mogolo wo o bontšhago bohlale le o bohlokwa tabeng ya dilo tše di makatšago tša bodumedi. . . . [Puku ye] e swanetše go ba gona ka lapeng le lengwe le le lengwe e le gore e bulwe, e balwe le go balwa leboelela nako le nako. Ga e na diphatlalatšo tša bodumedi le ge e le bofe eupša go e na le moo, ke modiro o bohlokwa wa bohlale bja motho yo moya wa gagwe o sekametšego go nyakišišeng dilo tše di raraganego tša Modimo.”

Mafelelong a sehlogo sa gagwe, Mna. Coccioli o ile a ngwala dinomoro tša mogala tša Hlatse yeo e mo neilego puku. Ga e sa le go tloga ka nako yeo, Hlatse e ile ya amogela megala e mentši ya batho bao ba kgopelago puku ye, ka gona ofisi ya lekala ya Dihlatse tša Jehofa kua Mexico e ile ya kgonthišetša gore ka moka bao ba bontšhitšego kgahlego pukung ya Go Tsoma ga Batho Modimo ba hweditše kopi. Motho yo mongwe yo a kgopetšego dipuku tše 20 bakeng sa lapa la gagwe le bagwera ga bjale o tšwela pele gabotse thutong ya gagwe ya Beibele.

[Mongwalo wa ka tlase]